Read Navajo II CHRONICLES 32 Bible Online

II CHRONICLES 32 - Navajo bible

II CHRONICLES 32

¹Kódahóót'įįdóó bik'ijį' Heziikáíyah éí ba'ahódlíigo Bóhólníihii yá naal'a'go Asíriya dine'é aláahgo binanit'a'í Senákerib éí Júdah kéyahgi nínáago, Kin hadaas'áii ditą́ągo binída'astł'inígíí yisnááh ádeeshłííł, nízingo yináshzhiizh.

²Áko Heziikáíyah haa ákoniizį́į'go Senákerib éí Jerúsalem kin haal'á bich'į' nideeshbah jinízingo jiníyáá lá;

³naat'áanii danilíinii áádóó diné ayóó ádaat'éii há nidaal'a'í danilíinii yił nayik'íyádaasti'go kin haal'áhídóó tł'óo'di tó hadaazlínígíí yidáda'deestł'ingo háká ííjéé'.

⁴Áko diné t'óó ahayóí áłah silį́į'go kéyah bikáá'góó tó hadaazlínígíí áádóó tó danílínígíí t'áá át'é yidáda'deestł'ingo ádaaní, Ha'át'íísh biniyé Asíriya dine'é aláahgo binanit'a'í danilíinii yíkaigo tó t'óó ahayóí yik'ídahakáah dooleeł.

⁵Áádóó ałdó' hadziilgo ázhdiilyaago, tsé bee ahéé'ítł'in nideiniiskaadii t'áá át'é hasht'ééjiidlaa, áádóó éí bikáá'dóó yada'iitł'ingo bikáá'dóó ha'alzídí ájiilaa, áádóó tł'óó'dę́ę́' tsé ła' ahéénínáánástł'in, índa David bikin haal'áagi Míllo hoolyéii hasht'ééjiidlaa áádóó bee na'abaahii índa naagé t'óó ahayóigo ádajiilaa.

⁶Índa siláo yinanit'a'í danilínígíí éí dine'é yá niinínilgo kin haal'áii yah e'etiinígi atiinjį' diné haa áłah ádayiilaago hada'ólníi doogo bich'į' hadzoodzíi'go ájíní,

⁷Danihidziil áádóó hada'íínółní; Asíriya dine'é aláahgo binanit'a'í índa siláo t'óó ahayóí bił dah yikahígíí t'áá ałtso t'áadoo béédaałdzidí índa t'áadoo nitsidaahkaaí, háálá nihí nihił hólónígíí éí áájí bił hólónígíí yiláahgo ayóó ánéelą́ą́'.

⁸Áájí éí ats'íís t'éí hoł hólǫ́, nidi nihí éí nihiDiyin God Bóhólníihii nihíká adoolwołgo anaa'gi nihá nidoobah. Áko diné éí Júdah dine'é aláahgo binanit'a'í Heziikáíyah saad hach'į' yee haadzí'ígíí yee hada'oosníí'.

⁹Áádóó bik'ijį' Asíriya dine'é aláahgo binanit'a'í Senákerib éí bisiláo t'áá ałtso yił t'ahdii Léíkish kin haal'áii yináshzhiizhgo, Jerúsalem kin haal'áágóó Júdah dine'é aláahgo binanit'a'í Heziikáíyah áádóó Jerúsalemgi Júdah dine'é t'áá ałtso yich'į' bá nidaal'a'í ayííł'a'go ání,

¹⁰Asíriya dine'é aláahgo binanit'a'í Senákerib kóní, Ha'át'íísh bada'íínóhłíigo Jerúsalemgi ana'í nihináshzhiizhgo nahísóotą́?

¹¹Da' doósh Heziikáíyah nihíni' áháléehgo t'óó dichin índa dibáá' nihidooghą́ą́ł biih ádadi'doohnił yiniyé áníi da, NihiDiyin God Bóhólníihii éí Asíriya dine'é aláahgo binanit'a'í bits'ą́ą́dóó yisdánihidoonił?

¹²Díí Heziikáíyah éí Bóhólníihii bá ninádahałaah doo biniyé wódah nahaz'ą́ągo ádaalyaaígíí índa bibikáá' náá'iiniihí nahjį' kódayiilaa áádóó Júdah dine'é índa Jerúsalem dine'é, T'ááłá'í bikáá' náá'iiniihí bidááhdóó nidahohłá índa tsin bijeeh dilidgo łikání halchinii bikáá' dadohłid, yidííniidgo ání ya'?

¹³Da' shizhé'é yę́ę áádóó shí náánáła' kédaayahgóó ał'ąą dine'é ádeiil'įįdígíísh doo nihił béédahózin da? Éí kédaayahdóó ał'ąą dine'éésh dabidiyinii t'áá ha'át'éegoda yídaneel'ą́ągo hakédaayah shílák'eedóó háádayoo'nil?

¹⁴Dashizhé'é yę́ę éí ał'ąą dine'é ałtso ádeisdįįdii dabidiyinii bitahdóó háidíígíishą' yíneel'ą́ągo bidine'é shits'ą́ą́dóó yisdáyíínil? Áko nihiDiyin God da' éísh yíneel'ą́ągo shiyaa háánihidoo'nił?

¹⁵Éí bąą k'ad, t'ááká Heziikáíyah nihi'dóleeh, doodaii' díí yee nihíni' áhólééh lágo; t'áadoo nidi dahwiinohdlání, háálá ał'ąą dine'é índa bee ídahólníihii dabidiyinii doo ła' hadine'é, shí, doodaii' dashizhé'é yę́ę nihiyaadóó hahodooniłii yíneel'ání da, áko nihiDiyin God nidi doo shiyaadóó háánihidoo'nił da.

¹⁶Áko bá nidaal'a'í t'óó yówehda Diyin God yik'ijį' índa Heziikáíyah yik'ijį' hadahaasdzíí'.

¹⁷Áádóó ałdó' Asíriya dine'é aláahgo binanit'a'í naaltsoos áyiilaa; éí bikáá' Ízrel dine'é biBóhólníihii Diyin God t'óó baa'ihgo yaa yáłti' índa yik'ijį' yáłti'go ání, Náádaałahgóó ał'ąą dine'é dabidiyinii éí hodine'é danilíinii t'áadoo shigháádahwiisnil da; ákót'éego Heziikáíyah haDiyin God éí hodine'é doo shiyaa hahizhdoo'ish da.

¹⁸Áádóó Jerúsalem kin haal'áagi tsé ahénátł'inígíí bikáa'gi diné nidaakaígíí yił yéé' ádahodoolíiłgo nídadooldzííł biniyé Jew dine'é bizaad k'ehgo hadadeeshghaazh, áko kin haal'áii dadiilnééł, danízin.

¹⁹Áádóó nihokáá' dine' é bidiyin dabidi'níinii diné ádayiilaii yik'ijį' hadahadziihígi át'éego Jerúsalem kin haal'áádóó Diyin God yik'ijį' hadahaasdzíí'.

²⁰Áko díí biniinaa aláahgo naat'áanii Heziikáíyah áádóó Éímaz biye' éí Diyin God yá halne'ii Aizéíyah yił yá'ąąsh góde Diyin God yich'į' yéego sodoolzin.

²¹Áko Bóhólníihii éí diyingo naal'a'í yiníł'a'go siláo ayóó ádaat'éii dahayóii t'áá ałtso áádóó diné nidei'eeshii índa Asíriya dine'é aláahgo binanit'a'í bisiláo yinanit'a'í danilíinii ałtso íísdįįd. Áko t'óó haa yáhásingo hakéyahgóó anídzoodzá. Áádóó nít'éé' hadiyin bidi'níinii bikin góne' yah ajííyáago ákwii t'áá hó haye'ké diltłish yee dahwiisxį́.

²²Kót'éego Bóhólníihii éí Heziikáíyah áádóó Jerúsalemgi kéédahat'ínígíí éí Asíriya dine'é aláahgo binanit'a'í índa hweda'ana'í t'áá ałtso bits'ą́ąjį' yisdáhóónil, áko t'áá ałtsodę́ę'go haa áhályą́ągo hoo'ish nít'éé'.

²³Áádóó diné t'óó ahayóí éí aa doolyéełii Jerúsalemjį' Bóhólníihii yich'į' nidayiizhjaa', índa Júdah dine'é aláahgo binanit'a'í Heziikáíyah aa doolyééł da'ílínígíí yaa dayiizhjaa'. Kodóó lą́ą ał'ąą dine'é t'áá ałtso binááł ayóó ájít'éego hodideeshzhiizh.

²⁴Éí yoołkááł yę́ędą́ą́' Heziikáíyah bitah doo hóóts'íídgóó bi'niitsą́, áádóó Bóhólníihii yich'į' sodoolzin, áko bich'į' haadzíi'go bee ééhózinii baidiní'ą́.

²⁵Nidi Heziikáíyah éí Bóhólníihii yee háká eelwodii t'áadoo baa ahéésniizį́į́'góó hajéí bee ádaa hojisnihígíí biniinaa hó áádóó Júdah dine'é índa Jerúsalem dine'é t'óó báhádzidgo bee atí'él'íinii hak'ijį' kóyiilaa.

²⁶Nidi Heziikáíyah hajéí bii' ádaa hojisnih yę́ę hó índa Jerúsalemgi kéédahat'íinii bił a'ohgo ádazh'diilyaa, áko éí biniinaa Heziikáíyah bíyoołkááł yę́ędą́ą́' Bóhólníihii yee atí'éł'íinii doo hak'ijį' kwííł'į́į́góó Heziikáíyah bíiníłką́.

²⁷Heziikáíyah t'áá íiyisí ast'įįd áádóó ił yílįįd, áko yódí bá dahooghanígíí ádayiilaago éí bii'góó béésh łigaii áádóó óola áádóó tsé da'ílíinii áádóó spáis wolyéii áádóó naagé índa da'ílíinii ałtah ádaat'éii ákǫ́ǫ́ yah ayiizyį́.

²⁸Áádóó tł'oh naadą́ą́' áádóó wáin índa áliv bineest'ą' bik'ah éí t'óó ahayóí yileełgo yá kin bii' nooh nída'achíihii ádayiilaa índa alį́į́' ałtah ádaat'éii t'áá át'é áádóó dibéda éí dabighan yá ádayiilaa.

²⁹Náá'áłdó' kin hadaas'áago ádá áyiilaa, áádóó dibé índa alį́į́' t'óó ahayóí hainínil, háálá Diyin God éí yódí t'óó ahayóí haidiní'ą́.

³⁰Áádóó díí Heziikáíyah ałdó' Gáíhan bideidę́ę́' tó háálínígíí yidádi'níłtł'ingo David yę́ę bikin haal'áajį' e'e'aahdę́ę'go tó bá aní'áago yah íílį́įgo áyiilaa. Áko Heziikáíyah yinaashnishígíí t'áá át'é yá'át'éehgo bá áánííł nít'éé'.

³¹Áko Bábilan dine'é binanit'a'í danilíinii bá nidaal'a'í éí kéyahgi ayóó ánóolningo ádahóót'įįdígíí yínda'ídídóoł kił biniyé hach'į' ayiis'a'go Diyin God hwíidínóotah biniyé t'áá ákǫ́ǫ́ nihoníłtį́, áko hajéí bii' bee nitsídzíkeesii t'áá át'é bił bééhodoozįįł.

³²K'ad Heziikáíyah łahjį' yaa naayáhígíí áádóó yá'át'éehgo ádzaaígíí, jó, éí Éímaz biye' éí Diyin God yá halne'ii Aizéíyah índa Júdah dine'é áádóó Ízrel dine'é binanit'a'í danilínígíí binaaltsoos bik'inídaháasdzoh.

³³Áko Heziikáíyah éí dahazhé'é yę́ę bitahjį' ajiiłhaazh, áádóó yóó'ádahoolaago David biye'ké yę́ę bitsénída'ootséél aláahgo wódahdiígi nidahastį́; dadziztsánígi Júdah dine'é índa Jerúsalem kin haal'áagi kéédahat'ínígíí t'áá ałtso neheeskaigo bił dajíílįįd, áádóó haye' Manáseh hatsásk'ehgi aláahgo nant'á silį́į́'.