Read Navajo II CHRONICLES 11 Bible Online

II CHRONICLES 11 - Navajo bible

II CHRONICLES 11

¹Riihobówam éí Jerúsalem kin haal'áajį' níyáago Ízrel dine'é yik'iidoojahgo áádóó Riihobówam bee bóhólnííh yę́ę bíí' nídoodleeł biniyé Júdah dine'é éí Bénjamin dine'é yił áłah áyiilaago, éí bitahdóó t'ááłáhídi neeznádiindóó ba'aan tseebídiindi mííl diné nidaabaah yéédahósinii yitaa yiizláá'.

²Nidi Diyin God éí bá halne'ii Shemáíyah wolyéii yich'į' haadzíi'go ání,

³Júdah kéyahgi Sálaman biye' aláahgo naat'áanii Riihobówam áádóó Júdah dine'é índa Bénjamin dine'é t'áá ałtso áádóó Ízrel dine'é bich'į' hadíídzihgo kóbididííniił,

⁴Bóhólníihii kóní, Doo ch'ídoohkah da, doodaii' nihik'isóó doo bik'iidoohjah da. Diné t'ááłá'í nootínígo danihighangóó nídadohkááh, háálá díí shí ádíshnínígíí át'é. Áko Bóhólníihii bik'eh dahojííł'įįdgo t'ą́ą́' aníjookaigo t'áadoo Jerobówam bik'i jiijée' da.

⁵Riihobówam éí Jerúsalemgi kééhat'į́ áádóó Júdah kéyahgi kin hadaas'áago bine' adziihii biniyé ádayiilaa:

⁶éí Béthlehem, Íítam, Tekówa,

⁷Béth-zer, Sóko, Adálam,

⁸Gath, Maríísha, Zif,

⁹Adóreim, Léíkish, Azííkah,

¹⁰Zórah, Éíjalan índa Hííbran éí Júdah kéyahgi áádóó Bénjamin kéyahgi kin hadaas'áago éí ditą́ągo binaa ahééda'astł'ingo ádayiilaa.

¹¹Áko éí kin hadaas'áii bidziilgo ádayiilaago ch'iyáán áádóó ak'ah índa wáin bii' nooh nída'achíhígíí éí ádayiilaago ákǫ́ǫ́ siláo binanit'a'í bídahólníihgo niinínil.

¹²Áádóó kin hadaas'áágóó t'áá át'é naagé índa tsiidétáán nidayiiznilgo Júdah dine'é áádóó Bénjamin dine'é bich'ijí niinínilgo ayóo bidziilgo áhoolaa.

¹³Áko nááda'iiłniihii áádóó Líívai dine'é éí Ízrel dine'é t'áá ałtso bitahdę́ę́' t'áá kéédahat'į́į́dę́ę́' Riihobówam yaa haaskai.

¹⁴Líívai dine'é bikéyah dahootso índa dabighan yits'ą́ą́' dah diikaigo Júdah kéyahgi áádóó Jerúsalem kin haal'áagi nidahaazná, háálá Jerobówam índa biye'ké yił éí Bóhólníihii bich'į' nááda'jiiłniihgo nidajil'a'ígíí nahgóó ahwiistł'ííd.

¹⁵Áko ninádahałaah doo biniyé wódah nahaz'ą́ągo ádaalyaaígi nááda'iiłniihii niinínilgo níłch' i bida'iiníziinii áádóó béégashii yáázh be'elyaii áyiilaii yaa yisįįd.

¹⁶Áádóó bik'ijį' Ízrel dine'é t'áá ałtso bitahdę́ę́' hajéí bee Ízrel biDiyin God Bóhólníihii hádajit'ínígíí dahazhé'é yę́ę biBóhólníihii Diyin God bich'į' náádazhdi'yoołnih biniyé Jerúsalemjį' nijiiskai.

¹⁷Áko Júdah dine'é éí bee óhólníihii bidziilgo ádayiilaa, áádóó táá' nááhaijį' Sálaman yę́ę biye' Riihobówam bidziilgo ádayósin nít'éé', háálá David áádóó Sálaman ní'ázhígi át'éego deíkáahgo táá' nááhai.

¹⁸Áádóó Riihobówam éí David yę́ę biye' Jériimath bitsi' Méíhalath áádóó Jésii yę́ę biye' Iiláíyab bitsi' Ábiheil t'áá áłah be'asdzą́ą́ áyiilaa.

¹⁹Éí haye'ké há niyiishchį́: éí Jíí'ash áádóó Shemaráíyah índa Zéíham daolyé.

²⁰Áádóó bikéédę́ę́' éí Ábsalam bitsi' Méíyakah yá náá'ásgeh; éí Abáíjah áádóó Áteiyai áádóó Záíza índa Shelómith há niyiishchį́.

²¹Nít'éé' Riihobówam bida'asdzą́ą́ áádóó bida'asdzą́ą́ yíł'íní t'áá ałtso éí biláahgo Méíyakah t'áá íiyisí ayóó'áyó'ní, háálá tseebííts'áadah be'asdzą́ą́ áádóó be'asdzą́ą́ yíł'íní éí hastą́diin índa naadiin tseebíí biye'ké áádóó bitsi'ké hastą́diin bá neheezhchį́.

²²Áko Riihobówam éí Méíyakah biyáázh Abáíjah dabik'is bitahdóó yilą́ąjį' naat'áanii nilį́įgo áyiilaa, háálá éí aláahgo naat'áanii ádeeshłííł nízin nít'éé'.

²³Áádóó Riihobówam éí yaa hóyą́ągo Júdah kéyahgi áádóó Bénjamin kéyahgi kin hadaas'áii ditą́ągo binída'astł'ingóó t'áá ałtso biye'ké ła' ákǫ́ǫ́ niyiiznil. Áko ch'iyáán t'óó ahayóigo yeidiyii'aah nít'éé', áádóó be'asdzą́ą́ dadooleełii lą'í yá hát'į́į́ nít'éé'.