Read Navajo I CHRONICLES 15 Bible Online

I CHRONICLES 15 - Navajo bible

I CHRONICLES 15

¹Nít'éé' David bikin haal'áhígi David t'áá bí ádá kin ádayiilaa, áádóó Diyin God bitsits'aa' dílzinii yá hasht'ehoolaago níbaal niiní'ą́.

²Áko David ání, Diyin God bitsits'aa' dílzinii doo ła'da nei'áa da dooleeł, t'áá hazhó'ó Líívai dine'é t'éiyá, háálá éí nidei'áa doo biniyé Bóhólníihii atah biizláá' áádóó yá nidaal'a'go ahool'áa doo.

³Áádóó Jerúsalemgi Ízrel dine'é dajílíinii t'áá ádzíłtso David áłah áhoolaa, éí Bóhólníihii bitsits'aa' dílzinii nídazhdoo'ááł biniyé ákwii yá hasht'ehoolaa.

⁴Áko David éí Éran dine'é áádóó Líívai dine'é áłah áyiilaa.

⁵Kóhath dine'é ła' Yúriyel aląąjį' sizíinii áádóó bik'isóó danilíinii neeznádiindóó ba'aan naadiin ánéelą́ą́'.

⁶Miirárai dine'é ła' Aséíyah aląąjį' sizíinii áádóó bik'isóó danilíinii naakidi neeznádiindóó ba'aan naadiin ánéelą́ą́'.

⁷Gérshan dine'é ła', Jówel aląąjį' sizíinii áádóó bik'isóó danilíinii neeznádiindóó ba'aan tádiin ánéelą́ą́'.

⁸Iilízafan dine'é ła' Shiiméíyah aląąjį' sizíinii áádóó bik'isóó danilíinii naakidi neeznádiin ánéelą́ą́'.

⁹Hííbran dine'é ła' Iiláíyel aląąjį' sizíinii áádóó bik'isóó danilíinii tseebídiin ánéelą́ą́'.

¹⁰Azáíyel dine'é ła' Amínadab aląąjį' sizíinii áádóó bik'isóó danilíinii neeznádiindóó ba'aan naakits'áadah ánéelą́ą́'.

¹¹Nít'éé' David éí Zéídak áádóó Abáíyathar náá'iiłniihii nilíinii índa Líívai dine'é danilíinii éí Yúriyel, Aséíyah, Jówel, Shiiméíyah áádóó Iiláíyel índa Amínadab daolyéego hágo dabizhdííniid,

¹²áádóó ábijiní, Nihí Líívai dine'é dabizhé'é yę́ę ba'áłchíní náás ahoolchíiłii yá aląąjį' naazíinii danohłį́. Ízrel dine'é biBóhólníihii Diyin God bitsits'aa' dílzinii bá hasht'ehooshłaajį' nídadooh'ááł biniyé nihí áádóó danihik'isóó bił t'áá nihí diyingo ída'dołnééh.

¹³Jó, átsédą́ą́' doo ákóda'oohłaagóó biniinaa Diyin God atínihiilaa, háálá Bóhólníihii yee has'áanii t'áadoo bik'ehgo nidahosiidláa' da.

¹⁴Áko nááda'iiłniihii áádóó Líívai dine'é dajílíinii éí Ízrel dine'é biBóhólníihii Diyin God bitsits'aa' dílzinii nídazhdoo'ááł biniyé t'áá hó diyingo ídazh'diilyaa.

¹⁵Áko Líívai dine'é éí Bóhólníihii bizaad k'ehgo Mózes yee haadzí'ígi át'éego Diyin God bitsits'aa' dílzinii bąąh tsin níyizí ní'áhígíí hawostisjį' ha'naa naní'áago bee nídadziz'ą́.

¹⁶Áko David éí Líívai dine'é yá aląąjį' naazíinii ábijiní, Nihí nihik'isóó ła' sin yee dahataałii nidahidoohniłgo sin yee nidaanéii, tsin tł'óół neeznáá bąąh daneelzhee'go bee nida'a'néii, tsin tł'óół naakits'áadah bąąh daneelzhee'go bee nida'a'néii índa béésh ahídí'niłgo ayóó'át'éego diits'a'ígíí yee nidaanéego bił dahózhǫ́ǫgo yéego dahataał doo.

¹⁷Áádóó Líívai dine'é éí Jówel biye' Hííman nídeidiiłtį́ áádóó bik'isóó danilíinii ałdó' ła' nideiznil índa Berekáíyah biye' Éísaf wolyéii ałdó' áádóó Miirárai biye'ké índa bik'isóó danilíinii áádóó Koshéíyah biye' Ííthan wolyéii ałdó',

¹⁸áádóó bik'isóó danilíinii bikéé'dóó naazínígíí éí Zekaráíyah, Ben, Jeiyéíziyel, Shiimíramath, Jiiháíyel, Ánai, Iiláíyab, Biinéíyah, Méíyasíyah, Matitháíyah, Iilífeleh índa Mikníyah áádóó ch'é'étiin yaa áhályání Óbed-íídam áádóó Jáíyel daolyé.

¹⁹Áádóó dahataałígíí éí Hííman, Éísaf áádóó Ííthan daolyé; éí béésh łitsoii ahídí'niłgo diits'a'ígíí nídazdiiłts'į́įh doo biniyé niho'dee'nil,

²⁰áádóó Zekaráíyah, Éíziyel áádóó Shiimíramath, Jiiháíyel, Ánai, Iiláíyab áádóó Méíyasíyah índa Biinéíyah éí tsin tł'óół neeznáá bąąh daneelzhee'go bee nida'a'néii chánahgo diits'a'ígíí bee ninádaji'neeh,

²¹Matitháíyah, Iilífeleh, Mikníyah, Óbed-íídam, Jáíyel índa Azazáíyah éí tsin tł'óół naakits'áadah bąąh daneelzhee'go bee nida'a'néii wóyahgo diits'a'ígíí yee ninádaa'neeh.

²²Líívai dine'é nilíinii Kenanáíyah wolyéii sin yee nidaanéhígíí áádóó dahataałígíí binanit'a'í jílį́įgo sin baa ni'ji'eesh, háálá éí ayóo yiyiichįįh.

²³Berakáíyah áádóó Elkéínah éí tsits'aa' dílzinii bich'į' yah a'atiinígi yaa áhályání nilį́.

²⁴Shebanáíyah, Jáshafat, Niithániyel, Amaséíyai, Zekaráíyah, Biinéíyah índa Eliyíízer daolyé; náá'iiłniihii danilį́įgo éí Diyin God bitsits'aa' dílzinii bilą́ąjį' béésh dilní bee í'dílzoołí yee ninádaa'neeh. Áádóó Óbed-íídam índa Jiiháíyah éí tsits'aa' dílzinii bich'į' yah a'atiinígi ał dó' yaa áhályání nilį́.

²⁵Ákohgo David áádóó Ízrel dine'é yá aląąjį' naazíinii índa siláo miilgo binanit'a'í danilíinii éí tsits'aa' dílzinii Bóhólníihii bibee aha'deet'áanii bii' sinilii Óbed-íídam bighandóó ch'ídeiz'ą́ągo bił dahózhǫ́ǫgo nídeí'aah.

²⁶Nít'éé' Líívai dine'é éí tsits'aa' dílzinii Bóhólníihii bibee aha'deet'áanii bii' sinilii nídeí'aahgo Diyin God bíká eelwod; éí bąą dóola tsosts'idgo áádóó deenásts'aa' tsosts'idgo náádayiisnii'.

²⁷David bi'éénééz éí áłts'óózígo yisdizígíí bee na'at'ą́hí łigaii dits'idgo ályaii yii' sitį́; Líívai dine'é t'áá ałtso tsits'aa' dílzinii nidei'áhígíí ałdó', áádóó dahataałígíí índa Kenanáíyah éí sin yee dahataałgo yaa na'a'eeshii ałdó' éí bi'éé', áádóó David éí íífad wolyéii na'at'ą́hí łigaii dits'idígíí bee ályaii ał dó' yii' sitį́.

²⁸Ákót'éego Ízrel dine'é t'áá ałtso tsits'aa' dílzinii Bóhólníihii bibee aha'deet'áanii bii' sinilii deí'aahgo bił dahózhǫ́ǫgo háádadilwosh. Deenásts'aa' bidee' bee í'dílzoołí áádóó béésh dilní bee í'dílzoołí áádóó béésh ahídí'niłgo diits'a' ígíí áádóó tsin tł'óół neeznáá bąąh daneelzhee'go bee nida'a'néii índa tsin tł'óół naakits'áadah bąąh daneelzhee'go bee nida'a'néii yee nidaanéego hahóół'á.

²⁹Nít'éé' David bikin haal'áajį' tsits'aa' dílzinii Bóhólníihii bibee aha'deet'áanii bii' sinilii nídají'aahgo Saul yę́ę bitsi' Máíkal wolyéii tsésǫ'dóó déez'į́į'go aláahgo naat'áanii David éí alzhishgo áádóó bił hózhǫ́ǫgo dilwoshgo yiyiiłtsą́ągo yi'į́įgo tsídeezkééz.