Read Navajo II CHRONICLES 18 Bible Online

II CHRONICLES 18 - Navajo bible

II CHRONICLES 18

¹Ákohgo Jiiháshafat éí yódí índa bee ił ídlíinii t'óó ahayóí boosąąd, áádóó Éíhab yighanjį' azyehgo yich' ijí silį́į́'.

²Áádóó díkwíí shį́į́ nááhaigo Samériya góyaa Éíhab bich'į' jiníyá. Áko Éíhab éí dibé áádóó béégashii t'óó ahayóí éí diné bił nijikaígíí bił há neistseed, áádóó Réímath-gíliyad góde shił díí'ash hałníigo háni' há áhoolaa.

³Áko Ízrel dine'é aláahgo binanit'a'í Éíhab éí Júdah dine'é aláahgo binanit'a'í Jiiháshafat ííłní, Réímath-gíliyadgóó daats'í shił díí'ash? Áko ázhdííniid, Shí t'áá nigi ánísht'é, shidine'é éí nidine'égi ádaat'é, áádóó anaa' náhádleehgo níká anéijah doo.

⁴Áádóó Jiiháshafat éí Ízrel dine'é aláahgo binanit'a'í ííłní, Bína'ídíłkid, baa nánooshkąąh, Bóhólníihii ha'át'íí didooniił díí jį́.

⁵Éí bąą Ízrel dine'é aláahgo binanit'a'í éí náásgóó áhodooníłígíí yaa dahalne'ii dį́įdi neeznádiingo diné áłah áyiilaago ííłní, Réímath-gíliyad daats'í bich'į' dadiibah, doodaii' ááhodeesht'įįł daats'í? Áko ádaaní, Ákóde dínááh, háálá Diyin God éí aláahgo naat'áanii yeididoo'ááł.

⁶Áádóó Jiiháshafat ání, Díí kǫ́ǫ́ dahalne'ígíísh binaashiijí Bóhólníihii yá halne'ii nabídídíilkiłígíí doo ła' naagháa da?

⁷Áko Ízrel dine'é aláahgo binanit'a'í éí Jiiháshafat ííłní, Diné ła' t'ah yidziih, éí Ímlah biye' Maikéíyah; éí shį́į́ hwee Bóhólníihii nabídídíilkił, nidi éí jooshłá, háálá yá'át'éehii ts'ídá doo yee shaa halne' da, nidi doo yá'áshóonii t'éiyá yee shaa halne'. Áko Jiiháshafat ání, Aláahgo naat'áanii nílíinii, t'áadoo ádíníní yee'.

⁸Nít'éé' Ízrel dine'é aláahgo binanit'a'í éí siláo binanit'a'í ła' hágo yidííniidgo ííłní, Tsxį́įłgo Ímlah biye' Maikéíyah kwe'é bił nánít'aash.

⁹Áko Ízrel dine'é aláahgo binanit'a'í índa Júdah dine'é aláahgo binanit'a'í Jiiháshafat éí bi'éénééz yiih yí'áazhgo Samériya dań'dítį́įhgi t'áá bíni' haz'ą́ą́ léi'gi t'áá ał'ąą bibikáá'dóó nahat'áii yikáá' dah siké, áko náás áhodooníiłii yaa dahalne'ii t'áá ałtso hadááhdóó dahoolne'.

¹⁰Áádóó Kiinéíyanah biye' Zedekáíyah béésh yee adee' áyiilaago ání, Bóhólníihii kóní, Díí bee Síriya dine'é ałtso asíníłdįįdjį' bighá da'dííshish.

¹¹Áko dahalne'ii t'áá ałtso t'áá ákót'éego náás áhodoonííł yaa dahoolne'go ádaaní, Nílááh, Réímath-gíliyad góde dínáahgo ła' nilééh, háálá Bóhólníihii éí aláahgo naat'áanii yeididoo'ááł.

¹²Áko hane' bił eel'a'go Maikéíyah hágo bidiní bi'doo'niidígíí hach'į' haadzíi'go ání, Jó, k'ad dahalne'ii t'áá ła' saad yá'át'éehii yee aláahgo naat'áanii yich'į' hadaasdzíí'. Éí bąą bíni' nizaad bee hadíídzihígíí baa nánooshkąąh, t'áá éí dabizaadígi át'ée doo; yá'át'éehii t'éiyá bee hadíídzih.

¹³Nidi Maikéíyah ání, Ts'ídá t'áá aaníí Bóhólníihii hiná; t'áá ákót'éego ts'ídá t'áá aaníí shiDiyin God shich'į' yee haadzí'ígíí t'éí bee hadeesdzih.

¹⁴Kót'éego aláahgo naat'áanii baazhníyá, áko aláahgo naat'áanii áháłní, Maikéíyah nílíinii, Réímath-gíliyadgóó daats'í dadiibah, doodaii' daats'í áádahodiit'įįł? Áko ábijiní, Nílááh, ákóde dohkáahgo ła' daałééh, háálá éí nílák'edidoot'ááł.

¹⁵Áko aláahgo naat'áanii áháłní, Haa lá néelą́ą'di bee nich'į' háádeesdzih? Shą́ą́', t'áadoo ha'át'íhída bee shił hólne'í, nidi t'áá aaníinii bee shił hólne'go, Bóhólníihii bízhi' t'éí bee shił hólne', nidishníi ni'.

¹⁶Ákohgo ání, Ízrel dine'é ałtso dziłgóó taozhjée'go yiiłtsą́; dibé yaa áhályáanii ádinígíigi áhoodzaa. Bóhólníihii ání, Bíni' diné t'áá ałtso bił dahodéezyéelgo dabighangóó anáhákáah le'.

¹⁷Áko Ízrel dine'é aláahgo binanit'a'í éí Jiiháshafat ííłní, Da' doósh nił hweeshne' da; eii yá'át'éehii doo yee shich'į' haadziih da, nidi doo yá'áshóonii t'éiyá.

¹⁸Nít'éé' Maikéíyah ánáádí'ní, Éí bąą Bóhólníihii ánínígíí diits'į́į́h; Bóhólníihii bibikáá'dóó nahat'áii yikáá' dah sidáago yá'ąąshdi dah deínéehii t'áá át'é binish'náájí áádóó binishtł'ají bíighah naazį́įgo yiiłtsą́.

¹⁹Áádóó Bóhólníihii ání, Háishą' Ízrel dine'é aláahgo binanit'a'í Éíhab yíni' yá'áhodoolíiłgo Réímath-gíliyadgóó doogááł, áko bik'eh hodidoodleeł? Áádóó ła' kót'éego ní, náánáła' kót'éego náádí'ní.

²⁰Ákohgo níłch'i léi' ch'íníyáago Bóhólníihii yidááhdóó yiizį'go ání, Shí lá bíni' áhodeeshłíił ni. Áko Bóhólníihii ábíłní, Ha'át'íishą' bee dooleeł?

²¹Áko ání, Ákǫ́ǫ́ deeshááł, áádóó bá dahalne'ii t'áá ałtso dabizéé' góne' níłch'i biyooch'íidii nish łį́į doo. Áko Bóhólníihii ání, Nílááh, bíni' áhónílééh, áádóó ałdó' bik'eh didíídleeł; nílááh, dínáahgo ákónínééh.

²²Éí bąą k'ad, Bóhólníihii éí níłch'i biyooch'íidii díí ná dahalne'ii t'áá ałtso dabizéé' góne' ayiis'a'; jó, Bóhólníihii éí doo yá'áshóonii yee ná haadzíí'.

²³Ákohgo Kiinéíyanah biye' Zedekáíyah hwíighahjį' niníyáago Maikéíyah biniitsį' néidííkaadgo ání, Shits'ą́ą́dóó lá háajigo Bóhólníihii biNíłch'i dahodiile'go nich'į' haadzíí'?

²⁴Maikéíyah ání, Jó, nídidíít'į́į́ł biniyé ná'áne'í góne' yah ííníyáago éí bijį́ yidííłtsééł.

²⁵Ákohgo Ízrel dine'é aláahgo binanit'a'í ání, Maikéíyah daosiłgo kin haal'áádóó naat'áanii Éíman áádóó aláahgo naat'áanii biye' Jó'ash bich'į' bił nídadohkááh.

²⁶Ádabidohní, Aláahgo naat'áanii ání, Díí diné awáalyaadi yah adaołt'e'go hodiiyeelgo nánísdzáajį' t'áá ach'į' nahwii'nánígo bááh éí tó bił banída'ołtso'.

²⁷Ákohgo Maikéíyah ání, Hodiiyeelgo néínídzáá ládą́ą́', Bóhólníihii doo shee haadzíi' da doo. Áádóó ání, Dine'é nohłíinii, t'áá ánółtso da'íísółts'ą́ą́'.

²⁸Kót'éego Ízrel dine'é aláahgo binanit'a'í índa Júdah dine'é aláahgo binanit'a'í Jiiháshafat éí Réímath-gíliyad góde ííná.

²⁹Áko Ízrel dine'é aláahgo binanit'a'í éí Jiiháshafat ííłní, Łahgo áneeshningo ádi'deeshníiłgo atah deeshbah, nidi ni éí ni'éénééz biih ninááh. Áádóó Ízrel dine'é aláahgo binanit'a'í łahgo ánoolningo í'diilyaago atah ííbaa'.

³⁰Nidi Síriya dine'é aláahgo binanit'a'í éí tsindaabąąs bijáád naakiígíí yindanit'a'í bił naakaígíí yi'níłnii'go ání, A'ohgo danilínígíí, doodaii' ayóó ádaat'éhígíí t'áadoo bił da'ahohgání, nidi Ízrel dine'é aláahgo binanit'a'í t'éiyá.

³¹Áádóó tsindaabąąs bijáád naakiígíí yindanit'a'í éí Jiiháshafat dayiiłtsą́ągo ádaaní, Ízrel dine'é aláahgo binanit'a'í át'į́; éí bąą yił da'ahidoogą́ą́ł yiniyé yináshzhiizh, nidi Jiiháshafat hadoolghaazhgo Bóhólníihii bíká eelwod, áádóó Diyin God dabidiisnáa'go hats'ą́ąjį' dah diikai.

³²Áko tsindaabąąs bijáád naakiígíí yindanit'a'í éí doo Ízrel dine'é aláahgo binanit'a'í át'į́į dago yaa ákodaniizį́į'go baa da'ígháahii t'óó nináhaazhjéé'.

³³Áko diné léi' t'óó dzólníí góne' be'ełtį́į́' yił k'ídeeshchidgo Ízrel dine'é aláahgo binanit'a'í bibéésh éé' ahidadii'á bita' góne' yiskah. Éí bąą Éíhab hatsinaabąąs bijáád naakiígíí neilo'ígíí ábijiní, Hashi'doolk'ehéii; naa'í'íléehgo nahjį' shił ha'íłbąąs.

³⁴Íídą́ą́' éí bijį́į́ góne' t'óó yówehda ałk'i jiijéé', áko i'íí'ą́ąjį' Ízrel dine'é aláahgo binanit'a'í bitsinaabąąs bijáád naakiígíí biyi'dóó Síriya dine'é yich'į'go de ízdólzin nít'éé', áko jį́honaa'éí ííyáago índa dadziztsą́.