Read Navajo NEHEMIAH 1 Bible Online

NEHEMIAH 1 - Navajo bible

NEHEMIAH 1

¹Hakaláíyah biye' Niihemáíyah díí saad yee hahaasdzíí'. Naadiin náhááh góne' Kízlev yiziłígíí binih Shúshan kin haal'áagi aláahgo naat'áanii bighan góne' sédáago

²shik'is ła' Hanéínai wolyéii Júdah kéyahdę́ę́' diné ła' yił shaa yíkai, áádóó Jew dine'é bi'disnáádóó ła' bééda'iisnii'ígíí áádóó Jerúsalem kin haal'áadi áhoot'éhígíí bína'ídééłkid.

³Áádóó ádashidííniid, Yisnááh danilį́į́ nít'éé' yę́ę daadziihígíí ninádahaas'náanii éí kéyah haz'ą́ądi ayóó át'éego bich'į' nidahwii'ná áádóó bá nidahat'i'; Jerúsalem ditą́ągo binaa ahéé'ítł'inígíí naa'adahineezkaad áádóó bidáń'daditį́į́h yę́ę adahideezk'ą́ą́'.

⁴Ákódzaadóó kót'éego shił hóóne'go nédá áádóó yícha áádóó baa yínííł nishłį́įgo t'áá díkwíhí yiską́, áádóó hodíínísingo ch'iyáán ats'ádinisht'ą́ índa Diyin God yá'ąąshdi hólóonii bich'į' sodeeszingo

⁵ádíshní, Bóhólníihii Diyin God yá'ąąshdi honílóonii, nánooshkąąh; ayóó át'éii áádóó t'áá íiyisí bits'ąą hasti'ii nílíinii, Diyin God éí bee aha'deet'áanii áádóó aa a'ááh hasin ayóó'ádanó'níigo bibik'eh ó'oo'níiłii yik'eh dahół'íinii yá hasht'eyósinii nílíinii,

⁶k'ad hazhó'ó ííníłts'ą́ą'go díní'į́į́', áko ná naal'a'í nishłíinii Ízrel dine'é bił nich'į' ádił nida'ayeelzíi'ii bee nił hashne'go Ízrel dine'é ná naal'a'í danilíinii k'ad t'áá ákwíí jį́ índa t'áá ákwíí tł'éé' bá nich'į' sonídíszįįhígíí yíísíníłts'ą́ą́'; shí áádóó shizhé'é yę́ę ba'áłchíní da'ahílchíihii bił ádił nida'ayeelzíí'.

⁷Nich'į' t'áá íiyisí t'óó baa'ihígi ádeiit'įįd; nibik'eh ó'oo'níiłii áádóó bee nihodiyíní'áanii índa nibee nihodiit'aahii Mózes bich'į' bee hahíínídzíi'ii doo bik'eh dahoniil'į́į da nít'éé'.

⁸Díí béénílniih doo, baa nánooshkąąh: ná naal'a'í Mózes bich'į' bee hahíínídzíí', Doo ákǫ́ǫ́ ádaoht'į́į́góogo ał'ąą dine'é bitahgóó tanihidínéeshkał,

⁹nidi shaa nánoohkaigo áádóó shibik'eh ó'oo'níiłii bik'eh dahonoł'į́įgo áádóó bida'oł'į́įgo azhą́ nihí ła' yá k'áshbąąhgóó tanihidi'nooskaad nidi, áádę́ę́' áłah ánáhodeeshdlíiłgo ákwii shi'dójíigo ádeeshłíiłgo náhodii'áníjį' ahodeesh'ish.

¹⁰K'ad díí ná naal'a'í áádóó nidine'é éí nibee adziilii bee áádóó nigaan bidziilii bee bik'é niná'íínídláii danilį́.

¹¹Bóhólníihii nílíinii, díí baa nánooshkąąh: ná naal'a'í nishłíinii áádóó ná naal'a'í danilíinii, nízhi' baa nihił dahózhǫ́ǫgo dadíníilzinii hazhó'ó nihisodizin nihá diits'į́į́h áádóó índa ná naal'a'í nishłíinii díí jį́ díí hastiin shaa a'áhí dínóozįįłgo shá yá'át'éehgo ádíílíłígíí biniyé nich'į' sodeeszin. Jó, aláahgo naat'áanii bibee adlání bee baná'áshkááh nít'éé'.