Read Navajo I CHRONICLES 14 Bible Online

I CHRONICLES 14 - Navajo bible

I CHRONICLES 14

¹Nít'éé' Táir kin haal'áádóó aláahgo naat'áanii Háíram éí David bich'į' naal'a'í ayííł'a'; éí dilk'istsoh tsin neheeshjíí' bee David bá kin ádoolnííł biniyé tsé deitł'inígíí áádóó kin ádeił'ínígíí yił ayííł'a'.

²Áko David éí Ízrel dine'é binanit'a'í jílį́į dooleełgo Bóhólníihii nihoníłtį́įgo baa ákoznízin, háálá bidine'é Ízrel biniinaa bee hóhólníihgo hoł haz'áanii ayóó át'éego hoł hoo'a'.

³Áádóó Jerúsalemgi David éí asdzání ła' hwe'asdzą́ą́ ánáádajiidlaa áádóó haye'ké índa hatsi'ké há neheezhchį́.

⁴Jerúsalemgi ha'áłchíní nidahaazhchínígíí kódaolyé: Shamúwa, Shóbab, Néíthan índa Sálaman,

⁵áádóó Íbhar, Iilíshuwa índa Elpéílet,

⁶áádóó Nógah, Níífeg índa Jafáíya,

⁷índa Iilíshama, Biyeláíyada áádóó Iilífalet.

⁸Áko David éí Ízrel dine'é t'áá ałtso aláahgo yinanit' a'í nilį́įgo ak'ah bik'i yaadziidgo bee bi'doolzį́į'go Filístiya dine'é dayíínii'go Filístiya dine'é bisiláo t'áá ałtso David hadeidínóotaał biniyé ákóde ííná. David haa hodiizts'ą́ą'go hach'į' ana'niidzį́į́'.

⁹Áko Réfeiyim honíts'aa'gi Filístiya dine'é nidahaaznáago hach'į' ni'ídee'nil.

¹⁰Áádóó David éí Diyin God neídééłkidgo ání, Da' Filístiya dine'ésh bich'į' anaa' hodeeshłeełgo bik'eh dinishdlį́įgo áshidíílííł? Áko Bóhólníihii áháłní, Nílááh, bich'į' anaa' hółeehgo bik'eh dinídlį́įgo áńdeeshłííł.

¹¹Nít'éé' Béíyal-piiréízim hoolyéejį' jíkaigo ákwii David ak'eh jideesdlį́į́'. David ájíní, Diyin God shíla' yee naashnishgo shi'ana'í danilíinii tó déégizhígi át'éego bik'i ch'ízhníłhaal; éí bąą ákwii haz'ą́ągi Béíyal-piiréízim hoosye'.

¹²Áádóó ákwii Filístiya dine'é bidiyin dabidi'níinii bida'alyaii yik'i dahineezhchą́ą'go éí ałtso adahididoolk'ą́ąłgo David yee haadzíí'.

¹³Áko Filístiya dine'é éí honíts'aa'gi diné yik'ijį' nináádaazbaa'.

¹⁴Éí bąą David éí Diyin God ninááyídééłkid, áádóó Diyin God áháłní, T'áadoo bit'ááh náhjahí, nidi nák'ee'ąądę́ę'go tsin naazkaadii múlberri wolyéii yíl'áhídóó baa nihinohkááh.

¹⁵Áádóó siláo yinééł yists'ą́ą'go tsin múlberri yíl'áhígíí bílátahgóó bii' hodiists'ą́ą'go bik'iidoohjah, háálá Diyin God éí Filístiya dine'é bisiláo yik'eh didoodleeł biniyé nihilą́ąjį' hólǫ́.

¹⁶Áádóó David t'áá Diyin God yee há haadzí'ígíí bik'ehgo í'jiilaa, áko Gíbiyan kin haal'áádóó Gíízer kin haal'áajį' Filístiya dine'é bisiláo dah deínéehii nidadzistseed.

¹⁷Áko David bee baa hane'ígíí kéyah t'áá át'éé nít'éé' nideezdláád, áádóó Bóhólníihii éí ał'ąą dine'é t'áá ałtso hwéédaaldzidgo áyiilaa.