Read Navajo II CHRONICLES 26 Bible Online

II CHRONICLES 26 - Navajo bible

II CHRONICLES 26

¹Ákohgo Júdah dine'é t'áá ałtso éí Azáíyah hastą́'áadah binááhaigo bizhé'é yę́ę Amazáíyah bitsásk'ehgi aláahgo naat'áanii nilį́įgo ádayiilaa.

²Áko aláahgo naat'áanii yę́ę bizhé'é da'iiłhaazhígi át'éego ajííłhaazhdóó bik'ijį' Azáíyah éí Íílath kin haal'áii áyiilaago Júdah dine'é yaa néidiní'ą́.

³Azáíyah éí hastą́'áadah binááhaigo aláahgo nant'á silį́į́'; Jerúsalem kin haal'áagi nant'áago ashdladiindóó ba'aan naaki nááhai. Bimá éí Jekoláíyah wolyéego Jerúsalemdóó naaghá.

⁴Áádóó t'áá ákogi ájooníiłgo Bóhólníihii honíł'į́; hazhé'é Amazáíyah áát'įįdii t'áá át'é bik'ehgo ájít'éé nít'éé'.

⁵Áádóó Diyin God hájít'į́įgo Zekaráíyah bíiníłką́; bí éí Diyin God dílzingo bił bééhózin, áko Bóhólníihii t'áá hájít'į́įgo Diyin God éí náás ajiyoołdiłgo áhósin nít'éé'.

⁶Áko dashdiiyáago Filístiya dine'é bił anada'ahijool'įįd; Gath kin haal'áagi áádóó Jábneh kin haal'áagi áádóó Áshdad kin haal'áagi tsé bee binída'astł'inii naa'adadziiskaad, áádóó Áshdad kin haal'á nahós'a'gi índa Filístiya dine'é bitahgóó kin hadaas'áago ádajiilaa.

⁷Índa Diyin God háká análwo'go Filístiya dine'é áádóó Ger-béíyal kin shijaa'gi Árab dine'é índa Miihónim dine'é bił da'ahijigą́ą́ nít'éé'.

⁸Áko Áman dine'é éí aa doolyéełii Azáíyah yaa dayiizhjaa' áádóó t'áá níléí Ííjip kéyah hoodzo bíighahgóó ch'ího'dit'ááh, háálá t'áá bí ayóó át'éego bidziilgo í'diilyaa.

⁹Náá'áłdó' Azáíyah Jerúsalemdi náhástł'ah aań'dítį́įhgi áádóó honíts'aa' aań'dítį́įhgi índa tsé naanástł'inígi yada'ii'áago bikáá'dóó ha'alzídí ádayiilaa.

¹⁰Áádóó ałdó' honoojíidi yada'iitł'ingo áyiilaa, índa t'óó ahayóigo tó hadayiiznil, háálá kéyah wóyahgo nahaz'ą́ą́góó índa halgaigóó da'alį́į́' t'óó ahayóí dah danéelkaad, áádóó daadziłgóó índa ayóo nida'nt'a'go nahaz'ą́ą́góó diné k'ééda'didléehii áádóó ch'il na'atł'o'ii yaa ádahalyáanii yisnil, háálá k'éédílyéehgi bił ayóó áhoot'é.

¹¹Náá'áłdó' Azáíyah éí diné anada'ał'íinii bee hólǫ́; éí anaa'góó nídadibahígíí náádadoobahgo ałkéé' nayiinil; éí aláahgo naat'áanii bisiláo yindanit'a'í ła' Hananáíyah bóhólníihgo éí naaltsoos ííł'íní Jáíyel áádóó naat'áaniishchíín Méíyasíyah éí yiyííłta'ígíí bik'ehgo ahádeiznil nít'éé'.

¹²Áádóó da'azhé'é yę́ę ba'áłchíní náás da'ahílchíihii aląąjį' naazíinii, siláo ayóó ádaat'éii t'áá ałtso yéélta'ígíí naakidi mííldóó ba'aan hastą́ądi neeznádiin lá.

¹³Áko bisiláo dah deínéehii éí táadi neeznádiindóó ba'aan tsosts'idi mííldóó ba'aan ashdladi neeznádiingo ánéelą́ą́'; éí anada'ał'į́įgo ayóó ádabóodziilgo aláahgo naat'áanii yíká anájahgo ana'í yich'į' nidaabaah nít'éé'.

¹⁴Azáíyah éí naagé, tsiidétáán, béésh ch'ah, béésh éé'da, ałtį́į́'da índa tsé bee da'ditł'į́įhda siláo dah deínéehii t'áá ałtso yá hasht'edayiilaa.

¹⁵Áádóó Jerúsalemgi diné da'iichįįhii éí yada'ii'áago bikáá'dóó ha'alzídí áádóó tsé nástł'in binídaastł'ah dabikáá'dóó bee aditł'į́įhtsoh ádayiilaii dah dadoo'nił biniyé áádóó k'aa' bee da'dilt'oh índa tsé dantsaaígíí bee da'ditł'į́įh dooleeł biniyé ádeidoolíiłgo yee hooł'a', índa nízaadgóó t'áá át'é hwéého'dílzin, háálá hadziil dzizlį́į'jį' t'áá íiyisí háká a'oolwod.

¹⁶Nidi hadziil dzizlį́į'go éí hodoołchǫǫłgo ádaa hodzisnih; jó, Bóhólníihii haDiyin God bibee haz'áanii bich'į' ni'jiisíí', áádóó Bóhólníihii bikin bii' sohodizin góne' bikáá' náá'iiniihí bikáá'dóó tsin bijeeh dilidgo łikání halchinii nááhizhdoołnih biniyé yah ajííyá.

¹⁷Áko náá'iiłniihii Azaráíyah áádóó Bóhólníihii binááda'iiłniihii tseebídiingo, éí diné dahayóii danilį́įgo yił hakéé' yah aakai.

¹⁸Aláahgo naat'áanii Azáíyah bidááh nijíkaigo ádabizhdííniid, Azáíyah yinílyéii, tsin bijeeh dilidgo łikání halchinii Bóhólníihii bich'į' nááhidííłnihgo doo ni ná át'ée da, nidi Éran dabiye'ké nááda'iiłniihii éí tsin bijeeh dilidgo łikání halchinii náádayiiłniih doo biniyé diyingo ats'ádabi'deest'áanii éí t'éiyá bá át'é. Diyingo haz'ánídóó ch'ínínááh, háálá doo ákǫ́ǫ́ íínít'įįd da áádóó Bóhólníihii Diyin God doo bił nílį́į́góó ándoolííł.

¹⁹Ákohgo Azáíyah éí tsin bijeeh dilidgo łikání halchinii yididoołiłgo dah yoo'áałgo báhóóchįįd. Áko nít'éé' nááda'iiłniihii yich'į' báhóóchįįdgo, shoo, nááda'iiłniihii binááł Bóhólníihii bikin bii' sohodizin góne' tsin bijeeh dilidgo łikání halchinii bikáá' náá'iiniihí bíighahgi łóód ats'íís yiyáanii naałdzidii hátáa'gi bidoolna'.

²⁰Aláahgo náá'iiłniihii Azaráíyah áádóó nááda'iiłniihii t'áá ałtso dahonééł'į́į'go, shoo, hátáa'gi łóód ats'íís yiyáanii naałdzidii silį́į́' lá. Áádóó tsxį́įłgo ch'ídahwiisxan; t'áá hó ałdó' tsxį́įłgo ch'ízhníyá, háálá Bóhólníihii atíhoolaa.

²¹Áko aláahgo naat'áanii Azáíyah daaztsą́ bijį́įjį' łóód ats'íís yiyáanii naałdzidii bąąh hólǫ́ǫ́ nít'éé', áádóó łóód ats'íís yiyáanii naałdzidii bee bąąh dahaz'ą́ągo t'áá sahdii kin yii' bighan, háálá Bóhólníihii bikin bii' sohodizin bits'áhodeelt'e'. Áko haye' Jótham éí aláahgo naat'áanii bighandóóígíí bee bóhólníihgo Júdah dine'é yá nihodii'aah nít'éé'.

²²K'ad Azáíyah łahjį' átséedi áádóó akée'di ádzaaígíí Éímaz biye' Diyin God yá halne'ii Aizéíyah ak'e'ashchį́.

²³Áádóó Azáíyah dahazhé'é yę́ę bitahjį' ajiiłhaazh dahazhé'é yę́ę yóó'ádaalyaaígi, t'áá éí aláahgo naat'áanii danilínígíí yóó'ádaal'ínígi yóó'áho'diilyaa, háálá ádadííniid, Łóód ats'íís yiyáanii naałdzidii hąąh hólǫ́ǫ́ nít'éé'. Áko haye' Jótham hatsásk'ehgi nant'á silį́į́'.