Read Navajo I CHRONICLES 27 Bible Online

I CHRONICLES 27 - Navajo bible

I CHRONICLES 27

¹Ízrel dine'é bitahdóó azhé'é aláahgo bídahólníihii danilíinii áádóó siláo mííl daníjaa'ii áádóó siláo neeznádiin daníjaa'ii binanit'a'í danilíinii índa bídahólníihii danilíinii, éí aláahgo naat'áanii yá nidaal'a'go yah ahikááh áádóó ch'éédahakáahgo nínádízi'go nídahidizíidgo nináháhááh. Ninádajilnishígíí naadiin dį́įdi mííl ázhnéelą́ą'go nínádízi'jį' nahjį' hadajiikáahgo ałkéé' hodis'nil.

²Alą́ąjį' nídízííd binih Zábdiyel biye' Jashóbiyam éí áłtsé siláo dah yinéełii naadiin dį́įdi mííl ánéelą́ą'go yinant'áá nít'éé'.

³Jashóbiyam éí Píírez dine'é bitahdóó nilíinii átsé nídízííd binih ałdó' siláo dah yinéełii bindanit'a'í t'áá ałtso binazhnit'áá nít'éé'.

⁴Naaki nídízííd binih Dódai éí Ahówah dine'é nilį́įgo siláo dah yinéełii bee bóhólnííh nít'éé'. Míklath ałdó' bóhólníihgo siláo naadiin dį́įdi mííl ánéelą́ą'go yinant'áá nít'éé'.

⁵Táá' nídízííd binih Jehóíyada aláahgo náá'iiłniihii nilíinii biye' Biinéíyah éí táá' góne' siláo dah yinéełii yinanit'a'í nilį́įgo siláo naadiin dį́įdi mííl ánéelą́ą'go yinant'áá nít'éé'.

⁶Díí Biinéíyah éí siláo tádiin daníjaa'ii bitahdóó diné ayóó ábóodziilii jílį́įgo éí siláo tádiinígíí bá aląąjį' sizíinii jílį́. Biinéíyah biye' Amízabad éí siláo dah yinéełii yitah hólǫ́.

⁷Dį́į́' nídízííd binih Jó'ab bitsilí Éísahel éí dį́į́' góne' siláo dah yinéełii yinanit'a'í nilį́įgo áádóó bikéédę́ę́' biye' Zebadáíyah éí siláo naadiin dį́įdi mííl ánéelą́ą'go yinant'áá nít'éé'.

⁸Ashdla' nídízííd binih Ízrah dine'é Shámhath éí ashdla' góne' siláo dah yinéełii yinanit'a'í nilį́įgo éí naadiin dį́įdi mííl ánéelą́ą'go yinant'áá nít'éé'.

⁹Hastą́ą́h nídízííd binih Tekówahdóó dine'é Íkesh biye' Áíra éí hastą́ą́h góne' siláo dah yinéełii yinanit'a'í nilį́įgo naadiin dį́įdi mííl ánéelą́ą'go yinant'áá nít'éé'.

¹⁰Tsosts'id nídízííd binih Pélan hoolyéédóó Íífreiyim dine'é ła' Híílez éí tsosts'id góne' siláo dah yinéełii yinanit'a'í nilį́įgo naadiin dį́įdi mííl ánéelą́ą'go yinant'áá nít'éé'.

¹¹Tseebíí nídízííd binih Zíírah dine'é bitahdóó Húsha dine'é ła' Síbiikai éí tseebíí góne' siláo dah yinéełii yinanit'a'í nilį́įgo naadiin dį́įdi mííl ánéelą́ą'go yinant'áá nít'éé'.

¹²Náhást'éí nídízííd binih Ánathath kin haal'áádóó Bénjamin dine'é ła' Éíbiyíízer éí náhást'éí góne' siláo dah yinéełii yinanit'a'í nilį́įgo naadiin dį́įdi mííl ánéelą́ą'go yinant'áá nít'éé'.

¹³Neeznáá nídízííd binih Niitófah kin haal'áádóó Zíírah dine'é ła' Maharéíyai éí neeznáá góne' siláo dah yinéełii yinanit'a'í nilį́įgo naadiin dį́įdi mííl ánéelą́ą'go yinant'áá nít'éé'.

¹⁴Ła'ts'áadah nídízííd binih Pírathan kin haal'áádóó Íífreiyim dine'é ła' Biinéíyah éí ła'ts'áadah góne' siláo dah yinéełii yinanit'a'í nilį́įgo naadiin dį́įdi mííl ánéelą́ą'go yinant'áá nít'éé'.

¹⁵Naakits'áadah nídízííd binih Niitófah kin haal'áádóó Áthniyel dine'é ła' Héldeiyai éí naakits'áadah góne' siláo dah yinéełii yinanit'a'í nilį́įgo naadiin dį́įdi mííl ánéelą́ą'go yinant'áá nít'éé'.

¹⁶Náá'áłdó' Ízrel dine'é yinanit'a'í danilíinii kódaolyé: Zíkrai biye' Eliyíízer éí Rúben dine'é yinant'áá nít'éé'. Méíyakah biye' Shefatáíyah éí Símiyan dine'é yinant'áá nít'éé'.

¹⁷Kémyu'el biye' Hashabáíyah éí Líívai dine'é yinant'áá nít'éé'. Zéídak éí Éran dine'é yinant'áá nít'éé'.

¹⁸David bínaaí ła' Iiláíhu éí Júdah dine'é yinant'áá nít'éé'. Máíkel biye' Ámrii éí Ísakar dine'é yinant'áá nít'éé'.

¹⁹Obadáíyah biye' Ishméíyah éí Zébyulan dine'é yinant'áá nít'éé'. Ázriyel biye' Jériimath éí Náftalai dine'é yinant'áá nít'éé'.

²⁰Azaráíyah biye' Hoshíya éí Íífreiyim dine'é yinant'áá nít'éé'. Piidéíyah biye' Jówel éí Manáseh dine'é ałníí'dóóígíí yinant'áá nít'éé'.

²¹Zekaráíyah biye' Ído éí Gíliyad nahós'a'gi Manáseh dine'é ałníí'dóóígíí yinant'áá nít'éé'. Ábner biye' Jéísiyel éí Bénjamin dine'é yinant'áá nít'éé'.

²²Jiiróham biye' Azéíriyel éí Dan dine'é yinant'áá nít'éé'. Díí éí Ízrel dine'é yinanit'a'í danilį́į́ nít'éé'.

²³Nidi David éí naadiindóó yaago dinééh béédááhaígíí t'áadoo yiyííłta' da, háálá Ízrel dine'é sǫ'ígi ánéelą́ą'go k'ee'ąą yidínóo łt'į́įłgo Bóhólníihii yee nihoní'ą́.

²⁴Zerowáíyah biyáázh Jó'ab wolyéii diné yi'ííníiłta' nidi t'áadoo ałtso yiyííłta' da; bi'ízhníiłta'ígíí biniinaa Ízrel dine'é bik'ijį' hóóchį'go atídabi'diilyaa áádóó jííłta'ígíí éí aláahgo naat'áanii David binaaltsoos Kránikals wolyéii doo bik'inídadzíízoh da.

²⁵Áádóó Éídiyel biye' Azméíveth éí aláahgo naat'áanii biyódí ádaat'éii bee bóhólnííh. Áádóó Azáíyah biye' Jiihánathan éí halgaidi áádóó kin hadaas'áagi áádóó kin dah naazhjaa'gi índa yada'iitł'ingo bikáá'dóó ha'íídées'į́'í bił nahaz'ą́ągi kin bii' nooh nída'achíihii bee bóhólnííh.

²⁶Kíílab biye' Ézrai éí dáda'ak'ehgóó ninádahwiiłdla'ígíí bee bóhólnííh.

²⁷Réímath kin haal'áádóó Shímiyai éí ch' il na'atł'o'ii deíl'áhígíí yaa áhályą́ą́ nít'éé' áádóó Shíífam hoolyéédóó Zábdai éí wáin bii' nooh nídaachíhígíí yaa áhályą́ą́ nít'éé'.

²⁸Gííder hoolyéédóó Béíyal-héínan éí áliv tsin naazkaadígíí áádóó síkamor tsin naazkaadígíí wóyahgo dahoníteelgóó dahólónígíí yaa áhályą́ą́ nít'éé'. Jó'ash éí áliv bik'ah nooh nídaachíihii yaa áhályą́ą́ nít'éé'.

²⁹Shéran nahós'a'dóó Shítrai éí Shéran nahós'a'gi dibé yaa áhályą́ą́ nít'éé'. Adléíyai biye' Shéífat éí honíts'aa' góyaa béégashii yaa áhályą́ą́ nít'éé'.

³⁰Íshmeiyel dine'é nilíinii Óbil éí ghą́ą́'ask'idii yaa áhályą́ą́ nít'éé'. Miirónath nahós'a'dóó Jedíyah éí télii yaa áhályą́ą́ nít'éé'.

³¹Héíger dine'é ła' Jéíziz éí dibé yaa áhályą́ą́ nít'éé'. Díí éí t'áá ałtso aláahgo naat'áanii David binaalye'é baa áháyą́ągi yindant'áá nít'éé'.

³²Jánathan éí David bahastóí jílį́įgo kót'é nínígíí jílį́, diné hóyáanii áádóó naaltsoos ííł'íní jílį́ áádóó Hákmonai biye' Jiiháíyel éí aláahgo naat'áanii biye'ké neinitin nít'éé'.

³³Ahíthofel éí aláahgo naat'áanii bikót'é nínígíí nilį́ áádóó Árkai dine'é ła' Húshai éí aláahgo naat'áanii yik'is nilį́įgo yił na'ahilyéé nít'éé'.

³⁴Biinéíyah biye' Jiihóíyadah áádóó Abáíyathar éí Ahíthofel bits'ásk'ehgi na'ak'íyáłti'ii silį́į'go dah nááneezké índa aláahgo naat'áanii bisiláo dah deínéehii binanit'a'í Jó'ab wolyéé nít'éé'.