Read Navajo I CHRONICLES 18 Bible Online

I CHRONICLES 18 - Navajo bible

I CHRONICLES 18

¹Áko díí bik'ijį' David éí Filístiya dine'é yik'eh deesdlį́į'go bee bóhólnííh silį́į́', índa Gath kin haal'áii áádóó binaagóó kin dah naazhjaa'ígíí Filístiya dine'é yighaideet'ą́.

²Áádóó Mó'ab dine'é yik'eh deesdlį́į'go éí David yá nidaal'a' daazlį́į'go yich'į' nida'iilé.

³Yufréítiiz tooh nílínídóó David bee hóhólníihgo ájílééh biniyé joogáałgo Zóbah kéyahdóó Héímath kin haal'áajį' aláahgo naat'áanii Hadadíízer bik'eh jideesdlį́į́'.

⁴Áko David éí bitsindaabąąs bijáád naakiígíí t'ááłáhídi mííl áádóó siláo łį́į́' yee nidaabaahígíí tsosts'idi mííl índa siláo t'áá ni' nidaanéhígíí naadiindi mííl yisná. Áádóó łį́į́' éí tsindaabąąs bijáád naakiígíí nideiłbąąsígíí t'áá át'é bitsáts'id jiizhgizh, nidi łį́į́' neeznádiingo oołbąs bíighahgo áádzísįįd.

⁵Nít'éé' Damáskasdóó Síriya dine'é bisiláo éí Zóbah kéyahgi aláahgo naat'áanii Hadadíízer yíká iijeeh yiniyé yinéełgo David éí Síriya dine'é bisiláo naadiin naakidi mííl yinéełii neistseed.

⁶Áádóó Síriya dine'é bikéyahgi Damáskas kin haal'áágóó David hasiláo dah deínéehgo ájiilaa, áádóó Síriya dine'é éí David yá naal'a'í daazlį́į'go yich'į' nida'iiléé nít'éé'. Áádóó Bóhólníihii éí David t'áá hizhdighááhgóó ak'eh hizhdidleehgo áhósin.

⁷Áko David éí óola naagé éí Hadadíízer bá nidaal'a'í ałtso íísdįįdígíí yílák'ee hayiiznilgo Jerúsalemjį' názhníjaa'.

⁸Áádóó ałdó' Hadadíízer bikin haal'á Tíbhath áádóó Kan hoolyéédóó David éí béésh łitsoii t'óó ahayóí názhníjaa'; Sálaman éí díí béésh łitsoii bee bii' tá'ádígisí nitsaaígíí áádóó áyah danii'áii índa łeets'aa' ádajiilaa.

⁹Nít'éé' Héímath kin haal'áadi aláahgo naat'áanii Tóyu éí Zóbah kéyahgi aláahgo naat'áanii Hadadíízer bisiláo t'áá ájít'é ałtso David hak'eh deesdlį́į'go yaa hodiizts'ą́ą'go

¹⁰Tóyu biye' Hadóram éí aláahgo naat'áanii David k'é yididooniił áádóó yá'át'éehgi íinidzaa yididooniił biniyé yich'į' ayííł'a', háálá David éí Hadadíízer yił ana'ahishchį́įgo yik'eh deesdlį́į́'; (jó, Hadadíízer éí Tóyu yił anaa' ahil'į́į́ nít'éé',) áko ha'át'íhída óola áádóó béésh łigaii índa béésh łitsoii bee ádaalyaii néiníjaa'.

¹¹Áko díí ałdó' t'áá ałtso t'áá bił óola índa béésh łigaii éí Íídam dine'é áádóó Mó'ab dine'é áádóó Áman dine'é áádóó Filístiya dine'é índa Ámalek dine'é bits'ą́ą́dóó nináyiizhjaa'ígíí aláahgo naat'áanii David yidíłyingo Bóhólníihii yaa néidiní'ą́.

¹²Áádóó ałdó' Zerowáíyah biyáázh Abísheiyai wolyéii éí Áshįįh Bił Honíts'aa' góyaa Íídam dine'é tseebííts'áadahdi míilgo neistseed.

¹³Áádóó Íídam kéyahgi David hasiláo dah deínéehgo ájiilaa, índa Íídam dine'é éí David yá naal'a'í daazlį́į́'. Áko Bóhólníihii éí David t'áá hizhdighááhgóó ak'eh hizhdidleehgo áhósin.

¹⁴Kót'éego David éí Ízrel dine'é t'áá ałtso yinant'áago doo haa dayit'éégóó áádóó t'áá ákogi át'éego yá hoo'ááł nít'éé'.

¹⁵Áádóó Zerowáíyah biyáázh Jó'ab éí siláo dah deínéehii yinant'á, áádóó Aháílad biye' Jiiháshafat éí naat'áaniishchíín nilį́į́ nít'éé',

¹⁶áádóó Aháítab biye' Zéídak índa Abáíyathar biye' Abímelek éí náá'iiłniihii nilį́į́ nít'éé'; Shávsha éí naaltsoos ííł'íní nilį́į́ nít'éé',

¹⁷áádóó Jiihóíyada biye' Biinéíyah éí Kéreth dine'é índa Pííleth dine'é yinant'á áádóó David biye'ké agháago bídahólnííh nít'éé'.