Read Navajo II CHRONICLES 3 Bible Online

II CHRONICLES 3 - Navajo bible

II CHRONICLES 3

¹Nít'éé' Sálaman éí Jerúsalemdi Dził Moráíyahgi éí hazhé'é David yę́ę Bóhólníihii bich'į' yit'íní í'diilyaaígi David yę́ę éí Jííbas dine'é Órnan habí'íná'ál'isígi hasht'ehoolaaígi ákwii Bóhólníihii bikin bii' sohodizin áyi'niilaa.

²Áko aláahgo naat'áanii nilį́įgo dį́į́' náhááh góne' naaki nídízííd binih naakigóó yoołkááł góne' kin bii' sohodizin áyi'niilaa.

³K'ad díí kót'éego éí Bóhólníihii bikin bii' sohodizin ázhdoolíłígíí Sálaman bee nahodi'neestą́ą́'. Áłtséédą́ą́' bí'néél'ąądígíí t'áá éí bik'ehgo náásee'go náhást'édiin ké silá áádóó tádiin ké silá áníłtéél.

⁴Kin bidáahjigo chaha'oh béédiní'ánígíí éí náásee'go áníłnézígíí kin naaniigo áníłtélígíí t'áá bił aheeníłtso; éí tádiin ké silá áníłtso áádóó dego neeznádiindóó ba'aan tseebídiin ké silá ánízah. Biyi'dę́ę'go éí óola t'áá bízhání yik'i niiníłkaad.

⁵Índa hodiyingo haz'ání góne' sáípres tsin neheeshjíí' kin bii'dę́ę́' sikaadgo áyiilaago óola yik'íísti' índa bikáa'jį' tsin páam áádóó béésh da'ahólzha'í bik'i naask'ęę'go áyiilaa.

⁶Áádóó kin éí tsé da'ílíinii yee nizhónígo neizhch'ąą'. Parvéíyimdę́ę́' óola chooz'įįd.

⁷Áko kin bii' sohodizin éí áah sitáán áádóó dáádadilkał bá nidaaz'áhígíí áádóó biyi'dóó daneelkálígíí índa dáádadilkałígíí óola yik'íísti', áko biyi'dóó daneelkálígíí yik'ijį' diyingo naal'a'í chérab wolyéii bee bik'i nida'ashk'aazhgo áyiilaa.

⁸Áádóó ts'ídá aláahgo hodiyingo haz'ánígíí éí náásee'go kin naaniigo t'áá bił aheeníłtso, áko éí tádiin ké silá bíighah áníłtso índa naaniigo tádiin ké silá áníłtéél. Hastą́ądi neeznádiin óola tálent dah adiidlohígíí bíighahgo yik'íísti'.

⁹Ił adaalkaałí éí óola shékel wolyéii ashdladiin bíighahgo dah hidédlo'. Áádóó adeídi dahooghanígíí éí bii'dę́ę́' óola bik'ídaasti'go áyiilaa.

¹⁰Áádóó kin ts'ídá aláahgo hodiyingo haz'ání góne' éí chérabim naaki be'elyaago áyiilaago óola yik'íísti'.

¹¹Áko chérabim bit'a' t'áá ahótą'go tádiin ké silá áníłnééz, ła' chérab bit'a' łahjí tsosts'idóó náá'áłníí' ké silá éí kin neelkálíjį' biní'á. Áádóó łahjígo bit'a'ígíí ałdó' tsosts'idóó náá'áłníí' ké silá éí łahjí chérab bit'a'ígíí bił ahidii'á.

¹²Áádóó náánáłahjí chérab bit'a'ígíí tsosts'idóó náá'áłníí' ké silá éí ła' kin neelkálígíí biní'á áádóó łahjíígíí chérab bit'a' bił ahidii'á.

¹³Díí chérabim bit'a'ígíí t'áá dį́į'go tádiin ké silá áníłnééz. Áko bikee' yee sizį́įgo ahiníl'į́.

¹⁴Áádóó ata'naníbaalígíí éí yá nahalingo dootł'izhígíí áádóó tsídídééh nahalingo łichí'ígíí índa łichxí'ígíí éí áłts'óózígo yisdizígíí bee na'at'ą́hí łigaii dits'idgo ályaii bik'ijį' diyingo naal'a'í chérabim wolyéii danízį́įgo bee nidaashch'ąą'go áyiilaa.

¹⁵Índa kin bii' sohodizin bidááhdóó ałdó' naakigo íí'áa dooígíí ashdladiindóó ba'aan naakidóó náá'áłníi'go ké silá áníłnéezgo éí bílátahdi t'áá ał'ąą dah sinilígíí éí tsosts'idóó náá'áłníí' ké silá áníłtso.

¹⁶Áádóó béésh da'ahólzha'í áyiilaaígíí éí íí'áhígíí bílátah dah sinilígíí yąąh niinínil, áádóó pámgrenit wolyéii neeznádiingo be'elyaii áyiilaago béésh da'ahólzha'í yąąh dah deiznil.

¹⁷Áko kin bii' sohodizin bich'éédą́ą'gi nish'náájígo áádóó nishtł'ajígo íí'áhígíí áyiilaa; nish'náájígoígíí éí Jéíkin yee yiyíízhi' áádóó nishtł'ajígoígíí éí Bó'az yee yiyíízhi'.