Read Navajo I CHRONICLES 12 Bible Online

I CHRONICLES 12 - Navajo bible

I CHRONICLES 12

¹Díí diné Zíklag kin haal'áagi David yidiikai; éí Kish biye' Saul wolyéii t'ah bits'ąą nijigháago, díí diné dahayóii anaa'gi áká anájahii danilį́.

²Ałtį́į́' yee hasht'e'ádadólzingo bíla' t'áá ałch'ijí chodayooł'į́įgo tsé yee da'diłniih áádóó k'aa' yee da'diłt'oh, éí Saul bik'éí danilíinii Bénjamin dine'é danilį́:

³Eihaiyíízer aląąjį' bóhólnííh silį́į́'; Jó'ash akéédę́ę́' bóhólnííh, t'áá áłah Gíbiyah kin haal'áádóó Shiiméíyah wolyéii biye'ké jílį́, índa Azméíveth biye'ké Jííziyel áádóó Píílet wolyéii índa Bérakah áádóó Ánathath hoolyéédóó Jííhu wolyéii,

⁴áádóó Gíbiyan kin haal'áádóó Isméíyah wolyéii; éí diné tádiingo bitahgóó diné hayóii nilį́, áádóó tádiingo yilą́ąjį' sizíinii nilį́, áádóó Jeremáíyah, Jahéíziyel áádóó Johéínan índa Gedíírah kin shijaa'dóó Józabad wolyéii,

⁵Iilózeiyai áádóó Jérimath áádóó Biyaláíyah áádóó Shemaráíyah índa Háruf hoolyéédóó Shefatáíyah wolyéii,

⁶Elkéínah áádóó Jiisáíyah índa Azéíriyel, Joyíízer áádóó Kórah dine'é Jashóbiyam wolyéii

⁷áádóó Gíídardóó Jiiróham biye'ké Joyíílah áádóó Zebadáíyah wolyéii.

⁸Áko Géed dine'é danilíinii ła' t'áá bí David yidiikaigo honoojíidi bidziilgo haz'ánígi diné dahayóii áádóó na'abaah yídaneel'áanii éí naagé áádóó tsiidétáán nideijaahii dabinii' náshdóítsoh dabinii'ígi ádaat'é áádóó dziłghą́ą'gi bįįhtsa'ii dadilwo'iigi át'éego dadilwo'.

⁹Alą́ąjį'ígíí Íízer wolyéii, naaki góne'ígíí Obadáíyah wolyéii, táá' góne'ígíí Iiláíyab wolyéii,

¹⁰dį́į́' góne'ígíí Mishmánah wolyéii, ashdla' góne'ígíí Jeremáíyah wolyéii,

¹¹hastą́ą́h góne'ígíí Átayai wolyéii áádóó tsosts'id góne'ígíí Iiláíyel wolyéii,

¹²tseebíí góne'ígíí Johéínan wolyéii, náhást'éí góne'ígíí Elzéíbad wolyéii,

¹³Neeznáá góne'ígíí Jeremáíyah wolyéii, ła'ts'áadah góne'ígíí Mákbanai wolyéii.

¹⁴Díí éí Géed biye'ké danilį́; siláo dah deínéehii binanit'a'í danilį́. A'ohgo doo nánílyéesii ła' neeznádiingo siláo yił da'ahóbáahgo yíneel'ą́; aláahgo doo nánílyéesii ła' t'ááłáhídi míilgo yíneel'ą́.

¹⁵Áko díí átsé nídízííd binih Jórdan tooh wó'ądaazna'go ha'naa nijíkai áádóó honíts'aa' góyaa kéédahat'íinii t'áá ałtso ha'a'aahjigo áádóó e'e'aahjigo hak'ee yóó'adahineezhchą́ą́'.

¹⁶Áádóó Bénjamin dine'é índa Júdah dine'é ła' bidziilgo haz'ánígi David yaa yíkai.

¹⁷Nít'éé' David ch'íníyáago hach'į' haadzíi'go áháłní, K'é dashididoohniiłgo shíká adoohjah biniyé shaa noohkaigo t'éiyá nihił ła'í nishłį́į doo. Azhą́ doo ákogi át'éii t'áadoo íishłaa da nidi shi'ana'í bich'į' ninádashidinoh'aah biniyé noohkaigo dashizhé'é yę́ę biDiyin God nihiidoołtsééł áádóó nihididooteh.

¹⁸Nít'éé' Amaséíyai siláo binanit'a'í nilíinii Níłch'i Diyinii bik'i hoole'go ání, David, níí' daniidlį́; nił dahoniidlǫ́, Jésii biye' nílíinii. Nich'į' hózhǫ́, nich'į' hózhǫ́ǫ le'; níká anájahii bich'į' hózhǫ́ǫ le', háálá niDiyin God níká análwo'. Áádóó David náhodiinilgo siláo dah deínéehii bindanit'a'í dajílį́įgo áhoolaa.

¹⁹Nít'éé' Filístiya dine'é bisiláo éí Saul yich'į' anaa' dahodoołeeł biniyé David yił yíkaigo t'áadoo David yíká ííjée' da, háálá Filístiya dine'é binanit'a'í ła' haa yádaałti'go t'óó náádááł dahodííniid, Honanit'a'í Saul bich'ijí jidooleełgo nihitsiits'iin nahgóó ahizhdooniłgo da'át'é, dahó'ní. Áko íídą́ą́' Manáseh dine'é bisiláo ła' David yidiikai.

²⁰Zíklag kin haal'áagi jiníyáago díí Manáseh bisiláo míilgo binanit'a'í danilíinii hohidiikai: éí Ádnah, Józabad, Jedáíyeiyel, Máíkel áádóó Józabad índa Iiláíhu áádóó Zílthai.

²¹Áádóó diné dahayóii doo nídanilyéesii éí siláo dah deínéehii yinanit'a'í danilíinii, éí David yíká ííjéé'.

²²Íídą́ą́' t'áá ákwíí jį́ David yíká áńdaajah biniyé yaa dahakááh; wónáásóó Diyin God yee bóhólníihgo dah deínéhígi át'éego t'óó ahayóí silį́į́'.

²³Bóhólníihii yee haadzíi'ii bik'ehgo Saul bee bóhólnííh yę́ę David yaa deididoo'ááł biniyé díí siláo dah deínéehii bee na'abaahii nideijaahígíí ákónéelą́ą́' lá:

²⁴Júdah dine'é éí naagé índa tsiidétáán nideijaahígíí, éí hastą́ądi mííldóó ba'aan tseebíidi neeznádiin ánéelą́ą'go anaa' yiniyé hasht'e'ádadólzin lá.

²⁵Símiyan dine'é bitahdóó diné anaa' yich'į' dahayóii índa doo nídanilyéesii tsosts'idi mííldóó ba'aan t'ááłáhídi neeznádiin ánéelą́ą́'.

²⁶Líívai dine'é éí dį́įdi mííldóó ba'aan hastą́ądi neeznádiin ánéelą́ą́'.

²⁷Áádóó Éran dine'é bisiláo táadi mííldóó ba'aan tsosts'idi neeznádiin ánéelą́ą'go Jiihóíyada honanit'a'í nilį́į́ nít'éé'.

²⁸Zéídak dinééh nilį́įgo diné hayóii índa doo nánílyéesii nilį́, áádóó hazhé'é bidine'é bisiláo binanit'a'í naadiin naaki yił yíkai.

²⁹Áádóó Bénjamin dine'é éí Saul bik'éí danilíinii táadi mííl ánéelą́ą'go Saul ba'áłchíní bił danilį́į́ nít'ée'ii David yił yíkai.

³⁰Íífreiyim dine'é naadiindi mííldóó ba'aan tseebíidi neeznádiin diné dahayóii áádóó doo nídanilyéesii, éí dabizhé'é yę́ę bidine'é ayóogo béédaho'dílzin.

³¹Áádóó Manáseh dine'é ałníí'dóóígíí tseebííts'áadahdi mííl éí David aláahgo naat'áanii ádeidoolííł biniyé dabi'dééji'go neheeskai.

³²Ísakar dine'é éí dahwéelzhíishii yik'idadi'yiitįįhii áádóó Ízrel dine'é ádadooníiłii bił béédahózinii danilínígíí índa bá naazíinii éí naakidi neeznádiin ánéelą́ą́'. Índa bik'isóó t'áá ałtso bik'eh ádaat'é.

³³Áádóó Zébyulan dine'é anaa' dayiichįįhii áádóó bee na'abaahii t'áá ałtso yił hasht'e'ádadólzinii ashdladiindi mííl ánéelą́ą'go ałkéé' na'ídí'nil yídahooł'ą́ą́' lá, áádóó doo naaki nilį́į́góó nitsídaakeesgo David yíká anájah.

³⁴Náftalai dine'é bisiláo binanit'a'í t'ááłáhídi mííl ánéelą́ą́', áádóó naagé índa tsiidétáán nideijaahígíí t'áá biłgo tádiindóó ba'aan tsosts'idi mííl ánéelą́ą́'.

³⁵Áádóó Dan dine'é anaa' dayiichįįhii naadiin tseebíidi mííldóó ba'aan hastą́ądi neeznádiin ánéelą́ą́'.

³⁶Ásher dine'é anaa' yiniyé hasht'e'ádadólzinii índa anaa' dayiichįįhii dízdiindi mííl ánéelą́ą́'.

³⁷Áádóó Jórdan tooh wónaanídę́ę́' Rúben dine'é bisiláo áádóó Géed dine'é bisiláo índa Manáseh dine'é ałníí'dóóígíí bisiláo anaa' biniyé bee na'abaahii ałtah áát'eełii nideijaahígíí neeznádiindóó ba'aan naadiindi mííl ánéelą́ą́'.

³⁸Díí diné nidaabaahii t'áá ałtso ałkéé' nida'ádí'nil yídahooł'ą́ą'ii t'ááłá'í nitsáhákees bee David éí Ízrel dine'é aláahgo binanit'a'í ádeidoołííł biniyé Hííbran kin haal'áajį' neheeskai. Áádóó Ízrel dine'é t'áá ałtso ałdó' David aláahgo naat'áanii ádeidoolíiłgo yee ła'í danilį́įgo tsídadeezkééz.

³⁹Áádóó dahak'isóó éí ch'iyáán há hasht'edayiilaaígíí dajiyą́ągo índa dajidlą́ągo David bił nijikaigo tágí jį́ azlį́į́'.

⁴⁰Áádóó ałdó' áhą́dígóó Ísakar dine'é áádóó Zébyulan dine'é índa Náftalai dine'é kéédahat'íinii éí téliida, ghą́ą́'ask'idiida, dzaanéezda índa béégashiida yee ch'iyáán nidayiizhjaa', áádóó atsį', ak'áán, tsin sikaadii fig bineest'ą' ahídadiiljé'ígíí áádóó ch'il na'atł'o'ii bineest'ą' nááltseii índa wáin áádóó ak'ah, béégashii índa dibé lą'í áłah ádajiilaa, háálá Ízrel dine'é bitahgi t'áá íiyisí hoł dahózhǫ́.