Read Navajo II CHRONICLES 13 Bible Online

II CHRONICLES 13 - Navajo bible

II CHRONICLES 13

¹Áko k'ad, Jerobówam aláahgo naat'áanii nilį́įgo tseebííts'áadah náhááh góne' Abáíjah éí Júdah dine'é yinanit'a'í silį́į́'.

²Táá' nááhaijį' Jerúsalem kin haal'áagi aláahgo naat'áanii nilį́į́ nít'éé'. Bimá éí Méíyakah wolyé; éí Gíbiyahdóó diné Yúriyel bitsi'. Áko Abáíjah áádóó Jerobówam ałch'į' anaa' hółǫ́ǫ́ nít'éé'.

³Áko Abáíjah éí siláo ayóo nidaabaahígíí dį́įdi neeznádiindi míilgo néidiinilgo anaa' biniyé yich'į' ni'ahí'nil. Jerobówam ałdó' siláo baa dahodzódlíii tseebíidi neeznádiindi míilgo néidiinilgo hach'į' anaa' biniyé ałkéé' niinínil.

⁴Áádóó Íífreiyim dine'é bikéyahdi deílk'idígi éí Dził Zemaréíyim bighą́ą́'dóó Abáíjah dah yiizį'go ání, Jerobówam áádóó Ízrel dine'é t'áá ánółtso, dashíínółts'ą́ą́'.

⁵Ízrel biBóhólníihii Diyin God éí David yę́ę áádóó biye'ké t'áá bił áshįįh bee aha'deet'ą́ągo Ízrel dine'é bee óhólnííh hool'áágóó baa deet'áanii nihił béédahózin.

⁶Nít'éé' David yę́ę biye' Sálaman yę́ę bá naal'a'í Nííbat biye' Jerobówam nídiidzáago binanit'a'í yich'į' naalteeh.

⁷Áádóó bik'ijį' diné doo yá'ádaashóonii ahíikaigo baa yíkai; éí Sálaman yę́ę biye' Riihobówam honiyé bidziilgo ída'diilyaa; íídą́ą́' Riihobówam t'ah ániid naagháago ádíkásti'go doo bohoníłdzil da nít'éé'.

⁸Áko nihí t'áá íiyisí t'óó ahonohyóí índa Jerobówam éí óola bee dóola yáázh naakigo áyiilaago nihidiyin biniyé nihee hólǫ́ǫgo biniinaa k'ad David yę́ę biye'ké éí Bóhólníihii bibee óhólnííh yeidiní'ánígíí bídadíníil'ąął danohsin.

⁹Bóhólníihii yá nááda'iiłniihii Éran áádóó Líívai dine'é biye'ké náás da'ahílchíiłii da' éísh doo nihił adaaníi da? Áko nílááhgóó kédaayahgóó ał'ąą dine'é ádaat'ínígi át'éego nááda'iiłniihii ádá nidahisoonil. Áko t'áá háiida éí dóola yázhí índa deenásts'aa' tsosts'idgo bee dílzin ádílnéehgo éí k'ehgo diyin dabidi'níinii bináá'iiłniihii danilį́įgo ádaahłééh.

¹⁰Nidi nihí éiyá Bóhólníihii nihiDiyin God nilį́, áádóó doo yóó'adadiit'ą́ą da, índa náá'iiłniihii danilínígíí Bóhólníihii yá nidaal'a'; éí Éran biye'ké danilį́ áádóó Líívai dine'é éí nidaal'a'gi bindaanish.

¹¹Áádóó t'áá ákwíí bíní áádóó e'e'áahgo Bóhólníihii bich'į' didlidgo nááhániihii índa tsin bijeeh dilidgo łikání halchinii nínáádayiiłnih, áádóó Diyin God bich'į' bááh nááhániihii ałdó' éí bikáá adání chin bąąh ádinii yikáá' ninádei'nił índa bee dahool'iní bá yada'ii'áhígíí éí bee dahool'iní t'áá bił óola bee ályaaígíí ak'ah bił e'e'áahgo dadiltłi' biniyé hasht'éédayiil'įįh, háálá nihí éí Bóhólníihii nihiDiyin God yich'į' nihííł'aadígíí bik'eh dahoniil'į́, nidi nihí éí yóó'adahosidoo'ą́.

¹²Áádóó jó, Diyin God éí t'áá bí nihinanit'a'í nilį́įgo nihił hólǫ́, áádóó binááda'iiłniihii éí béésh dilní bee í'dílzoołí nihich'į' deididoołts'į́įłgo yee nihida'doołnih. Ízrel dine'é nohłíinii, danihizhé'é yę́ę biDiyin God Bóhólníihii t'áadoo bik'ijį' danohłíní, háálá doo ła'dadoohłíił da.

¹³Nidi Jerobówam bisiláo ła' hane'dę́ę'go haa héeshjée'go áyiilaa; ła' éí Júdah dine'é bidááhdę́ę'go yaa héeshjéé', áádóó ła' yine'dę́ę'go yaa héeshjéé'.

¹⁴Áko Júdah dine'é t'ą́ą́' nídadéét'į́į́' nít'éé', jó, hadááhdę́ę́' índa hane'dę́ę́' hwe'ana'í yíl'á, áko Bóhólníihii bich'į' hadazhdeeshghaazhgo nááda'iiłniihii béésh dilní bee í'dílzoołí yee ádadííniid.

¹⁵Ákohgo Júdah dine'é hadadeeshghaazh, áko dazhdilwoshgo, Diyin God éí Abáíjah áádóó Júdah dine'é binááł Jerobówam áádóó Ízrel dine'é t'áá ałtso atíyiilaa.

¹⁶Áádóó Júdah dine'é yik'ee Ízrel dine'é dadínéezhchą́ą́', áko Diyin God éí Júdah dine'é yaa hodiní'ą́.

¹⁷Áádóó Abáíjah bidine'é yił éí siláo t'óó ahayóí nideistseed, áko ashdladi neeznádiindi mííl Ízrel bisiláo náhaasdláa'ii naaztseed.

¹⁸Íídą́ą́' kót'éego Ízrel dine'é hak'eh dahodeesdlį́į́', índa Júdah dine'é éí dahoneesná, háálá éí t'éiyá dabizhé'é yę́ę biDiyin God Bóhólníihii yaa dadzólíí nít'éé'.

¹⁹Áko Abáíjah éí Jerobówam yinoołchéeł go, áko kin hadaas'áii éí Béthel áádóó Jiishéínah índa Íífrayin, kin dah naazhjaa'ígíí t'áá daabił yighaideet'ą́.

²⁰Abáíjah bíyoołkááł yę́ędą́ą́' Jerobówam éí t'áadoo bidziil násdlį́į' da. Áádóó Bóhólníihii atíhoolaago dadziztsą́.

²¹Nidi Abáíjah éí ayóó át'é silį́į́'. Ba'ákéí éí dį́į́'ts'áadah shóyoost'e', áko biye'ké éí naadiin naaki áádóó bitsi'ké éí hastą́'áadah nít'éé'.

²²Áádóó Abáíjah łahjį' ádzaaígíí áádóó át'é nít'é'ígíí índa hahaasdzíi'ii éí Diyin God yá halne'ii Ído baa hane' bik'inídaháasdzoh.