Read Navajo I CHRONICLES 23 Bible Online

I CHRONICLES 23 - Navajo bible

I CHRONICLES 23

¹Nít'éé' David haastihgo áádóó lą'í binááhaigo biye' Sálaman éí Ízrel dine'é aláahgo binanit'a'í nilį́įgo áyiilaa.

²Áádóó Ízrel dine'é bindanit'a'í t'áá ałtso áádóó nááda'iiłniihii índa Líívai dine'é t'áá bił áłah áyiilaa.

³Áko Líívai dine'é éí tádiin áádóó dego béédááhaígíí yéélta'go t'áá ałtsogo tádiindóó ba'aan tseebíidi mííl ánéelą́ą́'.

⁴Líívai dine'é naadiin dį́įdi mííl ánéelą́ą'go Bóhólníihii bikin bii' sohodizin bindazhdoolnish biniyé niho'dee'nil; hastą́ądi mííl ánéelą́ą'go bídahólníihii índa ándahwii'aahii danilį́į́ nít'éé'.

⁵Áádóó ałdó' dį́įdi mííl ánéelą́ą'go dáń'dítį́hí yaa ádahalyą́, áádóó dį́įdi mííl ánéelą́ą'go sin yee nidaanéii bee Bóhólníihii baa dahojiniih doo biniyé íishłaaígíí bee nidajinée doo, níigo David haadzíí'.

⁶Áádóó David éí Líívai biye'ké Gérshan áádóó Kóhath índa Miirárai dajoolyéé nít'éé' yę́ę bik'ehgo ał'ąą nihodee'nil.

⁷Gérshan ba'áłchíní ahoolchíiłii ła' Léíyadan índa Shímiyai wolyé.

⁸Léíyadan biye'ké tált'é: Jiiháíyel alą́ąjį' bóhólnííh, ła'ígíí Zíítham índa Jówel wolyé.

⁹Shímiyai biye'ké tált'é: éí Shiilómith áádóó Héíziyel índa Héíran daolyé. Díí éí Léíyadan ba'áłchíní náás ahoolchíiłii yá aląąjį' naazį́.

¹⁰Áádóó Shímiyai biye'ké dį́lt'é: éí Jéíhath áádóó Záízah áádóó Jíí'ash índa Biiráíyah daolyé.

¹¹Jéíhath aláahgo bóhólnííh, áádóó bikéé' góne' éí Záízah, nidi Jíí'ash índa Biiráíyah biye'ké doo lą'í da; éí bąą t'áájíłá'í náás ahijoolchíił ii jilį́įgo ho'dólta'.

¹²Kóhath biye'ké dį́lt'é: éí Ámram áádóó Ízxar áádóó Hííbran índa Azáíyel daolyé.

¹³Ámram éí biye'ké Éran áádóó Mózes wolyé. Áko Éran éí dadílzinii chodao'ínígíí dílzingo ájósin doo biniyé ats'áho'deeltį́. Hó áádóó haye'ké díí hondaanishgo ahool'áa doo. Bóhólníihii binááł tsin bijeeh dilidgo łikání halchinii náádajiiłniihgo Bóhólníihii bá nidajil'a' doo índa bízhi' bee ak'ideijidlíigo ahool'áa doo.

¹⁴Mózes joolyéii Diyin God bits'ą́ą́dóó diné jílíinii haye'ké éí Líívai dine'é bił ho'dólta'.

¹⁵Mózes biye'ké Gérsham áádóó Eliyíízer wolyé.

¹⁶Gérsham biye'ké bits'ą́ą́dóó Shiibúwel wolyéii aláahgo bóhólnííh.

¹⁷Áádóó Eliyíízer biye' éí Riihabáíyah wolyéii aláahgo bóhólnííh. Áádóó Eliyíízer biye'ké doo ła' nááhódlǫ́ǫ da, nidi Riihabáíyah biye'ké t'óó ahayóí.

¹⁸Ízxar biye'ké bits'ą́ą́dóó Shiilómith aláahgo bóhólnííh.

¹⁹Díí Hííbran biye'ké ádaat'į́. Jiiráíyah wolyéii alą́ąjį' bóhólnííh; Amaráíyah aké'é góne' bóhólnííh; Jahéíziyel wolyéii tá'á góne' bóhólnííh áádóó Jékamiyam wolyéii dį́'í góne' bóhólnííh.

²⁰Azáíyel biye'ké Máíkah alą́ąjį' bóhólnííh, áádóó Jiisáíyah éí aké'é góne' bóhólnííh.

²¹Miirárai biye'ké Málai áádóó Múshai wolyé. Málai biye'ké Eliyéízar áádóó Kish wolyé.

²²Eliyéízar daaztsą́, áko biye'ké doo hólǫ́ǫ da nít'éé', nidi bitsi'ké t'éiyá hólǫ́ǫgo hak'is Kish biye'ké yił ahá da'agééh nít'éé'.

²³Múshai biye'ké táá': éí Málai áádóó Ííder índa Jériimath daolyé.

²⁴Díí éí Líívai biye'ké danilį́įgo dabizhé'é yę́ę bits'ą́ą́dóó náás ahoolchííł; dabizhé'é yę́ę aláahgo bídahólníihii dabízhi' bik'ehgo dayéélta'; éí naadiindóó dego béédááhaigo Bóhólníihii bikin bii' sohodizin góne' nidaalnishgo chodao'į́įgo nidaal'a'.

²⁵Háálá David ádííniid, Ízrel dine'é biBóhólníihii Diyin God nilíinii bidine'é háá'áyį́į́h yeidiní'ą́ągo Jerúsalem kin haal'áagi kéédahat'į́įgo ahóyéel'áa doo.

²⁶Áádóó Líívai dine'é ałdó' níbaal bii' hodílzinii índa beedí chodao'íinii doo nináádajigée da doo.

²⁷Áko akée'di saad bee David hadziisdzí'ígíí bik'ehgo Líívai dine'é naadiindóó dego béédááhaígíí yéélta'.

²⁸Háálá Bóhólníihii bikin bii' sohodizingi éí tł'óo'di haz'ánígi áádóó wóne'é dahooghangi Éran biye'ké danilíinii nidaal'a' áádóó dadílzinii t'áá ałtso chin bąąh ádingo óolzingo áádóó Diyin God bikin bii' sohodizingi nidaalnish doo biniyé nibi'dee'nil.

²⁹Diyin God bich'į' bááh nááhániihii ałdó' índa ch'iyáán nááhániih biniyé ak'áán dibahí, díík'ǫsh t'áágééd bááh ádaalyaii áádóó beedí bee ályaii áádóó tsé'ást'éí ályaii índa t'áá ałtso ał'ąą áníłtsogo bída'néél'ąądii yindaalnish doo,

³⁰áádóó abínígo nidzizį́įgo Bóhólníihii bich'į' ahééh daznízin áádóó baa dahojiniih índa e'e'áahgo ałdó' t'áá ákódajit'į́į doo,

³¹áádóó háá'áyį́į́h jį́į́ góne' áádóó dah néitį́į́h góne' áádóó dílzingo áłah ná'ádleeh néi'aahgo bee há nihodeet'ánígíí bik'ehgo Bóhólníihii binááł náás dajíłt'éehgo Bóhólníihii bich'į' didlidgo nááhániihígíí t'áá ałtso náádajiiłniih doo.

³²Áádóó níbaal bii' dahozdísinii áádóó hodiyingo haz'áanii baa ádahojilyą́ą doo índa Éran haye'ké bik'isóó danilíinii éí Bóhólníihii bikingi bá nidajil'a' doo.