Read Navajo II KINGS 9 Bible Online

II KINGS 9 - Navajo bible

II KINGS 9

¹Nít'éé' Diyin God yá halne'ii Iiláísha éí Diyin God yá dahalne'ii bídahooł'aahii ła' hágo yidííniidgo ííłní, Ni'éé' nitsiist'ah náníyishgo díí tóshjeeh yázhí bee ak'ah yí'áałgo Réímath-gíliyadgóó dínááh,

²áko áadi yíníyáago Nímshai binálí Jiiháshafat biye' Jííhu hádidíí'įįł, áádóó yah adíínáałgo bik'isóó bitahdóó bił nídidíít'ashgo ná'áne'é góne' bił yah adíí'ash,

³áádóó tóshjeeh yázhí bee ak'ah yíní'ánígíí hadíí'áałgo bitsiit'áagi yeidííził, áko ábididííniił, Bóhólníihii kóní, Ízrel dine'é aláahgo binanit'a'í dííleeł biniyé ak'ah nik'i yaaziidgo ni'doolzį́į́'. Áko dáádílkał ąą didíítį́įłgo t'áadoo na'ahodílziidí dah didíílwoł.

⁴Áko dinééh t'áá éí Diyin God yá halne'ii nilíinii Réímath-gíliyadgóó ííyá.

⁵Áádóó áadi jiníyáago siláo dah deínéehii binanit'a'í danilíinii naháaztą́; áádóó ání, Siláo binanit'a'í nílíinii, hane' naa ní'ą́. Jííhu ání, Háí lá ábidiní? Áko ábijiní, Ni ándishní, siláo binanit'a'í nílíinii.

⁶Áádóó nízhdii'na'go kin góne' bił yah ajíí'áazhgo éí dinééh ak'ah bitsiit'áagi yadziiziid, áko ábijiní, Bóhólníihii Ízrel biDiyin God kóní, Bóhólníihii bidine'é Ízrel dine'é aláahgo binanit'a'í dííleeł biniyé ak'ah nik'i yaaziidgo ni'doolzį́į́'.

⁷Áko asdzání Jézebel éí shá nidaal'a'í áádóó shá dahalne'ii neistseedgo bidił dadeezna'ígíí t'áá ałtso bá k'éédideeshnííł biniyé ninanit'a'í Éíhab bik'éí danilíinii t'áá ałtso nidííłtsxił.

⁸Jó, Éíhab bik'éí náás da'ahílchíihii t'áá ałtso ádoodįįł; éí diné danilínígíí naalte' danilíinii índa doo naalte' danilíinii t'áá ałtso Ízrel kéyahgi dahojílónígíí áhodeeshdįįł:

⁹Nííbat biye' Jerobówam náás da'ahílchíihii áádóó Aháíjah biye' Béíyasha náás da'ahílchíihii ádaasdįįdígi át'éego Éíhab bik'éí náás da'ahílchíihii ałtso áhodeeshdįįł.

¹⁰Jézriyel kéyahdi Jézebel éí łééchąą'í dabidoolghałgo doo ła' yóó'ahodoolíił da. Áko ąązhdinítą́ągo dashdiilwod.

¹¹Jííhu hananit'a'í bá nidaal'a'í bich'į' ch'éédzídzáago ła' áháłní, T'áásh ałtso yá'át'ééh? Ha'át'íísh biniyé díí t'óó diigisii naa níyá? Áko ábijiní, Díí diné áádóó yáłti'ígíí bee béédahonohsin.

¹²Áádóó ádaaní, T'óó ádíní; t'áá k'ad nihił hólne'. Áko Jííhu ání, Jó, kót'éego shich'į' haadzíi'go ání, Bóhólníihii kóní, Ízrel dine'é aláahgo binanit'a'í dííleeł biniyé ak'ah nik'i yaadziidgo níísį́į́'.

¹³Nít'éé' tsį́įłgo t'ááłá'í jinítínígo akáa'gi daha'é'ígíí bikáá' hááda'aldáhí góde bá nidadziskaadgo yikáá'dóó niníyá áádóó deenásts'aa' bidee' bee í'dílzoołgo bee ádazhdííniidgo ádajiní, Jííhu éí aláahgo naat'áanii nilį́.

¹⁴Ákót'éego Nímshai binálí Jiiháshafat biye' Jííhu éí Jóram yik'ijį' hodeez'ą́. (Íídą́ą́' Jóram éí Ízrel dine'é t'áá ałtso yił Síriya dine'é aláahgo binanit'a'í Házeiyel biniinaa Réímath-gíliyad kin haal'áagi hééshjéé' nít'éé'.

¹⁵Nidi aláahgo naat'áanii Jóram éí Síriya dine'é aláahgo binanit'a'í Házeiyel yik'ijį' naabaahgo Síriya dine'é bisiláo nabi'doolk'ęh nídoodzih biniyé Jézriyel kin haal'áajį' t'ą́ą́' nádzá.) Áko Jííhu ání, Kót'ée dooleeł danohsingo Jézriyelgi doo ła' hodoolnih da biniyé t'ááká díí kin haal'áádóó ła' ch'óoya'.

¹⁶Nít'éé' Jííhu bitsinaabąąs bijáád naakiígíí ła' bił yilwołgo Jézriyelgóó ííyá, háálá áadi Jóram sitį́. Íídą́ą́' Júdah dine'é aláahgo binanit'a'í Eihazáíyah áadi Jóram yaa níyá.

¹⁷Nít'éé' Jézriyelgi ha'ídées'į́į'ii na'alzídí bikáá'dóó sizį́įgo Jííhu yił yikahígíí haideel'į́į'go ání, Níléídę́ę́' ła' jookah. Jóram ání, Diné ła' łį́į́' bee bidááhgóó díł'áago áyididooniił, K'éésh biniyé ádaoht'į́?

¹⁸Áko diné ła' bidááhgóó łį́į́' bi ł eelwodgo ání, Aláahgo naat'áanii kóní, K'éésh biniyé wohkah? Jííhu ání, K'éésh ha'át'íí bee ádíílííł? Shikée'jigo aninááh. Áádóó ha'ídées'į́į'ii yaa ch'ééhoní'ą́ągo ání, Yidááh níyáa nidi doo t'ą́ą́' náádáał da.

¹⁹Áko naaki góne' ła' łį́į́' bee anáájííł'a'go yidááh níyáago ání, Aláahgo naat'áanii kóní, K'éésh biniyé wohkah? Jííhu ání, K'éésh ha'át'íí bee ádíílííł? Shikée'jigo aninááh.

²⁰Ha'ídées'į́į'ii yaa ch'éénááhoní'ą́ągo ání, T'áá yaa níyáa nidi doo t'ą́ą́' nínáánádáał da; Nímshai biye' Jííhu oołbąsígi át'éego aadę́ę́' oołbąs; jó, t'áá bizááká oołbąs.

²¹Áádóó Jóram ání, Hasht'e'ádadołnééh. Áko bitsinaabąąs bijáád naakiígíí bá hasht'edajiilaa. Nít'éé' Ízrel dine'é aláahgo binanit'a'í Jóram áádóó Júdah dine'é aláahgo binanit'a'í Eihazáíyah t'áá ał'ąą bitsinaabąąs bijáád naakiígíí yee Jííhu yidááh doo'ash biniyé dah dii'áazhgo Jézriyeldóó diné Néíbath yę́ę bidá'ák'eh nít'é'ígi yidááh ní'áázh.

²²Áádóó Jóram éí Jííhu yiyiiłtsą́ągo ání, K'éésh biniyé ánít'į́, Jííhu? Haadzíi'go ání, Nimá Jézebel be'ajił áádóó álílee k'ehgo yee hoołáałii t'ah náás deít'éehgo haash yit'éego k'é hólǫ́ǫ doo?

²³Áko Jóram éí Eihazáíyah ííłní, Eihazáíyah nílíinii, nihizéé' deest'ą́ą́ lá, níigo naa ná'ásbą́ązgo dah díníichą́ą́'.

²⁴Áádóó Jííhu t'áá ábóodziilígi yee be'ełtį́į́' niiníłts'ǫ́ǫdgo Jóram biníighah góne' yiskah, áko k'aa' hajéí biníkálnóodgo hatsinaabąąs bijáád naakiígíí bii'jį' nazhnííyęęzh.

²⁵Áko Jííhu éí bisiláo binanit'a'í Bídkar ííłní, Nídoołteehgo Jézriyel kin haal'áádóó diné Néíbath yę́ę bidá'ák'eh nít'é'íjį' ahołhan; jó, díí béénílniih: bizhé'é Éíhab yę́ę éí ni áádóó shí bikéé' iilbąsgo Bóhólníihii díí atí'doolníiłii hak'ijį' niidiní'ą́ągo ádííniid,

²⁶T'áá aaníí adą́ą́dą́ą́' Néíbath bidił áádóó biye'ké bidił yiiłtsą́ągo kwe'é haz'ánígi k'éédideeshnííł, ní Bóhólníihii. K'ad Bóhólníihii yee haadzí'ígíí bik'ehgo ni'jį' ahołhan.

²⁷Áko Júdah dine'é aláahgo binanit'a'í díí dziiłtsą́ągo dá'ák'eh kin bíighah góne' azhnííchą́ą́'. Áádóó Jííhu hakéé' dah adiiłbą́ązgo ání, Hó ałdó' dahooł kah. Áko Ger haz'ą́ą́ góde jookahgo Íbliyam kin shijaa'ígíí bíighahgi tsinaabąąs bijáád naakiígíí yii'jį' dahaskah. Áádóó Megído kin haal'áágóó azhnííchą́ą'go áadi dadziztsą́.

²⁸Áádóó há nidaal'a'í éí tsinaabąąs bijáád naakiígíí yee Jerúsalem kin haal'áágóó dah hastį́įgo dahazhé'é yę́ę yóó'ádaalyaaígi éí David yę́ę bikin haal'áhígi tséní'ootséél góne' yóó'ádahojiilaa.

²⁹Éíhab biye' Jóram nant'áago ła'ts'áadah náhááh góne' Eihazáíyah Júdah dine'é aláahgo yinanit'a'í silį́į́'.

³⁰Nít'éé' Jííhu Jézriyelgi níyáago Jézebel yaa hodiizts'ą́ą́', áko binii' yizhchíi'go índa bitsii' neizhch'ąą'go tsésǫ'dę́ę́' déez'į́į́'.

³¹Jííhu yah a'atiindę́ę́' yah ííyáago Jézebel ání, Zímrai, k'éésh bił yíníyá, binanit'a'í yiyiisxíinii nílíinii?

³²Áko Jííhu éí tsésǫ' góde déez'į́į'go ání, Háí shich'ijí nilį́? Háí? Yúnak wolyéhígíí naaki, doodaii' táa'go áádę́ę́' dadéez'į́į́'.

³³Áádóó ííłní, Bidah adahołhan. Áko bidah adajiisxango bidił éí tsé ahénátł'inígíí índa łį́į́' bik'éheesdááz, áádóó bik'i łį́į́' hoł naswod.

³⁴Áko yah ajííyáago ajííyą́ą́' áádóó ajoodlą́ą'go ájíní, Nílááh, díí asdzání t'óó báhádzidgo bá ha'oodzí'ígíí nídadoołteehgo yóó'ádaohłééh, háálá aláahgo naat'áanii bitsi' jílį́į́ nít'éé'.

³⁵Nidi yóó'adazhdoolííł biniyé ákǫ́ǫ́ ajookaigo hatsiits'iin áádóó hakee' índa hála' t'éiyá bik'íjíkai, áko hats'íís yę́ę łahjį' t'áá át'é ádin.

³⁶T'ą́ą́' níjíkaigo Jííhu bił dahojoolne'. Áko ání, Díí Bóhólníihii bá naal'a'í Iiláíjah Tíshbehdóó diné nilíinii yee haadzíi'go kóníi ni', Díí Jézriyel haz'ánígi Jézebel bitsį' łééchąą'í deidoolghał,

³⁷áádóó Jézriyelgi Jézebel bits'íís chąą' nahalingo dá'ák'ehgóó nanise' bich'iyą' nídoodleeł, áko, Díí Jézebel yę́ę át'į́, doo ła' bizhdidooniił da.