Read Navajo I CHRONICLES 10 Bible Online

I CHRONICLES 10 - Navajo bible

I CHRONICLES 10

¹Áko Filístiya dine'é éí Ízrel dine'é yik'iijéé', áádóó Ízrel dine'é bisiláo Filístiya dine' é yik'ee dadínéezhchą́ą'go Dził Gilbówa bighą́ą'gi nidabi'diztseed.

²Nít'éé' Saul áádóó haye'ké éí Filístiya dine'é t'áá íiyisí haatįįh yikaigo Jánathan áádóó Abínadab índa Malkishúwa éí Saul yiye'ké danilį́įgo Filístiya dine'é nidabistseed.

³Áko Saul hak'ijį' t'áá íiyisí anaa' hazlį́į'go da'diłt'ohii dahaskahgo bik'ee tízhdiilyaa.

⁴Nít'éé' Saul éí bee na'abaahí há neijaahii ábijiní, Nidiltłish handzį́įsgo shighá níłgééd. Áko díí doo bąąh nídahineeshgizhii doo ákódashidoolíiłgo shá nidahodoołt'ih da. Nidi bee na'abaahí há neijaahii doo íinízin da, háálá t'áá íiyisí yináldzid. Éí bąą Saul t'áá hó hadiltłish hadzíídzį́įzgo bik'ijį' tsé'yaa ízh'doolgo'go haghá níjilgo dadziztsą́.

⁵Áko bee na'abaahí há neijaahii Saul daaztsą́ągo yiyiiłtsą́, bí ałdó' bidiltłish yik'ijį' tsé'yaa í'doolgo'go bighá níjilgo daaztsą́.

⁶Kót'éego Saul daaztsą́ áádóó biye'ké tált'éego ałdó' daneezná áádóó haghandóó danilíinii t'áá łahjį' ałtso daneezná.

⁷Áádóó honíts'aa' góyaa Ízrel dine'é t'áá ałtso kéédahat'íinii éí Ízrel dine'é bisiláo yóó' adahineezhchą́'ígíí índa Saul éí biye'ké bił nidabi'diztseedígíí yaa ákódaniizį́į'go bikin hadaas'áii yóó'adeideez'ą́ągo bí ałdó' yóó'aheezhjéé', áko Filístiya dine'é nidahaaznáago ákwii kéédahat'į́į́ nít'éé'.

⁸Áko biiskání éí nidabi'diztseedígíí bindaalye'é yąąh dayídóobeeł yiniyé Filístiya dine'é yíkai; nít'éé' Dził Gilbówa bighą́ą'gi Saul áádóó biye'ké nidabi'diztseed lá.

⁹Áádóó yąąh da'ííbį́į'go bitsiits'iin nidei'dii'ą́ índa bibéésh éé' yee naabaahii yaa deidiinilgo Filístiya dine'é bikéyahgóó ida'iis'a'go eda'alyaii yich'į' nidahałáhígíí índa diné ałdó' yił dahoolne'.

¹⁰Áko bidiyin dabidi'níinii bá kin góne' habéésh éé' yah adeizhjaa' áádóó Déígan bich'į' sohodizin bá kin góne' hatsiits'iin dahidí'ą́ągo ádayiilaa.

¹¹Nít'éé' Jéíbesh-gíliyad dine'é t'áá ałtso Filístiya dine'é danilíinii Saul ádayííł'įįdígíí t'áá át'é yaa dahodiizts'ą́ą'go

¹²diné doo nídanilyéesii t'áá ałtso dah diikaigo Saul bits'íís índa biye'ké dabits'íís ałdó' dah deidiijaa'go Jéíbeshjį' nídeizhjaa'go chéch'il biyaagi dahats'in yóó'ádayiilaa índa t'áadoo da'ayání tsosts'id jį́ azlį́į́'.

¹³Saul t'áá hó Bóhólníihii bibee haz'áanii k'ízhníti'go Bóhólníihii bizaad bik'ijį' dzizlį́į'go índa ch'į́įdii yábiiłti'ii jííkeedgo ałdó' biniinaa dadziztsą́,

¹⁴áádóó Bóhólníihii t'áadoo naízhdééłkid da, éí bąą hwiisxį́ índa bee hóhólníihii Jésii biye' David baa deet'ą́.