Read Navajo I CHRONICLES 20 Bible Online

I CHRONICLES 20 - Navajo bible

I CHRONICLES 20

¹Áádóó ałtso yíhaidóó bik'ijį' anaa' hodoołeeł biniyé aláahgo naat'áanii ch'ídahidookah baa hoolzhiizh, nít'éé' Jó'ab dziilí bee siláo ch'íiní'eezhgo Áman dine'é bikéyah yii' dahóółchxǫ'go Rábah kin haal'áhígíí yizénáshzhiizh. Nidi David éí t'áá Jerúsalem kin haal'áadi naaghá. Áko Jó'ab éí Rábah kin haal'áhígíí baatįįh jíí'eezhgo ałtso ádajisdįįd.

²Nít'éé' Rábah aláahgo binanit'a'í binaat'á ch'ah David néidii'ą́, áko óola tálent dah adiidloh bíighahgo áníłdáás lá, áádóó tsé da'ílíinii bee naashch'ąą', áko éí David hak'i dazdeez'ą́, áádóó kin haal'áhídóó naalye'é daasnáanii lą'í ch'íjiizhjaa'.

³Áko diné ákwii kéédahat'ínígíí ch'íiní'eezhgo tsin bee nehech'iishí yee nida'iich'iish áádóó bis bee naatseedí índa tsénił yee da'atseełgo áyiilaa. Nít'éé' David éí Áman dine'é bikin hadaas'áágóó t'áá ałtso ákóyiilaa. Áádóó bí índa bidine'é t'áá ałtso Jerúsalemgóó anáhaaskai.

⁴Kódzaago Gíízer kin haal'áagi Filístiya dine'é bił ałk'i jiijéé'; íídą́ą́' Húshath dine'é nilíinii Síbiikai wolyéii éí yé'iitsoh ba'áłchíní ahoolchíiłii ła' Sípai wolyéii yiyiisxį́, áádóó Filístiya dine'é bik'eh dahodeesdlį́į́'.

⁵Áádóó Filístiya dine'é bił ałk'i náájiijée'go Jéíyer biye' Elhéínan wolyéii éí Gath kin haal'áádóó diné Goláíyath bitsilí Lámai wolyéii yiyiisxį́; bitsiidétáán éí áah sitáangi áníldííl.

⁶Nít'éé' Gath kin haal'áagi ałk'i náájiijée'go ákwii diné ayóó áníłnééz léi' naaghá; éí bílázhoozh naakits'áadah áádóó bikédiníbiní naakits'áadah, áko t'áá ałtsogo naadiin dį́į́'; éí ałdó' yé'iitsoh ba'áłchíní ahoolchíiłii ła' nilį́.

⁷Áádóó Ízrel dine'é nayé'é'įįhgo David bik'is Shímiya biye' Jánathan wolyéii éí hwiisxį́.

⁸Díí éí Gath kin haal'áagi yé'iitsoh bá nidahaazhchį́į́ nít'éé'; éí David áádóó bá nidaal'a'í nidabistseed.