Read Navajo I CHRONICLES 5 Bible Online

I CHRONICLES 5 - Navajo bible

I CHRONICLES 5

¹Rúben éí Ízrel alą́ąjį' bá ho'dizhchíinii jílínígíí haye'ké hó éí alą́ąjį' nijighá, nidi hazhé'é be'asdzą́ą́ bił ahizhdoolyáhígíí bąą alą́ąjį' yizhchínígíí bee bóhólníihii Ízrel biye' Jóseph éí biye'ké nidilt'éego baa deet'ą́. Áko alą́ąjį' ho'dizhchínígíí bee hóhólníihii éí ha'áłchíní náás ahoolchíiłii daabíí' nít'éé' nidi éí t'áadoo bíí' daazlį́į' da.

²Azhą́ Júdah hak'isóó biláahgo áhóodziil nít'éé' áádóó hats'ą́ą́dóó aláahgo naat'áanii hazlį́į́', nidi Jóseph éí alą́ąjį' yizhchínígíí bee bóhólníihii bíí' silį́į́'.

³Rúben éí Ízrel alą́ąjį' bá ho'dizhchínígíí haye'ké éí Héínak, Pállu, Hézran índa Kármii daolyé.

⁴Jówel ba'áłchíní ahoolchíiłii, Jówel biye' Shiiméíyah wolyé, Shiiméíyah biye' Gag wolyé, Gag biye' Shímiyai wolyé,

⁵Shímiyai biye' Máíkah wolyé, Máíkah biye' Riyéíyah wolyé, Riyéíyah biye' Béíyal wolyé.

⁶Béíyal biye' Biyérah wolyéego Asíriya dine'é aláahgo binanit'a'í Tílgath-pilníízer bisná. Rúben dine'é yinanit'a'í nilį́į́ nít'éé'.

⁷Áádóó hak'isóó ba'áłchíní náás da'ahílchíhígíí bízhi' naaltsoos bik'idaasdzoh. Aląąjį' bá naazíinii éí Jáíyel áádóó Zekaráíyah

⁸índa Bíílah daolyé. Bíílah bizhé'é Éízaz wolyé. Éízaz bizhé'é Shííma wolyé. Shííma bizhé'é Jówel wolyé. Éí Aró'er kin shijaa'di bighan. Nííbo kin shijaa'dóó Béíyal-míyan kin haal'áajį' Rúben hakéyah nít'éé'.

⁹Áádóó ha'a'aahjigo Yufréítiiz tooh nílínídóó honoojí bich'į'go bee hóhólnííh nít'éé', háálá Gíliyad kéyahdi dahabéégashii k'ee'ąą nídeeshzhiizh.

¹⁰Saul bíyoołkááł yę́ędą́ą́' Héígar dine'é hoł anada'ahil'į́įgo bik'eh dazdeesdlį́į́', áádóó ha'a'aahjigo Gíliyad kéyah t'áá át'é dabighan bii' kéédahojit'į́į́ nít'éé'.

¹¹Béíshan kéyahdi Sálkah kin haal'áajį' Géed dine'é hanaashiijí kéédahat'į́į́ nít'éé'.

¹²Béíshangi Jówel alą́ąjį' naat'áanii nilį́į́ nít'éé'; náá'ákóne' Shéífam nináánít'áá nít'éé', náá'ákóne' Jéíyanai nináánít'áá nít'éé' índa náá'ákóne' Shéífat nináánít'áá nít'éé'.

¹³Áádóó dahak'isóó dabizhé'é yę́ę bada'áłchíní éí Máíkel, Miishálam, Shííba, Jóreiyai, Jéíka, Záíya áádóó Ííber daolyé; tsosts'id yilt'éé lá.

¹⁴Díí éí Ábiheil ba'áłchíní danilį́. Ábiheil bizhé'é Húrai wolyé, Húrai bizhé'é Jarówah wolyé, Jarówah bizhé'é Gíliyad wolyé, Gíliyad bizhé'é Máíkel wolyé, Máíkel bizhé'é Jiishísheiyai wolyé, Jiishísheiyai bizhé'é Jáhdo wolyé, Jáhdo bizhé'é Baz wolyé.

¹⁵Ábdaiyel biye' Éíhai wolyé, Gúnai binálí nilį́įgo dahazhé'é yę́ę ba'áłchíní náás da'ahílchíihii yá aląąjį' sizį́.

¹⁶Áádóó Gíliyad kéyahgóó áádóó Béíshan kéyahgóó kin dah naazhjaa'gi índa Shéran kéyahgi dahootsogóó kéédahat'į́į́ nít'éé'.

¹⁷Júdah dine'é aláahgo binanit'a' í Jótham wolyéii índa Ízrel dine'é aláahgo binanit'a'í Jerobówam wolyéii bíyoołkááł yę́ędą́ą́' díí ba'áłchíní náás da'ahílchíhígíí t'áá ałtso bízhi' naaltsoos bik'idaasdzoh.

¹⁸Áádóó Rúben dine'é áádóó Géed dine'é índa Manáseh dine'é ałníí'dóó doo nídanilyéesii naagé índa diltłish nideiłjid yídaneel'áanii áádóó da'diłt'ohii índa na'abaah dayiichįįhii dízdiindóó ba'aan dį́įdi mííldóó ba'aan tsosts'idi neeznádiindóó ba'aan hastą́diin nídahidiibaa'.

¹⁹Áko Héígar dine'é, Jííter dine'é, Néífish dine'é áádóó Nódab dine'é yił da'ahoogą́ą́'.

²⁰Jó, bíká o'oolwodgo diné nayískai áádóó Héígar dine'é índa diné bił nidaabaahii haidiní'ą́, háálá anaa' baa na'aldeehdóó Diyin God yich'į' yéego sodadilzingo Diyin God bidiizts'ą́ą́', jó, Diyin God yaa dadzólíí nít'éé'.

²¹Áko ana'í dabilį́į́' bighadadziis'nil. Ghą́ą́'ask'idii ashdladiindi míilgo, dibé naakidi neeznádiindóó ba'aan ashdladiindi míilgo, télii naakidi míilgo áádóó diné neeznádiindi mííl ánéelą́ą'go dadzisná.

²²Ana'í lą'í nidadzistseed, háálá Diyin God bíniik'ehgo anaa' dahojisłį́į́'. Ízrel dine'é daho'disnáajį' ákwii kéédahojit'į́į́ nít'éé'.

²³Béíshan nahós'a'dóó Béíyal-hérman hoolyéii bich'į'go áádóó Síínir hoolyéii bich'į'go índa Dził Hérman bitsį́įjį' Manáseh dine'é ałníí'dóó éí kéyahgi kéédahat'į́įgo k'ee'ąą dínéest'ą́.

²⁴Áko Íífer, Íshai, Iiláíyel, Ázriyel, Jeremáíyah, Hodaváíyah índa Jádiyel dabizhé'é yę́ę ba'ałk'eedóó a'áłchíní danilį́įgo aląąjį' naazíinii danilį́į́ nít'éé'. Éí diné ayóó ádaat'éii áádóó doo nídanilyéesii danilį́įgo índa dabizhé'é yę́ę ba'ałk'eedóó ba'áłchíní danilį́įgo aląąjį' naazį́įgo bee béédaho'dílzin nít'éé'.

²⁵Éí dabizhé'é yę́ę biDiyin God yich'į' ádił da'asiih, háálá dabinááł Diyin God ábísdįįd, nidi t'áá éí kéyahgi ajił k'ehgo diyin dabidi'níinii yee t'óó ádee nináádaas'ne'.

²⁶Nít'éé' Asíriya dine'é aláahgo binanit'a'í Pul wolyéii, t'áá éí Tílgath-pilníízer ałdó' wolyé, éí Ízrel dine'é biDiyin God báhóółchįįdgo Rúben dine'é, Géed dine'é índa Manáseh dine'é ałníí'dóó ałtso yisná. Éí Héílah nahós'a'jį', Héíbor nahós'a'jį', Hára nahós'a'jį' índa Gózan tooh nílíníjį' honí'eezhgo díí jį́įjį' ákwii kéédahojit'į́.