Read Navajo II CHRONICLES 4 Bible Online

II CHRONICLES 4 - Navajo bible

II CHRONICLES 4

¹Áádóó ałdó' bikáá' náá'iiniihí béésh łitsoii yee áyiilaa; áníłtsogi éí náásee'go áádóó naaniigo tádiin ké silá áádóó dego éí ashdla'áadah ké silá.

²Náá'áłdó' bii' tá'ádígisí nitsaaígíí béésh łitsoii doolyį́į'go bee ályaa; éí názbąsgo ashdla'áadah ké silá ha'naa áníłtso áádóó dego tsosts'idóó ałníí' ké silá; bidáa'gi dízdiindóó ba'aan ashdla' ké silá ánízahgo ahééhool'á.

³Bidáá' gónaa biyaadóogo éí dóola bida'alyaago ashdla'áadah ké silá bíighahgo ahéénízį́. T'ááłá'í béésh łitsoii éí dóola bééda'alyaago naakigo ałnaashiijí nít'i'.

⁴Béésh łitsoii bee dóola ályaaígíí naakits'áadahgo naazį́; táa'go náhookǫsjigo dadéez'į́į́', táa'go e'e'aahjigo dadéez'į́į́', táa'go shádi'áahjigo dadéez'į́į́' índa táa'go ha'a'aahjigo dadéez'į́į́'; dabitł'aa' ahidadii'áago bikáa'gi bii' tá'ádígisí nitsaaígíí dah yist'ą́.

⁵Dį́į́' bik'ehgo íidéetą́ą́', áádóó bidáá' gónaa éí bee adlání bidáá' gónaaígíí nahalingo ch'ilátah hózhóón lílii wolyéii bee naashch'ąą'. T'ááłáhídi neeznádiindóó ba'aan náhást'édiin tóshjeeh bíighahgo bee tó siką́.

⁶Áádóó ałdó' bii' tá'ádígisí neeznáá béésh łitsoii yee áyiilaa, áko éí ashdla'go nish'náájí niinínil áádóó ashdla'go nishtł'ají niinínil. Áko didlidgo náádahizhdoołnihii éí díí bii'jį' tánínádadzigis doo, áádóó bii' tá'ádígisí nitsaaígíí éí nááda'iiłniihii yii' tá'ánídadigis doo.

⁷Bee dahool'iní bá yadaa'áii neeznáago ádoolníłígíí bik'ehgo óola yee áyiilaago kin bii' sohodizin góne' niinínil; nish'náájígo ashdla' niinínil áádóó nishtł'ajígo ashdla' niinínil.

⁸Áádóó ałdó' bikáá' adání neeznáá áyiilaago kin bii' sohodizin góne' niinínil; nish'náájígo ashdla' niinínil áádóó nishtł'ajígo ashdla' niinínil. Índa bii' tá'ádígisí neeznádiingo óola yee áyiilaa.

⁹Náá'ákóne'é éí nááda'iiłniihii bá haz'ánígíí áádóó nitsaago haz'ánígíí áyiilaa índa bidáádadilkał áyiilaago béésh łitsoii yik'ídeisti'.

¹⁰Áádóó bii' tá'ádígisí nitsaaígíí éí shádi'ááhdóó ha'a'aah bich'į'jígo kin bii' sohodizin naanáz'áhígi niiní'ą́.

¹¹Háíram ałdó' ásaa' áádóó łeeshch'iih bee hahakaahí índa łeets'aa' nímazí ádayiilaa, áko Háíram éí Bóhólníihii bikin bii' sohodizin si'ą́ągi chodao'į́į dooleełígíí aláahgo naat'áanii Sálaman yá ałtso áyiilaa.

¹²Naakigo íí'áa dooígíí éí t'áá áłah bílátahdi łeets'aa' nímazí nahalingo ályaii áádóó éí łeets'aa' nímazí nahalingo naakigo ályaaígíí ałnánaneesdizgo binázt'i'go bee naashch'ąą'go áyiilaa.

¹³Naaki ałnánaneesdizgo yistł'ónígíí bá dį́įdi neeznádiin pámgrenit aneest'ą' béé'ályaago neizhch'ąą'; éí naaki íí'áhígíí t'áá áłah bílátahgi łeets'aa' nímazí nahalingo ályaaígíí béésh łitsoii ahidiníłnádaozt'i'go t'áá ał'ąą pámgrenit ahąąh ahéénít'i'go binázt'i'go áyiilaa.

¹⁴Áádóó bii' tá'ádígisí bá naaznilígíí bikáa'gi bii' tá'ádígisí dah naaznilgo ałdó' áyiilaa.

¹⁵Bii' tá'ádígisí nitsaaígíí biyaadóó dóola naakits'áadah béé'ályaago naazį́įgo áyiilaa.

¹⁶Ásaa' áádóó łeeshch'iih bee hahakaahí áádóó bíla'táa'iida índa chodao'ínígíí t'áá ałtso éí aláahgo naat' áanii Sálaman bá Bóhólníihii bikin bii' sohodizin góne' chodao'į́į doo biniyé Háíram béésh łitsoii bídazdilidii yee ádayiilaa.

¹⁷Jórdan tooh bibąąhgóó halgai hóteel wolyéhígíí Sákath haz'ání áádóó Zeredéíthah haz'ání bita' gónaa hashtł'ish dits'idí hólónígi ákwe'é aláahgo naat'áanii béésh deidííłhį́į́'.

¹⁸Kót'éego Sálaman díí chodao'ínígíí t'áá át'é t'óó ahayóii áyiilaago béésh łitsoii haa shį́į́ néelą́ą́' dah hidédlo'go chooz'įįd; éí doo bééhózin da.

¹⁹Áko Sálaman éí chodao'ínígíí t'áá ałtso áádóó bikáá' náá' iiniihí índa Diyin God bich'į' bááh nááhániihii bikáá' niná'nił dooígíí óola yee Bóhólníihii bikin bii' sohodizin yá áyiilaa,

²⁰áádóó bee dahool'iní bá yadaa'áii éí bee dahool'iní t'áá biłgo óola t'áá bízhání bee ályaa; éí t'áá át'ée dooleełígi át'éego wóniidi diyingo haz'ánígíí bidááhdóó diltłi' doo biniyé áyiilaa.

²¹Ch'ilátah hózhóón áádóó bee dahool'iní índa tsííd bee náhádláhí éí óola t'áá bízhání yee ádayiilaa.

²²Kǫ' bee náhiniltsésí, bii' tá'ádígisída, łeets'aa' tsin bijeeh dilidgo łikání halchinii báhígíí índa tsííd bee naakáhída éí óola t'áá bízhání bee ádaalyaa. Kin bii' sohodizin bidáádílkał bąąh dah naaznilgo bee dánda'dilkałígíí índa ts'ídá aláahgo diyingo haz'ánígíí bidáádadilkałígíí áádóó hodiyingo haz'ánígíí bidáádadilkałígíí éí óola bee ádaalyaa.