Read Navajo II CHRONICLES 6 Bible Online

II CHRONICLES 6 - Navajo bible

II CHRONICLES 6

¹Ákohgo Sálaman haadzíi'go ání, Bóhólníihii kóní, K'os diłhił bii' honishłǫ́ǫ doo.

²Nidi kin bii' kééhót'į́į dooleełii ná áshłaa; éí bii' hool'áágóó honílǫ́ǫ doo.

³Áko aláahgo naat'áanii náhaayáago Ízrel dine'é áłah nilínígíí t'áá ałtso naazį́įgo yik'idzisdli'.

⁴Áádóó ání, Ízrel dine'é biBóhólníihii Diyin God baa ha'niih le'; éí shizhé'é David yę́ę yich'į' haadzíi'ii ła' yiyiilaago kóní,

⁵Shidine'é Ííjip kéyahdę́ę́' ch'íní'eezh bijį́į́dóó kin haal'áagi Ízrel dine'é bitahgi doo ła' kin bii' sohodizinii shá íidoolíiłgo ákwii shízhi' baa ha'niih doo biniyé bik'i diishnii' da, doodaii' doo ła' shidine'é Ízrel binazhnit'áa doo biniyé náhodiiłtį́į da.

⁶Nidi Jerúsalem kin haal'áii éí náhodii'ą́; ákwii shízhi' baa ha'niih doo biniyé áádóó David éí shidine'é Ízrel yinant'áa doo biniyé nídiiłtį́.

⁷Áko shizhé'é David yę́ę díí bíni' nilį́į́ nít'éé'; éí kin bii' sohodizin ádoolníiłgo bii' Ízrel dine'é biBóhólníihii Diyin God bízhi' baa ha'niih doo, nízin nít'éé'.

⁸Nidi Bóhólníihii éí shizhé'é David yę́ę áyidííniid ni', Kin bii' sohodizin ádíílíiłgo bii' shízhi' baa ha'niih dooígíí níni' nilį́į́ nít'é'ígíí éí yá'át'éhígi át'éego baa nitsísíníkééz.

⁹Azhą́ ákót'ée nidi, ni éí doo kin shá ádíílíił da, nidi niye' t'áá ni ná yizhchínígíí éí kin íidoolíiłgo bii' shízhi' baa ha'niih doo, níi ni'.

¹⁰Áko Bóhólníihii yee haadzíi'ii yi'iilaago shizhé'é David yę́ę bitsásk'ehjį' ííyá áádóó Bóhólníihii yee haadzí'ígi át'éego Ízrel dine'é bá bikáá'dóó nahat'áii bikáá'dóó dah nédá índa kin íishłaago bii' Ízrel dine'é biBóhólníihii Diyin God bízhi' baa ha'niih doo.

¹¹Áádóó ákóne' tsits'aa' dílzinii niiní'ą́; éí biyi' Bóhólníihii bibee aha'deet'áanii Ízrel dine'é yił hasht'edayiilaaígíí sinil.

¹²Áko Sálaman éí Ízrel dine'é áłah nilínígíí binááł Bóhólníihii bibikáá' náá'iiniihí bidáahjigo yiizį'go dah didiilnii'.

¹³Háálá Sálaman éí béésh łitsoii bee wódahdi dah náhást'ą́ągo áyiilaa éí náásee'go tsosts'idóó náá'áłníi'go ké silá áádóó naaniigo tsosts'idóó náá'áłníi'go ké silá índa dego éí dį́į́'dóó náá'áłníi'go ké silá, áko tł'óo'jigo nááhást'ánígíí nahaníi'gi niiní'ą́; éí yikáá'dóó yiizį' áádóó Ízrel dine'é áłah nilínígíí t'áá ałtso binááł nitsidinígo'go yá'ąąshjigo dah didiilnii'.

¹⁴Áko ání, Ízrel dine'é biBóhólníihii Diyin God nílíinii, diyin nigi ánáánát'éii yá'ąąshdi índa nahasdzáán bikáa'gi doo hólǫ́ǫ da; ni t'éiyá ná nidaal'a'í éí aha'deet'áanii áádóó aa a'ááh hasinii bił hasht'eyínísinii ninááł deíkááh.

¹⁵Ni éí ná naal'a'í shizhé'é David yę́ę bich'į' bee hahíínídzíi'ii bił hasht'eyínísin nít'éé'; t'áá aaníí bee háínídzíi'go díí jį́ át'éhígi át'éego bi'iinilaa.

¹⁶Éí bąą k'ad, Ízrel dine'é biBóhólníihii Diyin God nílíinii, ná naal'a'í shizhé'é David yę́ę bá bee hwiinił'a'ígíí ánílééh; jó, ábidííníniid, Na'áłchíní náás ahoolchíiłii doo ła'da shinááł Ízrel dine'é bibikáá' dóó nahat'áii yi'oh dadínóol'ąął da; jó, na'áłchíní ádaa dahóyą́ągo shibee haz'áanii yik'eh dahół'į́įgo, shinááł yínááł yę́ęgi át'éego deíkááh ládą́ą́' doo yi'oh dadínóol'ąął da.

¹⁷K'ad Ízrel dine'é biBóhólníihii Diyin God nílíinii, ná naal'a'í shizhé'é David yę́ę bich'į' saad bee háínídzíi'ii éí t'áá aaníi le'.

¹⁸Nidi Diyin God nilíiniísh t'áá aaníí nahasdzáán yikáa'gi dine'é yił kééhat'į́į doo? Jó, yádiłhił índa yá'ąąsh t'áá náhwiist'ą́ą́ nít'éé' doo nihóoghah da, índa díí kin ná áshłaaígíí ádiyooshéhí yee'.

¹⁹Ákót'ée nidi ná naal'a'í bisodizin áádóó ná'ookąąhgo yíísíníłts'ą́ą́', Bóhólníihii shiDiyin God nílíinii, ná naal'a'í nich'į' ná'ookąąhgo sodoolzingo bá disíníts'ą́ą́'.

²⁰Áko tł'ée'go áádóó jį́įgo díí kin si'ánígi shízhi' baa ha'niih doo, dííníniidígíí bik'i díní'į́į' doo, áko ná naal'a'í díí haz'ánígíí yich'į'go déez'į́į'go nich'į' sonídílzįįhgo bá nídiits'į́įh dooleeł.

²¹Ná naal'a'í áádóó nidine'é Ízrel kojį' dadéez'į́į'go nich'į' nída'ookąąhígíí yíísíníłts'ą́ą́'; yá'ąąshdi honílónídę́ę́' íísíníłts'ą́ą'go ádił nida'iisíihgo bá yóó'ahidí'aah doo.

²²Diné ła'da yił kééhat'íinii yich'į' ádił ni'iisíihgo éí ádee habidi'yooldzíi'go díí kin bii' bikáá' náá'iiniihí bidááhdóó nidoogáałgo ádee hadidoodzih.

²³Ákohgo yá'ąąshdi didííts'į́įłgo ná naal'a'í nidilt'éhígíí t'áá ha'át'éegoda ádíílíiłgo baa nídíít'įįł, éí doo yá'áshǫ́ǫ́góó ádzaaígíí yá ninádootłishgo bee bá nihodíí'ááł índa t'áá ákogi ááníiłii éí bit'áá ákogi át'éii bik'ehgo bik'ijiidíídliił.

²⁴Nidine'é Ízrel nich'į' nida'iisíi'go biniinaa bi'ana'í bik'eh dadeesdlį́į'go áádóó nízhi' dayózhíigo nich'į' ninákaigo índa díí kin biyi' nída'ookąąhgo sodadilzingo

²⁵yá'ąąshdi didííts'į́įłgo nidine'é Ízrel nida'iisíi'ii bá yóó'ádidíí'ááł áádóó kéyah baa dííní'ánígíí áajį' dabizhé'é yę́ę bił ninádíí'ish.

²⁶Nidine'é Ízrel nich'į' nida'iisíi'go biniinaa níłtsą́ nihéé'ni' áádóó díí haz'ánígíí yich'į'go dadéez'į́į'go nich'į' sodadilzingo índa nízhi' dayózhíigo nida'iisí'ígíí yits'ą́ąjigo ninákai; jó, bich'į' nidahoyíníłnáá'.

²⁷Ákohgo yá'ąąshdi didííts'į́įłgo ná nidaal'a'í áádóó nidine'é Ízrel nida'iisíi'ii bá yóó'ahidí'aah doo, yá'át'éehgo honít'i'góó deíkáah dooígíí bee nanítingo bikéyah bik'ijį' nidahałtin doo; kéyah daabíí' dooleełgo nidine'é baa dííní'ą́.

²⁸Kéyah bikáá'góó hodííchįįdgo, doodaii' nidahałniihgo, doodaii' nídahooltseigo, doodaii' dláád dahazlį́į'go, doodaii' nahachagiitsoh dahazlį́į'go, doodaii' ch'osh ditł'ooí dahazlį́į'go bikéyahdóó kin hadaas'áhígíí ła' bi'ana'í yinadééjée'go t'áá ha'át'íhída atí'oolíiłii bidadeesna'go, t'áá ha'át'íhída naałniih baa níłnii'go,

²⁹ákohgo diné t'áá háiida sodilzingo, doodaii' ná'ookąąhgo, doodaii' Ízrel dine'é t'áá ałtso ákót'éego yaa naakaigo, t'ááłá'í nítínígo t'áá bí yik'ee ti'dahooníihii áádóó yaa yínííł danilíinii yaa ákódahiniizįįhgo índa díí kin bii' sohodizin biyi'dóó dah dadéelníihgo sodadilzingo

³⁰yá'ąąshdi kééhót'į́įdi didííts'į́į́ł áádóó nida'iisí'ígíí bá yóó'ahidí'aah doo, áádóó diné t'ááłá'í nítínígo bá dahonít'i' bik'ehgo bá ádadííliił, diné dabijéí nił bééhózinígíí; (t'áá ni t'éiyá nihokáá' dine'é dabijéí nił bééhózin;)

³¹éí danihizhé'é yę́ę kéyah baa dííní'ánígíí yikáá' t'áá abídayiiską́ bijį́įjį' dandósin doo biniyé ákódíínííł.

³²Áádóó ałdó' dé'éyóní ła' doo Ízrel dine'é nilíinii, nidi nízhi' ayóó át'éii áádóó ayóó ánóodziilii índa nigaan bits'áhoníyée'ii biniinaa díí haz'ánígíí yich'į'go déez'į́į'go nich'į' sodidoozįįłgo

³³yá'ąąshdi kééhót'ínídę́ę́' didííts'į́į́ł, áádóó dé'éyóní níyókeedígíí t'áá ałtso bá bi'díílííł; díí t'áá nidine'é Ízrel nízhi' bił béédahózingo deidósinígi át'éego nihokáá' dine'é t'áá át'é dandósin doo áádóó bił béédahodoozįįł: díí kin áshłaaígíí nízhi' bee wójíi doo.

³⁴Nidine'é bi'ana'í danilíinii yich'į' dahidibáahgo, t'áá háájída hidíł'áago kin haal'á nidííní'ánígíí áádóó kin éí nízhi' bee wójíigo íishłaaígíí yich'į' dadéez'į́į'go nich'į' sodadilzingo

³⁵yá'ąąshdi bisodizin índa biná'ookąąh bá didííts'į́į́ł índa yiniyé ádaaníinii bá bi'íínísin doo.

³⁶Nich'į' ádił nida'iisíihgo, (jó, diné t'áá ałtso ádił da'iisííh,) áko hach'į' náhodoochįįł go hwe'ana'í baa hodidíí'ááł, áko dahodoołnéełgo bikéyah nízaadgóó, doodaii' áhą́dígóoda yóó'adahodínóołkał,

³⁷nidi éí kéyahgóó yisnááh ádaho'diilyaa yę́ędi hajéítł'áahdi łahgo át'éego tsíńdazdookosgo áádóó dahasnánígíí bikéyahdi nich'į' nida'jookąąhgo kódajiníi doo, Ádił nida'ayeelzíí', doo ádahwiilyą́ą́góó, doo yá'áshǫ́ǫ́góó ádeiit'įįd.

³⁸Dabisnánígíí bikéyahdi dahajéí índa daháni' t'áá át'é bee łahgo át'éego tsíńdazdookosgo áádóó hakéyah dahazhé'é yę́ę baa dííní'áanii índa kin haal'á nidííní'áanii, áádóó kin áshłaaígíí nízhi' bee wójíi doo,

³⁹yá'ąąshdi kééhót'ínídę́ę́' bisodizin áádóó biná'ookąąh didííts'į́į́ł áádóó yiniyé ádaaníinii bá bi'íínísin doo índa nidine'é nich'į' ádił nida'iisíi'ii bá yóó'ahidí'aah doo.

⁴⁰K'ad, shiDiyin God nílíinii, nánooshkąąh, díí haz'ą́ą́dóó nich'į' sodiszingo shíísíníłts'ą́ą́'.

⁴¹Éí bąą k'ad, Bóhólníihii shiDiyin God nílíinii, díldzííł, háánílyį́į́h dooleełgóó tsits'aa' dílzinii nidziil bee bééhózinii bił dínááh, Bóhólníihii shiDiyin God nílíinii, háni'dii nináá'iiłniihii yisdá'iildééh yee hadadít'ée le' áádóó háni'dii nidiyį́į́' danilíinii yá'át'éehii yaa bił nidahoozhǫǫh le'.

⁴²Bóhólníihii shiDiyin God ak'ah bik'i yeiniziidgo yíínísį́į'ii doo t'óó bi'dííłnih da, béénílniih, ná naal'a'í David yę́ę baa a'ááh ná niidzįįh nít'éé'.