Read Navajo II CHRONICLES 29 Bible Online

II CHRONICLES 29 - Navajo bible

II CHRONICLES 29

¹Heziikáíyah naadiin ashdla' binááhaigo nant'áago hahoolzhiizh áádóó Jerúsalemgi nant'áago naadiin náhást'éí nááhai. Bimá éí Abáíjah wolyéego Zekaráíyah yitsi' nilį́.

²Heziikáíyah t'áá ákogi át'éii baa joogáałgo Bóhólníihii hoo'į́; hazhé'é David yę́ę áát'įįdii t'áá át'é bik'ehgo ájít'į́.

³Áádóó aláahgo nant'áago t'ááłá'í náhááh góne' átsé nídízííd binih Bóhólníihii bikin bii' sohodizin bidáádílkał aa nídazdeeztą́ągo hasht'éédajiidlaa.

⁴Áádóó nááda' iiłniihii índa Líívai dine'é éí áłah ájiilaago ha'a'aahjigo haz'ánígi bił áłah dzizlį́į́'.

⁵Áko ábijiní, Líívai dine'é nohłíinii, dashíínółts'ą́ą́', ádadołdéehgo danihizhé'é yę́ę biDiyin God Bóhólníihii bikin bii' sohodizin hodiyingo haz'ą́ągo áńdaahdlééh áádóó t'óó badaa'ihii hodiyingo haz'ą́ą́dę́ę́' ch'ídahohjááh.

⁶Háálá danihizhé'é yę́ę doo ákǫ́ǫ́ ádáát'įįdgóó nihiDiyin God Bóhólníihii binááł doo yá'áshóonii yaa nidaaskai áádóó yóó'adeideez'ą́ áádóó yits'ą́ąjį' ádaadzaago doo deiníł'į́į da nít'éé'.

⁷Áádóó ałdó' kin bii' sohodizin bidáahjigo chaha'ohgi dáádílkałígíí dáda'deeskaal índa bee dahool'iní deineestsiz áádóó tsin bijeeh dilidgo łikání halchinii nááhániihígíí índa didlidgo nááda'iiniihígíí éí Ízrel dine'é biDiyin God bihodiyin haz'ą́ągi doo náádayiiłniih da nít' éé'.

⁸Éí bąą Bóhólníihii t'óó báhádzidgo yee atí'éł'íinii Júdah kéyahdóó dine'é áádóó Jerúsalem kin haal'áádóó dine'é bik'ijį' dahidíyį́; éí daoh'į́įgo ach'į' nahwii'ná bik'ee t'óó ił ahayóí índa haa da'oodloh dooleełjį' nihodiiz'ą́.

⁹Éí bąą, jó, danihizhé' é yę́ę diltłish bee nidaaztseed índa nihiye'ké áádóó nihitsi'ké índa nihida'asdzą́ą́ yisnááh ádabi'diilyaa.

¹⁰K'ad Ízrel biDiyin God Bóhólníihii bił ałhadi'deesht'ááł biniyé shíni' áhooshłaa, áko t'óó báhádzidgo báhóóchįįdii nihits'ą́ąjį' nídoodleeł.

¹¹Shiye'ké, k'ad t'áadoo nida'áhodołziidí, háálá Bóhólníihii binááł nisoozį́įgo bich'į' nidahohłáago tsin bijeeh dilidgo łikání halchinii dadohłidgo bá nidaał'a' doo biniyé nánihiizláá'.

¹²Ákohgo Líívai dine'é nídiijéé': éí Kóhath dine'é Amaséíyai biye' Méíhath, Azaráíyah biye' Jówel áádóó Miirárai dine'é Ábdai biye' Kish, Jeháliilel biye' Azaráíyah áádóó Gérshan dine'é éí Zímah biye' Jó'ah, Jó'ah biye' Ííden,

¹³áádóó Iilízafan dine'é éí Shímrai áádóó Jáíyel índa Éísaf dine'é éí Zekaráíyah índa Matanáíyah,

¹⁴áádóó Hííman dine'é éí Jáíyel índa Shímiyai, áádóó Jedúthan dine'é éí Shiiméíyah índa Azáíyel nídiijéé'.

¹⁵Áko dabik'isóó áłah ádayiilaago hodiyingo ádadooldee'go yah eekai, áádóó Bóhólníihii yee has'áanii bik'ehgo aláahgo naat'áanii haadzíi'go Bóhólníihii bikin bii' sohodizin hasht'éédahojidlééh biniyé yah ajookai.

¹⁶Áádóó nááda'iiłniihii éí Bóhólníihii bikin bii' sohodizin náwóne'ígóó yah eekaigo hasht'edahoolaa índa t'áá ałtsoní danchǫ́'ígíí Bóhólníihii bikin bii' sohodizindóó tł'óo'di haz'áníjį' ch'ídayiizhjaa'. Áko Líívai dine'é éí Kídran tó nílínígíí yiih dayiiskaad.

¹⁷Áádóó átsé nídízídígíí ła'a jį́į́ góne' dadeeshnish; tseebíí jį́į́ góne' Bóhólníihii bikin bii' sohodizin yah e'etiiníjį' baa hoolzhiizh, áko tseebíí yiską́ąjį' Bóhólníihii bikin bii' sohodizin dajíísį́į́' áádóó átsé nídízídígíí hastą́'áadah jį́į́ góne' ałtso yindaashnish.

¹⁸Ákohgo aláahgo naat'áanii Heziikáíyah yaa daaskaigo ádeidííniid, Bóhólníihii bikin bii' sohodizin t'áá át'é diyingo ádeiilyaa áádóó didlidgo bikáá' náá'iiniihí bił chodao'ínígíí t'áá bił índa bááh nááhániihii bikáá' niná'niłígíí éí bił chodao'ínígíí t'áá bił diyingo ádeiilyaa.

¹⁹Áádóó ałdó' aláahgo naat'áanii Éíhaz nant'á yę́ędą́ą́' bee haz'áanii k'íiníti'go ásaa' yóó'ayiistł'íidii hasht'edeiilyaago diyingo ats'ádabi'deest'ą́; jó, éí Bóhólníihii bibikáá' náá'iiniihí bidáahgi sinil.

²⁰Ákohgo aláahgo naat'áanii Heziikáíyah abíínídą́ą́' nídii'na'go kin haal'áádóó aląąjį' naazíinii áłah áyiilaago Bóhólníihii bikin bii' sohodizin góde yił haaskai.

²¹Áádóó bee óhólnííh índa kin bii' sohodizin bá áádóó Júdah dine'é bá ádił ni'iidzííhjí nááhániihii biniyé t'áá ał'ąą tsosts'id níjaa'go dóola áádóó deenásts'aa' áádóó dibé yázhí índa tł'ízíchǫǫh nidajiizhjaa'go nááda'iiłniihii Éran bits'ą́ą́dóó náás ahoolchíiłii éí Bóhólníihii bibikáá' náá'iiniihí bikáa'jį' náádeidiyoołnih biniyé bich'į' bee hadzoodzíí'.

²²Áko dóola nideistseedgo bidił éí nááda'iiłniihii nídeidiiką́ągo bikáá' náá'iiniihí yik'ídeistah; t'áá ákót'éego deenásts'aa' índa dibé yázhí t'áá ałkéé' nideistseedgo dabidił bikáá' náá'iiniihí yik'ídeistah.

²³Áádóó tł'ízíchǫǫh ádił ni'iidzííhjí nááhániihii éí aláahgo naat'áanii índa diné t'áá át'é bidáahjį' ch'ídeizh'eezh. Áádóó éí yikáá' dah dadeesnii'.

²⁴Áko nááda'iiłniihii éí tł'ízíchǫǫh nideistseedgo bidiłígíí yee k'é nídeidoot'įįłii ádayiilaago bikáá' náá'iiniihí bikáá'dóó Ízrel dine'é t'áá ałtso bá k'é náhodoodǫǫł biniyé yá náádayiisnii', háálá díí didlidgo nááhániihii índa ádił ni'iidzííhjí nááhániihii éí Ízrel dine'é t'áá ałtso bá nááhidoonihgo aláahgo naat'áanii yee haadzíí'.

²⁵David áádóó aláahgo naat'áanii bá náásgóó áhodoonííł yaa halne'ii Géed índa Diyin God yá halne'ii Néíthan éí nidahaz'áanii bik'ehgo niinínil. Éí béésh ahídí'niłgo diits'a'ígíí áádóó tsin tł'óół neeznáá bąąh daneelzhee'go bee nida'a'néii índa tsin tł'óół naakits'áadah bąąh daneelzhee'go bee nida'a'néii Líívai dine'é dah deíjáahgo Bóhólníihii bikin bii' sohodizin góne' niinínil, háálá kót'éego Bóhólníihii bá dahalne'ii yee haadzíí' nít'éé'.

²⁶Áko Líívai dine'é éí David yę́ę bibee nida'a'néhígíí dah deíjáahgo áádóó nááda'iiłniihii éí béésh dilní bee í'dílzoołí dah deíjáahgo naazį́.

²⁷Áko Heziikáíyah éí bikáá' náá'iiniihí bikáa'jį' didlidgo náádi'yoonihgo yee haadzíí'. Didlidgo náá'iiniihí bee hahoolzhiizhgo béésh dilní bee í'dílzoołí áádóó Ízrel dine'é aláahgo binanit'a'í David yę́ę bibee nida'a'néhígíí biłgo Bóhólníihii biyiin ałdó' yee nídadiine'.

²⁸Áádóó áłah ílínígíí t'áá ałtso nidahałáago dahataałígíí éí dahataał índa béésh dilní bee í'dílzoołí yee ádaanínígíí dadiists'ą́ą́', áko didlidgo náá'iiniihígíí ałtso deidííłidjį' nidahałá bíighah azlį́į́'.

²⁹Áko ałtso nááda'dziisnii'go aláahgo naat'áanii áádóó bił áłah nilínígíí t'áá ałtso bił nitsidazdéesgo'go nidahodzisá.

³⁰Náá'áłdó' aláahgo naat'áanii Heziikáíyah áádóó naat'áanii danilíinii éí Líívai dine'é yida'asnii'go David yę́ę índa áhodooníiłii yaa halne'ii Éísaf yę́ę bizaad bee Bóhólníihii baa dahohniihgo bich'į' dahohtaał deidííniid. Áko yaa dahaniihgo bił dahózhǫ́ǫgo dahóótáál áádóó yaa'ádaat'éego nidahasá.

³¹Ákohgo Heziikáíyah áhodííniidgo ání, K'ad Bóhólníihii bich'į' diyingo ats'ánída'asidoht'ą́; áyídíjį' ninohkáahgo nááhidoonihii áádóó ahééh hasinjí nááhániihii áádóó didlidgo nááhániihii Bóhólníihii bikin bii' sohodizin góne' yah adaahjááh. Áko áłah nilínígíí éí didlidgo nááhániihii áádóó ahééh hasinjí nááhániihii nidayiizhjaa' índa t'áá bí ádeinízinígíí didlidgo nááhániihii nidayiizhjaa'.

³²Áko áłah ílínígíí éí didlidgo nááhidoonihii nidayiizhjaa'ígíí éí dóola tsosts'idiingo, deenásts'aa' neeznádiingo índa dibé yázhí naakidi neeznádiingo t'áá át'é Bóhólníihii bich'į' didlidgo nááhániihii biniyé deineeskaad.

³³Áádóó diyingo ats'ádahideest'ánígíí éí béégashii hastą́ądi neeznádiin áádóó dibé éí táadi mííl.

³⁴Nidi nááda'iiłniihii t'áá díkwíigo bąą didlidgo nááhidoonihii ch'ééh ałtso nídajił'ah. Áko náánáła' nááda'iiłniihii t'ah ádadildéehgo biná ałtso bindajishnishjį' dahak'isóó Líívai dine'é háká ííjéé', háálá Líívai dine'é éí nááda'iiłniihii biláahgo t'áá ákogi ádaat'éego ádadooldee'.

³⁵Áádóó didlidgo nááhániihii t'óó ahayóí áádóó hózhǫ́ǫ́jí nááhániihii bik'ah t'áá bił índa yanáadzi'go nááhániihii didlidgo nááhániihígíí t'áá bik'eh daníką́ągo, kót'éego Bóhólníihii bikin bii' sohodizingi nidahojiłáago ádajiilaa.

³⁶Áádóó Diyin God éí diné t'áá ałtso yá áát'įįd biniinaa Heziikáíyah índa diné t'áá ałtso bił nidahoozhǫǫh, háálá t'áadoo hooyání ádzaa.