Read Navajo EZRA 6 Bible Online

EZRA 6 - Navajo bible

EZRA 6

¹Ákohgo aláahgo naat'áanii Daráíyas yee nihoní'ą́ągo naaltsoos ałch'į' yisdisii bá hooghan góne' hádeidéé'į́į́'; t'áá ákwe'é Bábilangi yódí nii'nilígíí sinil.

²Áádóó Míídiya dine'é bił nahós'a' biyi' Ákmiitha kin haal'áagi kin náhálgai góne' naaltsoos ałch'į' yisdisii éí bii' kót'éego bee ak'e'ashchį́įgo nídiit'ą́.

³Sáíras aláahgo naat'áanii nilį́įgo t'ááłá'í náhááh góne', t'áá éí aláahgo naat'áanii Sáíras yee nihoní'áanii éí Jerúsalemgi Diyin God bikin áńdoolníiłgo yeinít'į́įgo bee ak'e'ashchį́, Bíni' kin áńdoolnííł; náádahidoonihii náádayiiłniih nít'éé' yę́ęgi ákwii kin ninádoot'ááł; bíni' bitł'ááh nástł'inii bidziilgo nídootł'į́į́ł; éí dego náhást'édiin ké silá ánízah índa naaniigo náhást'édiin ké silá áníłtéel doo.

⁴Tsé ayóó ádaníłtsooígíí táá' ałk'i ahénátł'in doo áádóó bikáá' tsin ahéédaaz'áa doo índa aláahgo naat'áanii biyódí bighandóó bee bik'é azláa doo.

⁵Áádóó háni' óola áádóó béésh łigaii bee beedí ádaalyaii Diyin God bikin biyi' chodao'íinii Jerúsalemgi kin bii' sohodizin bii'dę́ę́' Nébukadnézzar ch'íiníjaa'go Bábilangóó yiiníjaa'ígíí, éí Jerúsalemgi kin bii' sohodizin biih nídadoohjih; éí beedí t'ááłá'í ní'ánígo t'áá naaznil yę́ęgóó Diyin God bikin bii' ninádahizhdoo'nił.

⁶Éí bąągo k'ad, Tátnai, tooh nílíní e'e'aahjígo bił nahós'a'gi naat'áanii nílíinii áádóó Shííthar-báznai índa nił ałch'odao'níinii Áfarsath dine'é nilíinii tooh nílíní biláahdi kéédahoht'íinii t'áá aa nízaadi nidaahkai.

⁷Díí Diyin God bikin bi'oonishígíí t'áadoo baa nídaoht'íní áádóó háni' Jew dine'é binaat'áanii nilíinii áádóó Jew dine'é yá aląąjį' naazíinii díí Diyin God bikin t'áá si'ą́ nít'éé' yę́ęgi ninádeí'aah.

⁸Náá'áłdó' díí bee nihonish'aahígíí éí Jew dine'é yá aląąjį' naazíinii díí Diyin God bikin áńdeidléhígíí bá kódaaht'į́į dooleeł: éí aláahgo naat'áanii binaalye'é bee t'áá tooh nílínígíí e'e'aahdę́ę'go nidi bíká anídaahjah; da'ílíinii díí diné tsį́įłgo baa dahidoohnił, áko doo dabidí'nóoltł'ah da.

⁹Yídin danilínígíí éí dóola yázhí áádóó deenásts'aa' áádóó dibé yázhí éí yá'ąąshdę́ę́' Diyin God nilíinii bich'į' didlidgo náádayiiłniih; tł'oh naadą́ą́', áshįįh, wáin áádóó ak'ah éí Jerúsalemgi nááda'iiłniihii nii'nilígíí bik'ehgo háni' t'áadoo bínéél'á'í t'áá bí t'éí t'áá ákwíí jį́ baa daha'níił doo.

¹⁰Áko yá'ąąshdę́ę́' Diyin God nilíinii bich'į' łikání halchinii náádayiiłniih dooleeł áádóó aláahgo naat'áanii índa biye'ké bida'iina' yá sodadilzin doo.

¹¹Áádóó ałdó' bee nihoní'áanii ła'da łahgo ájiilaago hakin bá naní'áii nahjį' hahidoolghą́ąłgo áádóó haghá dootsihgo, éí dah hó'oołtsihgo hoł íí'áago ádoolnííł índa hakinígi ts'iilzéítah ádahodoolííł.

¹²Áádóó Diyin God t'áá bí bízhi' ákwii bee hójíigo áyiilaii éí aláahgo naat'áanii danilíinii, doodaii' diné danilíinii Jerúsalemgi díí Diyin God bikin jidoołchxǫǫł biniyé díí bee nihoní'ánígíí łahgo át'éego ádabizhniilaii t'áá ałtso éí áhodi'dooldįįłí. Shí Daráíyas díí bee haz'áanii áshłaaígíí haneetehee bi'oolníił dooleeł.

¹³Ákohgo aláahgo naat'áanii Daráíyas éí tooh nílíní e'e'aahjígo naat'áanii Tátnai wolyéii áádóó Shííthar-báznai índa yił ałch'odao'níinii yich'į' hane' áyiilaii haneetehee yik'eh dahóół'įįd.

¹⁴Áádóó náásgóó áhodooníiłii yaa halne'ii Hágeiyai índa Ído biye' Zekaráíyah éí Diyin God bizaad yaa halne'go Jew dine'é bá aląąjį' naazíinii kin ádeiléehgo náás deeskai. Ízrel dine'é biDiyin God yee haadzíi'ii bik'ehgo áádóó Pérzha dine'é aláahgo binanit'a'í danilíinii Sáíras áádóó Daráíyas índa Artazérksiiz yee nahas'áanii bik'ehgo kin ádayiilaago ałtso hadidzaa.

¹⁵Áko aláahgo naat'áanii Daráíyas nant'áago hastą́ą́h náhááh góne' Éídar yiził binih táá'góó yoołkáałgo kin ałtso ályaa.

¹⁶Áádóó Ízrel dine'é éí nááda'iiłniihii áádóó Líívai dine'é índa dabidisnááh nít'éé' yę́ę áłah daazlį́į'go díí Diyin God bikin diyingo nideideez'ą́ągo yaa bił dahózhǫ́.

¹⁷Áádóó díí Diyin God bikin diyingo nideideez'ą́ągo dóola t'ááłáhídi neeznádiin áádóó deenásts'aa' naakidi neeznádiin índa dibé yázhí dį́įdi neeznádiin náádahaaz'nii'. Ízrel dine'é t'áá ałtso dadóone'é bik'ehgo ádił ni'iidzííh biniinaa tł'ízíchǫǫh naakits'áadah bá náádahaaz'nii'.

¹⁸Áko Mózes binaaltsoos biyi' bee ak'e'ashchínígi át'éego Jerúsalem kin haal'áagi Diyin God bá nidajil'a' biniyé nááda'iiłniihii áádóó Líívai dine'é ch'ídahodoołáałii ałkéé' nidadziznil.

¹⁹Átsé nídízííd binih dį́į́'ts'áadahgóó yoołkáałgo yisnááh danilį́į́ nít'éé' yę́ę atis'adeesdzá bee bééhániihii yaa naaskai.

²⁰Jó, nááda'iiłniihii áádóó Líívai dine'é t'áá bí naazínígi t'áá ła' bizhi'ee t'áá ałtso doo bąąh daachinígóó ída'diilyaa. Yisnááh danilį́į́ nít'éé' yę́ę bá atis'adeesdzá bee bééhániihii biniyé dabik'isóó nááda'iiłniihii danilíinii bá áádóó t'áá daabí ałdó' ádá dibé yázhí nideistseed.

²¹Ízrel dine'é yisnááhdę́ę́' nákaígíí áádóó Ízrel dine'é biBóhólníihii Diyin God hádajit'į́įgo biniyé kéyahgóó ał'ąą dine'é bitahgi badaa'ihii yits'á áda'deesnilgo hodiikaígíí t'áá ałtso da'ííyą́ą́'.

²²Áádóó tsosts'id yiską́ąjį' bił dahózhǫ́ǫgo díík'ǫsh t'áágééd bááh ályaii bee hodílzingo áłah ná'ádleeh yaa naaskai, háálá Bóhólníihii éí hoł dahózhǫ́ǫgo áhoolaa áádóó Asíriya kéyahgi aláahgo naat'áanii bijéí yee hach'į' k'é nídzingo áyiilaa, áko Diyin God éí Ízrel biDiyin God bikin bich'į' dahadziilgo bindajilnish nít'éé'.