Read Navajo II CHRONICLES 36 Bible Online

II CHRONICLES 36 - Navajo bible

II CHRONICLES 36

¹Áádóó Júdah dine'é éí Josáíyah biye' Jiihó'ahaz nídeidiiłtį́įgo Jerúsalem kin haal'áagi bizhé'é yę́ę bitsásk'ehgi aláahgo naat'áanii ádayiilaa.

²Jiihó'ahaz éí naadiin táá' binááhaigo nant'á silį́į́', áko Jerúsalemgi nant'áago táá' nídeezid.

³Áko Ííjip dine'é aláahgo binanit'a'í éí Jerúsalemdi ats'ááhoníłt'e', áko kéyah éí béésh łigaii tálent wolyéii neeznádiin dah hidiidloh bíighahgo índa óola t'ááłá'í tálent bíighahgo ák'é ninádazhdoodléełgo áhoolaa.

⁴Áádóó Ííjip dine'é aláahgo binanit'a'í éí Jiihó'ahaz bik'is Iiláíyakim Júdah kéyahgi áádóó Jerúsalemgi aláahgo naat'áanii nilį́įgo áyiilaago Jiihóíyakim éí yee hóózhi', nidi Nííko éí hak'is Jiihó'ahaz Ííjip kéyahgóó yił ní'áázh.

⁵Jiihóíyakim éí naadiin ashdla' binááhaigo aláahgo nant'á silį́į́', áádóó Jerúsalemgi nant'áago ła'ts'áadah nááhai áádóó biDiyin God Bóhólníihii binááł doo yá'ádaashóonii yaa naayá.

⁶Bábilan dine'é aláahgo binanit'a'í Nébukadnézzar éí hach'į' nídiidzáago béésh da'ahólzha'í yee hwe'aztł'ǫ́ǫgo Bábilangóó honílóóz.

⁷Nébukadnézzar éí Bóhólníihii bikin bii' sohodizin góne' chodao'íinii ałdó' ła' Bábilan kin haal'áágóó ayiizhjaa'go Bábilandi diyin dabidi'níinii bá hooghan góne' niinínil.

⁸Áko Jiihóíyakim łahjį' yaa naayáhígíí áádóó doo daaldinii yaa naayáhígíí índa bee bik'íhást'ahígíí, jó, éí Ízrel dine'é áádóó Júdah dine'é aláahgo binanit'a'í danilínígíí binaaltsoos bik'inídaháasdzo. Áko biye' Jehóíyakin hatsásk'ehgi nant'áá nít'éé'.

⁹Jehóíyakin éí tseebííts'áadah binááhaigo aláahgo nant'á silį́į́', áko Jerúsalemgi nant'áago táá' nídeezid áádóó neeznáá yiską́. Áko doo yá'ádaashóonii yaa naagháago Bóhólníihii binááł ákwáát'įįd.

¹⁰Dąągo aláahgo naat'áanii Nébukadnézzar aníł'a'go Jehóíyakin éí Bábilanjį' yił adaaskai áádóó Bóhólníihii bikin bii' sohodizin góne' chodao'íinii da'ílíinii daadziihígíí ałdó' ákǫ́ǫ́ adeizhjaa', áko hak'is Zedekáíyah éí Júdah dine'é áádóó Jerúsalem dine'é aláahgo yinanit'a'í nilį́įgo áyiilaa.

¹¹Zedekáíyah éí naadiin ła' binááhaigo nant'á silį́į́' áádóó Jerúsalemgi nant'áago ła'ts'áadah nááhai.

¹²Doo yá'áshóonii baa nijigháago biDiyin God Bóhólníihii binááł ájíít'įįd, áádóó t'áá hó Diyin God yá halne'ii Jeremáíyah éí Bóhólníihii bizaad yee yáłti'go t'áadoo a'ohgo ízh'diilyaa da.

¹³Aláahgo naat'áanii Nébukadnézzar éí Diyin God bee ádee hahoyííłdzíí' yę́ę bich'į' nízhdiiltee' áádóó áhozhdeeshchxǫ'go índa hajéí jííłtł'isgo ízh'diilyaago Ízrel dine'é biDiyin God Bóhólníihii bich'į' nijíltee'.

¹⁴Náá'áłdó' aláahgo nááda'iiłniihii áádóó diné t'áá ałtso t'áá íiyisí bee haz'áanii dayiizti'; ał'ąą dine'é bidoo daaldinii t'áá át'é bik'ehgo yaa naaskai, áko Jerúsalemgi Bóhólníihii bikin bii' sohodizin dílzingo ats'éidiní'áanii dayííłchxǫ'.

¹⁵Dahazhé'é yę́ę biBóhólníihii Diyin God éí hane' nidei'áhí hach'į' ałnáánéíł'aah, háálá bidine'é áádóó hodiyingo hoł haz'ánígi yaa a'ááh nízin nít'éé'.

¹⁶Nidi Diyin God yá hane' nidei'áhígíí yá nidahałt'i' índa hazaad dayíí'įįd índa há dahalne'ii yaa daadloh nít'éé', áko Bóhólníihii bidine'é yich'į' t'óó báhádzidgo yee atí'éł'íinii t'áadoo bidééłníní da silį́į'jį' hanííchaad.

¹⁷Éí bąą Kaldíya dine'é aláahgo binanit'a'í hach'į' yiyííł'aad, éí hakin bii' sohodizin góne' hadinééh danilíinii diltłish yee nideistseed, áko dinééh, doodaii' ch'ikę́ęhda, hastóí haastihiida doo yaa a'ááh nízin da; Bóhólníihii éí t'áá ádzíłtso yílák'ee hodíí'ą́.

¹⁸Bóhólníihii bikin bii' sohodizin góne' chodao'íinii dantsaaígíí índa ádaałts'íísígíí t'áá át'é, áádóó Bóhólníihii bikin bii' sohodizindóó áádóó aláahgo naat'áanii bighandóó índa naat'áanii danilíinii dabighandóó da'ílíinii t'áá át'é éí Bábilangóó ayiizhjaa'.

¹⁹Áádóó Bóhólníihii bikin bii' sohodizin adeideesk'ą́ą́' índa Jerúsalem kin haal'á ditą́ągo binaa ahéé'ítł'inígíí tadayoostł'ííd, áádóó naat'áanii dabighan ałtso deidííłid, índa chodao'íinii da'ílíinii ałtso nidayiishchxǫ'.

²⁰Áko diltłish yits'ąą hadahineezhchą́'ígíí éí Bábilan kin haal'áágóó ayiizh'eezh; áadi Pérzha dine'é yee bóhólníihii hwee ádíhólnííh silį́į'jį' Nébukadnézzar índa biye'ké ałdó' yá nidaal'a' nít'éé'.

²¹Áádóó Jeremáíyah éí Bóhólníihii yee haadzíi'ii bohodoolnííł biniyé tsosts'idiin nááhaijį' kéyah háá'áyį́į́h yee ákeesdla', áko bikáá' doo nihwiildlaadgóó tsosts'idiin nááhaijį' hanáályį́į́'.

²²Áko k'ad Pérzha dine' é aláahgo binanit'a'í Sáíras nant'áago t'ááłá'í náhááh góne' Jeremáíyah éí Bóhólníihii bizaad yee hahaasdzíi'ii bohodoolnííł biniyé Bóhólníihii éí Pérzha dine'é aláahgo binanit'a'í Sáíras biníłch'i yidiisnáá', áko aláahgo naat'áanii bee óhólníihgo bił haz' ą́ą́góó t'áá át'é baa nidahazne' índa bee ak'e'ashchį́įgo ałdó' áyiilaago ání,

²³Pérzha dine'é aláahgo binanit'a'í Sáíras kóní, Yá'ąąshdę́ę́' Bóhólníihii Diyin God éí nahasdzáán bikáa'gi bee ídahólníihii t'áá át'é sheidiní'ą́, áko Júdah kéyahgi Jerúsalem kin haal'áagi kin bii' sohodizin bá ádeeshłíiłgo shąąh niinílá. Háishą' Diyin God bidine'é t'áá ałtso bitahdóó nidaahkaii? Éí haBóhólníihii Diyin God hoł hólǫ́ǫ le' áádóó bíni' Jerúsalem góde nihééhizhdookah.