Read Navajo II CHRONICLES 1 Bible Online

II CHRONICLES 1 - Navajo bible

II CHRONICLES 1

¹David biye' Sálaman éí bee bóhólníhígíí t'áá íiyisí bóhólníihgo ábi'diilyaa, áko haBóhólníihii Diyin God hoł hólǫ́ǫgo t'áá íiyisí ayóó át'éii jílį́įgo áhoolaa.

²Ákohgo Sálaman éí Ízrel dine'é t'áá ałtso, siláo daamííl níjaa'go áádóó siláo neeznádiin níjaa'go yindanit'a'í áádóó ádahwée'aahiida índa Ízrel dine'é t'áá ałtso binanit'a'í danilíinii díidí azhé'é aláahgo bídahólníhígíí yich'į' haadzíí'.

³Áko Sálaman áádóó áłah ílínígíí t'áá ałtso bił wók'ą́ądi Gíbiyan kin haal'áadi jíkai, háálá Diyin God biníbaal bii' dahozdísinii áadi si'ą́; éí Bóhólníihii bá naal'a'í Mózes honoojíidi áyiilaa.

⁴Nidi David éí Kírjath-jíyarimdę́ę́' Diyin God bitsits'aa' dílzinii yá hasht'ehoolaaíjį' niiní'ą́, háálá Jerúsalem kin haal'áagi níbaal niiní'ą́.

⁵Náá'áłdó' Her binálí Biizáliyel éí Yúrai biye' nilíinii bikáá' náá'iiniihí béésh łitsoii yee áyiilaii, éí Bóhólníihii biníbaal bii' hodílzinii bich'éédą́ą'gi si'ą́. Áko Sálaman índa áłah ílínígíí bił ákǫ́ǫ́ jíkai.

⁶Áko Sálaman dah diiyáago bikáá' náá'iiniihí béésh łitsoii bee ályaii si'áníjį' Bóhólníihii binááł hajiyá; éí níbaal bii' dahozdísiniigi si'ą́; ákwii t'ááłáhídi míilgo didlidgo nááhániihii nááyiisnii'.

⁷T'áá éí bitł'éé' Diyin God éí Sálaman yich'į' yit' íní í'diilyaago ííłní, T'áá shííníkeedígíí naa dideesh'ááł.

⁸Áko Sálaman éí Diyin God ííłní, Shizhé'é David yę́ę t'áá íiyisí ayóó át'éego baa a'ááh nínízingo bitsásk'ehgi nanisht'áago áshiinilaa.

⁹Bóhólníihii Diyin God nílíinii, shizhé'é David yę́ę baa dííní'ą́ yę́ę éí k'ad bidziilgo ánílééh, háálá ła' dine'é łeezh nahalingo ayóó ánéelą́ą'go éí aláahgo binanisht'áago áshiinilaa.

¹⁰K'ad bee hódzą́ áádóó ił ééhózin shaa diní'aahgo díí dine'é binááł ch'ínáshdááh áádóó yah anáshdáah doo. Háíyee' díí nidine'é t'áadoo bee néelą́'ígóó yíl'áhígíí yá nihodiyii'aah doo?

¹¹Áádóó Diyin God éí Sálaman ííłní, Díí nijéí biyi'di nitsíníkeesgo yódí, at'į́, ił ídlį́, doodaii' ni'ana'í nidootsiłgida áádóó nízaadgóó hinínáa dooleełii t'áadoo ádá yííníkeed da, nidi shidine'é bá aláahgo naat'áanii ániishłaaígíí bee bá nahó'áa doo biniyé bee hódzą́ áádóó ił ééhózin ádá yííníkeed,

¹²bee hódzą́ áádóó ił ééhózin éí naa deet'ą́, áko yódí áádóó at'į́ índa ił ídlį́ naa dideesh'ááł; éí nítséedi aláahgo naat'áanii danilį́į́ nít'éé' yę́ę t'áadoo ła' ákódaat'éii bee dahazlį́į' da, doo nidi nikéédę́ę́' náánáła'da ákódaat'éii bee hodooleeł da.

¹³Áko Sálaman éí Gíbiyan kin haal'áadi wók'ą́ądi haz'ánídę́ę́' áádóó níbaal bii' dahozdísinii si'ą́ą́dę́ę́' dah nízdiidzáago Jerúsalem kin haal'áajį' nídzídzáago Ízrel dine'é binazhnit'áá nít'éé'.

¹⁴Áádóó Sálaman éí tsindaabąąs bijáád naakiígíí áádóó łį́į́' yee nidaabaahii áłah áyiilaa, áko t'ááłáhídi mííldóó ba'aan dį́įdi neeznádiingo tsindaabąąs bijáád naakiígíí áádóó naakits'áadahdi miilgo łį́į́' yee nidaabaahii, díí éí bá hasht'edahodít'éego kin hadaas'áágóó niyiiznil, áádóó Jerúsalemgi aláahgo naat'áanii binaashiigóó ła' niinínil.

¹⁵Áádóó aláahgo naat'áanii tsé yíl'áhígíigi át'éego Jerúsalem kin haal'áagi béésh łigaii índa óola bee áda'azįįdgo áádóó honíts'aa'gi síkamor naazkaadii yíl'áhígíigi át'éego dilk'is bee áda'azįįdgo áyiilaa.

¹⁶Áko Sálaman éí łį́į́' baa neelkaadígíí éí Ííjip kéyahdę́ę́' áádóó Kwéi hoolyéédę́ę́' shóozt'e'; aláahgo naat'áanii bá nida'iiłniihígíí Kwéi hoolyéédę́ę́' łį́į́' nideiniiłkaadígíí t'áá bą́ą́h da'ílínígíí bíighahgo nídayíís'nii'.

¹⁷Áádóó Ííjip kéyahdę́ę́' tsinaabąąs bijáád naakiígíí nidahaaznii'ígíí éí t'ááłá'í ní'ánígo hastą́ądi neeznádiin béésh łigaii shékel wolyéii bą́ą́h nida'iizlį́į́' áádóó łį́į́' ałdó' t'ááłá'í nítínígo t'ááłáhídi neeznádiindóó ba'aan ashdladiin bą́ą́h nida'iizlį́į́'; kót'éego Het dine'é aláahgo binanit'a'í danilíinii índa Síriya dine'é aláahgo binanit'a'í danilíinii t'áá ałtso yich'į' nináádayiis'nii'.