Read Navajo I CHRONICLES 22 Bible Online

I CHRONICLES 22 - Navajo bible

I CHRONICLES 22

¹Nít'éé' David ání, Díí Bóhólníihii Diyin God bikin bii' sohodizin át'é, áádóó díí bikáá' náá'iiniihí bikáa'jį' didlidgo nááhániihii Ízrel dine'é bá át'é.

²Áádóó David éí Ízrel dine'é bikéyahgi dé'éyóní nidaakaígíí áłah ádoolníiłgo yee nihoní'ą́ áádóó tsé bee kin ádoolnííł biniyé tsé hasht'e'niyída'iitseełii yits'éinínil.

³Áko David éí yah a'atiingi dáń'dítį́hí biniyé ił adaalkaałí índa bee ahída'iilcha'ii ádadoolnííł biniyé béésh dootł'izh áłah ájiilaa, áádóó béésh łitsoii t'óó ahayóí t'áadoo dah dahidiidleehí áłah ájiilaa,

⁴áádóó ałdó' dilk'istsoh tsin neheeshjíí' t'óó ahayóí, háálá Sáídan índa Táir kin haal'áádóó dilk'istsoh tsin neheeshjíí' t'óó ahayóí David yaa deiznil.

⁵Nít'éé' David ádííniid, Shiye' Sálaman wolyéii ániid naaghá índa t'ah dit'ódí, áádóó Bóhólníihii bá kin nitsaago índa naashch'ąą'go ádoolnííł; éí kéyah t'áá ałtsogóó baa hane' doo, áádóó baa ha'niih doo biniyé ádoolnííł. Éí bąą k'ad, biniyé hasht'edideeshnííł. Áko David dazhdootsaałígíí t'áá bítsé lą'ígóó hasht'ezhdiidzaa.

⁶Áko haye' Sálaman wolyéii hágo bizhdííniid, áádóó Ízrel dine'é biBóhólníihii Diyin God bá kin ázhdoolíiłgo bee hóhodzoosníí'.

⁷Áádóó David éí Sálaman ííłní, Shiye' nílíinii, Bóhólníihii shiDiyin God bízhi' baa ha'niih doo biniyé kin ádeeshłííł nisin nít'éé'.

⁸Nidi Bóhólníihii t'áá bí bizaad yee shich'į' haadzíi'go kóní, Diné lą'í bidił bits'ádaazlį́įgo íinilaa, áádóó ayóó át'éego nisíníbaa'. Shízhi' baa ha'niih doo biniyé kin doo ádíílíił da, háálá nahasdzáán bikáa'gi shinááł diné lą'í nisíníłtseed.

⁹Jó, ashkii ná doochííł, éí diné bił hasht'ehodít'éii nilį́į doo; bikéyah binaagóó bi'ana'í doo anadabił'į́į́góó ádeeshłííł. Sálaman bee yídóojiił. Bíyoołkááł biyi' Ízrel dine'é bich'į' hózhǫ́ǫgo áádóó bił hodéezyéelgo ádeeshłííł.

¹⁰Éí shízhi' baa ha'niih doo biniyé shá kin íidoolííł, áádóó shiye' nilį́į doo índa shí bizhé'é nishłį́į doo, áádóó aláahgo bee bóhólníihgo bił haz'ą́ągi bikáá'dóó nahat'áii chánah ádeeshłíiłgo Ízrel dine'é yinant'áago ahool'áa doo.

¹¹K'ad, shiye' nílíinii, Bóhólníihii nił hólǫ́ǫ le', áádóó yá'át'éehii ła' danile' doo áádóó Bóhólníihii niDiyin God t'áá yee naa yááłti'ígi át'éego bá kin ádíílííł.

¹²T'áá hazhó'ó Bóhólníihii éí bee hódzáanii áádóó bee ak'idi'yiitįįhii neididoo'áałgo Ízrel dine'é binant'áa dooleeł biniyé Bóhólníihii niDiyin God bibee haz'áanii bik'eh honíł'į́į doo.

¹³Bóhólníihii éí Ízrel dine'é bídéét'i'go yee nihwiiz'áanii índa yee nihodiiz'áanii Mózes bee bich'į' ha'oodzíi'ii hazhó'ó bik'eh honíł'į́įgo yá'át'éehgo nich'į' áhooníił doo. Nidziilgo í'díínílzin, áádóó yéego chánah nílį́; t'áadoo nił yé'í índa doo nidi nídíníílyis da.

¹⁴Jó, k'ad t'áá shizááká Bóhólníihii bikin bii' sohodizin biniyé hasht'ediisdzaa; óola tálent wolyéhígíí neeznádiindi mííl dah adiidloh bíighahgo áádóó béésh łigaii tálent wolyéhígíí mííltsoh dah adiidloh bíighahgo índa béésh łitsoii áádóó béésh dootł'izh t'óó ahayóí t'áadoo dah dahidiidleehí shóiséłt'e', índa tsin neheeshjíí' áádóó tsé ałdó' hasht'eishłaa; éí ła' bínéidíí'nił.

¹⁵Áádóó ałdó' diné nidaalnishii lą'í nił hólǫ́; tsin neheeshjíí' áádóó tsé hasht'edeił'íinii índa diné naanish ał'ąą át'éii dayiichįįhii dahólǫ́.

¹⁶Óola áádóó béésh łigaii áádóó béésh łitsoii índa béésh dootł'izh doo jóołta' ánéelą́ą' da. Éí bąą nídiidáahgo binanilnish, áádóó Bóhólníihii nił hólǫ́ǫ le'.

¹⁷David éí Ízrel dine'é binanit'a'í danilíinii t'áá ałtso haye' Sálaman wolyéii yíká adoojahgo yee haadzíi'go kóní,

¹⁸Bóhólníihii nihiDiyin God nilíinii nihił hólǫ́ áádóó t'áá ałtsodę́ę́' nihił hasht'ehodít'éego áyiilaa, háálá kéyah yikáá' kéédahat'íinii t'áá ałtso shílák'eidíí'ą́, éí kéyahgi kéédahat'ínígíí Bóhólníihii áádóó bidine'é binááł bik'eh dahodeesdlį́į́'.

¹⁹K'ad nihijéí índa nihii' naazíinii bee Bóhólníihii nihiDiyin God hádaoht'į́; éí bąą k'ad, dah dohkáahgo Bóhólníihii Diyin God bihodiyingo haz'ą́ ádaahłééh, áko Bóhólníihii bízhi' baa ha'niih doo biniyé kin ádoolníłígíí bii' góne' tsits'aa' dílzinii Bóhólníihii bibee aha'deet'áanii bii' sinilii yah adoot'ááł, áádóó Diyin God bá chodao'íinii dílzinii yah adoojih.