Read Navajo EZRA 9 Bible Online

EZRA 9 - Navajo bible

EZRA 9

¹K'ad díí ákódaadzaadóó bik'ijį' naat'áanii danilíinii shaa daaskaigo ádaaní, Ízrel dine'é áádóó nááda'iiłniihii índa Líívai dine'é danilíinii éí Kéínan dine'é, Het dine'é, Píírez dine'é, Jííbas dine'é, Áman dine'é, Mó'ab dine'é, Ííjip dine'é índa Ámor dine'é, díí kédaayahgi kéédahat'íinii ts'ídá nádį́'ídi t'óó baa'ihígi át'éego naaldeehii doo bits'ádahóni' da.

²Jó, t'áá daabí áádóó biye'ké bida'asdzą́ą́ dadooleełígíí t'áá bí ádá nídayiizláá', ákohgo diyingo dine'é éí kédaayahgóó dadine'é yił ałtaa násdee'; t'áá aaníí naat'áanii danilíinii áádóó nidant'áii éí aláahgo doo ákǫ́ǫ́ ádáát'įįd da.

³Áko díí diséts'ą́ą'go shi'éé' áádóó shi'éénééz ák'inaashdláád áádóó shitsii' índa shidághaa' hah háłdláád, t'óó shił ahayóigo sédáá nít'éé'.

⁴Ákohgo yisnááh danilį́į́ nít'é'ígíí bee haz'áanii k'ídeizti'ígíí biniinaa t'ááłá'í nítínígo Ízrel dine'é biDiyin God bizaad bik'ee bitah dahoditłidígíí t'áá ałtso shaa áłah silį́į́', áko t'óó shił ahayóigo sédáago e'e'áahgo náá'iiniihjį' ahoolzhiizh.

⁵Áádóó e'e'áahgo náá'iiniih baa hoolzhiizhgo shi'éé' áádóó shi'éénééz nehéłdládígíí t'ahdii bee áká síszaazgo t'óó shił ahayóigo sídáhídóó nídiish'na', áko nitsidinígo'go Bóhólníihii shiDiyin God bich'į' dah didiishnii'.

⁶Áko ádíshní, ShiDiyin God nílíinii, ts'ídá t'óó ádaa yánísdzin áádóó bik'ee nich'į' shinii' deichxii', shiDiyin God, háálá nihidoo ákwii ádaat'éii nihitsiits'iin bilááh danées'ąąd, áádóó nihidoo ákǫ́ǫ́ é'ét'éii yádiłhił bídanées'ąąd.

⁷Danihizhé'é yę́ę bídayééłkaah yę́ędóó díísh jį́įjį' ayóó át'éego doo ákǫ́ǫ́ é'ét'éii baa nisiikai, háálá nihí doo ákwii ádeiit' įįdgóó bąą nihí áádóó aláahgo nihindanit'a'í áádóó nihinááda'iiłniihii éí kédaayahgóó aláahgo naat'áanii danilíinii bílák'ee anihidoot'ą́, áádóó diltłish áádóó naalte' índa yisnááh ádanihi'diilyaago bik'ee t'óó nihił adahayóigo baa nihidoot'ą́; éí díísh jį́į́góó ákót'é.

⁸Nidi k'ad Bóhólníihii nihiDiyin God bits'ą́ą́dóó ajooba' t'óó kónígháníjį' ííshją́ą́ ályaago bee ła' deiidzíi'go yisdádahaakai áádóó bihodiyingo haz'áanii nihíí' dooleełgo hahoolzhiizh, áko nihiDiyin God nihił ch'ídi'níłdláád áádóó binaalte' daniidlį́į́ nít'éé' yę́ę bits'ąą áłts'íísígo t'áá nánihiłna'.

⁹Jó, naalte' daniidlį́į́ nít'éé'; azhą́ naalte' daniidlį́į nidi, nihiDiyin God t'áadoo yóó'anihidíí'ą́ą da, nidi Pérzha dine'é aláahgo bindanit'a'í dabinááł nihaa a'áhí niizį́į́', áko nánihiłna'go áádóó nihiDiyin God bikin anídeiilnéehgo áádóó nidahaazhchǫ' yę́ęgóó hasht'éédadiilníiłgo yee nihá hooł'a' índa Júdah kéyahgi áádóó Jerúsalem kin haal'áagi bine' nideidzi' dooleełii nihaidiní'ą́.

¹⁰Áko k'ad, nihiDiyin God nílíinii, díí bikéé'dóoshą' ha'át'íí náádadii'níi doo; jó, nibik'eh ó'oo'níiłii yóó'adahideet'ą́.

¹¹Éí ninaal'a'í náás áhodooníiłii yaa dahalne'ii binahjį' háínídzíí', Kéyah nihíí' ádadoohłíłígíí biih wookaigo éí kédaayahgóó kéédahat'íinii t'óó badaa'ihígi ádáát'įįdii áádóó bidoo daaldinii bee kéyah ahidiníłnáago nidahonees'ą́ą́góó baa'ihii yił ałná'át'į́.

¹²Éí bąą k'ad, danihitsi'ké éí dabiye'ké t'áadoo baa dahohníłí, doodaii' dabitsi'ké éí danihiye'ké t'áadoo bich'į' bá ídadołkidí, áádóó bee bił hózhóonii, doodaii' hool'áágóó dabiyódí t'áadoo bá hádaaht'íní. Kót'éego t'éiyá danihidziil doo, índa kéyahdóó yá'át'éehii daohsą́ą doo, áádóó nihada'áłchíní náás ahoolchíiłii bá hool'áágóó kéyah bíí' dooleełii bá ádahodoohłííł.

¹³Áko doo yá'át'éhígi ádeiit'įįdígíí índa ts'ídá doo ákǫ́ǫ́ ádeiit'įįdígíí biniinaa éí t'áá át'é nihik'i hoole'go, nihiDiyin God nílíinii, ts'ídá doo ákwii ádeiit'įįdígíí biniinaa atínihidíílíłígíí t'áá bich'į'ígo atínihiinilaago áádóó díigi át'éego ła' yisdádahaakaigo

¹⁴nibik'eh ó'oo'níiłiísh doo bik'eh náádahoniil'į́į da doo áádóó díí diné doo daaldingi ádaat'ínígíísh bił ahinínánéiikah doo? Ánihini'niłdįįd baa hoolzhiizhjį' daats'í nihich'į' náháchį' doo nít'éé', áko doo daats'í ła' dadiidzih da, doodaii' doo daats'í yisdáhidiikah da?

¹⁵Ízrel dine'é biBóhólníihii Diyin God nílíinii, ts'ídá t'áá ákwii át'éii nílį́; jó, t'áá díí jį́ át'éhígi át'éego ła' t'áá deiidzíí'. Shoo, ninááł doo ákǫ́ǫ́ ádeiit'ínígíí bii' honiidlǫ́; jó, díí biniinaa nidáahgi doo daodzįįh át'ée da.