Read Navajo II CHRONICLES 9 Bible Online

II CHRONICLES 9 - Navajo bible

II CHRONICLES 9

¹Áko Shííba kéyahdóó asdzą́ą́ naat'ááh éí Sálaman ch'íbi'dit'áahgo yaa hodiizts'ą́ą'go, éí bee hwééhodoozįįł biniyé nantł'ago na'ídíkidii yínahódídóołkił yiniyé Jerúsalem kin haal'áajį' níyá, áko diné lą'í hoł yíkai, áádóó spáis wolyéhígíí áádóó óola índa tsé da'ílíinii ghą́ą́'ask'idii há deíłjiidgo yił níná. Áko Sálaman yaa níyáago biyi'di yee nitsíkeesígíí t'áá át'é yee yił ahił nahasne'.

²Áádóó Sálaman bínabízhdééłkidígíí t'áá át'é yee hoł hoolne', áko t'áadoo łahgo nées'į́'í t'áá bééhózínígo Sálaman hoł hoolne'.

³Áádóó Shííba kéyahdóó asdzą́ą́ naat'ááh éí Sálaman bibee hódzáanii bił bééhoozin, áádóó kin áyiilaa lá,

⁴índa bikáá' adání bikáá'dóó ch'iyáán índa yił nidaha'áago bá nidaal'a'í dah nídinibįįhígíí, áhą́dígo bá nidaal'a'ígíí áádóó dabi'éé', bibee adlání yaa ádahalyáanii áádóó dabi'éé' índa Bóhólníihii bikin bii' sohodizin bich'į' háá'ádáhígíí dziiłtsą́ągo t'óó bik'ee hoł ahayóigo t'áadoo ájóne'gi da.

⁵Aláahgo naat'áanii ábijiní, Baa nanináhígíí índa nibee hódzáanii shikéyahdi bee naa hane'go diséts' ą́'ígíí t'áá aaníí lá.

⁶Nidi yaa dahalne'ígíí doo yinishdlą́ą da nít'éé'. T'áá shí níyáago nééł'į́į'go índa; ayóó át'é nibee hódzáanii t'áá bighąądígi nidi t'áadoo bee shił hóóne' da lá; bee naa hane'go diséts'ą́'ígíí biláahdigo ádaaníí lá.

⁷Diné nidááhdóó naazíinii áádóó ná nidaal'a'í nidááhdóó naazį́įgo nibee hódzáanii t'áá áłahjį' dayíists'ą́ą'ii dooládó' bił dahózhǫ́ǫ da.

⁸Bóhólníihii niDiyin God éí naa bił hózhǫ́ǫgo Ízrel dine'é bá bikáá'dóó nahat'áii yikáá'dóó dah nineesdáii baa ha'niih le'; Bóhólníihii éí Ízrel dine'é hool'áágóó ayóó'áyó'nínígíí biniinaa doo haa dayit'éégóó índa t'áá ákogi át'éego diné bá hóó'áał doo biniyé aláahgo naat'áanii ániilaa.

⁹Neeznádiindóó ba'aan naadiin tálent bíighahgo óola áádóó spáis wolyéii t'áá íiyisí t'óó ahayóigo índa tsé da'ílíinii aláahgo naat'áanii baazhnínil; díí spáis wolyéii éí Shííba kéyahdóó asdzą́ą́ naat'ááh éí aláahgo naat'áanii Sálaman yeinínilígíí ákót'éii t'áadoo ła' baí'nil da.

¹⁰Áádóó ałdó' Háíram bá nidaal'a'í índa Sálaman bá nidaal'a'í éí Ófer haz'ánídę́ę́' óola áádóó tsin álmug bídáátsélígíí índa tsé da'ílíinii nideizyį́.

¹¹Aláahgo naat'áanii éí Bóhólníihii bikin bii' sohodizin áádóó aláahgo naat'áanii bighan bíyah danii'áhígíí tsin álmug bídáátsélígíí yee áyiilaa, tsin tł'óół naakits'áadah bąąh daneelzhee'go bee nida'a'néii índa tsin tł'óół neeznáá bąąh daneelzhee'go bee nida'a'néii éí dahataałígíí yá áyiilaa áádóó éí tsin álmug bídáátsélígíí Júdah dine'é bikéyahgi ákót'éii t'áadoo nídadziiltsą́ą da.

¹²Áádóó aláahgo naat'áanii Sálaman éí Shííba kéyahdóó asdzą́ą́ naat'ááh yinízinii t'áá át'é hóyííkeedígíí baazhdiní'ą́ índa aláahgo naat'áanii baazhníláhígíí bideená haidiní'ą́ągo hakéyahgóó há nidaal'a'í bił aníjookai.

¹³Áko t'ááłá'í nááhaijį' hastą́ądi neeznádiindóó ba'aan hastą́diindóó ba'aan hastą́ą́h tálent dah hidiidloh bíighahgo óola éí Sálaman baa náhágééh.

¹⁴T'áá náábíláahgo naalyéhé yá naazdáii áádóó naalyéhé baa nidahaniihígíí índa Aréíbiya kéyahdę́ę́' aláahgo naat'áanii t'áá ałtso áádóó kéyahdóó naat'áanii danilíinii ałdó' óola áádóó béésh łigaii éí Sálaman yaa nídeigééh.

¹⁵Aláahgo naat'áanii Sálaman éí naakidi neeznádiin naagé nitsaaígíí óola t'áá bízhání yee ádayiilaa; éí t'ááłá'í ní'ą́ bik'ehgo óola hastą́ądi neeznádiin shékel wolyéii bíighahgo bee ádaalyaa.

¹⁶Índa táadi neeznádiingo naagé áłts'ísígíí óola t'áá bízhání yee ádayiilaa; éí t'ááłá'í ní'ą́ bik'ehgo óola táadi neeznádiin shékel wolyéii bíighahgo bee ádaalyaa. Áko aláahgo naat'áanii éí Lébanan kéyahdę́ę́' dilk'is dantsxaazii bee kin ályaa wolyéii biyi' góne' niinínil.

¹⁷Náá'áłdó' aláahgo naat'áanii éí yikáá'dóó nant'áii ayóó ánóolningo áívori wolyéii yee áyiilaa áádóó éí óola t'áá bízhání yik'íísti'.

¹⁸Bikáá'dóó nahat'áii bich'į' hastą́ągo ałk'i hoo'nilí haaz'á áádóó bik'i dah adées'eezí óolago bikáá'dóó nahat'áii bidii'á índa bik'i dah asdáhí ałts'ą́ą́hjí ní'áhígíí hólǫ́; éí ałts'ą́ą́hjí bíighahgi náshdóítsoh bitsiijį' daditł'ooígíí be'elyaago sizį́.

¹⁹Náshdóítsoh bitsiijį' daditł'ooígíí naakits'áadahgo éí naaki níláago ałk'i hoo'nilí ałts'ą́ą́hjí yikáá' dah naazį́, áádóó náánáła' bee óhólníihii bił nahaz'ą́ą́góó doo ła' ákót'éego ánáánályaa da.

²⁰Aláahgo naat'áanii Sálaman bibee adlání t'áá át'é óola bee ádaalyaa, índa Lébanan kéyahdę́ę́' dilk'is dantsxaazii bee kin ályaa wolyéii biyi' ásaa'ígíí éí óola t'áá bízhání bee ádaalyaa; béésh łigaii éí doo bee ádaalyaa da, háálá Sálaman bíyoołkááł yę́ędą́ą́' éí doo da'ílį́į da.

²¹Háálá Sálaman bitsinaa'eeł éí Háíram bá nidaal'a'í Társhish kéyahgóó nída'dił'ołgo táá' nínáhah bik'eh Társhishdóó tsinaa'eełgi ádaat'éií yee óola, béésh łigaii, áívori wolyéii, mągítsoh índa tsídii bitsee' naashch'ąą'ígíí pííkak wolyéii ninádayiigééh.

²²Kót'éego lá aláahgo naat'áanii Sálaman éí nihokáá'góó aláahgo naat'áanii danilíinii t'áá ałtso yiláahgo yódí índa bee hódzáanii yist'įįd.

²³Áádóó nihokáá'dóó aláahgo naat'áanii danilíinii t'áá ałtso Sálaman éí Diyin God bee hódzáanii biih yiyííláhígíí bá dideests'į́į́ł danízin nít'éé'.

²⁴Áko diné t'ááłá'í nítínígo aa deidooléełii nidayiijááh nít'éé': éí béésh łigaii bee ádaalyaii áádóó óola bee ádaalyaii áádóó éé' ádaat'éii áádóó deezlá índa spáis daolyéhígíí, łį́į'da índa dzaanéezda t'ááłá'í nináháhááh bik'eh aa dajiinííł nít'éé'.

²⁵Sálaman éí dį́įdi mííl łį́į́' áádóó tsindaabąąs bijáád naakiígíí dabighan bee hólǫ́ índa naakits'áadahdi mííl łį́į́' yee nidaabaahígíí, éí díí bá hasht'edahoot'éegi kin hadaas'áágóó niyiiznil, áádóó Jerúsalem kin haal'áagi aláahgo naat'áanii binaashiigóó yił niinínil.

²⁶Áádóó tooh nílíní Yufréítiizdóó Filístiya dine'é bikéyahjį' áádóó Ííjip dine'é bikéyah bibąąhjį' aláahgo naat'áanii danilíinii t'áá át'é éí Sálaman yinant'á.

²⁷Áádóó aláahgo naat'áanii tsé yíl'áhígíigi át'éego Jerúsalemgi béésh łigaii bee áda'azįįdgo áádóó síkamor tsin honíts'aa'gi yíl'áhígíigi át'éego dilk'is tsin bee áda'azįįdgo áyiilaa.

²⁸Áko Ííjip kéyahdę́ę́' áádóó t'áá ałtso kéyah naaznildę́ę́' Sálaman éí łį́į́' baa heesgį́.

²⁹K'ad Sálaman łahjį' átsé áádóó akée'di yaa naayáhígíí éí Diyin God yá dahalne'ii Néíthan áádóó Sháíloh haz'ánídóó diné nilíinii Aháíjah índa á oo'íinii Ído wolyéii éí Nííbat biye' Jerobówam bídéét'i'ii yiyiiłtsánígíí díí bindaaltsoos bik'inídaháasdzo.

³⁰Jerúsalemgi Sálaman éí Ízrel dine'é t'áá ałtso yinant'áago dízdiin nááhai.

³¹Áádóó Sálaman dahazhé'é yę́ę da'iiłhaazhígi át'éego ajiiłhaazh áádóó hazhé'é David yę́ę bikin haal'áagi yóó'áho'diilyaago haye' Riihobówam hatsásk'ehgi nant'áá nít'éé'.