Read Navajo II CHRONICLES 27 Bible Online

II CHRONICLES 27 - Navajo bible

II CHRONICLES 27

¹Jótham éí naadiin ashdla' binááhaigo aláahgo nant'á silį́į́', áko nant'áago Jerúsalem kin haal'áagi hastą́'áadah nááhai. Bimá éí Jiirúsha wolyéego Zéídak yitsi' nilį́.

²Áko t'áá ákogi ájít'į́įgo Bóhólníihii binááł jiníyá; hazhé'é Azáíyah áát'įįdii t'áá át'é bik'ehgo ájoonííł nít'éé'. Bóhólníihii bikin bii' sohodizin góne' éí doo yah ajigháah da. Áko dine'é t'ahdii doo yá'ádaat'éehii yaa nidaakai.

³Áádóó Bóhólníihii bikin bii' sohodizin adeídi yah a'atiinígíí áyiilaa, índa yílk'id Ófel hoolyéii tsé binaa ahénátł'inígíí bikáá'góó lą'í yínááyiitł'in.

⁴Náá'áłdó' Júdah kéyahgi daadziłgóó bine' nida'adzi'ii áádóó yada'iitł'ingo bikáá'dóó ha'alzídí ádayiilaa.

⁵Áádóó Áman dine'é aláahgo binanit'a'í índa bisiláo yik'iijée'go yik'eh dadeesdlį́į́'; t'áá éí yihahígíí bii' Áman dine'é éí béésh łigaii tálent wolyéii t'ááłáhídi neeznádiingo áádóó tł'oh naadą́ą́' hastą́diindóó ba'aan naaki yikááł bíighahgo índa tł'oh naadą́ą́' bidee'í hastą́diindóó ba'aan naaki yikááł bíighahgo dah dahidédlo'go haa nídeigééh nít'éé'. Kót'éego naaki áádóó táá' náhááh góne' haa nídeigééh nít'éé'.

⁶Áko Jótham éí biDiyin God Bóhólníihii binááł t'áá ákóne' ájít'į́įgo nahodziz'ánígíí biniinaa ayóó ájít'é dzizlį́į́'.

⁷K'ad Jótham łahjį' yaa naayáhígíí áádóó tádííbaa'ígíí t'áá át'é índa nahaz'ánígíí, jó, éí Ízrel dine'é índa Júdah dine'é binanit'a'í danilínígíí binaaltsoos bik'inídaháasdzo.

⁸Naadiin ashdla' binááhaigo éí nant'á silį́į́' áádóó Jerúsalem kin haal'áagi nant'áago hastą́'áadah nááhai.

⁹Áko Jótham éí dahazhé'é yę́ę bitahjį' ajiiłhaazhgo hazhé'é David yę́ę bikin haal'áhígi yóó'ádahojiilaa. Haye' Éíhaz éí hatsásk'ehgi nant'áá nít'éé'.