Read Navajo I CHRONICLES 11 Bible Online

I CHRONICLES 11 - Navajo bible

I CHRONICLES 11

¹Nít'éé' Ízrel dine'é t'áá ałtso Hííbran kin haal' áadi David yaa áłah silį́į'go ádaaní, Shoo, nits'in índa nits'íís daniidlį́įgo nik'éí niidlį́.

²Hoolzhiizhdę́ę́' Saul aláahgo nihinanit'a'í nilį́ yę́ędą́ą́' ni lą́ą Ízrel dine'é niidlíinii dah nihidini'eezh áádóó yah anánihííní'eezh. Bóhólníihii nihiDiyin God ándííniid, Shidine'é Ízrel ba'íłtso' doo índa Ízrel dine'é aláahgo binanit'a'í nílį́į doo.

³Éí bąą Ízrel dine'é hastóí aląąjį' naazíinii t'áá ałtso Hííbrandi aláahgo naat'áanii yaa haaskai áádóó Hííbrandi Bóhólníihii binááł David yił aha'dadeest'ą́, áko Sámuel éí Bóhólníihii bizaad bee hadzoodzíi'ii bik'ehgo David éí Ízrel dine'é aláahgo yinanit'a'í dooleełgo ak'ah yik'i yadayiiziid.

⁴Áko David áádóó Ízrel dine'é t'áá ałtso Jerúsalemgóó yíkai; ákwii kéyahgi Jííbas dine'é kéédahat'į́įgo biniinaa Jííbas hoolyéé nít'éé'.

⁵Áádóó Jííbasgi kéédahat'ínígíí David ádeiłní, Doo kojį' díínáał da. Ákót'ée nidi David éí Záíyangi ayóó át'éego adziil bił nahazhódę́ę yisná; éí David bikin haal'á hoosye'.

⁶Áádóó David ádííniid, T'áá háiida Jííbas dine'é átsé atíyiilaaígíí éí naat'áanii áádóó siláo binanit'a'í jílį́į doo. Nít'éé' Zerowáíyah biyáázh Jó'ab alą́ąjį' heedzáago naat'áanii silį́į́'.

⁷Áko David éí adziil bił nahazhóódgóó kééhat'į́į́ nít'éé'; éí bąą David bikin haal'á hoosye'.

⁸Áádóó binaagóó t'áá Míllodóó wóshdę́ę́' kin haal'áago áyiilaa. Áko kin haal'áhígíí łahjį' Jó'ab hasht'éédayiidlaa.

⁹Áko David éí ayóó át'é áádóó ayóó át'éii yileeł, háálá t'áá ałtsoní bee Bóhólníihii bił hólǫ́.

¹⁰Díí David hasiláo dahayóii honanit'a'í danilíinii bee hóhólníihgo hoł haz'áanii chánah ádahósingo Ízrel dine'é t'áá ałtso aláahgo binanit'a'í dzizlį́į'go Bóhólníihii bizaad k'ehgo Ízrel bídéét'i'go ádahoolaa.

¹¹Kót'éego David éí siláo dahayóii nei'eesh nít'éé': Hákmonai biye' Jashóbiyam wolyéii siláo binanit'a'í danilíinii yinanit'a'í nilį́, éí łah bitsiidétáán t'éí yee ana'í táadi neeznádiingo ałtso neistseed.

¹²Áádóó hakéédę́ę́' éí Ahówah dine'é nilíinii Dódo biye' Eliyéízar wolyéii éí diné tált'éego dahayóii ła' nilį́.

¹³Éí Pas-dámim nahós'a'gi tł'oh naadą́ą́' bidee'í yíl'áá léi'gi Eliyéízar éí David yił naa'aashgo ákwii Filístiya dine'é bisiláo hak'iidoojah yiniyé ahííkai; Filístiya dine'é bisiláo bits'ąą diné yóó'adazhneezhchą́ą́'.

¹⁴Áko t'áá tł'oh naadą́ą́' bidee'í bitahgi jíiskéego nidziisdzíí' áádóó Filístiya dine'é bisiláo nidzistseed. Kót'éego Bóhólníihii ayóó át'éego yisdáhóónil.

¹⁵Nít'éé' tádiin siláo binanit'a'í danilíinii bitahdóó tájílt'éego David bił ahizhdidookah biniyé Adálam tsé'áángóó jíkai, áko Réfeiyim honíts'aa'gi Filístiya dine'é bisiláo nidahaaznáá lá.

¹⁶Áádóó bidziilgo haz'ą́ągi David nijighá, áádóó Béthlehemgi Filístiya dine'é bisiláo dah yinééł.

¹⁷Łah David t'áá hó bídin jílíinii bee hajoodzíi'go ájíní, Béthlehemgi yah a'atiinígi tó hahadleehdóó ajódlą́ą́' laanaa nisin!

¹⁸Áádóó tájílt'éego Filístiya dine'é bisiláo dah deínéehii bił ch'ízhníjée'go Béthlehemgi yah a'atiinígi tó hahadleehdóó tó nídazhdiiką́ągo David baa dadzizką́, nidi David tó t'áadoo yoodlą́ą́'góó Bóhólníihii t'óó yich'į' yayiiziid,

¹⁹áádóó ání, Kódeeshníłígíí shiDiyin God ts'ídá doo yee shá has'ą́ą da. Díí diné be'iina' ninádeideez'ą́ągo dabidił át'é. Éí bąą tó t'áadoo yoodlą́ą' da. Díí diné ts'ídá aláahgo dabidziilii tált'éego kódaadzaa.

²⁰Jó'ab bik'is Abísheiyai wolyéii tá'á góne' ts'ídá aláahgo bidziilgo bóhólnííh. Éí bitsiidétáán bee ana'í táadi neeznádiingo neistseed, díí tájílt'éhígíí ła' kót'éego házhi' béého'dílzin silį́į́'.

²¹Áko tájílt'éhígíí hó éí nidilt'éhígíí biláahgo aghá ho'dool'áago binanit'a'í áho'diilyaa, nidi átsé tált'éhígíí doo éí jílį́į da.

²²Kábziyeldóó Jiihóíyada biye' Biinéíyah wolyéii, diné doo nánílyéesii lą'ígóó áát'įįdii nilíinii éí Mó'ab diné nizhdilt'éego náshdóítsoh bitsiijį' ditł'oii nahojílinii neistseed, áádóó níchíilgo a'áán góyaa náshdóítsoh bitsiijį' ditł'ooígíí yiyiisxį́.

²³Áádóó Ííjip dine'é ayóoda áníłnéezgo tsosts'idóó ałníí' ké silá áníłtso, áko bitsiidétáán éí da'atł'óii bi'áah sitáangi áníldíilgo neitin; ákót'ée nidi ákǫ́ǫ́ gish yinítą́ągo áádóó bitsiidétáán bílák'ee hajiyííłhango t'áá bí bitsiidétáán bee jiisxį́.

²⁴Díí Jiihóíyada biye' Biinéíyah wolyéii yaa naayá, áko tájílt'éhígíí ła' kót'éego bízhi' béého'dílzin silį́į́'.

²⁵Jó, tádiinígíí bitahdóó ił jílį́, nidi átsé tált'éhígíí doo éí jílį́į da, áko David bisiláo binanit'a'í jílį́įgo áhoolaa.

²⁶Áádóó ałdó' siláo danilíinii bitahdóó diné doo nídanilyéesii danilínígíí éí díí: Jó'ab bik'is Éísahel wolyéii áádóó Béthlehem hoolyéédóó Dódo biye' Elhéínan wolyéii,

²⁷Héírad dine'é Shámmath wolyéii, Pélon hoolyéédóó Híílez wolyéii,

²⁸Tekówa kin haal'áádóó Íkesh biye' Áíra wolyéii, Ánathath kin haal'áádóó Éíbiyíízer wolyéii,

²⁹Húshai dine'é Síbiikai wolyéii, áádóó Ahówah dine'é Áíleiyai wolyéii,

³⁰Niitófah kin shijaa'dóó Maharéíyai wolyéii, Niitófahdóó Béíyanah biye' Hííled wolyéii,

³¹Bénjamin dine'é bikin haal'áii Gíbiyah hoolyéédóó Ráíbai biye' Ítheiyai wolyéii, Pírathan kin shijaa'dóó Biinéíyah wolyéii,

³²Géíyash yílk'idgi tó danílínídóó Hórai wolyéii, Árabah honoojíídóó Éíbiyel wolyéii,

³³Bahúrim hoolyéédóó Azméíveth wolyéii, Sheiyálbim kin shijaa'dóó Iiláíyaba wolyéii,

³⁴Gízan hoolyéédóó Héíshem biye'ké, Héírar hoolyéédóó Shéígii biye' Jánathan wolyéii,

³⁵Héírardóó Séíkar biye' Eiháíyam wolyéii, Er biye' Iiláífal wolyéii,

³⁶Miikííra hoolyéédóó Híífer wolyéii, Pélon hoolyéédóó Aháíjah wolyéii,

³⁷Dził Kármeldóó Híízro wolyéii, Ézbeiyai biye' Néíyarai wolyéii,

³⁸Néíthan bik'is Jówel wolyéii, Hágeri biye' Míbhar wolyéii,

³⁹Áman dine'é Zíílek wolyéii, Biyérath kin shijaa'dóó Néíharai wolyéii; éí Zerowáíyah biyáázh Jó'ab yá bee na'abaahí neijaah nít'éé',

⁴⁰Íthra dine'é Áíra índa Géíreb wolyéii,

⁴¹Het dine'é Yuráíyah wolyéii, Áhlai biye' Zéíbad wolyéii,

⁴²Rúben dine'é Sháíza biye' Ádina wolyéii; éí Rúben dine'é bisiláo binanit'a'í nilíinii tádiingo yił naakai,

⁴³Méíyakah biye' Héínan wolyéii áádóó Míthnai dine'é Jáshafat wolyéii,

⁴⁴Áshterath kin haal'áádóó Azáíyah wolyéii, Aró'er kin shijaa'dóó dine'é Hóthan biye'ké Shéíma áádóó Jáíyel wolyéii,

⁴⁵Shímrai biye' Jedáíyeiyel wolyéii áádóó bik'is Táíza dine'é Jóha wolyéii,

⁴⁶Méíhava dine'é Iiláíyel wolyéii áádóó Elnéíyam biye'ké Jéribai áádóó Joshaváíyah wolyéii áádóó Mó'ab dine'é Íthmah wolyéii,

⁴⁷Iiláíyel wolyéii, áádóó Óbed wolyéii índa Mezóba hoolyéédóó Jéísiyel wolyéii. Díí t'áá ałtso siláo danilį́.