Read Navajo II CHRONICLES 21 Bible Online

II CHRONICLES 21 - Navajo bible

II CHRONICLES 21

¹Áko Jiiháshafat dabizhé'é yę́ę da'iiłhaazhígi át'éego ajiiłhaazhgo David yę́ę bikin haal'áagi dahazhé'é yę́ę yóó'ádaalyaaígi yóó'áho'diilyaa. Áko haye' Jiihóram hatsásk'ehgi aláahgo nant'á silį́į́'.

²Áádóó hak'isóó hólǫ́, éí Jiiháshafat dabiye': Azaráíyah, Jiiháíyel, Zekaráíyah, Azaráíyah, Máíkel índa Shefatáíyah daolyé; díí t'áá át'é Ízrel dine'é aláahgo binanit'a'í Jiiháshafat biye' ádaat'į́.

³Béésh łigaii áádóó óola índa naalye'é da'ílíinii ayóó ánéelą́ą'go Júdah kéyahgi kin hadaas'á ditą́ągo binaa ahééda'astł'inígíí t'áá bił hazhé'é hataideez'ą́ą́ nít'éé', nidi bibee óhólníhígíí éí Jiihóram yeidiní'ą́, háálá éí átsé yizhchíinii nilį́.

⁴Áko Jiihóram éí bizhé'é yę́ę bibee óhólníihii bee bóhólnííh silį́į'go bidziil í'diilyaago bik'isóó t'áá ałtso áádóó Ízrel dine'é binaat'áanii danilíinii ła' ałdó' diltłish yee neistseed.

⁵Jiihóram éí tádiindóó ba' aan naaki binááhaigo aláahgo naat'áanii silį́į́' áádóó nant'áago Jerúsalem kin haal'áagi tseebíí nááhai.

⁶Ízrel dine'é aláahgo binanit'a'í danilį́ nít'é'ígíí bik'ehgo t'áá Éíhab ba'áłchíní náás ahoolchíiłii ádaat'į́ yę́ęgi át'éego jiníyá, háálá Éíhab bitsi' éí hwe'asdzą́ą́ nít'éé'. Áko Bóhólníihii binááł doo yá'áshóonii baa nijigháá nít'éé'.

⁷Azhą́ ákót'ée nidi, Bóhólníihii éí David yę́ę yił aha'deet'áanii biniinaa hó índa dahaye'ké bá hool'ingo hool'áágóó yee yá nihoní'áanii bik'ehgo ha'áłchíní náás ahoolchíiłii doo áyółdįįh át'ée da.

⁸Jiihóram bíídíiską́ą́dóó Íídam dine'é éí Júdah dine'é bee bóhólníihii yich'į' nidaastee'go yits'ą́ąjį' daazlį́į'go aláahgo naat'áanii ádá nideistį́.

⁹Ákohgo Jiihóram éí naat'áanii danilíinii áádóó bitsindaabąąs bijáád naakiígíí yee nidaabaahii t'áá ałtso yił dah diiná, áko tł'ée'go éí nízhdiijée'go Íídam dine'é bisiláo éí hó índa tsindaabąąs bijáád naakiígíí yee nidaabaahii bindanit'a'í bił honáshzhiizhígíí bik'i jiijéé'.

¹⁰Díí jį́į́góó Íídam dine'é éí Júdah dine'é yich'į' nidaastee'. Íídą́ą́' Líbnah dine'é ałdó' hach'į' nidaastee' nít'éé'. Dahazhé'é yę́ę biDiyin God Bóhólníihii yóó'azhdíí'ą́ągo biniinaa ákót'é.

¹¹Áádóó ałdó' Júdah kéyahgi daadziłgóó ninádahałaah doo biniyé wódah nahaz'ą́ągo ádajiilaa, áko Jerúsalem kin haal'áagi diné kéédahat'ínígíí na'ageh yee tsi'naakaigo ádajiilaa índa Júdah dine'é t'áá ádzaajigo dah yidii'eezh.

¹²Áko Diyin God yá halne'ii Iiláíjah hach'į' ak'e'ashchį́įgo ání, David yę́ę biDiyin God Bóhólníihii kóní, Nizhé'é Jiiháshafat yę́ę índa Júdah dine'é aláahgo binanit'a'í Éísa yę́ę t'áadoo bik'ehgo díníyáa da,

¹³nidi Ízrel dine'é aláahgo binanit'a'í danilíinii bik'ehgo yíníyáago Júdah dine'é áádóó Jerúsalemgi kéédahat'ínígíí éí Éíhab ba'áłchíní náás ahoolchíłígíí ałjiłnii danilínígi át'éego ałjiłnii yee ádee nidaa'néego íinilaa, áádóó ałdó' danik'isóó éí nizhé'é yę́ę ba'áłchíní náás ahoolchíłígíí éí niláahgo yá'ádaat'ééh nít'éé'; éí ałdó' nisíníłtseed; éí bąą,

¹⁴jó, ayóó át'éego nahałniih yee Bóhólníihii éí nidine'é áádóó na' áłchíní áádóó nida'asdzą́ą́ índa nee hólónígíí t'áá át'é yee atíidoolííł.

¹⁵Áádóó ni éí t'áá íiyisí nitah hodínóogah, háálá naałniih bee nich'íí' bąąh dahwiidoo'aał; t'áá ákwíí jį́ bee nich'į' nahwii'náago biniinaa nich'íí' hadoołhęsh.

¹⁶Áko Bóhólníihii éí Filístiya dine'é áádóó Iithiyópiya dine'é bikéyah nahós'a'dóó Árab dine'é éí bádahachį'go Jiihóram yich'į' néidíníiłkaad.

¹⁷Éí Júdah dine'é bikéyah yik'ijį' nídii'náago yaatįįh yikai, áko aláahgo naat'áanii bighan bii'dóó áádóó binaagóó honaalye'é nídayiizláa'go áádóó ałdó' dahaye'ké índa hweda'asdzą́ą́ t'áá ałtso adayiizhjaa'go haye' t'ááłá'í nidi t'áadoo há áádeisįįd da, nidi akéédę́'ígíí Jiihó'ahaz t'éiyá.

¹⁸Díí t'áá ałtso ádaadzaadóó bik'ijį' Bóhólníihii éí naałniih doo nádziihii yee Jiihóram atíyiilaa.

¹⁹Áádóó bik'ijį' naaki nááhai baa hoolzhiizhgo naałniih bee hach'íí' bąąh dahaz'ánígíí biniinaa hach'íí' hááłhęęzhgo t'áá íiyisí hach'į' nahwii'náago dadziztsą́. Áko hadine'é éí dahazhé'é yę́ę yiyah déédeidiłjah yę́ęgi át'éego t'áadoo há ádayiilaa da.

²⁰Jiihóram tádiindóó ba'aan naaki binááhaigo aláahgo nant'á silį́į́' áádóó Jerúsalem kin haal'áagi nant'áago tseebíí nááhai; doo hodi'nidzingóó dashdiiyá, áko aláahgo naat'áanii danilíinii dabitséní'ootséelgi éí t'áadoo yóó'áho'diilyaa da, nidi David yę́ę bikin haal'áagi łeeh ho'dooltį́.