Read Navajo EZRA 8 Bible Online

EZRA 8 - Navajo bible

EZRA 8

¹Aláahgo naat'áanii Artazérksiiz nant'áá góne' Bábilan kin haal'áádę́ę́' ákóde shił yikaígíí dabizhé'é yę́ę ba'áłchíní náás da'ahílchíihii áádóó dabizhé'é yę́ę bits'ą́ą́dóó danilíinii éí díí ádaat'į́:

²Fíniyas ba'áłchíní náás da'ahílchíihii ła' Gérsham wolyéii, Íthamar ba'áłchíní náás da'ahílchíihii ła' Daniel wolyéii, David ba'áłchíní náás da'ahílchíihii ła' Hátash wolyéii,

³Péírash ba'áłchíní náás da'ahílchíihii ła' Shekanáíyah éí ba'áłchíní náás da'ahílchíihii ła' Zekaráíyah wolyéii bił níjíkai, áádóó diné neeznádiindóó ba'aan ashdladiin hastóí dabizhé'é yę́ę da'ahílchíihii hoł dayéélta'.

⁴Péíhath-mó'ab ba'áłchíní náás da'ahílchíihii ła' Zeraháíyah biye' Íílaiyowíínai éí diné naakidi neeznádiin bił níjíkai.

⁵Záto ba'áłchíní náás da'ahílchíihii ła' Jahéíziyel biye' Shekanáíyah éí diné táadi neeznádiin bił níjíkai.

⁶Éíden ba'áłchíní náás da'ahílchíihii ła' Jánathan biye' Ébed éí diné ashdladiin bił níjíkai.

⁷Íílam ba'áłchíní náás da'ahílchíihii ła' Athaláíyah biye' Jiishéíyah éí diné tsosts'idiin bił níjíkai.

⁸Shefatáíyah ba'áłchíní náás da'ahílchíihii ła' Máíkel biye' Zebadáíyah éí diné tseebídiin bił níjíkai.

⁹Jó'ab ba'áłchíní náás da'ahílchíihii ła' Jiiháíyel biye' Obadáíyah éí diné naakidi neeznádiindóó ba'aan tseebííts'áadah bił níjíkai.

¹⁰Béínai ba'áłchíní náás da'ahílchíihii ła' Jasifáíyah biye' Shiilómith éí diné neeznádiindóó ba'aan hastą́diin bił níjíkai.

¹¹Bííbeiyai ba'áłchíní náás da'ahílchíihii ła' Bííbeiyai biye' Zekaráíyah éí diné naadiin tseebíí bił níjíkai.

¹²Ázgad ba'áłchíní náás da'ahílchíihii ła' Hákatan biye' Johéínan éí diné neeznádiindóó ba'aan neeznáá bił níjíkai.

¹³Adonáíkam ba'áłchíní náás da'ahílchíihii akéé'dóóígíí ła' Iilífalet, Jáíyel índa Shiiméíyah daolyéii éí diné hastą́diin bił níjíkai.

¹⁴Bígveiyai ba'áłchíní náás da'ahílchíihii ła' Yúthai áádóó Zábad wolyéii éí diné tsosts'idiin bił níjíkai.

¹⁵Ahéíva tooh nílíníjį' áłah áhooshłaa áádóó áadi níbaal biyi' tágí jį́į́ nihee ida'az'ą́, áko diné áádóó nááda'iiłniihii hazhó'ó bitah déé'į́į' go Líívai ba'áłchíní náás da'ahílchíihii t'áadoo ła' yiiłtsą́ą da.

¹⁶Ákohgo Eliyíízer, Ériyel, Shiiméíyah, Elnéíthan, Jéírib, Elnéíthan, Néíthan, Zekaráíyah áádóó Miishálam diné nidei'eeshii danilíinii áádóó Jóíyarib índa Elnéíthan ałdó' éí diné ak'idi'yiitįįhii nilíinii bíká i'ííł'a'.

¹⁷Kasifáíyah haz'ánídi aląąjį' sizíinii Ído wolyéii bich'į' adahoyéł'a' áádóó Ído índa bik'isóó kin bii' sohodizin yindaal'a'ii Néthinim wolyéii ábizhdidooniiłii bee hoł hweeshne'; éí nihiDiyin God bikingi nidaal'a' dooleełii nihaa deidoo'ish.

¹⁸NihiDiyin God ayóó ánóolningo nihik'i dah dées'nii'go diné ak'idi'yiitįįhii nihił yaa daaskaii éí Ízrel biye' Líívai bits'ą́ą́dóó ahoolchíiłii Málai wolyéii ba'áłchíní náás da'ahílchíihii ła' Sheriibáíyah biye'ké t'áá bił índa bik'isóó danilíinii tseebííts'áadah.

¹⁹Áádóó Hashabáíyah ałdó' índa Miirárai ba'áłchíní náás da'ahílchíihii ła' Jiishéíyah bik'isóó áádóó dabiye'ké ałdó' t'áá biłgo naadiin.

²⁰David áádóó naat'áanii danilį́į́ nít'éé' yę́ę éí kin bii' sohodizin yindaal'a'ii Néthinim wolyéii Líívai dine'é yíká anídaajah doo biniyé nideiznilii éí Néthinim dine'é naakidi neeznádiindóó ba'aan naadiin ánéelą́ą'go éí t'áá ałtso bízhi' naaltsoos dabikáá'.

²¹Áko nihiDiyin God binááł ádaa dahojiniilbá'í ádadi'diilnííł biniyé Ahéíva tooh nílínígi hodílzingo doo adą́ baa nidiikah, dishníigo bee haasdzíí', áko nihá áádóó nihada'áłchíní bá índa nihinaalye'é t'áá ałtso bá doo nahontł'agóó nihá honít'i' doo biniyé hádeiit'į́į doo.

²²Háálá nihi'ana'í bits'ąą nihaa ádahalyą́ą doo biniyé aláahgo naat'áanii éí siláo nidaabaahii áádóó łį́į́' yee anada'ał'íinii bíídéeshkiłígíí baa yánísin nít'éé', háálá aláahgo naat'áanii bich'į' yádeiilti'go ádabidii'niid, NihiDiyin God éí yá'át'éehii biniyé há dabidéez'į́į'ii t'áá ałtso yik'i dah doolnih, nidi yóó'adabidii'aahii t'áá ałtso yich'į' bibee adziilii áádóó t'óó báhádzidgo hashké nídzingo atí'éł'íinii yee yik'ijį' nilį́.

²³Ákohgo hodílzingo doo adą́ baa nisiikai áádóó díí biniyé nihiDiyin God nídeisiikango nihisodizin nihá yidiizts'ą́ą́'.

²⁴Ákohgo nááda'iiłniihii aląąjį' naazíinii naakits'áadah yilt'éego éí Sheriibáíyah wolyéii áádóó Hashabáíyah wolyéii índa bik'isóó neeznált'éego ats'ánínil.

²⁵Áádóó aláahgo naat'áanii índa bá kót'éego daaníinii áádóó bikéédę́ę́' naat'áanii danilíinii índa Ízrel dine'é t'áá ałtso ákwii nidaakaii éí béésh łigaii áádóó óola índa beedí chodao'íinii nihiDiyin God bikin biniyé adayiiznilii dah dahidiilo'go bitaa sénii'.

²⁶Dah hidiilo'ígíí béésh łigaii hastą́ądi neeznádiindóó ba'aan ashdladiin tálent wolyéii bíighahgo áádóó beedí béésh łigaii bee ályaii éí neeznádiin tálent bíighahgo índa óola éí neeznádiin tálent bíighahgo bitaa sénii'.

²⁷Óola łeets'aa' mííl bą́ą́h ílį́įgo áádóó łeets'aa' nizhóníii béésh łitsoii bee ályaii naakigo t'áá óola ílínígi át'éego ílíinii baa dasénil.

²⁸Áádóó ábidishní, Bóhólníihii bich'į' dadinohyin; beedí ałdó' dadiyin áádóó béésh łigaii áádóó óola éí danizhé'é yę́ę ádeinízingo biDiyin God Bóhólníihii nilíinii yich'į' adayiiznilii át'é.

²⁹Jerúsalem kin haal'áagi Bóhólníihii bikin biyi' nahaz'ání góne' aláahgo nááda'iiłniihii áádóó Líívai dine'é áádóó Ízrel dine'é dabizhé'é yę́ę ba'áłchíní da'ahílchíihii yá aląąjį' naazíinii dabinááł dah dahidoolo'jį' bik'i hada'ísídół'į́į́' áádóó baa ádahołyą́ą doo.

³⁰Ákohgo nááda'iiłniihii áádóó Líívai dine'é éí béésh łigaii áádóó óola índa beedí dah deidiyiileehígíí Jerúsalemgi nihiDiyin God bikin bii' sohodizingóó nídeidoojih biniyé nídeidiinil.

³¹Ákohgo t'ááłá'í nídízííd naakits'áadahgóó yoołkáałgo Ahéíva tooh nílínídóó dah dii'náago Jerúsalem kin haal'áágóó yii'néełgo nihiDiyin God nihik'i dah doolnihgo nihi'ana'í áádóó nihaa héeshjée'ii bits'ąą yisdánihíínil.

³²Áádóó Jerúsalemjį' nii'náago ákwii táá' danihiiską́.

³³Dį́'í jį́į́ aleeh góne' nihiDiyin God bikin góne' Yuráíyah biye' Mériimath éí béésh łigaii áádóó óola índa beedí dah deidiyiilo'; Fíniyas biye' Eliyéízar áká ajoolwod áádóó Jéshuwa biye' Jázabad índa Bínuwai biye' Nowadáíyah éí Líívai dine'é danilį́įgo hoł nákai.

³⁴Éí t'ááłá'í jinítínígo bá wólta'go dah dahizhdiilo'ígíí ádaníłdáasee t'áá ałtso íídą́ą́' naaltsoos há bikáá' ádaalyaa.

³⁵Yisnááh ádabi'diilyaa yę́ę daasnáádę́ę́' ninádahaas'náago Ízrel dine'é biDiyin God bich'į' didlidgo náádahaniihii náádayiisnii': Ízrel dine'é t'áá ałtso bá dóola yázhí naakits'áadah áádóó deenásts'aa' éí náhást'édiindóó ba'aan hastą́ą́h índa dibé yázhí éí tsosts'idiindóó ba'aan tsosts'id náádahaaznii'. Ádił ni'iidzííhjí nááhániihii tł'ízíchǫǫh naakits'áadahgo náádahaaznii'. Díí t'áá ałtso Bóhólníihii bich'į' didlidgo náádahaaznii'.

³⁶Aláahgo naat'áanii éí naaltsoos haidiilaaígíí tooh nílíní e'e'aahjí nahós'a'góó bił bídahólníihii índa naat'áanii danilíinii yich'į' deistsooz áádóó yá'át'éehgo Ízrel diné yíká ííjéé' índa Diyin God bikin haz'ą́ągi ałdó' ła' hoodzaa.