Read Navajo II CHRONICLES 14 Bible Online

II CHRONICLES 14 - Navajo bible

II CHRONICLES 14

¹Áko Abáíjah éí dahazhé'é yę́ę da'iiłhaazhígi át'éego ajiiłhaazhgo David yę́ę bikin haal'áhígi yóó'áho'diilyaa, áádóó haye' Éísa hatsásk'ehgi aláahgo nant'á silį́į́'. Áko bíyoołkááł yę́ędą́ą́' kéyahgi hodéezyéelgo neeznáá nááhai.

²Áádóó Éísa biDiyin God Bóhólníihii binááł yá'ádaat'éehii índa t'áá ákogi át'éii yaa naagháá nít'éé'.

³Áko diyin dabidi'níinii łahgo ádaat'éii bida'alyaii bibikáá' nááda'iiniihí índa ninádahałaah doo biniyé wódah nahaz'ą́ągo ádaalyaaígíí nahjį' kóyiilaa áádóó eda'alyaii niyiizti' índa asdzání bida'alyaii naazínígíí niyiiztséél.

⁴Áádóó Júdah dine'é yich'į' haadzíi'go ííłní, Danihizhé'é yę́ę biDiyin God Bóhólníihii hádaaht'į́ áádóó bibee haz'áanii índa bibik'eh ó'oo'níiłii bik'eh ádanoht'é.

⁵Náá'áłdó' Júdah kéyahgi kin hadaas'áádóó t'áá át'é eda'alyaii índa ninádahałaah doo biniyé wódah nahaz'ą́ągo ádaalyaaígíí nahjį' kóyiilaa, áádóó aláahgo bee óhólníihgo bił haz'ą́ągi hoł hodéezyéelgo hoo'a'.

⁶Áádóó Júdah kéyahgi kin hadaas'á ditą́ągo binaa ahééda'astł'ingo ádayiilaa, háálá kéyahgi háádajilyį́į́h nít'éé'; éí deíháhígíí biyi' doo anaa' hólǫ́ǫ da nít'éé'; jó, Bóhólníihii háázhdooyįhgo haidiní'ą́.

⁷Éí bąą Júdah dine'é áyidííniid, Kéyah t'ah kǫ́ǫ́ hólónídą́ą́', haa'íshą' kin hadaas'áii éí ditą́ągo binaagóó ahééda'astł'inii áádóó yada'iitł'inii áádóó dáń'dadilkałii índa bich'ą́ą́h dah nída'atį́įhii bee hólǫ́ǫgo ádadiilnííł, háálá Bóhólníihii nihiDiyin God hádeiit'į́įgo t'áá ałtsojį' háá'dooyįh nihaidiní'ą́. Kót'éego dahasbį' áádóó náás dadi'yeesdéél.

⁸Áko Éísa éí Júdah dine'é bisiláo táadi neeznádiindi míilgo bee hólǫ́; éí naagé áádóó tsiidétáán nideijaah, áádóó Bénjamin dine'é naakidi neeznádiindóó ba'aan tseebídiindi míilgo siláo éí naagé índa k'aa' nideijaah, áko díí t'áá ałtso diné dahayóii danilį́.

⁹Iithiyópiya dine'é Zíírah wolyéii éí t'ááłáhídi mííltsoh siláo áádóó táadi neeznádiingo tsindaabąąs bijáád naakiígíí yee hach'į' nídiibaa'go Marííshahjį' níná.

¹⁰Ákohgo Éísa ákǫ́ǫ́ yich'į' ch'íníná, áko Marííshahgi Zéfathah honíts'aa'ígi yich'į' anaa' biniyé ni'ahí'nil.

¹¹Áko Éísa biDiyin God Bóhólníihii yich'į' ádííniidgo ání, Bóhólníihii nílíinii, dabidziilii, doodaii' doo dabidziilii bíká adíílwołgi doo nániłdzil da; nihíká anilyeed, Bóhólníihii nihiDiyin God nílíinii, naa dadzííníidlí, índa díí ayóó ázhnéelą́'ígíí nízhi' bee bik' ijį' niniikai, Bóhólníihii nílíinii, ni éí nihiDiyin God nílį́; t'ááká diné ła' nik'eh dódle' yíila'.

¹²Kót'éego Éísa áádóó Júdah dine'é dabinááł Bóhólníihii éí Iithiyópiya dine'é yik'eh deesdlį́į'go Iithiyópiya dine'é adahineezhchą́ą́'.

¹³Áko Éísa áádóó bisiláo yił naakaígíí níléí Gíírar kin haal'áajį' yikéé' deíjeehgo, áko Iithiyópiya dine'é bisiláo t'óó ahayóí ch'ééh ádáát'įįdgo naaztseed, háálá Bóhólníihii áádóó bisiláo ałtso hak'eh dadeesdlį́į́' áádóó yisnááh bąąh da'oogą́'ígíí t'óó ahayóí adayiizyį́.

¹⁴Áádóó Gíírar kéyah nahós'a' binaagóó kin hadaas'áhígíí t'áá át'é atídayiilaa, háálá Bóhólníihii yik'ee bił yéé' dahazlį́į́' áádóó kin hadaas'áágóó t'áá át'é adayiizyį́, háálá yisnááh t'áá íiyisí t'óó ahayóí.

¹⁵Áádóó ałdó' da'alį́į́' dah deinéełkaadii dabiníbaal atídayiilaago dibé índa ghą́ą́'ask'idii t'óó ahayóí adeineeskaadgo Jerúsalem kin haal'áágóó anídahaaskai.