Read Navajo II CHRONICLES 10 Bible Online

II CHRONICLES 10 - Navajo bible

II CHRONICLES 10

¹Riihobówam éí Shííkem kin haal'áágóó ííyá, háálá Shííkemgi Ízrel dine'é éí aláahgo naat'áanii ádahodoolííł biniyé t'áá át'é neheeskai.

²Áko Nííbat biye' Jerobówam éí t'ah Ííjip kéyahdi kééhojit'į́įgo díí jíínii', áko Ííjipdę́ę́' nídzídzá; jó, Sálaman bits'ąą Ííjipgóó yóó'ajoolwod nít'éé'.

³Háká ada'as'a'go hágo dahodííniid, áko Jerobówam áádóó Ízrel dine'é t'áá ałtso áłah nilínígíí yíkaigo Riihobówam yich'į' hadaasdzíi'go ádaaní,

⁴Nizhé'é yę́ę nihiyéél nidaazgo áyósin nít'éé'; éí bąą k'ad, nizhé'é yę́ę bik'ee ti'dahwii'níihgo bá nidasiil'a'ígíí áádóó hééł nidaazgo nihá áyósin nít'éé' yę́ę ászólígo nihá áníléehgo ná nideiil'a' dooleeł.

⁵Áko áyidííniid, Táá' yiską́ągo shaa nínáádoohkah. Áko diné anídahaaskai.

⁶Áko aláahgo naat'áanii Riihobówam éí hastóí kót'é daaníinii, éí hazhé'é Sálaman yę́ę t'ah hiná yę́ędą́ą́' yidááhdóó naazį́į́ nít'é'ígíí bił baa nídadzist'įįdgo ájíní, Haash yit'éego díí diné bich'į' t'ą́ą́' háádeesdzihgo bee bił nídahodeeshnihígíí bee shił dahołne'?

⁷Áádóó hach'į' hadaasdzíi'go ádaaní, Díí dine'é bich'į' ná'áhwiinít'į́'ígo áádóó bił dahoníshǫ́ǫgo índa saad yá'ádaat'éehii bee bich'į' hahídziih ládą́ą́' ná nidaal'a'í danilį́įgo ahool'áa doo.

⁸Áko hastóí danilíinii hach'į' kót'é daaníigo hąąh nideizláhígíí doo bázniizį́į' da, nidi dinééh danilíinii bił dazhneeyáanii bił nabik'íyádajiłti'go hadááhdóó naazį́į́ nít'éé'.

⁹Áko ábijiní, Haash yit'éego nabik'íyádasoołti'ii bee díí diné bich'į' bee háádadiidzih? Éí shich'į' hadaasdzíi'go ádashidííniid, Nizhé'é yę́ę nihiyéél nidaazgo áyósin nít'éé' yę́ę ászólígo nihá ánílééh.

¹⁰Áko dinééh hoł daneeyánígíí hach'į' hadaasdzíi'go ádahałní, Díí dine'é nich'į' hadaasdzí'ígíí kót'éego bich'į' hadíídzihgo kódidííniił, Éí nizhé'é yę́ę nihiyéél nidaazgo áyósin nít'éé' yę́ę ászólígo nihá ánílééh, daniłnínígíí kóbididííniił, Shíláyázhí éí shizhé'é yę́ę biníí' áníłtsááz yę́ę biláahgo áníldíil doo.

¹¹Índa shizhé'é yę́ę nihiyéél nidaazgo nihá áyósin nít'éé' yę́ę t'ah biláhígi át'éego nihiyéél nidaazgo nihá ádeeshłííł; shizhé'é yę́ę éí bee atsxis yee atínihił'į́į́ nít'éé', nidi shí éí séígo' adishish nahalingo shibee atsxis bee atínihish'į́į doo.

¹²Ákohgo aláahgo naat'áanii, Táá' yiską́ągo shaa nídoohkah, hałníigo há nihoní'áanii bik'ehgo táá' yiską́ągo Jerobówam áádóó dine'é t'áá ałtso Riihobówam yaa haaskai.

¹³Áko aláahgo naat'áanii t'áá na'níle'dii diné bich'į' hadziisdzíí'; jó, aláahgo naat'áanii Riihobówam éí hastóí kót'é dabiłníí nít'é'ígíí doo yiniizį́į' da.

¹⁴Dinééh danilíinii kót'éego dahałnínígíí bee bich'į' hadzoodzíi'go ájíní, Shizhé'é yę́ę nihiyéél nidaazgo áyósin nít'éé', nidi shí éí t'ah biláhígi át'éego nihiyéél nidaazgo ádeeshłííł; shizhé'é yę́ę ałdó' bee atsxis yee atínihił'į́į́ nít'éé', nidi shí éí séígo' adishish nahalingo bee atsxis bee atínihish'į́į dooleeł.

¹⁵Ákohgo aláahgo naat'áanii éí dine'é doo yiyíists' ą́ą' da; jó, Diyin God bits'ą́ą́dóó ádzaa, áko Bóhólníihii t'áá bí bizaad éí Sháíloh haz'ánídóó diné nilíinii Aháíjah binahjį' Nííbat biye' Jerobówam yich'į' yee hahaasdzíi'ii bik'eh áhodoonííł.

¹⁶Áko Ízrel dine'é t'áá ałtso éí aláahgo naat'áanii doo hwíists'ą́ą́'góó baa ákodazniizį́į'go diné éí aláahgo naat'áanii ánáádeidoo'niidgo ádaaní, David yę́ę bits'ą́ą́dóó ha'át'íísh nihee dahólǫ́? Jésii biye' bits'ą́ą́dóó íí' dooleełii doo ła' nihee hólǫ́ǫ da. Ízrel dine'é danohłíinii, danihiníbaalgóó nídadohkááh. David dine'é danohłíinii, niha'áłchíní náás ahoolchíiłii baa ádahołyą́. Ákohgo Ízrel dine'é dabiníbaalgóó anídahaaskai.

¹⁷Nidi Ízrel dine'é éí Júdah kin hadaas'áagi kéédahat'ínígíí Riihobówam honant'áá nít'éé'.

¹⁸Ákohgo aláahgo naat'áanii Riihobówam éí Adóram wolyéii naanish bí'nílchééh yinanit'a'í nilíinii ayííł'a'go Ízrel dine'é t'áá ałtso tsé yee nídahoneesne'go hoł nidadzisne', nidi aláahgo naat'áanii Riihobówam bitsinaabąąs bijáád naakiígíí tsxį́įłgo yiih yíyáago Jerúsalem kin haal'áágóó anííchą́ą́'.

¹⁹Áádóó Ízrel dine'é éí David yę́ę ba'áłchíní náás ahoolchíiłii yich'į' nidaalteehgo díí jį́į́góó ákót'é.