Read Navajo II KINGS 7 Bible Online

II KINGS 7 - Navajo bible

II KINGS 7

¹Nidi Iiláísha ání, Bóhólníihii haadzí'ígíí yíísíníłts'ą́ą́'; Bóhólníihii kóní, Yiską́ągo kóhoodzaago Samériya kin haal'áii bidáń'dítį́hígi ak'áán ashdladiin dah hidédlo' bíighahgo t'ááłá'í shékel wolyéii bą́ą́h ílį́įgo áádóó tł'oh naadą́ą́' bidee'í éí neeznádiin dah hidédlo' bíighahgo t'ááłá'í shékel wolyéii bą́ą́h ílį́įgo nahaniih doo.

²Áko aláahgo naat'áanii jílíinii t'áá hó há naal'a'í bigaan jótą'ii éí Diyin God yá naal'a'í yich'į' haadzíi'go ání, Azhą́ Bóhólníihii éí yá'ąąsh ąą áyiilaa nidi, da' éísh ákóhodoonííł? Áádóó Iiláísha ání, Shoo, t'áá ni yidííłtsééł, nidi doo ła' dííyį́įł da.

³Nít'éé' diné éí łóód ats'íís yiyáanii naałdzidii bąąh dahólónígíí yah a'atiingi naháaztą́, áko áda'ahidi'níigo, Ha'át'íí lá biniyé t'áá daats'í kǫ́ǫ́ dadíníi'néełgo nahísíitą́?

⁴Kin haal'áá góne' yah adiikah, dadii'niid ládą́ą́', nidi kin haal'áá góne' hodichin, áko t'áá ákwii dadíníi'nééł; t'áá kǫ́ǫ́ naháatą́ągo ałdó' dadíníi'nééł. Éí bąą k'ad, tį', bíni'dii Síriya dine'é dah yinéełii bich'į' diikah, yisdádanihiznil ládą́ą́' dahinii'náa doo; nidanihiłtseed ládą́ą́' danee'náa doo.

⁵Áádóó hiłiijį́į'go nidzíiztánídóó dashdiikaigo Síriya dine'é dah deínéhígóó jíkai, áko Síriya dine'é dah deínéhíjį' jíkaigo, shoo, diné doo ła' ákwii naagháa da.

⁶Háálá Bóhólníihii éí Síriya dine'é dah deínéhígíí éí tsindaabąąs bijáád naakiígíí áádóó łį́į́' t'áá éí ayóó át'éego oonééł yiits'a'ígi át'éego dazdiizts'ą́ą'go áhoolaa, áádóó áda'ahidoo'niid, Jó, Ízrel dine'é aláahgo binanit'a'í éí Het dine'é aláahgo bindanit'a'í áádóó Ííjip dine'é aláahgo bindanit'a'í nihik'iidoojah biniyé yich'į' ni'iizla' lá.

⁷Éí bąą hiłiijį́į'go dah dazhdíníichą́ą'go yisdázhdookah biniyé haníbaal áádóó dahalį́į́' índa dahatélii t'áá dahooghan nít'éé' bik'i dahizhneezhchą́ą́'.

⁸Áko díí diné éí łóód ats'íís yiyáanii naałdzidii bąąh dahólónígíí dah da'ínééh nít'éé' yę́ęgi jíkaigo níbaal ła' biyi' góne' yah ajookaigo da'jííyą́ą́' áádóó da'joodlą́ą́' índa béésh łigaii áádóó óola índa éé' dah deidiijaa'go nídeidees'į́į́'; áádę́ę́' nínáánákaigo níbaal ła' yiih náánáákai áádóó ła' ch'ínáádeizyį́įgo nídeidees'į́į́'.

⁹Nít'éé' áda'ahidoo'niid, Doo yá'át'ééhgóó ádeiit'į́. Díí jį́ hane' yá'át'éehii baa hoolzhiizh; hoos'įįdjį' t'áadoo baa dahwiilne' ládą́ą́' doo yá'áshóonii nihik'i hwiidooleeł; éí bąą k'ad, tį', aláahgo naat'áanii bighandóóígíí ła' bił dahodiilnih.

¹⁰Áko kin haal'áii bich'į' yah a'a'tiingi yíkai; ákwii yaa ádahalyánígíí yéego bich'į' ádazhdííniidgo ádajiní, Síriya dine'é dah deínéehgi niikai nít'éé', shoo, doo nidaagháhí da, doo nidi diné biinéé' ła' diits'a' da, łį́į́' áádóó télii dah dahaastł'ǫ́, níbaal ałdó' t'áá bíni' naaznil.

¹¹Áádóó ch'é'étiin yaa ádahalyánígíí ałch'į' hadadeeshghaazh, áádóó aláahgo naat'áanii bighan góne' yaa dahoolne'.

¹²Nít'éé' aláahgo naat'áanii t'áá tł'éé' nídii'na'go bá nidaal'a'í ííłní, Síriya dine'é bisiláo dah deínéehii nihiniyé hasht'edadiidzaaígíí bee nihił hashne'. Dichin nihi'niighą́'ígíí bił béédahózin; éí bąą dah yinéłídóó haní'ąągóó aheezhjée'go nídadeest'į́į́', áko kin haal'áádę́ę́' ch'íjiizhjée'go t'áá dajiináago hoł nidahidiidił danihó'ní áádóó kin haal'áá góne' yah adiijah, daaníigo ádanihił'į́.

¹³Nít'éé' bá nidaal'a'í ła' haadzíi'go ání, Jó, Ízrel dine'é lą'í ádaasdįįdígi át'éego kwe'é daadziihígíí ałdó' ádadoodįįłgo nihił béédahózin. Áko haa'íshą' diné ła' łį́į́' daadziihígíí bitahdóó ashdla'go nídeididooniłgo ákǫ́ǫ́ łį́į́' yee dadookahgo díí baa hane'ígíí nihił béédahodoozįįł.

¹⁴Aláahgo naat'áanii éí Síriya dine'é bisiláo bikéé' dahodiił'a'go ání, Nílááh, hádasídóo'į́į́', áko łį́į́' éí tsindaabąąs bijáád naakiígíí naaki t'áá ał'ąą yoołbąsgo dashdiikai.

¹⁵Áádóó Jórdan toohgóó bikéé' jíkai; ákǫ́ǫ́ Síriya dine'é tsį́įłgo danéechéehgo éé' áádóó ásaa' adayiistł'íidgo adíítąąd lá. Áádę́ę́' hane' nídadziz'ą́ągo aláahgo naat'áanii bił dahojoolne'.

¹⁶Nít'éé' Ízrel dine'é ch'éheeskaigo Síriya dine'é bisiláo dabiníbaal biyi'dóó bindaalye'é nídajiizláá'. Áko Bóhólníihii ádííniidígíí bik'ehgo ak'áán ashdladiin dah hidédlo' bíighahgo t'ááłá'í shékel wolyéii bą́ą́h ílį́įgo áádóó tł'oh naadą́ą́' bidee'í éí neeznádiin dah hidédlo' bíighahgo t'ááłá'í shékel wolyéii bą́ą́h ílį́įgo nahaniih nít'éé'.

¹⁷Íídą́ą́' aláahgo naat'áanii jílíinii t'áá hó há naal'a'í bigaan jótą'ii éí dáń'dítį́hígi yaa áhályą́ą doo biniyé nizhníłtį́, áko aláahgo naat'áanii éí Diyin God yá naal'a'í yaa níyáádą́ą́' bá naal'a'í bich'į' ha'oodzíi'ii bik'ehgo dáń'dítį́įhgi diné hak'i naaskaigo dadziztsą́.

¹⁸Háálá, Yiską́ągo kóhoodzaago Samériya kin haal'áii bidáń'dítį́hígi tł'oh naadą́ą́' bidee'í neeznádiin dah hidédlo'go t'ááłá'í shékel wolyéii bą́ą́h ílį́įgo áádóó ak'áán ashdladiin dah hidédlo' bíighahgo t'ááłá'í shékel wolyéii bą́ą́h ílį́įgo nahaniih dooleeł, Diyin God yá naal'a'í aláahgo naat'áanii yee yich'į' haadzíí' yę́ędą́ą́',

¹⁹áádóó aláahgo naat'áanii bá naal'a'í éí Diyin God yá naal'a'í yich'į' haadzíi'go ádííniid, Azhą́ Bóhólníihii éí yá'ąąsh ąą áyiilaa nidi, da' éísh ákóhodoonííł? Áádóó Iiláísha ádííniid, Shoo, t'áá ni yidííłtsééł, nidi doo ła' dííyį́įł da.

²⁰Ákót'éego bee há ha'oodzí'ígíí bohoolyaa, háálá dáń'dítį́įhgi diné hak'i naaskaigo dadziztsą́.