Read Navajo II CHRONICLES 25 Bible Online

II CHRONICLES 25 - Navajo bible

II CHRONICLES 25

¹Amazáíyah naadiin ashdla' binááhaigo aláahgo nant'á silį́į́' áádóó naadiin náhást'éí nááhaijį' Jerúsalem kin haal'áagi nant'áá nít'éé'; bimá éí Jiihó'adan wolyéego Jerúsalem kin haal'áádóó naaghá.

²Áádóó t'áá ákogi ájít'į́įgo Bóhólníihii binááł jiníyá, nidi t'óó ájít'į́įgo ájíít'įįd.

³Ákódzaago bee hóhólnííh dooleełii chánahgo há áyiilaago há nidaal'a'í nidzistseed, jó, aláahgo naat'áanii hazhé'é yę́ę dayiisxį́įgo éí biniinaa ájít'į́.

⁴Nidi nidabi'diztseedii ba'áłchíní éí t'áadoo nidzistseed da, nidi Mózes binaaltsoos bee haz'áanii bee ak'e'ashchínígíí biyi' Bóhólníihii haadzíí' kóníigo, Azhé'é danilíinii áłchíní biniinaa doo nidootsił da, doodaii' áłchíní bizhé'é biniinaa doo nidootsił da. Nidi diné t'ááłá'í jinítínígo ádił nida'dziisíhígíí nidaho'ditseed doo.

⁵Náá'áłdó' Amazáíyah éí Júdah dine'é áłah áyiilaago dahazhé'é yę́ę ba'áłchíní náás ahoolchíiłii bik'ehgo mííl siláo dah deínéehii áádóó neeznádiin siláo dah deínéehii yindanit'a'í danilį́įgo Júdah dine'é índa Bénjamin dine'é yá niinínil. Áádóó naadiindóó dego béédááhaígíí yiyííłta' nít'éé', éí táadi neeznádiin diné néidiinilígíí, anaa' biniyé hasht'e'ádadiilyaii, tsiidétáán áádóó naagé nideijaahgo yídaneel'ą́.

⁶Áádóó ałdó' béésh łigaii tálent wolyéii neeznádiin bíighahgo bik'é Ízrel dine'é bitahdę́ę́' neeznádiindi míilgo siláo ayóogo dahayóígíí haa yí'nil.

⁷Nidi Diyin God yá halne'ii léi' haa níyáago ání, Aláahgo naat'áanii nílíinii, t'ááká Ízrel dine'é bisiláo nił dókááh yíila', háálá Bóhólníihii éí doo Ízrel dine'é yił hólǫ́ǫ da, jó, Íífreiyim dine'é danilį́įgo ádaat'į́.

⁸Nidi bił dadeeshbah nínízingo, nílááh, nidziilgo hasht'e'ídílnéehgo díbááh; Diyin God éí ana'í nihik'eh dadidoodleełgo ánihidoolííł, háálá Diyin God adziil bee hólǫ́ǫgo áká adoolwoł índa ak'eh hodidoodleeł.

⁹Áko Amazáíyah éí Diyin God bits'ą́ą́dóó diné nilíinii ííłní, Ákoshą' neeznádiingo tálent wolyéii Ízrel dine'é bisiláo baa nínilígíí haa dadiilnííł? Áko Diyin God bits'ą́ą́dóó diné nilíinii áhodííniidgo ání, Éí bilááh ánéelą́ą'go Diyin God nich'į' ninéidoodléełgo yíneel'ą́.

¹⁰Ákohgo Amazáíyah éí Íífreiyim dine'é bisiláo haa nínánígíí, Nihighangóó nídóhkááh, bijiníigo béézhníłnii'. Éí bąą ayóó át'éego Júdah dine'é yich'į' bádahazhchįįdgo t'áá íiyisí bádahachį'go dabighangóó anáákai.

¹¹Áádóó Amazáíyah bidziil í'diilyaago bidine'é dah yidii'eezh áádóó Áshįįh Bił Honíts'aa' hoolyéé góyaa yił nínáago Síyer dine'é bisiláo neeznáadi míilgo nideistseed.

¹²Áko Júdah dine'é éí łahjį' neeznáadi míilgo daadzí'ígíí deisnáago tsé nít'i' bighą́ą'di hadeiniskaad; áádę́ę́' hadah adayiistł'íidgo ałtso dadiitaa'.

¹³Nidi Amazáíyah éí siláo hooghangóó béézhníłnii'ígíí éí Júdah kéyahgi kin hadaas'áhígíí Samériya kin haal'áádóó Beth-hóran kin shijaa'jį' yaatįįh yikaigo táadi míilgo diné nideistseed índa bąąh da'oogą́'ígíí t'óó ahayóí adayiizyį́.

¹⁴Ákódzaadóó bik'ijį' Amazáíyah éí Íídam dine'é íísdįįdę́ę́' nádzáago Síyer dine'é bidiyin dabidi'níinii néiníjaa'go t'áá bí bidiyin danilį́į dooleełgo dah deiznil áádóó nináháłaahgo yich'į' tsin bijeeh dilidgo łikání halchinii nááyiiłniih nít'éé'.

¹⁵Éí bąą Bóhólníihii éí Amazáíyah yich'į' báhóóchįįdgo bá halne'ii hach'į' ayííł'a'go áhodííniid, Ha'át'éegoshą' dadine'é bidiyin dabidi'níinii éí bidine'é nits'ą́ąjį' yisdéidooniłígi nádį́'ídi doo yídaneel'áanii bich'į' cho'iisíníł'įįd?

¹⁶Áádóó t'ah yájíłti'go aláahgo naat'áanii áháłní, Da' niísh aláahgo naat'áanii bá kót'é diníigo ádaniilyaa? K'adí! Ha'át'íísh biniyé nidiyoolyééł? Áko Diyin God yá halne'ii áá hoost'įįd, nidi ání, Díí shił bééhózin: Diyin God, Ándeeshdįįł, nó'ní, háálá díí baa nisíníyá áádóó díí kót'é nidishnínígíí doo yísíníłts'ą́ą' da nít'éé'.

¹⁷Ákohgo Júdah dine'é aláahgo binanit'a'í bá nidaal'a'ígíí ííłní, Ha'át'íí lá baa naasháa doo, yiłníigo Jííhu binálí Jiihó'ahaz biye' Jó'ash Ízrel dine'é aláahgo binanit'a'í yich'į' i'ííł'a'go ání, Hágo, anaa' biniyé ahididiit'ashgo ahidiigą́ą́ł.

¹⁸Áko Ízrel dine'é aláahgo binanit'a'í Jó'ash éí Júdah dine'é aláahgo binanit'a'í Amazáíyah yich'į' i'ííł'a'go ííłní, Lébanan kéyahdóó ch'il deeníní ałts'íísí léi' éí Lébanandóó gad ayóó át'éé léi' yich'į' i'ííł'a' kóníigo, Nitsi' shiye' be'asdzą́ą doo biniyé baa níłteeh, áko Lébanangi naaldlooshii ałchinii naagháago éí ch'il deeníní łeeh yí' ííł'eez.

¹⁹Áko ádíní, Jó, Íídam dine'é bisiláo niséłtseed, diní; éí bee ádaa hosíní'nih. K'ad nighangi t'óó bił ánít'é. Ha'át'íísh biniyé ni áádóó Júdah dine'é t'áá bił nihik'eh didoodleełgo atínihidoolíiłii baa nánít'į́.

²⁰Nidi Amazáíyah doo íists'ą́ą' da, háálá Diyin God bíniik'ehgo ádzaa, áko Íídam dine'é bidiyin dabidi'níinii bíká chojooł'į́įgo biniinaa hweda'ana'í yaa hodidoo'ááł.

²¹Áko Ízrel dine'é aláahgo binanit'a'í Jó'ash ákóde ííyáago Júdah kéyahgi Beth-shíímesh kin haal'áagi Júdah dine'é aláahgo binanit'a'í Amazáíyah yił ahidii'áázh.

²²Áádóó Ízrel dine'é éí Júdah dine'é yik'eh dadeesdlį́į'go diné t'ááłá'í nítínígo dabiníbaalgóó anídahineezhchą́ą́'.

²³Áko Ízrel dine'é aláahgo binanit'a'í Jó'ash éí Júdah dine'é aláahgo binanit'a'í Amazáíyah éí Jiihó'ahaz binálí Jiihó'ash biye' Beth-shíímeshgi yiyiiłtsoodgo Jerúsalem kin haal'áajį' yił daaskai, áko Jerúsalem ditą́ągo binaa ahéé'ítł'inígíí éí Íífreiyim biyah a'atiinídóó bee nástł'ahgi yah a'atiiníjį' éí hastą́ądi neeznádiin ké silá bíighahjį' naa'adeineeskaad.

²⁴Áádóó óola índa béésh łigaii t'áá át'é áádóó Bóhólníihii bikin bii' sohodizin góne' beedí chodao'íinii, Óbed-íídam baa áhojilyánígíí áádóó aláahgo naat'áanii bighandóó naalye'é nídayiizlá'ígíí áádóó diné yisnánígíí bił Samériya kin haal'áágóó anáá'ná.

²⁵Ízrel dine'é aláahgo binanit'a'í Jiihó'ahaz biye' Jó'ash daaztsą́ą́dóó bik'ijį' Júdah dine'é aláahgo binanit'a'í Jó'ash biye' Amazáíyah hináago ashdla'áadah nínáánááhai.

²⁶K'ad Amazáíyah łahjį' átséedi áádóó akée'di ádzaaígíí, jó, éí Júdah dine'é índa Ízrel dine'é binanit'a'í danilínígíí binaaltsoos bik'inídaháasdzo.

²⁷Áko Amazáíyah éí Bóhólníihii yikéé' yigááł yę́ę yits'ą́ąjį' hááyáádóó bik'ijį' Jerúsalem kin haal'áagi hondahaz'ą́ągo Léíkish kin haal'áágóó azhnííchą́ą́'. Nidi ákǫ́ǫ́ hakéé' ada'as'a'go áadi dahwiisxį́.

²⁸Áádóó łį́į́' yee nídahastį́įgo Júdah kéyahgi kin haal'áagi dahazhé'é yę́ę yóó'ádaalyaagi yóó'ádahoolaa.