Read Navajo I CHRONICLES 4 Bible Online

I CHRONICLES 4 - Navajo bible

I CHRONICLES 4

¹Júdah biye'ké éí Píírez, Hézran, Kármii, Her índa Shóbal daolyé.

²Áádóó Shóbal biye' Riyéíyah wolyé; éí Jéíhath bizhé'é jílį́, índa Jéíhath éí Ahómai áádóó Léíhad bizhé'é jílį́. Díí éí Zórah kin haal'áadi kéédahat'íinii náás ahoolchíiłii danilį́.

³Íítam biye'ké Jézriyel áádóó Íshma índa Ídbash daolyé. Áádóó bitsi' Házelelpónai wolyé.

⁴Piinúwel éí Gíídar yizhé'é nilį́; Íízer éí Húsha yizhé'é nilį́. Díí Her hats'ą́ą́dóó náás ahidideeshchíinii danilį́. Éfratah alą́ąjį' bá ho'dizhchį́. Her éí Béthlehem bizhé'é dzizlį́į́'.

⁵Áádóó Tekówadi kééhat'íinii bizhé'é Ásher wolyéii be'asdzą́ą́ naaki éí Híílah áádóó Néíyarah wolyé.

⁶Áko Néíyarah éí Ásher bá díí nijiishchį́: Ahúzam áádóó Híífer áádóó Témenai índa Héíyaháshtarai. Díí t'áá ałtso Néíyarah biyáázhké danilį́.

⁷Híílah biyáázhké éí Zííreth áádóó Jiizówer índa Ííthnan daolyé.

⁸Kaz éí Éínab áádóó Zobííbah índa Héíram yizhé'é nilį́. Héíram haye' Ahárhel ba'áłchíní náás ahoolchíiłii hólǫ́.

⁹Áádóó Jéíbez éí yił háájéé' biláahgo ił ílíinii nilį́. Hamá éí Jéíbez yee hóózhi' kóníigo, Háálá yínííł nishłį́įgo hoshéłchį́.

¹⁰Nít'éé' Ízrel dine'é biDiyin God bich'į' Jéíbez sozdoolzingo ájíní, T'áá íiyisí shik'izhdíídliił áádóó kéyah hótsaago shaa diní'aah índa shił honílǫ́ áádóó doo yá'áshóonii bits'ąą shaa áhólyą́, áko doo yínííł nishłį́į da doo! Áádóó Diyin God bíjííkeedígíí haidiní'ą́.

¹¹Áádóó Kíílab bik'is Shúwah éí Mííhir há yizhchį́; Mííhir éí Éshtan yizhé'é nilį́.

¹²Éshtan éí Beth-réífa áádóó Pasíyah índa Tiihínah yizhé'é nilį́. Tiihínah éí Irnéíhash há yizhchį́. Díí éí Rííkahdóó dine'é danilį́į́ nít'éé'.

¹³Áádóó Kíínez biye'ké Áthniyel índa Siiréíyah wolyé. Áthniyel biye' Héíthath wolyé.

¹⁴Miyónothai biye' Ófrah wolyé. Siiréíyah biye' Jó'ab wolyé. Jó'ab éí Kárashim dine'é yizhé'é nilį́. Kárashim dine'é nida'ach'ąąhii danilį́į́ nít' éé'.

¹⁵Jiifáneh biye' Kéíleb wolyé. Kéíleb biye'ké Áíru áádóó Íílah índa Néíyam daolyé. Íílah biye' Kíínaz wolyé.

¹⁶Áádóó Jeháliilel biye'ké Zif áádóó Zífah áádóó Tíriya índa Aséíriyel daolyé.

¹⁷Ézra biye'ké Jííther áádóó Mííred áádóó Íífer índa Jéílan daolyé. Áádóó Mííred bitsi' Míriyam wolyé áádóó biye'ké Shámeiyai índa Íshbah wolyé. Éí tált'éego Féro bitsi' Bitháíyah wolyéii Mííred bá nijiishchį́. Íshbah biye' Éshtiimowa wolyé.

¹⁸Áádóó Mííred be'asdzą́ą́ Jew dine'é nilínígíí Jííred áádóó Hííber índa Jiikóthiyel niyiishchį́. Jííred biye' Gíídar wolyé. Hííber biye' Sóko wolyé. Jiikóthiyel biye' Zanówah wolyé.

¹⁹Hodáíyah be'asdzą́ą́ nilíinii Néíham bilah jílį́įgo hayáázhké nidilt'é hólǫ́. Ła' Kii'áílah wolyéego Gárma dine'é yizhé'é silį́į́'. Ła'ígíí Éshtiimowa wolyéego Méíyakath dine'é yizhé'é silį́į́'.

²⁰Sháíman biye'ké Ámnan áádóó Rínah áádóó Ben-héínan índa Táílan daolyé. Íshai biye'ké Zóheth áádóó Ben-zóheth wolyé.

²¹Júdah biye' Shíílah wolyéii biye'ké hólǫ́. Ła' Er éí Lííkah yizhé'é nilį́, áádóó ła'ígíí Léíyadah éí Marííshah yizhé'é nilį́, áádóó Shíílah jílíinii Ashbííyadóó dine'é áłts'óózígo yisdizígíí bee na'at'ą́hí łigaii dits'idgo ádeił'į́įgo ahoolchíiłii bizhé'é dzizlį́į́',

²²áádóó haye'ké Jókim, ła' Kozííba kin shijaa'dóó dine'é, áádóó Jó'ash índa Séíraf daolyé. Séíraf éí Mó'abgi índa Jashóíbai-lííhemgi nant'áá nít'éé'. Áko díí t'áá ałk'idą́ą́' yízhí bee naaltsoos si'áanii át'é.

²³Díí éí Netáíyim kin shijaa'dóó áádóó Gedíírah kin shijaa'dóó hashtł'ish ásaa' ádeił'íinii danilį́į́ nít'éé'. Ákwii aláahgo naat' áanii yá nidaalnish biniyé ákwii kéédahat'į́į́ nít'éé'.

²⁴Símiyan biye'ké Nému'el, Jéímin, Jéírib, Zíírah índa Shéíyal daolyé.

²⁵Shéíyal biye' Shálam wolyé. Shálam biye' Míbsam wolyé. Míbsam biye' Míshma wolyé.

²⁶Míshma biye' Hámu'el wolyé. Hámu'el biye' Záker wolyé. Záker biye' Shímiyai wolyé.

²⁷Áádóó Shímiyai biye'ké hastą́'áadah; bitsi' éí hastą́lt'é, nidi bik'isóó bada'áłchíní doo daalą'í da, doo nidi Júdah dine'égi át'éego k'ee'ąą dínéest'ą́ą da.

²⁸Bíyer-shííbagi áádóó Móladahgi índa Héízar-shúwalgi,

²⁹Bílhahgi, Íízemgi índa Tóladgi,

³⁰Biithúwelgi, Hórmahgi áádóó Zíklagi,

³¹Beth-márkabothgi, Héízar-súsimgi, Beth-bíraigi índa Shéíyaréíyimgi kéédahat'į́į́ nít'éé'. Aláahgo naat'áanii David dah neezdáajį' kót'éego bikin hadaas'áá nít'éé'.

³²Díí bikin dah naazhjaa' nít'é'ígi éí Íítam, Áyiin, Ríman, Tóken índa Éíshan, kin hadaas'á ashdla'go.

³³Áádóó t'áá Béíyaljį' díí kin hadaas'áhígíí binaagóó ałdó' kin dah naazhjaa' nít'éé'. Ákwe'é kéédahat'į́į́ nít'éé' áádóó dabizází náás da'ahílchínígíí bik'inídaháasdzoh.

³⁴Miishóbab, Jámlek, Amazáíyah biye' Jóshah,

³⁵Jówel, Josibáíyah biye' Jííhu, éí Siiréíyah hanálí áádóó Éísiyel naakidi náhánálí,

³⁶Íílaiyowíínai, Jéíyakóbah, Jeshohéíyah, Aséíyah, Éídiyel, Jiisímiyel, Biinéíyah

³⁷índa Zíza wolyéii bizází Shiiméíyah dį́įdi náhánálí, Shímrai táadi náhánálí, Jedéíyah naakidi náhánálí, Álan hanálí, Sháífai hazhé'é.

³⁸Díí éí dabízhi' ch'ídahast'ánígíí éí náás da'ahílchíihii yinanit'a'í danilį́į́ nít'éé', áádóó dabizhé' é yę́ę bada'áłchíní náás da'ahílchíihii ayóó át'éego k'ee'ąą dínéest'ą́.

³⁹Éí Gííder kéyah yah ahóót'i'jį', honíts'aa'ígíí ha'a'aahjígo bilį́į́' yá ch'il hadeintáago nidahaazná.

⁴⁰Ákwe'é kéyah hóteelgo áádóó hodéezyéelgo índa hasht'ehodít'éego bilį́į́' yee dadínóolk'ahii yik'ídaneeztą́ą́'; ákwii átséédą́ą́' Ham dine'é kéédahat'į́į́ nít'éé'.

⁴¹Heziikáíyah éí Júdah dine'é aláahgo yinanit'a'í nilį́į́dą́ą́' éí díí dabízhi' naaltsoos bik'inídaháasdzohgo nidahaaznánígíí ákwii kéédahojit'į́įgo ałtso nidahastseed áádóó dahaníbaal áádóó dahaghan ałtso ádeisdįįd índa dahaghan yę́ęgi bighan ádahoolaa, háálá ákwii bilį́į́' bá ch'il dahólǫ́.

⁴²Áádóó Símiyan dine'é bitahdóó diné ashdladi neeznádiingo éí Dził Síyergóó hadahaazná; éí binanit'a'í danilíinii Pelatáíyah, Niiyaráíyah, Riifáíyah índa Azáíyel daolyéii Íshai biye'ké danilį́.

⁴³Áádóó Ámalek dine'é ła' yóó'adahineezhchą́ą'go dadzoodzí'ígíí nidaho'diztseed índa dahakéyah yę́ęgi díí jį́įjį' kéédahat'į́.