Read Navajo I CHRONICLES 28 Bible Online

I CHRONICLES 28 - Navajo bible

I CHRONICLES 28

¹Áádóó David éí Ízrel dine'é binanit'a'í t'áá ałtso: dadine'é binaat'áanii danilíinii áádóó siláo dah deínéehii binanit'a'í danilíinii aláahgo naat'áanii bá nidaal'a'go ałkéé' bi' dis'nil áádóó siláo mííl daníjaa'ii áádóó siláo neeznádiin daníjaa'ii binanit'a'í danilíinii áádóó aláahgo naat'áanii biye'ké bił biyódí áádóó bee dahólóonii yaa ádahalyáanii áádóó bídahólníihii áádóó diné dahayóii índa diné doo nídanilyéesii yił Jerúsalemjį' áłah áhoolaa.

²Áko aláahgo naat'áanii David yiizį'go ání, Dashíínółts'ą́ą́', shik'isóó índa shidine'é danohłíinii, t'áá ádíiyi'ídóó kwíiniizį́į́', tsits'aa' dílzinii Bóhólníihii bibee aha'deet'áanii bii' sinilii hasht'e'si'ą́ą doogi índa nihiDiyin God bibikáá' dah adées'eezí si'ą́ą doogi ádeeshłíłígíí bá hasht'edideesh'nííł.

³Nít'éé' Diyin God áshidííniid, Shízhi' baa ha'niih doo biniyé kin doo ádíílíił da, háálá diné naazbaa'ii nílį́, áádóó diné nisíníłtseedgo bidił bits'ádaazlį́įgo íinilaa.

⁴Azhą́ ákót'ée nidi, Ízrel dine'é biBóhólníihii Diyin God náshidiiłtį́; éí shizhé'é yę́ę ba'áłchíní náás ahoolchíiłii t'áá ałtso bits'ą́ą́dóó Ízrel dine'é aláahgo binanit'a'í nishłį́įgo ahool'áa doo, háálá Júdah dine'é bídahólníih doo biniyé náyiizlą́ą́', áádóó Júdah dine'é bits'ą́ą́dóó, shizhé'é yę́ę ba'áłchíní bits'ą́ą́dóó, shizhé'é yę́ę biye'ké bitahdóó shí bił nishłį́įgo Ízrel dine'é t'áá ałtso aláahgo binanit'a'í nishłį́įgo áshiilaa.

⁵Áádóó shiye'ké t'áá ałtso bitahdóó, (háálá Bóhólníihii shiye'ké lą'í sheinínil,) shiye' Sálaman wolyéii Bóhólníihii ts'ídá aláahgo bee bíhólníihgo bił haz'ą́ągi bikáá'dóó nahat'áii yikáá' dah yineesdáago Ízrel dine'é yinant'áa doo biniyé nábidiiłtį́.

⁶Áádóó áshíłní, Niye' Sálaman éí shikin bii' sohodizin áádóó binaagi nahaz'ánígíí íidoolííł, háálá shiye' jílį́į doo áádóó hazhé'é nishłį́į doo biniyé náhodiiłtį́.

⁷Náá'áłdó' t'áá áłahjį' shibik'eh ó'oo'níiłii índa bee nihodiish'aahii díí jį́ át'éhígi át'éego bik'eh hojíł'į́į́ ládą́ą́' bee hóhólníihgo hoł haz'ą́ągi hool'áágóó chánah ádeeshłííł.

⁸Éí bąą k'ad, Bóhólníihii éí Ízrel dine'é t'áá ałtso áłah áyiilaaígíí dabinááł áádóó nihiDiyin God nihíists'ą́ą'go Bóhólníihii nihiDiyin God bibik'eh ó'oo'níiłii t'áá ałtso bik'eh dahonoł'į́ áádóó hazhó'ó nidaałkaah, áko kéyah yá'át'éhígíí nihíí' dooleeł áádóó niha'áłchíní náás da'ahílchíhígíí daabíi'go ahool'áa doo.

⁹Áádóó ni, shiye' nílíinii, Sálaman, nizhé'é biDiyin God bééhonísįįh índa nijéí t'áá át'é bee áádóó níni' nilį́įgo bá nanil'a', háálá Bóhólníihii ajéí t'áá át'é haisííd áádóó áhwiindzingo nitsáhákees t'áá ałtso bił bééhózin; hánít'į́įgo bik'ídíínááł, nidi yóó'adííní'ą́ągo bí ałdó' hool'áágóó yóó'andidoo'ááł.

¹⁰K'ad hazhó'ó baa nitsíníkees, háálá Bóhólníihii bá kin hodiyingo haz'ą́ ádíílíiłgo ná nidiiłtį́; nidziil ádíínílzin índa ánílééh.

¹¹Nít'éé' David biye' Sálaman éí kin bii' sohodizin bich'éédą́ą'gi chaha'oh áádóó bikin ádadoolníłígíí áádóó yódí bá dahooghanígíí, adeídi nahaz'ánígíí, wóne'é nahaz'ánígíí índa ná'áne'ídi aa a'ááh hasinii bił haz'áanii éí bik'ehgo áda'doolníłígíí yeiníłtsooz,

¹²áádóó Diyin God biNíłch'i Diyinii bíniik'ehgo t'áá ałtso Bóhólníihii bikin bii' sohodizin binaagi nahaz'ánígíí áádóó biyi' góne' nahaz'ánígíí áádóó Diyin God bikin bii' sohodizin góne' yódí ádaat'éii bá haz'ą́ągi índa chodao'íinii dadílyinii bá haz'ą́ągi há bik'eh áhoolyaa.

¹³Áádóó ałdó' nááda'iiłniihii índa Líívai dine'é yik'ehgo nidaalnish dooleełígíí áádóó Bóhólníihii bikin bii' sohodizin góne' nidaal'a'go ałkéé' bi'dis'nil dooígíí índa Bóhólníihii bikin bii' sohodizin góne' chodao'į́į dooígíí t'áá ałtso há bik'eh áhoolyaa.

¹⁴Áádóó nidajil'a'go bee nidajilnish dooleełii t'áá ałtso óola chodeidoo'įįłii dah dahidiidleehgo índa béésh łigaii chodeidoo'įįłii dah dahidiidleehgo haidiní'ą́.

¹⁵Bee hool'iní bá yadaa'ii'áii áádóó bílátahdóó bee dahool'inígíí ádazhdoolííł biniyé óola t'áá bízhání chodeidoo'įįłii dah dahidiidleehgo áádóó béésh łigaii t'áá bízhání chodeidoo'įįłii dah dahidiidleehgo haidiní'ą́.

¹⁶Áádóó bááh nááhániihii bá bikáá' adání óola bik'ídooltih índa bikáá' adání béésh łigaii bik'ídadooltih biniyé dah dahidiidleehgo haidiní'ą́.

¹⁷Bíla' táa'ii, ásaa' nímaazí, bee adlání áádóó óola ásaa' nitsaaígíí índa óola t'áá bízhání chodei'doo'įįłii dah dahidiidleehgo béésh łigaii ásaa' nitsaaígíí bee ádazhdoolííł biniyé béésh łigaii t'áá bízhání dah dahidiidleehgo haidiní'ą́.

¹⁸Áádóó tsin bijeeh dilidgo łikání halchinii bikáá' nááhániih dooígíí óola t'áá bízhání bik'ídooltih biniyé dah dahidiidleehgo áádóó diyingo naal'a'í chérabim wolyéii bit'a' dah yoołbałgo óola bee hadidoolníiłgo tsits'aa' dílzinii Bóhólníihii bibee aha'deet'áanii bii' sinilii bikáá'dóó ałch'į' bit'a' yiiníłbaalgo bik'ehgo ádoolníłígíí haidiní'ą́.

¹⁹David haadzíi'go ání, Díí t'áá át'é saad bee ak'e'ashchínígíí, t'áá éí bik'ehgo ádoolníłígíí t'áá ałtso bik'idi'deeshtį́į́ł biniyé Bóhólníihii shił ííshjání áyiilaa.

²⁰Nít'éé' David biye' Sálaman ííłní, Nidziilgo í'díínílzin, áádóó chánah nílį́įgo bi'íínísin; t'áadoo nił yé'í áádóó t'áadoo ádił nisindáhí, háálá Bóhólníihii Diyin God t'áá éí shiDiyin nilíinii nił hólǫ́ǫ doo, índa Bóhólníihii bikin bii' sohodizin ałtso binishínílnishjį' doo ch'ééh ádííł'įįł da, áádóó doo yóó'andidoo'áał da.

²¹Áádóó, jó, nááda'iiłniihii índa Líívai dine'é ałkéé' bi'dis'nilgo t'áá éí Bóhólníihii bikin bii' sohodizin bina'anishgi nił dahólǫ́ǫ doo, áádóó naanish dayiichįįhii t'áá da'níł'ąą binda'anish dooleełii t'áá ałtsojį' yee níká anájah doo, áádóó ałdó' naat'áanii índa diné t'áá ałtso t'áá ádíníígóó yik'eh dahół'į́į doo.