Read Navajo II CHRONICLES 15 Bible Online

II CHRONICLES 15 - Navajo bible

II CHRONICLES 15

¹Áko Diyin God biNíłch'i éí Óded biye' Azaráíyah bik'i hoole'.

²Áko dah diiyáago Éísa yidááh níyá, áko ííłní, Dashíínółts'ą́ą́', Éísa áádóó Júdah dine'é índa Bénjamin dine'é t'áá ánółtso, Bóhólníihii t'ah bił dahonohłǫ́ǫgo nihił hólǫ́, áádóó hádaoht'į́įgo bik'ídadoohkah, nidi yóó'ádasidoo'ą́ągo bí ałdó' yóó'anihididoo'ááł.

³K'ad nízaad nihoolzhiizhgo Ízrel dine'é éí Diyin God t'áá aaníinii t'áágééd yildah áádóó náá'iiłniihii nidí'nóotįįłii ádin índa bee haz'áanii t'áágééd dahináá nít'éé'.

⁴Nidi bide ádahoodzaago Ízrel biDiyin God Bóhólníihii hadeintáago yik'ídaaskaigo yich'į' ninákai.

⁵Áko t'áá háiida doo hózhǫ́ǫgo ch'íjóya', doodaii' doo yah anídzódza' le' át'ée da nít'éé', nidi éí kédaayahgóó kéédahat'ínígíí t'óó báhádzidgo ti'dahojiyoonííh nít'éé'.

⁶Índa ła' dine'é náánáła' dine'é ádayoołdįįł, áádóó ła' kin haal'áii náánáła' kin haal'áii tídeiidile', háálá Diyin God éí ach'į' nahwii'náanii t'áá ałtso yee hade áhósin nít'éé'.

⁷Éí bąą danihidziil le', t'áadoo nihąą ninádahaka'í, háálá nihinaanish bideená nihik'idahozhdoodliił.

⁸Áko Éísa díí saadígíí yidiizts'ą́ą́', éí Diyin God yá halne'ii Óded yee hahaasdzí'ígíí yee ha'oosníí', áko Júdah dine'é bikéyah áádóó Bénjamin dine'é bikéyahdóó t'áá át'é, índa Dził Íífreiyimgi kin hadaas'áhígíí yisnánídóó doo daaldinii bida'alyaii nahjį' kóyiilaago áádóó Bóhólníihii bikin bii' sohodizin chaha'oh bééniní'ánígíí bidáahgi Bóhólníihii bibikáá' náá'iiniihí hasht'ééyiidlaa.

⁹Áko Éísa éí Júdah dine'é áádóó Bénjamin dine'é t'áá ałtso índa Ízrel dine'é bitahdóó Íífreiyim dine'é áádóó Manáseh dine'é índa Símiyan dine'é dabitahdóó ał'ąą dóone'é danilíinii bił áłah ájiilaa, háálá haDiyin God Bóhólníihii hoł hólónígíí dayiiłtsą́ągo t'óó ahayóí hohidiikai.

¹⁰Éísa nant'áago ashdla'áadah náhááh góne' táá' nídízííd binih Jerúsalem kin haal'áagi áłah dzizlį́į́'.

¹¹T'áá éí bijį́ Bóhólníihii bich'į' náádadziisnii'; bąąh da'jííghą́ą'go nidajiizhjaa'ígíí ła', tsosts'idi neeznádiin béégashii índa tsosts'idi mííl dibé,

¹²áádóó dahazhé'é yę́ę biBóhólníihii Diyin God éí hajéí t'áá át'é bee índa hwii' sizíinii t'áá át'é bee hádajit'į́į doo biniyé ahadazdeest'ą́.

¹³Índa t'áá háiida Ízrel dine'é biBóhólníihii Diyin God doo hádaat'íinii nidabi'ditseed doo, éí a'ohgo ádaat'éii, doodaii' ayóó ádaat'éii, diné, doodaii' asdzánída ákódoolnííł.

¹⁴Áádóó Bóhólníihii bich'į' ádee hadahizdeesdzíi'go iinéé' ayóó íits'a'go áádóó dazhdilwoshgo béésh dilní bee í'dílzoołí índa deenásts'aa' bidee' bee í'dílzoołí bee ádazhdííniid.

¹⁵Áko Júdah dine'é t'áá ałtso díí ádee ha'oodzí'ígíí yaa bił nidahoozhǫǫh, háálá bijéí t'áá át'é yee nideideez'ánígíí índa deinízinígíí t'áá át'é yee Diyin God hádaat'į́įgo yik'ídaaskai, áko Bóhólníihii t'áá ałtsodę́ę́' doo haa hwiinít'į́į́góó áhoolaa.

¹⁶Náá'áłdó' aláahgo naat'áanii Éísa bimá Méíyakah éí asdzą́ą́ naat'ááh nilínídóó nahjį' hayííłt'e', háálá asdzání be'elyaii doo daaldinii bidiyingo áyiilaa, áko éí habe'elyaii Éísa hats'ą́ą́' niyiisne'go yiidííséigo Kídran tó nílínídi yidííłid.

¹⁷Nidi ninádahałaah doo biniyé wódah nahaz'ą́ągo ádaalyaaígíí éí Ízrel kéyahdóó t'áadoo nahjį' kólyaa da; azhą́ ákót'ée nidi, Éísa bijéí yee t'áá ákwii át'éego bíiníłką́.

¹⁸Áádóó Bóhólníihii bikin bii' sohodizin góne' yah ajiizhjaa'ii éí bizhé'é yę́ę diyingo niidiyiiz'áanii índa t'áá hó ałdó' diyingo nihizdeez'áanii, éí béésh łigaii áádóó óola índa chodao'íinii át'é.

¹⁹Áko doo da'ahijigą́ą́góó Éísa nant'áago tádiindóó ba'aan ashdla' nááhai.