Read Navajo I CHRONICLES 17 Bible Online

I CHRONICLES 17 - Navajo bible

I CHRONICLES 17

¹Nít'éé' David hakin bii' dzizdáago Diyin God yá halne'ii Néíthan wolyéii ábijiní, Shoo, dilk'is bee kin ályaago bii' shighan, nidi tsits'aa' dílzinii Bóhólníihii bibee aha'deet'áanii bii' sinilii t'ahdii níbaal bii' si'ą́.

²Áko Néíthan éí David ííłní, Baa nitsíníkeesígíí t'áá ałtso ánílééh, háálá Diyin God nił hólǫ́.

³Kódzaadóó bik'ijį' tł'ée'go Néíthan éí Diyin God hach'į' haadzíi'go kóní,

⁴Nílááh, shá naal'a'í David kóbidiníigo bił hólne', Bóhólníihii áníłní, Kin bii' shighan dooleełígíí doo shá ádíílíił da,

⁵háálá Ízrel dine' é háí'eezhdóó wóshdę́ę́' díí jį́įjį' doo kin bii' kééhasht'į́į da; t'óó níbaal dílzinii naat'áágóó kééhasht'į́įgo hoolzhish.

⁶Ízrel dine'é t'áá bił tádíshkááhgóó, Ízrel dine'é yá nidahodii'aahii éí shidine'é shá bada'ołtso' bidííniidígíí, Haash yit'éego dilk'is bee kin ályaii doo shá ádaohłéeh da, t'áadoo ła' kóbidííniidí da.

⁷Éí bąą k'ad, shá naal'a'í David ábididííniił, T'áá ałtsoní bee Bóhólníihii áníłní, Shidine'é Ízrel binanit'a'í nílį́į doo biniyé dibé bighandóó índa dibé bikéé' nanináádóó nándiiłtį́.

⁸Áádóó t'áá nanináágóó nił honishłǫ́ǫ́ nít'éé', índa ninááł ni'ana'í ałtso ásíłdįįd, áádóó nahasdzáán bikáa'gi diné ayóó ádaat'éii dabi'dójíhígi át'éego ni'dójíigo ániishłaa.

⁹Áádóó Ízrel shidine'é danilíinii kéyah bá náhodideesh'áałgo ákwii kéédahojit'į́į doo áádóó k'ihodideeshłééł áádóó doo nahjį' kónáádabidi'doolníił da, índa diné doo yá'áshóonii ana'dandzinii hak'i naazhjéé' yę́ęgi át'éego doo ła' hak'i nináádoojah da,

¹⁰Ízrel shidine'é danilíinii bá nidahodii'aahii ninínilídóó wóshdę́ę́' t'óó yich'į' ana'dandzingo yik'i ninájah nít'éé'. Áádóó ni'ana'í danilíinii t'áá ałtso bik'idiyaa nílį́įgo ándeeshłííł. Áádóó ałdó' nił hashne', Bóhólníihii éí na'áłchíní náás ahoolchíiłgo íidoolííł.

¹¹Kóhodoonííł, ne'iina' nidoot'ih beiníłką́ągo danizází bich'į' nídíídleełgo bił honílǫ́ǫ doo, índa niye'ké náás ahoolchíłígíí bitahdóó ła' aláahgo bee bóhólníihgo bił haz'áanii bohoníłdzilgo ádeeshłííł.

¹²Éí kin shá íidoolííł, áádóó bibikáá'dóó nahat'áii ahóyéel'áágóó bidziilgo ádeeshłííł.

¹³Bizhé'é nishłį́į doo áádóó shiye' nilį́į doo, áádóó Saul éí ninááł nahjį' kóshłaa; éí she'ajooba' bits'ą́ąjį' kwíishłaa yę́ęgi át'éego niye' éí doo bits'ą́ąjį' kódeeshłíił da.

¹⁴Nidi shikin áádóó bee shóhólníihgo bił haz'áanii éí bidziilgo ádeeshłííł. Bibikáá'dóó nahat' áii éí ahóyéel'áágóó bidziilgo ádoolnííł.

¹⁵Díí saadígíí t'áá ałtso bik'ehgo áádóó ił áhoodzaaígíí t'áá ałtso bik'ehgo Néíthan éí David bich'į' hadzoodzíí'.

¹⁶Áádóó aláahgo naat'áanii David éí Bóhólníihii hólónígi jineezdáago ájíní, Bóhólníihii Diyin God nílíinii, ha'át'íísh nishłį́? Sha'ałk'eedóoshą' ha'át'íí daniidlį́įgo kónízahjį' shił nííní'áázh?

¹⁷Diyin God nílíinii, dííyee' nináałgo t'įįhdígoígíí át'é, áádóó ałdó' ná naal'a'í ba'áłchíní náás ahoolchíiłii náasdi át'ée dooleełígíí bee bá háínídzíí', índa diné aláahdi baa nitsídahakeesii dabi'dójíhígi át'éego shaa nitsíníkees, Bóhólníihii Diyin God nílíinii.

¹⁸David ná naal'a'í nił nilínígíí biniinaa ha'át'íísh ałdó' náándidoo'niił? Háálá ná naal'a'í bééhonísin.

¹⁹Bóhólníihii nílíinii, ná naal'a'í bá nijéí bee baa ákonínízinii bik'ehgo díí ayóó ádaat'éii áálíłígíí t'áá ałtso ayóó ádaat'éego baa dahane'.

²⁰Bóhólníihii nílíinii, t'áá ałtsoní baa dahane'ii bik'ehgo dasidiits'ą́ą'go t'áadoo ła' nigi át'éhí da, áádóó t'áá ni t'éiyá Diyin God nílį́.

²¹Áádóó nahasdzáán bikáa'gi dadine'é doo ła' nidine'é Ízrelgi ádaat'ée da; éí Diyin God bidine'é dooleeł biniyé ádá yik'é niná'ídláago Ííjip kéyahdę́ę́' nidine'é nááhíníłnii'ii binááł ana'í ch'ínííníłkaad, áko éí bee ayóó át'éego índa ił ídlį́įgo ił sínílįįd?

²²Háálá nidine'é Ízrel hool'áágóó níí' danilį́įgo íinilaa, áádóó ni, Bóhólníihii nílíinii, biDiyin God sínílį́į́'.

²³Éí bąą k'ad, Bóhólníihii nílíinii, ná naal'a'í áádóó ba'áłchíní náás ahoolchíiłii bídéét'i'go háínídzíi'ii hool'áágóó bidziilgo ánílééh, áádóó t'áá bee háínídzí'ígíí ánílééh.

²⁴Bíni'dii chánahgo nízhi' ayóó át'éego baa ha'niihgo ahool'áa le' kóhá'níigo, T'áá ałtsoní bee Bóhólníihii éí Ízrel dine'é biDiyin God nilį́; t'áá éí Diyin God baa áhályáanii nilį́. Ná naal'a'í David ba'áłchíní náás ahoolchíiłii ninááł dabidziil le'.

²⁵Háálá ni, shiDiyin God nílíinii, ná naal'a'í ba'áłchíní náás ahoolchíiłii bee bił hwíínílne'. Éí bąą ná naal'a'í díí yaa ákoniizį́į'go nich'į' sodoolzin.

²⁶Áko k'ad Bóhólníihii, ni éí Diyin God nílį́, áádóó ná naal'a'í díí yá'át'éehii bee bá nihwííní'ą́.

²⁷Éí bąą k'ad, bíni' nił hóshǫ́ǫgo ná naal'a'í ba'áłchíní náás ahoolchíiłii bik'izhdíídliił, áko ninááł naaldeehgo ahóyéel'áa doo; jó, Bóhólníihii nílíinii, bik'idahojidlíigo ahóyéel'áa doo.