Read Navajo II CHRONICLES 20 Bible Online

II CHRONICLES 20 - Navajo bible

II CHRONICLES 20

¹Áádóó ákódaadzaadóó bik'ijį' Mó'ab dine'é áádóó Áman dine'é índa náánáła' dadine'é éí Jiiháshafat yił da'ahidoogą́ą́ł biniyé yich'į' níná.

²Ákohgo siláo ła' yíkaigo Jiiháshafat yił dahoolne'go ádaaní, Íídamdę́ę́' diné ayóó ánéelą́ą'go tónteel bilááhdę́ę́' nihik'ijį' yinééł; jó, Házazan-téímer haz'ą́ągi t'áá éí Engíídai hoolyéegi dah yinééł.

³Nít' éé' Jiiháshafat bił yéé' hazlį́į́', áko Bóhólníihii hát'į́į doo yiniyé hasht'e'í'diilyaago Júdah dine'é t'áá ałtso bitahgóó doo adą́ą da dooleełgo yaa táhodoolne'.

⁴Áko Júdah dine'é ahíikaigo áłah silį́į́'; Bóhólníihii nihíká anilyeed deididooniił biniyé Júdah kéyahgi t'áá kin hadaas'áádę́ę́' t'áá át'é nidahaaskaigo Bóhólníihii hádaat'į́.

⁵Áádóó Jiiháshafat yiizį'go Júdah dine'é índa Jerúsalem kin haal'áádę́ę́' dine'é áłah silį́'ígíí binááł Bóhólníihii bikin bii' sohodizin bidááhjí ániidgo haz'ánígi sizį́įgo

⁶ání, Danihizhé'é biDiyin God Bóhólníihii nílíinii, da' doósh Diyin God yá biyi'di hólóonii nílį́į da? Áádóó da' doósh ni ał'ąą dine'é bibee ídahólníihii bee nóhólníih da? Bee adziil índa ayóó át'éii nílák'ee silá, áko doo ła'da nidínóol'ąął da.

⁷NihiDiyin God nílíinii, da' doósh díí kéyahgi kéédahat'íinii Ízrel dine'é nidine'é nilíinii binááł ch'ínííníłkaad da, áádóó kéyah éí nik'is Éíbraham ba'áłchíní náás ahoolchíiłii hool'áágóó baa dííní'ą́ą da?

⁸Áádóó ákwii yii' kéédahat'į́į́ nít'éé', áádóó éí kin bii' sohodizin bii' nízhi' baa ha'niih doo biniyé ádayiilaago ádaaní,

⁹Doo yá'ádaashóonii nihik'ijį' silį́į'go, éí diltłish, doodaii' nihich'į' nahwii'náago, doodaii' naałniih, doodaii' dahodííchįįdgo díí kin bii' sohodizin bidááhdóó áádóó ni nidááhdóó deidiidzįįł, háálá díí kin bii' góne' ni'dójí, áko nihich'į' nidahwii'náago nídaniikąąhgo nihididííts'į́įłgo yisdánihidíínił.

¹⁰Áádóó k'ad, shoo, Áman dine'é áádóó Móab dine'é índa Dził Síyerdóó dine'é nilíinii, Ízrel dine'é éí Ííjip kéyahdę́ę́' náákah yę́ędą́ą́' nideidoołtsiłgo t'áadoo bee ba'dííní'ą́ą da, nidi yik'ee'ąą haakaigo t'áadoo nideistseed da.

¹¹Shoo, kódíshní, K'éédanihididlééh yiniyé nihich'į' yinééł; nikéyah áádóó nihíí' dooleełgo nihaa dííní'ánídóó ch'ídanihidínóoł kał.

¹²NihiDiyin God nílíinii, doósh nihá baa nídíít'įįł da? Háálá nihí adziil nihee ádingo díí ayóó át'é nihik'ijį' oonééł; ádadii'níłígíí doo nihił béédahózin da, nidi ni t'éí nich'į'go dadíníit'į́į́'.

¹³Áádóó Júdah dine'é t'áá ałtso Bóhólníihii yidááhdóó deizį'; dabiyázhí áádóó bida'asdzą́ą́ índa bada'áłchíní yił naazį́.

¹⁴Ákohgo Éísaf biye'ké náás ahoolchíiłii Matanáíyah biye' Jáíyel, éí biye' Biinéíyah, éí biye' Zekaráíyah, éí biye' Jahéíziyel, éí Líívai dine'é nilíinii éí Bóhólníihii biNíłch'i Diyinii áłah ílínígíí biníi'gi bik'i hoole'.

¹⁵Áádóó ání, Júdah dine'é áádóó Jerúsalem kin haal'áagi kééhoht'íinii t'áá ánółtso índa Jiiháshafat aláahgo naat'áanii nílíinii, da'íísółts'ą́ą́'; Bóhólníihii kónihiłní, Díí ayóó át'é dah oonéłígíí biniinaa t'áadoo béédaałdzidí, áádóó t'áadoo bik'ee nisidaahdáhí, háálá nihí doo anadadooht'įįł da, nidi Diyin God anadoot'įįł.

¹⁶Yiską́ągo ákóyaa bich'į' hidoohkah; jó, Ziz tsénít'i'dę́ę'go hadookah, áko Jiirú'el honoojíigi ha'a'aahjigo honíts'aa' nineel'ą́ągi bik'ídoohnééł.

¹⁷Nihí éí díí anaa'gi doo bik'iidoohjah da; t'áá nihí bich'į' ni'ádóhníiłgo hazhó'ó adahidíínóhsį́h, áko Bóhólníihii bibee yisdá'iildéehii deidoołtsééł; Júdah dine'é áádóó Jerúsalem dine'é nohłíinii, t'áadoo nihił daayé'í, áádóó t'áadoo bik'ee nisidaahdáhí; yiską́ągo bich'į' ch'ídoohnééł, háálá Bóhólníihii éí nihił hólǫ́ǫ dooleeł.

¹⁸Áko Jiiháshafat éí yaa ádzaago neeshjool áádóó Júdah dine'é índa Jerúsalem kin haal'áagi kéédahat'íinii t'áá ałtso Bóhólníihii yich'į' tsé'yaa daneeshjoolgo Bóhólníihii yich'į' nidahasá.

¹⁹Áádóó Líívai dine'é éí Kóhath dine'é áádóó Kórah dine'é danilíinii deizį'go Ízrel dine'é biBóhólníihii Diyin God yaa dahaniihgo chánahgo dahataał.

²⁰Áko t'ah abíínídą́ą́' nízhdiijéé' áádóó Tekówah honoojíijigo ch'ízhníná, áko joonéełgo Jiiháshafat t'áá ákǫ́ǫ́ yiizį'go ání, Dashíínółts'ą́ą́', Júdah dine'é áádóó Jerúsalemgi kéédahoht'íinii, Bóhólníihii nihiDiyin God deinohdlą́ągo baa dadzíínóhłí, áko nihidziilgo adasoołkaal doo; yá dahalne'ii deinohdlą́, áko nihá ła' hooníił doo.

²¹Áádóó dine'é bił nabik'íyádajisti'go Bóhólníihii yich'į' dahataał dooígíí néidiinil, áádóó éí hodílzingo baa dahojiniih doo biniyé siláo yilą́ąjį' yikahgo ádadidooniił, Bóhólníihii baa dahohniih, háálá aa a'ááh nízingo ahóyéel'á.

²²Áko adaho'niitáalgo áádóó Bóhólníihii yaa dahaniihgo Bóhólníihii éí Áman dine'é áádóó Mó'ab dine'é índa Dził Síyerdóó dine'é éí Júdah dine'é yiniyé niheeznáago ahaah héeshjée'go áyiilaa, áko t'óó ałk'i néijéé'.

²³Jó, Áman dine'é áádóó Mó'ab dine'é bisiláo éí Dził Síyerdóó dine'é ałtso ádeidoołdįįł biniyé yik'iijéé', áko Síyerdóó kéédahat'íinii ádeisdįįdgo t'áá bí t'ááłá'í nítínígo ahíłká'ííjée'go ahidiníłnáago áda'ahisdįįd.

²⁴Áko Júdah dine'é honoojíidi ya'ii'áago bikáá'dóó ha'alzídíjį' yíkaigo, diné haal'áhíjį' dadéé'į́į́' nít'éé'; jó, ats'íís daneeznáago ni'góó nihidíl'á; doo ła' yidzí'í da lá.

²⁵Jiiháshafat áádóó bidine'é éí bida'ana'í yę́ę bindaalye'é yąąh deídóobeeł biniyé yíkaigo daneeznáanii bitahgóó yódí t'óó ahayóí índa t'áadoo le'é da'ílínígíí yik'ídahaaskaigo, t'áá bí ádá nidayiidláahgo t'óó yówehda áde ádayiilyaa; t'áá nídayiiláahgo táá' yiską́; jó, t'óó ahayóí lá.

²⁶Áádóó dį́į́' yiską́ągo yíldzis Bérakah hoolyéegi áłah silį́į́', áko ákwe'é Bóhólníihii yaa dahaniih; éí bąą éí haz'ánígíí díí jį́įjį' yíldzis Bérakah hoolyé.

²⁷Ákohgo Júdah dine'é áádóó Jerúsalem kin haal'áádóó dine'é Jiiháshafat halą́ąjį' yigáałgo hoł dahózhǫ́ǫgo Jerúsalem kin haal'áágóó níjíkai, háálá hoda'ana'í bik'eh dazdeesdlį́į'go biniinaa Bóhólníihii hoł nidahoozhǫǫhgo áhoolaa.

²⁸Tsin tł'óół neeznáá bąąh daneelzhee'go bee nida'a'néii áádóó tsin tł'óół naakits'áadah bąąh daneelzhee'go bee nida'a'néii índa béésh dilní bee í'dílzoołí yee nidaanéego Jerúsalem kin haal'áagi Bóhólníihii bikin bii' sohodizinjį' nákai.

²⁹Nít'éé' bee ídahólníihii t'áá át'é kédaayahgóó Bóhólníihii éí Ízrel dine'é bida'ana'í yich'į' naazbaa'ígíí yaa dahodiizts'ą́ą'go Diyin God yik'ee bił yéé' dahazlį́į́'.

³⁰Áko Jiiháshafat yee bóhólníihgo nahós'a'gi hodiiyeel, háálá haDiyin God hanaadę́ę́' doo ách'į' ni'jódlíígóó háázhdoolyįhgo há áyiilaa.

³¹Kót'éego Jiiháshafat éí Júdah dine'é yinant'áá nít'éé'. Tádiindóó ba'aan ashdla' binááhaigo aláahgo naat'áanii silį́į́' áádóó Jerúsalem kin haal'áagi nant'áago naadiin ashdla' nááhai. Bimá éí Azúbah wolyéego Sháílhai yitsi' nilį́.

³²Áko bizhé'é Éísa yę́ę yaa naayáii yik'ehgo níyá; éí doo yits'ághááhgóó Bóhólníihii binááł t'áá ákogi ádaat'éii yaa naaghá.

³³Azhą́ ákót'ée nidi, ninádahałaah doo biniyé wódah nahaz'ą́ągo ádaalyaaígíí t'áadoo nahjį' ályaa da, háálá dine'é éí dahazhé'é yę́ę biDiyin God bich'į' t'áadoo bijéí yee nideideez'ą́ą da.

³⁴K'ad łahjį' Jiiháshafat átsé áádóó akée'di ádzaaígíí, jó, Hanéínai biye' Jííhu éí Ízrel dine'é aláahgo binanit'a'í danilíinii binaaltsoos bik'inídaháasdzo.

³⁵Díí ádahóót'įįdóó bik'ijį' Júdah dine'é aláahgo binanit'a'í Jiiháshafat éí Ízrel dine'é aláahgo binanit'a'í Eihazáíyah doo yá'áshóonii yaa naagháii yił yíní ahíldin.

³⁶Tsinaa'eeł Társhish kin haal'áágóó ałnáádaa'oł doo biniyé ádeidoolíiłgo yił ahidii'áázh; Ííziyan-gííber kin haal'áagi éí tsinaa'eeł ádayiilaa.

³⁷Ákohgo Maríísha kin haal'áádóó diné Dódava biye' Eliyíízer éí Jiiháshafat yik'ijį' hahaasdzíi'go ání, Eihazáíyah bił ahidini' áazhgo biniinaa Bóhólníihii éí bindashínílnishii yiyííłchǫ'. Áko tsinaa'eeł dahaastǫ'go doo dazhdół'eeł át'ée da silį́į́'.