Read Navajo II CHRONICLES 22 Bible Online

II CHRONICLES 22 - Navajo bible

II CHRONICLES 22

¹Jerúsalem kin haal'áhídóó dine'é éí haye' akéédę́'ígíí Eihazáíyah hatsásk'ehgi aláahgo naat'áanii ádayiilaa, háálá siláo Árab dine'é yił ninínáago haye' da'alą́ąjį'ígíí ałtso nideistseed. Áko Júdah dine'é aláahgo binanit'a'í Jiihóram yę́ę biye' Eihazáíyah nant'áá nít'éé'.

²Eihazáíyah dízdiindóó ba'aan naaki binááhaigo aláahgo naat'áanii silį́į́', áádóó Jerúsalem kin haal'áagi nant'áago t'ááłá'í nááhai. Bimá éí Athaláíyah wolyéego Ámrai yitsi' nilį́.

³Áko ałdó' Éíhab bighandóó danilíinii dayíkaígi át'éego jiníyá, háálá bimá éí doo yá'ádaashóonii ádoolníiłgo yínabiniłtin nít'éé'.

⁴Éí bąą doo yá'ádaashóonii baa joogáałgo Bóhólníihii honíł'į́, t'áá Éíhab bighandóó ádáátįįdígi ájít'į́, háálá éí hazhé'é yę́ę ádindóó bik'ijį' hodoołchxǫǫłii yee nidahoneeztą́ą́'.

⁵Kót'é dadííniidii ałdó' yik'ehgo yigááł, áko Ízrel dine'é aláahgo binanit'a'í Éíhab yę́ę biye' Jiihóram éí Réímath-gíliyad kin haal'áagi Síriya dine'é aláahgo binanit'a'í Házeiyel yich'į' anaa' hodoohłeeł biniyé yił dah dii'áázh nít'éé'. Síriya dine'é bisiláo éí Jóram hadayiisk'eh.

⁶Áko Jóram k'abi'doolk'ehii nídoodzih biniyé Jézriyel kin haal'áágóó anáádzá; éí Réímahdi Síriya dine'é aláahgo binanit'a'í Házeiyel bił ahijigą́ą́ nít'éé'. Áko Júdah dine'é aláahgo binanit'a'í Jiihóram biye' Eihazáíyah éí Jézriyeldi Éíhab biye' Jóram daatsaahgo biniinaa ákóyaa yich'į' ííyá.

⁷Jóram baazhníyáhígíí biniinaa Eihazáíyah ho'diisyį́ éí Diyin God bik'ehgo ádzaa, háálá jiníyáago Jiihóram bił dashdii'áazhgo Nímshai biye' Jííhu baatįįh jíí'áázh; éí Éíhab bighandóó náás ahoolchíłígíí íidoołdįįł biniyé Bóhólníihii ak'ah yik'i yayiiziidgo yiyíísį́į́'.

⁸Áko nít'éé' Jííhu éí Éíhab ba'áłchíní náás ahoolchíiłii neiłtseedgo, Júdah dine'é naat'áanii danilíinii áádóó Eihazáíyah bik'isóó dabiye' éí Eihazáíyah yá nidaal'a'ígíí yik'íníyáago neistseed.

⁹Áádóó Jííhu éí Eihazáíyah haintá; éí Samériya kin haal'áadi na'ádinil'in nít'éé', áádóó bił ni'deedéelgo Jííhu baa yídlóozgo bi'diisyį́. Áko yóó'ádayiilaa, háálá ádadííniid, Jó, Jiiháshafat binálí jílį́; éí bijéí t'áá át'é bee Bóhólníihii yich'į' cho'ooł'į́į́ nít'éé', ákondi Eihazáíyah ba'áłchíní náás ahoolchíiłii éí bee óhólníihii yi'oh danéés'ąąd.

¹⁰Nít'éé' Eihazáíyah bimá Athaláíyah biyáázh daaztsą́ągo yaa ákoniizį́į'go dah diiyáago Júdah dine'é aláahgo binanit'a'í yę́ę biye'ké ałtso íísdįįd.

¹¹Nidi aláahgo naat'áanii bitsi' Jiihoshábiyath, éí Eihazáíyah biye' Jó'ash, aláahgo naat'áanii biye'ké nidaaztseedígíí bitahdóó yił dah dii'áazhgo bí áádóó asdzání baa áhályánígíí nída'iilkáhí góne' náhodees'į́į́'. Kót'éego aláahgo naat'áanii Jiihóram bitsi' Jiihoshábiyath, náá'iiłniihii Jiihóíyada be'asdzą́ą́ nilíinii, Eihazáíyah bideezhí jílį́įgo biniinaa Athaláíyah yits'ąą náhodees'į́į́', áko t'áadoo hwiisxį́į da.

¹²Áko Bóhólníihii bikin bii' sohodizin góne' asdzání haa áhályánígíí bił nahodi'nil'ingo hastą́ą́h nááhai. Áádóó Athaláíyah éí kéyah yii' kéédahat'íinii yinant'áá nít'éé'.