Read Navajo I CHRONICLES 29 Bible Online

I CHRONICLES 29 - Navajo bible

I CHRONICLES 29

¹Áádóó aláahgo naat'áanii David ałdó' diné áłah nilínígíí t'áá ałtso yich'į' haadzíi'go ání, Shiye' Sálaman t'áá sáhí Diyin God nábidiiłtínígíí ániid naaghá áádóó t'ah bíni' dit'ódí, índa naanish ts'ídá ayóó át'é, háálá díí kin bii' sohodizin éí doo diné bá álnéeh da, nidi Bóhólníihii Diyin God bá álnééh.

²K'ad shiDiyin God bikin bii' sohodizin hadidooníłígíí biniyé hasht'ediisdzaa: óola bee ádoolníłígíí bá óola sinil áádóó béésh łigaii bee ádoolníłígíí bá béésh łigaii sinil áádóó béésh łitsoii bee ádoolníłígíí bá béésh łitsoii sinil áádóó béésh dootł'izhii bee ádoolníłígíí bá béésh dootł'izhii sinil áádóó tsin neheeshjíí' bee ádoolníłígíí bá tsin neheeshjíí' sinil áádóó tsé nitł'izii ániks wolyéii áádóó tsé nitł'izii biih dahidoo'niłígíí áádóó tsé bits'áda'deezlídígíí áádóó nitł'iz ałtaas'éí áádóó tsé da'ílíinii ał'ąą ádaat'éii índa tsé dildǫ'ii márbel wolyéii dziilí bee lą'í áłah íishłaa.

³Náá'áłdó' shiDiyin God bikin bii' sohodizin baa shił hózhǫ́ǫgo bąą t'áá át'é áádóó díí bóóltą'go t'áá shí shiyódí óola áádóó béésh łigaii shee hólǫ́ǫgo shiDiyin God bikin bii' sohodizin baa diní'ą́; t'áá áchą́hwíídéeni'go t'áá ałtsojį' bilááh honee'ą́ągo kin diyinii ádoolnííł biniyé hasht'ediisdzaa.

⁴Óola éí táadi mííl tálent bíighahgo Ófer nahós'a'dóó óola yá'át'éehii áádóó béésh łigaii bąąh hadoolyį́į'ii t'áá bízhání éí tsosts'idi mííl tálent bíighahgo kin góne' bik'ídooltih biniyé baa diní'ą́.

⁵Áádóó óola t'áá bízhánígo óola yee ádeidoolíłígíí índa béésh łigaii t'áá bízhánígo béésh łigaii yee ádeidoolíłígíí éí diné nida'ach'ąąh dayiichįįhii t'áá ałtso yindadoolnishgo nideidooch'ąh. Áko háishą' t'áá bí íinízingo díí jį́ diyingo ídi'doolníiłgo Bóhólníihii yá naal'a' doo?

⁶Nít'éé' da'azhé'é yę́ę aláahgo bídahólníihii áádóó Ízrel dine'é binanit'a'í danilíinii áádóó siláo mííl daníjaa'ii áádóó siláo neeznádiin daníjaa'ii binanit'a'í danilíinii éí aláahgo naat'áanii binaanish bee bídahólníihii bił t'áá bí ádeinízingo biyódí ła' áajį' ádayiiznil.

⁷Óola éí ashdladi mííl tálent bíighahgo áádóó neeznáadi mííl dram ałdó' bíighahgo áádóó béésh łigaii neeznáadi mííl tálent bíighahgo áádóó béésh łitsoii tseebídiindi mííl tálent bíighahgo índa béésh dootł'izhii t'ááłáhídi neeznádiindi mííl tálent bíighahgo Diyin God bikin bii' sohodizingi choidoo'įįłígíí biniyé ádayiiznil.

⁸T'áá háiida tsé da'ílíinii bee dahólónígíí éí Bóhólníihii bikin bii' sohodizingi biyódí nooh nídeilchíihjį' Gérshan dine'é ła' Jiiháíyel wolyéii há yaa áhályą́ą doo biniyé baa dadziiznil.

⁹Áko díí t'áá bí ádeinízingo ada'iiznilígíí biniinaa diné bił nidahoozhǫǫh nít'éé', háálá t'áá bí ádeinízingo doo naaki nilį́į́góó biyódí Bóhólníihii yaa nídayiis'nil, áádóó aláahgo naat'áanii David ałdó' bił nihoozhǫǫhgo ayóó át' éego bił hózhǫ́ǫ́ nít'éé'.

¹⁰Éí bąą áłah ílínígíí t'áá át'é binááł David éí Bóhólníihii yaa haznihgo ání, Nihizhé'é yę́ę Ízrel wolyéii biBóhólníihii Diyin God nílíinii, nił hózhǫ́ǫgo naa ha'niihgo hool'áágóó ahóyéel'áa doo.

¹¹Bóhólníihii nílíinii, ayóó ánít'é áádóó nidziil áádóó naa ha'niih áádóó ak'eh hidídleeh áádóó aláahdi ánít'é, háálá yádiłhił biyi' dahólóonii índa nahasdzáán bikáá' dahólóonii t'áá ałtso níí' át'é; t'áá ałtso bee nóhólnííh, Bóhólníihii nílíinii, áádóó wódahgo áni'dólzingo t'áá ałtso binanít'á.

¹²Yódí índa ił ídlį́ nits'ą́ą́dę́ę́' nihwiileeh áádóó t'áá ałtsoní binanít'á; bee adziilii índa ayóó é'ét'éii dah yílééł áádóó ayóó át'éii áálííł índa diné t'áá ałtso adziil baa hidí'aah.

¹³Éí bąą k' ad, nihiDiyin God nílíinii, nich'į' ahééh daniidzin índa nízhi' ayóó át'éii baa dahwii'niih.

¹⁴Nidi shíshą' éí ha'át'íí nishłį́ áádóó shidine'éshą' ha'át'íí ádaat'į́įgo t'áá nihí ádeiniidzingo kót'éego ada'iyee'nil? Háálá t'áá ałtsoní nits'ą́ą́dę́ę́' hólǫ́ áádóó t'áá níi'ii naa nídahii'nil.

¹⁵Jó, ninááł danihizhé'é yę́ę naasdee'ígi át'éego áyóní áádóó t'óó tádadinéehii daniidlį́. Nihokáa'gi nihídayéełkaahígíí chaha'oh adahalzhoodígi át'é; kwe'é doo hool'áágóó hinii'náa da.

¹⁶Bóhólníihii nihiDiyin God nílíinii, daat'íinii nináneel'ą́ąjį' t'áá ałtso áłah ádeiilyaaígíí bee kin ádoolníiłgo nízhi' diyinii baa dahwii'niih doo biniyé, díí nits'ą́ą́dóó ádaat'é índa t'áá át'é níi'ii ádaat'é.

¹⁷ShiDiyin God nílíinii, shí ałdó' shił bééhózin, ajéí nabínítaah áádóó t'áá ákogi ádaat'éii baa nił hózhǫ́. Shí éí shijéí bee nisinii bik'ehgo doo naaki nilį́į́góó díí t'áá ałtso naa nídiní'ą́; k'ad nidine'é kǫ́ǫ́ áłah nilínígíí bił dahózhǫ́ǫgo t'áá bí ádeinízingo naa náhidit'aahii ná adayiiznil.

¹⁸Éíbraham áádóó Áízak índa Ízrel danihizhé'é yę́ę biBóhólníihii Diyin God nílíinii, hool'áágóó t'áá áłahjį' díí nidine'é t'áá biyi'ídóó ádeinízinii t'áá ałtso baa áhólyą́ áádóó naa nitsídaakeesgo íínísin.

¹⁹Áko nibik'eh ó'oo'níiłii áádóó bee hahínídzíi'ii índa bee nihoyíní'áanii t'áá át'é yi'ósin doo áádóó kin bii' sohodizin bá hasht'ediisdzaaígíí íidoolíiłgo biniyé shiye' Sálaman bijéí doo naaki nilį́į́góó íínísin.

²⁰Nít'éé' David áłah ílínígíí t'áá át'é yich'į' haadzíi'go ání, K'ad Bóhólníihii nihiDiyin God bił hózhǫ́ǫgo baa dahohniih. Áko áłah ílínígíí t'áá át'é dabizhé'é yę́ę biBóhólníihii Diyin God bił hózhǫ́ǫgo yaa dahaniih, áko Bóhólníihii yich'į' yaa ádaadzaago nidahasá índa aláahgo naat'áanii yaa dahaznih.

²¹Áádóó biiskání Bóhólníihii bich'į' náádahidoonihii náádayiisnii' áádóó Bóhólníihii bich'į' didlidgo nááhániihii náádayiisnii': éí dóola t'ááłáhídi mííl, deenásts'aa' t'ááłáhídi mííl índa dibé yázhí t'ááłáhídi mííl yanáadzi'go nááhániihii t'áá bił Ízrel dine'é t'áá ałtso bá lą'ígo náádayiisnii'.

²²Áádóó éí bijį́ ayóó át'éego bił dahózhǫ́ǫgo da'ííyą́ą́' áádóó da'oodlą́ą́'. Áko naakidi aleeh góne' David biye' Sálaman aláahgo naat'áanii nilį́įgo ádayiilaa áádóó aláahgo bíhólníih doo biniyé Bóhólníihii yich'į' ak'ah yik'i yadayiiziid índa Zéídak náá'iiłniihii nilį́į doo ałdó' biniyé ak'ah yik'i yadayiiziid.

²³Nít'éé' Sálaman éí bizhé'é David bitsásk'ehgi aláahgo naat'áanii nilį́įgo Bóhólníihii bibikáá'dóó nahat'áii yikáa'gi dah neezdá áádóó binahat'a' bidziil silį́į'go Ízrel dine'é t'áá át'é bik'eh dahół'į́į́ nít'éé'.

²⁴Naat'áanii t'áá ałtso áádóó diné dahayóii índa David biye'ké t'áá ałtso ałdó' aláahgo naat'áanii Sálaman yik'eh dahół'į́į doo biniyé yaa ádadeest'ą́.

²⁵Áádóó Ízrel dine'é t'áá ałtso binááł Bóhólníihii éí Sálaman ayóó át'éego baa ha'niihgo áyiilaa áádóó aláahgo ts'ídá ayóó át'éii naat'ááh ídlį́ haidiní'ą́, áko Ízrel dine'é bitahgi aláahgo naat'áanii nídaadleełii ts'ídá doo ła' ákót'ée da nít'éé'.

²⁶Kót'éego Jésii biye' David éí Ízrel dine'é t'áá át'é yinant'áá nít'éé'.

²⁷Ízrel dine'é yinant'áago dízdiin nááhai; Hííbran kin haal'áhígi nant'áago tsosts'id nááhai índa Jerúsalem kin haal'áagi nant'áago tádiindóó ba'aan táá' nááhai.

²⁸T'áá íiyisí haastihgo daaztsą́ índa lą'í binááhai; biyódí áádóó yee ił nilíinii lą'í bee hólǫ́ǫgo ahoolzhiizh. Áádóó biye' Sálaman hatsásk'ehgi aláahgo naat'áanii silį́į'go nant'áá nít'éé'.

²⁹David deeshnishdóó binaanish ninít'i'jį' Sámuel náásgóó áhodoonííł yaa halne'ii binaaltsoos bikáá' áádóó Néíthan éí Diyin God yá halne'ii binaaltsoos bikáá' índa Géed náásgóó áhodoonííł yaa halne'ii binaaltsoos bikáá' nídaháasdzo,

³⁰nant'á nít'é'ígíí t'áá át'é áádóó ábóodziil nít'é'ígíí áádóó bich'į' áhóót'įįdígíí áádóó Ízrel dine'é bich'į' ádahóót'įįdígíí índa kédaayahdóó aláahgo bee ídahólníihgo bił nahaz'áanii t'áá ałtso bich'į' ádahóót'įįdígíí éí naaltsoos bik'inídaháasdzo.