Read Navajo I CHRONICLES 16 Bible Online

I CHRONICLES 16 - Navajo bible

I CHRONICLES 16

¹Áko Diyin God bitsits'aa' dílzinii nídadziz'ą́ągo David níbaal niiní'ánígíí ałníi' gi nidadziz'ą́. Áádóó Diyin God bich'į' didlidgo náádahaniihii índa hózhǫ́ǫ́jí náádahaniihii náádayiisnii'.

²Áko David éí didlidgo náádahaniihii áádóó hózhǫ́ǫ́jí náádahaniihii ałtso nááyiisnii'go, Bóhólníihii bízhi' binahjį' Ízrel dine'é bik'i sozdoolzingo bik'ijiijisdli'.

³Áádóó Ízrel dine'é t'ááłá'í nítínígo diné áádóó sáanii, t'áá łah dadilt'éhígo bááh áádóó atsį' índa ch'il na'atł'o'ii ahídiiłjée'ii bitaa dziznii'.

⁴Náá'áłdó' Líívai dine'é ła' éí Bóhólníihii bitsits'aa' dílzinii bidááhdóó nidaal'a' doo, Ízrel dine'é biBóhólníihii Diyin God béédabijiyiiłníih doo, yaa ahééh danízin doo áádóó yaa dahaniih doo biniyé nizhnínil.

⁵Éísaf aląąjį' sizį́, áádóó akéé'dóó naazínígíí Zekaráíyah, Jiiháíyel, Shiimíramath, Jáíyel, Matitháíyah, Iiláíyab, Biinéíyah, Óbed-íídam índa Jáíyel daolyé, éí tsin tł'óół neeznáá bąąh daneelzhee'go bee nida'a'néii áádóó tsin tł'óół naakits'áadah bąąh daneelzhee'go bee nida'a'néii yee ninádaa'neeh doo, áádóó Éísaf éí béésh ahídí'niłgo diits'a'ígíí jidiiłts'a' doo,

⁶Biinéíyah áádóó Jahéíziyel náá'iiłniihii nilíinii éí tsits'aa' dílzinii Diyin God bibee aha'deet'áanii bii' sinilii bidááhdóó t'áá áłahjį' béésh dilní bee í'dílzoołí yee anídí'niihgo hoolzhish doo.

⁷Áko éí bijį́ David éí Éísaf áádóó bik'isóó danilíinii díí sin bee Bóhólníihii bich'į' ahééh daznízingo dahojitaał dooígíí yee nihoní'ą́.

⁸Haa'íshą' Bóhólníihii bich'į' ahééh danohsin! Bízhi' dayínóhshíigo bich'į' sodadołzin! Diné bitahgóó yaa naagháhígíí baa dahołne'!

⁹Bich'į' dahohtaał! Baa dahohniihgo bich'į' dahohtaał! Binaanish ayóó ádaat'éii t'áá ałtso baa dahołne'!

¹⁰Bízhi' diyinii baa nihił dahózhǫ́ǫ le'! Bóhólníihii há deidéez'į́į'ii bijéí bił nidahoozhǫǫh le'!

¹¹Bóhólníihii índa bibee adziil há dasídóo'į́į́'! Bóhólníihii t'áá áłahjį' hádaaht'į́!

¹²Binaanish ayóó ádaat'éii áádóó álílee yaa naayáii índa ánihwii'aahgo ainít'į́į́ nít'é'ígíí béédaałniih!

¹³Haa'íshą' Ízrel éí Bóhólníihii yá naal'a'í nilíinii bits'ą́ą́dóó yichíiłii danohłíinii, Jéíkab bada'áłchíní nídii'nilii danohłíinii, béédaałniih!

¹⁴Éí Bóhólníihii nihiDiyin God nilį́. Nahasdzáán bikáá'góó t'áá níłtéél nít'éé' ánihwii'aah.

¹⁵Bibee aha'deet'áanii hool'áágóó béédaałniih, índa saad yee haadzíi'ii miildi ałk'i ná'oochííłgóó béédaałniih doo.

¹⁶Éí Éíbraham yił aha'deet'áanii áádóó Áízak yich'į' ádee hadoodzíi'ii,

¹⁷éí bee haz'áanii dooleeł biniyé bohoníłdzilgo Jéíkab baa deet'ą́, áko hool'áágóó bee aha'deet'áanii át'éego Ízrel baa deet'ą́.

¹⁸Kóníigo haadzíí', Kéínan kéyah nihá bits'ání'ą́ągo nihíí' dooleeł biniyé nihaa dideesh'ááł.

¹⁹Diné t'áá díkwíí nółt'éhí, t'áá aaníí t'áá díkwíí nółt'éhígo éí kéyahdi ayóní danohłį́įgo tádooná.

²⁰Ał'ąą dine'é ła'ałyóí baa níjí'néehgo ał'ąą dine'é bee bídahólníihgo bił dah nahaz'ą́ą́góó tázhdííná.

²¹Diné doo ła' atíbidoolííłgóó yich'ą́ą́h déesnii' nít'éé'; t'áá aaníí bidine'é yiniinaa aláahgo naat'áanii danilíinii yich'ahashkéé nít'éé',

²²kóníigo, Ak'ah bik'i yadahiiziidgo deísį́į'ii shíhígíí t'áadoo baa nídaaht'íní! Shá dahalne'ii atídaohłééh lágo!

²³Nahasdzáán nidahonees'ą́ą́dę́ę́' diné danohłíinii, t'áá ánółtso Bóhólníihii bich'į' dahohtaał; bits'ą́ą́dóó bee yisdá'iildéehii t'áá ákwíí jį́ baa ch'ídahoyoh'aah.

²⁴Yee ayóó át'éii ał'ąą dine'é bitahgóó baa dahołne'; t'óó bik'ee ayóogo ááníiłii ał'ąą dine'é t'áá ałtso bitahgóó baa dahołne'!

²⁵Háálá Bóhólníihii ayóó át'é áádóó t'áá íiyisí baa ha'niihgo yą́ą́h nilį́; diyin dabidi'níinii t'áá ałtso biláahgo dólzin.

²⁶Háálá ał'ąą dine'é bidiyin dabidi'níinii t'áá ałtso t'óó e'elyaii ádaat'é, nidi Bóhólníihii éí yót'ááh hiníláii áyiilaa.

²⁷Ił ídlį́ áádóó ayóó é'ét'é bináhaazlá. Bisodizin bá hooghan bii' dziil índa ił hózhóonii hólǫ́.

²⁸Ał'ąą dine'é danohłíinii, nihił dah nahaz'ą́ą́dę́ę́' t'áá ánółtso Bóhólníihii baa dahohniih; Bóhólníihii yee ayóó át'éii índa bee adziil bee hólónígíí bee baa dahohniih!

²⁹Bóhólníihii bízhi' éí ayóó át'éii yą́ą́h nilíinii bee baa dahohniih! Náádahidoołnihii deínóhjáahgo bidááhdę́ę́' nihohkááh. Nihił dahodiyingo dahodíínóhsingo Bóhólníihii bich'į' nidahohłá!

³⁰Nahasdzáán nidahonees'ą́ą́dę́ę́' diné danohłíinii t'áá ánółtso, hats'ąą dasoohti'go dahodíínóhsin. Nahasdzáán ts'ídá doo nahjį' kódoolnííłgóó bohoníłdzilgo niiní'ą́.

³¹Yót'ááh dahiníláii bił dahózhǫ́ǫ le' índa nahasdzáán bił nihoozhǫǫh le'; ał'ąą dine'é bitahgóó kódaha'níi le', Bóhólníihii éí nant'á.

³²Tónteel áádóó bii' dahólóonii ayóó íits'a' le'. Dá'ák'eh áádóó bikáá' hólóonii t'áá ałtso háni'dii bił nidahoozhǫǫh le'.

³³Áko índa tsin deíl'áhígíí t'áá ałtso bił dahózhǫ́ǫgo Bóhólníihii yich'į' dahataał doo, háálá nahasdzáán yaa nídóot'įįł yiniyé yíghááh.

³⁴Haa'íshą' Bóhólníihii bich'į' ahééh danohsin, háálá yá'át'éehii nilį́. Bóhólníihii aa a'ááh nízingo ahóyéel'á.

³⁵Kónáádadohní, Diyin God yisdánihiníiłii nílíinii, yisdánihínííł; áłah ánihílééh áádóó ał'ąą dine'é bits'ą́ąjį' yisdánihínííł, áko nízhi' diyinii bee danííníijíigo nich'į' ahééh daniidzin doo áádóó nihił dahózhǫ́ǫgo naa dahwii'niih doo.

³⁶Ízrel dine'é biBóhólníihii Diyin God baa ha'niihgo hool'áágóó ahóyéel'áa doo. Áko diné t'áá ałtso ádadííniid, T'áá ákót'ée le', áádóó Bóhólníihii yaa dahaznih.

³⁷Áko David éí tsits'aa' dílzinii Bóhólníihii bibee aha'deet'áanii bii' sinilii bidáahgi t'áá áłahjį' Éísaf áádóó bik'isóó danilíinii nidaal'a'go t'áá ákwíí jį́ nidaalnishgo hoolzhish doo biniyé nizhnínil.

³⁸Áádóó Óbed-íídam índa hastą́diindóó ba'aan tseebíigo bik'isóó danilíinii, áádóó Jedúthan biye' Óbed-íídam ałdó' índa Hósah wolyéii yah a'atiingi yaa áhályání nilį́.

³⁹Áádóó náá'iiłniihii Zéídak índa bik'isóó nááda'iiłniihii éí Gíbiyangi wódahgo haz'ánídi Bóhólníihii biníbaal bii' hodílzinii bidáahgi nidaal'a' doo biniyé nizhnínilgo

⁴⁰Bóhólníihii bibee haz'áanii bii' t'áá ałtso bee ak'eda'ashchíinii bik'ehgo t'áá áłahjį' abínígo áádóó e'e'áahgo didlidgo nááhániihii biniyé bikáá' náá'iiniihí bikáa'jį' didlidgo nááhániihii Bóhólníihii bich'į' náádajiiłniihgo hoolzhish doo biniyé Ízrel dine'é bich'į' bee hadzoodzíí'.

⁴¹Hííman áádóó Jedúthan índa diné dayééji'go náhaasdlá'ígíí t'áá bił Bóhólníihii bich'į' ahééh daznízin doo biniyé niho'dee'nil, háálá Bóhólníihii aa a'ááh nízingo ahóyéel'á.

⁴²Hííman áádóó Jedúthan éí béésh dilní bee í'dílzoołí áádóó béésh ahídí'niłgo diits'a'ígíí yee ninádaa'neeh doo biniyé índa dilní ał'ąą ádaat'éii Diyin God bee baa ha'niihígíí yaa áhályą́. Jedúthan biye'ké éí yah a'atiin yaa ádahalyą́.

⁴³Nít'éé' diné t'áá ałtso t'ááłá'í nítínígo t'áá bí dabighangóó anídahaaskai. Áádóó David bighandóóígíí yik'izhdoodliił yiniyé anáádzá.