Read Navajo II CHRONICLES 17 Bible Online

II CHRONICLES 17 - Navajo bible

II CHRONICLES 17

¹Áádóó Éísa hatsásk'ehgi haye' Jiiháshafat aláahgo nant'á silį́į'go Ízrel dine'é yich'į' bidziilgo hasht'ediidzaa.

²Áko Júdah kéyahgi t'áá át'é kin hadaas'áii ditą́ągo binída'astł'inígóó siláo dah deínéehgo áyiilaa, índa Júdah kéyah áádóó Íífreiyim dine'é bikin hadaas'áhígíí éí Éísa hazhé'é yę́ę yisnánígi siláo niyiiznil.

³Jiiháshafat éí Bóhólníihii bił hólǫ́, háálá átséédą́ą́' hazhé'é David yę́ę hinánígi át'éego jiníyá; Béíyalim éí doo hát'į́į da nít'éé'.

⁴Nidi hazhé'é yę́ę biDiyin God Bóhólníihii hájít'į́įgo áádóó bibik'eh ó'oo'níiłii bik'eh hojíł'į́įgo jiníyá; doo éí Ízrel dine'é ádaat'ínígíí bik'ehgo jiníyáa da.

⁵Éí bąą Bóhólníihii éí bee óhólníihii chánah áyiilaago yee hóhoos'níí', áko Júdah dine'é t'áá ałtso aa doolyéełii Jiiháshafat yaa dayiiznilgo yódí índa bee ił ídlíinii t'óó ahayóí bee hazlį́į́' nít'éé'.

⁶Áádóó éí Bóhólníihii bik'ehgo honít'i'jí yaa bił honeeni áádóó ninádahałaah doo biniyé wódah nahaz'ą́ągo ádaalyaaígíí áádóó asdzání bida'alyaii Júdah kéyahdóó nahjį' kóyiilaa.

⁷Índa nant'áago táá' náhááh góne' ałdó' bá naat'áanii danilíinii Ben-héíyil áádóó Obadáíyah áádóó Zekaráíyah áádóó Niithániyel índa Maikéíyah éí nida'nitin dooleeł biniyé Júdah dine'é bikin hadaas'áágóó ayiis'a'.

⁸Áádóó Líívai dine'é dah deidiił'a' éí Shiiméíyah, Nethanáíyah, Zebadáíyah, Éísahel, Shiimíramath, Jiihánathan, Adonáíjah, Tobáíjah áádóó Tab-adonáíjah, díí éí Líívai dine'é danilį́įgo náá'iiłniihii Iilíshama áádóó Jiihóram yił dayííł'aad.

⁹Áko Bóhólníihii bibee haz'áanii naaltsoos bee dahólǫ́ǫgo Júdah dine'é bikin hadaas'áágóó t'áá át'éé nít'éé' diné yitahgóó nida'neeztą́ą́'.

¹⁰Áádóó Júdah dine'é bik'i dinaago bee óhólnííh bił nahaz'ą́ą́góó éí Bóhólníihii béédadzisdzíidgo biniinaa Jiiháshafat t'áadoo bik'i jiijée' da.

¹¹Nít'éé' Filístiya dine'é aa deidooléełii índa béésh łigaii nehelyéhígíí Jiiháshafat yaa deizhjaa', índa Árab dine'é éí deenásts'aa' áádóó tł'ízíchǫǫh t'áá ał'ąą tsosts'idi miildóó ba'aan tsosts'idi neeznádiingo haa deineeskaad.

¹²Áko Jiiháshafat adeest'įįdgo ts'ídá ayóó át'éii yileeł. Áádóó Júdah kéyahgi kin binída'astł'inígíí áádóó kin hadaas'áii kin bii' nooh nída'achíihii ádayiilaa.

¹³Áádóó Júdah kéyahgi kin hadaas'áágóó naanish bee áda'íízįįd índa Jerúsalem kin haal'áagi siláo dahayóii índa dabíiyisii kéédahat'į́.

¹⁴Áko díí éí dabizhé'é yę́ę bada'áłchíní bik'ehgo dayéélta': Júdah dine'é bitahdóó siláo míilgo yindanit'a'í: alą́ąjį' siláo binanit'a'í Ádna éí diné dahayóii táadi neeznádiindi mííl yił dah yinééł.

¹⁵Áádóó náábíkéé' góne' éí siláo binanit'a'í Jiihohéínan naakidi neeznádiindóó ba'aan tseebídiindi mííl siláo yił dah yinééł.

¹⁶Náá'ákóne' éí Zíkrai biye' Amasáíyah, éí Bóhólníihii yich'į' ni'ádeet'ánígíí diné dahayóii naakidi neeznádiindi mííl yił dah yinééł.

¹⁷Bénjamin dine'é nilíinii Iiláíyada, éí diné hayóii nilį́; éí naakidi neeznádiindi mííl siláo éí k'aa' áádóó naagé nideijaahii yił dah yinééł.

¹⁸Náábíkéédę́ę́' éí Jiihózabad t'ááłáhídi neeznádiindóó ba'aan tseebídiindi mííl siláo dah yinéłígíí yił anaa' yiniyé hasht'edadee'nééh.

¹⁹Díí éí aláahgo naat'áanii yá nidaal'a'; Júdah kéyahgi t'áá át'éé nít'éé' kin hadaas'á ditą́ągo binaa ahééda'astłinígóó siláo niyiiznilígíí ałdó' aláahgo naat'áanii yá nidaal'a'.