Read Navajo EZRA 7 Bible Online

EZRA 7 - Navajo bible

EZRA 7

¹K'ad díí kódahóót'įįdóó bik'ijį' Pérzha dine'é aláahgo binanit'a'í Artazérksiiz nant'áago Ézra éí Siiréíyah biye' jílį́, éí Azaráíyah yę́ę biye', éí Hilkáíyah yę́ę biye',

²éí Shálam yę́ę biye', éí Zéídak yę́ę biye', éí Aháítab yę́ę biye',

³éí Amaráíyah yę́ę biye', éí Azaráíyah yę́ę biye', éí Miiréíyath yę́ę biye',

⁴éí Zeraháíyah yę́ę biye', éí Ázai yę́ę biye', éí Bákai yę́ę biye',

⁵éí Abíshuwa yę́ę biye', éí Fíniyas yę́ę biye', éí Eliyéízar yę́ę biye', éí Éran aláahgo náá'iiłniihii nilį́į́ nít'éé' yę́ę biye' jílį́.

⁶Díí Ézra éí Bábilan kin haal'áádóó dashdiiyá, áko Ízrel dine'é biBóhólníihii Diyin God éí Mózes bibee haz'áanii aidiní'áanii jiichįįhgo bínazh'niłtin nít'éé', áádóó t'áá jókeedígíí t'áá ałtso éí aláahgo naat'áanii haidii'aah, háálá haDiyin God Bóhólníihii hak'i dah doolnih.

⁷Aláahgo naat'áanii Artazérksiiz nant'áago tsosts'id náhááh góne', Ízrel dine'é ła' áádóó nááda'iiłniihii ła' áádóó Líívai dine'é ła' áádóó dahataałígíí áádóó dáń'dítį́hí yaa ádahalyáanii índa kin bii' sohodizin yindaal'a'ii Néthinim wolyéii Jerúsalem kin haal'áágóó eekai.

⁸Aláahgo naat'áanii nant'áago tsosts'id náhááh góne', ashdla' yiziłígíí binih Ézra éí Jerúsalemgi níyá.

⁹Jó, t'ááłá'í nídízííd binih ła'a jį́į́ góne' Bábilan kin haal'áádę́ę́' dashdiiyá áádóó haDiyin God ayóó ánóolningo hak'i dah doolnihígíí bik'ehgo ashdla' nídízííd binih ła'a jį́į́ góne' Jerúsalemgi jiníyá.

¹⁰Jó, Ézra éí Bóhólníihii bibee haz'áanii hájít'į́įgo áádóó bik'eh hojíł'į́įgo áádóó bee nahaz'áanii índa bik'eh hoogáałii Ízrel dine'é bitahgóó bee nazh'nitin doo biniyé hajéí bee háni' áhojiilaa.

¹¹Ézra náá'iiłniihii índa bee haz'áanii yína'niłtinii, t'áá éí Bóhólníihii bibik'eh ó'oo'níiłii áádóó bibee nahaz'áanii Ízrel dine'é baa deet'áanii yíhooł'ą́ą'ii nilį́įgo aláahgo naat'áanii Artazérksiiz díí naaltsoos hainíłtsoozígíí át'é.

¹²Aláahgo naat'áanii danilíinii aláahgo yinant'áii Artazérksiiz wolyéii éí náá'iiłniihii Ézra t'áá éí yá'ąąshdę́ę́' Diyin God bibee haz'áanii yína'niłtinii nilíinii bich'į' hadółt'éego hózhǫ́ǫ le' índa náádaała' ałdó'.

¹³Díí bee nihonish'aah: éí Ízrel dine'é t'áá háiida, doodaii' bináá'iiłniihii áádóó Líívai dine'é éí shóhólníihgo haz'ą́ągi kéédahat'íinii t'áá bí ádeinízingo Jerúsalem kin haal'áágóó deeshááł, danízinígíí ákǫ́ǫ́ nił dookah.

¹⁴NiDiyin God bibee haz'áanii yínítą'ígíí bik'ehgo Júdah kéyah áádóó Jerúsalem kin haal'áii bína'ídídííłkił biniyé aláahgo naat'áanii áádóó bá kót'éego daaníinii tsosts'idgo éí dandees'a'go

¹⁵aláahgo naat'áanii áádóó bá kót'éego daaníinii éí béésh łigaii áádóó óola t'áá bí ádeinízingo adayiiznilígíí éí Ízrel dine'é biDiyin God, Jerúsalemdi hólóonii bich'į' jideezhjaa'.

¹⁶Bábilan nahós'a' t'áá át'éé nít'éé' béésh łigaii áádóó óola shóozt'e'ígíí áádóó diné índa nááda'iiłniihii t'áá bí ádeinízingo Jerúsalemgi biDiyin God bikin biniyé adayiiznilígíí bíidoo'niłgo ákǫ́ǫ́ dííjih biniyé dandees'a'.

¹⁷Áko díí béesoígíí hazhó'ó chodaoł'į́įgo bee dóola, deenásts'aa', dibé yázhí, ak'áán náádahaniihii áádóó yanáadzi'go náádahaniihii, t'áá bił tsį́įłgo nidahidííłnihgo Jerúsalem kin haal'áagi niDiyin God bikin si'ą́ągi bikáá' náá'iiniihí bikáa'jį' náádahidoołnih.

¹⁸Béésh łigaii áádóó óola ch'ínííłna'ígíí choidoo'įįłgi ni áádóó nik'isóó bił nihił yá'ádaat'ééh góne' éí nihiDiyin God íinízinii bik'ehgo áda' doohłííł.

¹⁹Beedí naa deideez'ánígíí ałdó' niDiyin God bikingi chodao'į́į dooígíí éí Jerúsalemgi Diyin God bidáahjį' nidííjih.

²⁰Áádóó niDiyin God bikin biniyé ha'át'íhída bídin nááhódlǫ́ǫgo éí aláahgo naat'áanii biyódí da'ílíinii bá hooghandóó shóidííłt'eeł.

²¹Áko shí, Artazérksiiz aláahgo naat'áanii nishłíinii, tooh nílíní e'e'aahjígo yódí da'ílíinii yaa ádahalyáanii t'áá ałtso bich'į' bee nihonish'aah: éí Ézra náá'iiłniihii nilíinii, yá'ąąshdę́ę́' Diyin God bibee haz'áanii yína'niłtinii, t'áá ha'át'íhída nihíyókeedgo hazhó'ó t'áá ánihiłnínígi tsį́įłgo bá bida'doohłííł.

²²Béésh łigaii neeznádiin dah hidiidloh t'óó bíneel'ánígo áádóó tł'oh naadą́ą́' neeznádiin haaką́ bíighahgo áádóó wáin neeznádiin yikááł bíighahgo áádóó ak'ah neeznádiin yikááł bíighahgo índa áshįįh t'áá nidzinígíí bíighahgo bá bida'doohłííł.

²³T'áá ha'át'íhída yá'ąąshdę́ę́' Diyin God nilíinii haadzí'ígíí háni' haleebee yá'ąąshdę́ę́' Diyin God bikin bá áhodoonííł; jó, ha'át'íísh biniyé aláahgo naat'áanii áádóó biye'ké danilíinii bee óhólnííh bił haz'áanii bich'į' t'óó báhádzidgo hashké hwiindzin doo?

²⁴Áádóó ałdó' díí nihił béédahózingo ádeiilnééh: danihííníi'nínígíí éí nááda'iiłniihii áádóó Líívai dine'é áádóó dahataałii áádóó dáń'dítį́hí yaa ádahalyáanii índa kin bii' sohodizin yindaal'a'ii Néthinim wolyéii, doodaii' díí Diyin God bikingi nidaal'a'ígíí éí da'nítiin bik'é siláhígíí áádóó nahalyéii índa ínáoltą'í doo nidayiiléégóó bee bá hwiidoo'aał.

²⁵Áko ni Ézra yinílyéii, niDiyin God bibee hódzáanii nee hólónígíí bik'ehgo yah ada'iiníiłii áádóó ándahwii'aahii nidahidííniłgo tooh nílíní e'e'aahjígo diné kéédahat'ínígíí t'áá ałtso niDiyin God bibee nahaz'áanii bił béédahózinígíí yá dahwée'aah dooleeł, áádóó bee haz'áanii doo bił béédahózinígíí éí bínabiníłtin doo.

²⁶T'áá háiida niDiyin God bibee haz'áanii áádóó aláahgo naat'áanii bibee haz'áanii doo bik'eh ájít'éégóó háni'dii ts'ídá t'áá áho'dólne' góne' há nihodoot'áałgo hodi'yoolyééł, doodaii' łahgóó ho'doolnih, doodaii' hanaalye'é haghadoo'nił, doodaii' awáalyaa ahodi'doolt'eeł.

²⁷Danihizhé'é yę́ę biBóhólníihii Diyin God baa ha'niih le'; éí Jerúsalem kin haal'áagi Bóhólníihii bikin bii' sohodizin t'áadoo bee nóoshónígóó ádoolnííł biniyé aláahgo naat'áanii kót'éego bijéí yee tsíideeskééz.

²⁸Áádóó aláahgo naat'áanii binááł áádóó bá kót'éego daaníinii índa aláahgo naat'áanii bikéé'dóó bídahólníhígíí t'áá ałtso dabinááł, ayóó'áshó'níigo shaa a'áhí niizį́į́'. Áko Bóhólníihii shiDiyin God shik'i dah doolnihgo bee shidziil sélį́į́', índa Ízrel dine'é bits'ą́ą́dóó diné alááh dahideezíinii áłah íishłaago ákóde shił yikah dooleełii dah dii'eezh.