Read Navajo II CHRONICLES 23 Bible Online

II CHRONICLES 23 - Navajo bible

II CHRONICLES 23

¹Áádóó tsosts'id nááhaigo Jiihóíyada hadziil ízh'diilyaago neeznádiingo siláo yindanit'a'í, éí Jiiróham biye' Azaráíyah, Jiihohéínan biye' Íshmeiyel, Óbed biye' Azaráíyah, Adáíyah biye' Méíyasíyah, Zíkrai biye' Iilíshafat díí bi ł aha'daz'deest'ą́.

²Áko éí Júdah kéyah nahós'a'góó tádookaigo Júdah dine'é bikin hadaas'áádę́ę́' t'áá át'é Líívai dine'é áádóó Ízrel dine'é dabizhé'é aląąjį' naazíinii áłah ádayiilaago Jerúsalem kin haal'áajį' neheeskai.

³Éí áłah ílínígíí t'áá ałtso Diyin God bikin bii' sohodizin góne' aláahgo naat'áanii bił aha'daz'deest'ą́. Áko Jiihóíyada áhodííniid, Jó, Bóhólníihii éí David biye'ké náás yichíiłii yaa yáłti'go haadzíi'ii bik'ehgo aláahgo naat'áanii biye' ła' nant'áa doo.

⁴Áko díí éí kódadoohnííł, Táa'go dah oonéłígíí bitahdóó t'ááłá'ígo dah wohnéłígíí, éí nááda'iiłniihii áádóó Líívai dine'é háá'áyį́į́h jį́į́ góne' nidaołnishígíí dááda'dilkał baa ádahołyą́ą doo.

⁵T'ááłá'ígo dah náánááhnéłígíí éí aláahgo naat'áanii bighan baa ádahołyą́ą doo; t' ááłáhígo dah náánááhnéłígíí éí atł'ááh nástł'in bidáń'dítį́įhgi baa ádahołyą́ą doo, áádóó diné t'áá ałtso éí Bóhólníihii bikin bii' sohodizindóó tł'óó' binaa nááház'ánígi áłah nilį́į doo.

⁶Nidi Bóhólníihii bikin bii' sohodizin góne' t'ááká ła'da yah ooya' lágo; t'áá hazhó'ó nááda'iiłniihii áádóó Líívai dine'é ninádaalnishii t'éiyá yah anídaakah doo, háálá éí dadiyin, nidi dine'é t'áá ałtso éí Bóhólníihii bá hada'dzisíid doo.

⁷Áádóó Líívai dine'é éí aláahgo naat'áanii yinídoot'ih, áko diné t'ááłá'í nítínígo bideezla' dah deíjáah doo; t'áá háiida kin góne' yah ííyáhígíí hodi'yoolyééł, nidi aláahgo naat'áanii yah anádáahgo áádóó ch'ínádáahgo baa ádahołyą́.

⁸Áko Líívai dine'é áádóó Júdah dine'é t'áá ałtso éí náá'iiłniihii Jiihóíyada hach'į' yee haadzíi'ii t'áá át'é bik'ehgo ádadziidzaa. T'ááłá'í jinítínígo hasiláo háá'áyį́į́h jį́į́ góne' dadeeshnishígíí éí nidahaashnishígíí bił yah azhdookah, háálá náá'iiłniihii Jiihóíyada doo hwéé'íłníih da.

⁹Náá'áłdó' náá'iiłniihii Jiihóíyada éí aláahgo naat'áanii David yę́ę bibee atsiidadétáán áádóó binaage' ádaałts'ísígíí índa dantsaaígíí éí Bóhólníihii bikin bii' sohodizin góne' sinilígíí neeznádiingo siláo bindanit'a'í yeinínil,

¹⁰áádóó diné t'áá ałtso t'ááłá'í nítínígo bideezla' dah deíjáahgo éí kin bii' sohodizin bíighahgi nish'náájígo áádóó nishtł'ajígo nihoneel'áníjį' áádóó bikáá' náá'iiniihí bíighahgóó índa aláahgo naat'áanii binaagóó naazį́įgo áyiilaa.

¹¹Ákohgo aláahgo naat'áanii biye' yił ch'ídaaskaigo naat'á ch'ah bik'i dazdeez'ą́ áádóó bee ak'e'ashchíinii bee bééhániihii bílák'edadzistsooz, áádóó Jiihóíyada índa biye'ké éí ak'ah hak'i yadayiiziidgo aláahgo naat'áanii ádahoolaa índa ádaaní, Aláahgo naat'áanii as'ahgóó hináa le'!

¹²Nít'éé' Athaláíyah éí diné hahóół'áago deíjeehgo aláahgo naat'áanii yaa dahaniihgo yidiizts'ą́ą'go Bóhólníihii bikin bii' sohodizin góne' diné yich'į' yah ííyá.

¹³Ákohgo déé'į́į́' nít'éé', shoo, aláahgo naat'áanii yah e'etiingi kin bíyah nii'áii yíighahdóó sizį́; naat'áanii danilíinii áádóó béésh dilní bee í'dílzoołí yee ádaanínígíí aláahgo naat'áanii yíighahdóó naazį́ índa kéyahdóó diné t'áá ałtso bił nidahoozhǫǫhgo béésh dilní yee ádaaní áádóó ałdó' sin bee na'a'néego dahataałígíí aa dahaniihgo alą́ąjį' dahataał nít'éé'. Áko Athaláíyah ák'ina'ooldláadgo hadoolghaazhgo ání, Shiya'iidlo'go shighahodeet'ą́!

¹⁴Ákohgo náá'iiłniihii Jiihóíyada éí neeznádiin siláo dah yikahii yindanit'a'í danilíinii ch'íiní'eezhgo áyidííniid, Siláo bita' góne' bił oohkááh, áko t'áá háiida hakéé' góne' eelwodígíí diltłish bee bidi'yoolyééł, háálá náá'iiłniihii ádííniid ni', T'ááká Bóhólníihii bikin bii' sohodizin góne' hodi'yoolyééł yíila'.

¹⁵Áko Athaláíyah deisiłgo aláahgo naat'áanii bighan bich'į'go łį́į́' bee yah aná'ádahí góne' ch'élwodgo ákwe'é bi'diisyį́.

¹⁶Áko Jiihóíyada áádóó Júdah dine'é t'áá ałtso índa aláahgo naat'áanii éí Bóhólníihii bidine'é dajílį́į doo biniyé ahadazdeest'ą́.

¹⁷Ákohgo diné t'áá ałtso éí diyin bidi'níinii Béíyal bá kin góne' yah eekaigo nidayiizti' áádóó bibikáá' nááda'iiniihí índa bida'alyaii t'áá íiyisí ałtso nidayiizti'go deidííséiigo Béíyal bináá'iiłniihii Mátan éí bikáá' náá'iiniihí bidááhjígo dayiisxį́.

¹⁸Jiihóíyada éí nááda'iiłniihii Líívai dine'é danilíinii éí David yę́ę haa yáłti'go haadzíi'ii bik'ehgo Bóhólníihii bikin bii' sohodizin góne' naanish bee bídahólníihgo Bóhólníihii bich'į' didlidgo nááda'jiiłniih dooleeł biniyé niyiiznil áádóó Mózes bibee haz'áanii yee ak'e'ashchínígi át'éego hoł nidahoozhǫǫh doo áádóó dahojitaał dooleełgo bee hódahólnííh; David haa yáłti'go haadzíi'ii bik'ehgo ída'jił'į́į́ nít'éé'.

¹⁹T'áá ła'da doo ho'didééhgóó éí doo yah azhdoogáał da biniyé Bóhólníihii bikin bii' sohodizingi dáádílkał yaa ádahalyánígíí niinínil.

²⁰Áko siláo yindanit'a'í áádóó aląąjį' naazíinii áádóó diné yindanit'a'í danilíinii índa kéyahdóó diné t'áá ałtso éí yił dah diikaigo Bóhólníihii bikin bii' sohodizindę́ę́' aláahgo naat'áanii yił hadadaaskai, áádóó adeíjí dáń'dítį́į́hdę́ę́' aláahgo naat'áanii bighanjį' jíkai. Áko aláahgo naat'áanii éí bikáá'dóó nahat'áii yikáá' dah deineesdá.

²¹Áádóó éí kéyahgóó diné kéédahat'íinii t'áá ałtso bił nidahoozhǫǫh; Athaláíyah yę́ę diltłish yee dayiisxį́į́dóó bik'ijį' kin haal'áhígi hasht'ehodíít'e'.