Read Navajo I CHRONICLES 19 Bible Online

I CHRONICLES 19 - Navajo bible

I CHRONICLES 19

¹Kódahóót'įįdóó bik'ijį' Áman dine'é aláahgo binanit'a'í Néíhash wolyéii daaztsą́ągo bitsásk'ehgi biye' aláahgo naat'áanii náánásdlį́į́'.

²Nít'éé' David ání, Néíhash biye' Héínan baa jiideeshbaał, háálá bizhé'é yę́ę shaa joozba' ni'. Áádóó David éí Héínan bizhé'é yę́ę yaa yínííł nilínígi hadabizhdi'yoołnih biniyé nidaal'a'í bich'į' ajiis'a'. Áko David há nidaal'a'í éí Áman dine'é bikéyahdi Héínan hadabizhdi'yoołnih biniyé baa jíkai.

³Nidi Áman dine'é binanit'a'í danilíinii Héínan ádeiłní, Da' David nizhé'é yę́ę bił nilį́įgo biniinaa hadashi'diyoolnih biniyé shich'į' i'iis'a'ásh nínízin? Bá nidaal'a'í t'óó hada'doosił áádóó haash yit'éego nik'eh hodidoodleeł índa kéyah hadeidoosił yiniyé naalchi'í danilį́įgo yíkai lá!

⁴Éí biniinaa Héínan éí David bá nidaal'a'í dayiiłtsoodgo bidághaa' dayííshéé' áádóó bitł'aa' bíighahjį' bi'éé' daneel'ą́ągo dayiizhgizhgo yéé'níłnii'.

⁵Nít'éé' diné ła' éí diné dabi'dool'aadii ádabi'dool'įįdígíí David yił nídahoolne', áádóó bidááhgóó i'jííł'a', háálá éí diné t'áá íiyisí ádaa yádandzin. Áko aláahgo naat'áanii ábíłní, T'áá Jériko kin haal'áadi nahísóotą́; nihidághaa' nídadínéesą́ągo índa nídoohkah.

⁶Áko Áman dine'é éí David doo bíłdingóó áda'diilyaago yaa ákodaniizį́į'go Héínan índa Áman dine'é éí Mesopotéímiya kéyahdę́ę́' áádóó Síriya-méíyakah kéyahdę́ę́' índa Zóbah kéyahdę́ę́' tsindaabąąs bijáád naakiígíí índa łį́į́' yee nidaabaahii éí béésh łigaii tálent mííl bíighahgo bideená bíká adoojah biniyé yich'į' adeizhjaa'.

⁷Áko tádiindóó ba'aan naakidi mííl tsindaabąąs bijáád naakiígíí áádóó Méíyakahdóó aláahgo naat'áanii índa siláo adeená áká iijeehígíí neheeskaigo Médiiba kin haal'áhígíí bíighahgi nidahaazná. Áman dine'é ałdó' dabikin hadaas'áádę́ę́' anaa' yiniyé áłah daazlį́į́'.

⁸Áádóó éí David yaa hodiizts'ą́ą'go Jó'ab índa diné dahayóii dah deínéhígíí ákǫ́ǫ́ ayiis'a'.

⁹Áman dine'é ch'ídahaaznáago anaa' dahodoołeeł biniyé kin haal'á yah a'atiingi ałkéé' ni'ahí'nil, áádóó aláahgo naat'áanii danilíinii neheeskaígíí éí halgaidi t'áá sahdii dah deínééh.

¹⁰Nít'éé' Jó'ab éí siláo hadáahgi áádóó bikéédę́ę́' ana'í hak'iidoojah yiniyé ałkéé' danít'i'go baa ákozniizį́į'go Ízrel dine'é bisiláo dahayóii ła' bitah jiizláá' áádóó Síriya dine'é bisiláo yił ałk'iidoojah biniyé nizhnínil.

¹¹Áádóó siláo łahjį'ígíí hak'is Abísheiyai bich'į' bizhníłnii'; éí Áman dine'é bisiláo yich'į' ni'ádee'nil.

¹²Áádóó Jó'ab áhodííniid, Síriya dine'é bisiláo shilááh ábóodziil ládą́ą́' shíká adíílwoł, nidi Áman dine'é bisiláo nilááh ábóodziil ládą́ą́' shí éí níká adeeshwoł.

¹³Chánah nílį́į le'; nihidine'é bá áádóó nihiDiyin God bíí' danilį́įgo kin hadaas'áii bá t'áá nihí diné doo nídanilyéesii daniidlį́į doo; háni'dii Bóhólníihii t'áá bí bił yá'át'éhígi át'éego í'doolííł.

¹⁴Áko Jó'ab áádóó diné yił naakaígíí éí Síriya dine'é bisiláo bił da'ahizhdoogą́ą́ł biniyé bit'áahjį' ajookai; nít'éé' hak'ee yóó'adahineezhchą́ą́'.

¹⁵Ákohgo Síriya dine'é bisiláo danéechéehgo Áman dine'é bisiláo dabiiłtsą́ągo bí ałdó' Jó'ab bínaaí Abísheiyai wolyéii yik'ee dah dadíníichą́ą'go kin haal'áajį' yah adahineezhchą́ą́'. Nít'éé' Jó'ab éí Jerúsalemjį' nádzá.

¹⁶Nidi Síriya dine'é bisiláo éí Ízrel dine'é bisiláo tsístł'adabiniłkaadgo yaa ákodaniizį́į'go Yufréítiiz tooh wónaanídi Síriya kéyahdóó siláo dah deínéehii áłah áyiilaa, áádóó Hadadíízer bisiláo dah deínéehii yinanit'a'í Shófak halą́ąjį' yigáa łgo níná.

¹⁷Áádóó David díí bee hoł hóóne'go Ízrel dine'é bisiláo t'áá ałtso áłah ájiilaago Jórdan tooh ha'naa nizhnínáago bik'i dah jizhjéé'. Ákohgo Síriya dine'é bisiláo bich'į' anaa' hodoołeeł biniyé David hasiláo ałkéé' deezt'i'go Síriya dine'é bisiláo hoł da'ahoogą́ą́'.

¹⁸Nít'éé' Síriya dine'é bisiláo éí Ízrel dine'é bisiláo yik'ee dah dadíníichą́ą́', áko Síriya dine'é bisiláo tsosts'idi mííl ánéelą́ą'go tsindaabąąs bijáád naakiígíí yee nidaabaahii áádóó dízdiindi mííl ánéelą́ą'go t'áá ni' nidaabaahii éí David nahastseed índa Síriya dine'é bisiláo dah deínéehii binanit'a'í Shófak wolyéii ałdó' yiyiisxį́.

¹⁹Áádóó Hadadíízer wolyéii bá nidaal'a'í éí Ízrel dine'é bisiláo tsístł'adabineeskaadgo yaa ákodaniizį́į'go David yił k'é nídahasłį́į́', índa t'óó yá nidaal'a'í daazlį́į́' áádóó Síriya dine'é bisiláo doo t'áá k'ad Áman dine'é bisiláo yíká ánáánáájée' da.