Read Navajo NEHEMIAH 11 Bible Online

NEHEMIAH 11 - Navajo bible

NEHEMIAH 11

¹Diné binanit'a'í danilíinii Jerúsalem kin haal'áagi kéédahat'į́į́ nít'éé'; diné łahjį'ígíí yáá'iilt'e' yaa naaskaigo diné neeznált'éhígíí t'ááłá'í bits'ádooltéełgo éí dílzingo kin haal'áagi Jerúsalemgi kééhat'į́į doo áádóó diné náhást'élt'éhígíí éí náádaałahgóó kin hadaas'áágóó kéédahojit'į́į doo.

²Ízrel dine'é éí diné t'áá bí ádeinízingo Jerúsalemgi kéédahat'į́į dooígíí t'áá ałtso yaa dahaznih.

³Kéyah nahós'a'dóó díí diné aláahgo bídahólníhígíí Jerúsalemgi kéédahat'į́, nidi Júdah kéyahdi kin hadaas'áágóó t'ááłá'í jinítínígo t'áá hó hakin hadaas'áagi hwee dahólóonii bii' kéédahojit'į́į́ nít'éé'; éí Ízrel dine'é danilíinii áádóó nááda'iiłniihii áádóó Líívai dine'é áádóó Néthinim wolyéii índa Sálaman bá nidaal'a'í yę́ę bits'ą́ą́dóó da'ahílchíihii ałdó' ákǫ́ǫ́ kéédahat'į́į́ nít'éé'.

⁴Áko Jerúsalemgi Júdah áádóó Bénjamin ba'áłchíní ahoolchíiłii ła' kéédahat'į́. Júdah ba'áłchíní ahoolchíiłii éí díí: Píírez ba'áłchíní ahoolchíiłii ła', Mahéílalíyel biye' Shefatáíyah, éí biye' Amaráíyah, éí biye' Zekaráíyah, éí biye' Azáíyah, éí biye' Atháíyah wolyéii ákwii kééhat'į́,

⁵índa Shilónai biye' Zekaráíyah, éí biye' Jóíyarib, éí biye' Adéíyah, éí biye' Hazéíyah, éí biye' Kolhózeh, éí biye' Bérak, éí biye' Méíyasíyah wolyéii ákwii kééhat'į́.

⁶Píírez ba'áłchíní ahoolchíiłii Jerúsalemgi kéédahat'į́į́ nít'é'ígíí éí dį́įdi neeznádiindóó ba'aan hastą́diindóó ba'aan tseebíí diné ánéelą́ą'go doo nídanilyéesii danilį́į́ nít'éé'.

⁷Náá'ákóne' Bénjamin ba'áłchíní ahoolchíiłii éí Jiiséíyah biye' Íthiyel, éí biye' Méíyasíyah, éí biye' Koléíyah, éí biye' Piidéíyah, éí biye' Jówed, éí biye' Miishálam, éí biye' Séílu wolyéii ákwii kééhat'į́;

⁸éí bikéédę́ę́' Gábeiyai índa Sáleiyai éí náhást'éidi neeznádiindóó ba'aan naadiin tseebíí ánéelą́ą́'.

⁹Zíkrai biye' Jówel éí honanit'a'í nilį́į́ nít'éé'; Siinúwah biye' Júdah éí akéé' góne' kin haal'áhígi dine'é yinant'áá nít'éé'.

¹⁰Nááda'iiłniihii ła': Jóíyarib biye' Jedéíyah áádóó Jéíkin.

¹¹Aháítab biye' Miiréíyath, éí biye' Zéídak, éí biye' Miishálam, éí biye' Hilkáíyah, éí biye' Siiréíyah wolyéii éí Diyin God bikin si'ą́ą́dóó aláahgo bóhólníhígíí nilį́.

¹²Dabik'isóó kin bii' sohodizin si'ą́ągi nidaalnishígíí éí tseebíidi neeznádiindóó ba'aan naadiin naaki ánéelą́ą́', áádóó Malkáíyah biye' Pásher, éí biye' Zekaráíyah, éí biye' Ámzai, éí biye' Pelaláíyah, éí biye' Jiiróham, éí biye' Adéíyah wolyéii,

¹³áádóó bik'isóó éí da'azhé'é aláahgo bídahólníhígíí éí naakidi neeznádiindóó ba'aan dízdiindóó ba'aan naaki ánéelą́ą́', índa Ímer biye' Miishíliimath, éí biye' Ahéísai, éí biye' Azéíriyel, éí biye' Amásheiyai wolyéii,

¹⁴áádóó dabik'isóó diné ayóó ádabóodziilii doo nídanilyéesii éí t'ááłáhídi neeznádiindóó ba'aan naadiin tseebíí ánéelą́ą́'; diné ayóó ádaat'éii ła' biye' Zábdiyel wolyéii honant'áá nít'éé'.

¹⁵Líívai dine'é ałdó' ła': Bánai biye' Hashabáíyah, éí biye' Ázrikam, éí biye' Háshab, éí biye' Shiiméíyah wolyéii,

¹⁶áádóó Líívai dine'é aláahgo bídahólníhígíí ła' Shábiithai índa Jázabad éí Diyin God bikin si'ánídóó t'áá tł'óó'jí nida'anishígíí yinant'áá nít'éé'.

¹⁷Éísaf biye' Zábdai, éí biye' Máíka, éí biye' Matanáíyah wolyéii hó éí alą́ąjį' ahééh hwiindzingo sodilzin; bikéé' góne' Bakbakáíyah, éí bik'isóó danilíinii bitahgi naaki góne' sizį́į́ nít'éé', índa Jedúthan biye' Géílal, éí biye' Shamúwa, éí biye' Ábda wolyéii ałdó' íjóltą' nít'éé'.

¹⁸Diyingo kin haal'áagi Líívai dine'é danilíinii éí naakidi neeznádiindóó ba'aan tseebídiindóó ba'aan dį́į́' ánéelą́ą'go kééhat'į́į́ nít'éé'.

¹⁹Náá'ákóne' dáádílkał yaa ádahalyáanii Ákab áádóó Tálman índa dabik'isóó danilíinii dáádílkał yaa ádahalyáanii éí t'ááłáhídi neeznádiindóó ba'aan tsosts'idiindóó ba'aan naaki ánéelą́ą́'.

²⁰Áádóó łahjį' Ízrel dine'é áádóó nááda'iiłniihii índa Líívai dine'é t'ááłá'í nítínígo Júdah kéyahgi t'áá ałtso kin hadaas'áágóó bíí' daazlį́į'gi kéédahat'į́.

²¹Nidi Néthinim wolyéii éí Ófel deílk'idgi kéédahat'į́į́ nít'éé' áádóó Záíha índa Gíspa éí Néthinim dine'é yinant'áá nít'éé'.

²²Máíka biye' Matanáíyah, éí biye' Hashabáíyah, éí biye' Béínai, éí biye' Ázai wolyéii éí Jerúsalemgi ałdó' Líívai dine'é yinant'áago Éísaf ba'áłchíní ahoolchíiłii sin yee dahataałii ła' nilį́įgo Diyin God bikin si'ánígi nida'anishígíí yinant'áá nít'éé'.

²³Aláahgo naat'áanii díí yee haadzíí': sin yee dahataałii éí dayíłkiinii t'áá ákwíí jį́ bá ninádaji'nił.

²⁴Júdah biye' Zíírah ba'áłchíní ahoolchíiłii ła' Miishézabiil biye' Pethaháíyah éí diné bídadéét'i'ii t'áá ałtso aláahgo naat'áanii bee bił hojilne' nít'éé'.

²⁵Índa kin dah naazhjaa'góó áádóó binaagóó nidahós'a'ígíí t'áá bił ákǫ́ǫ́ Júdah dine'é ła' éí Kírjath-árba kin haal'áadi índa binaagóó kin naazhjaa'góó kéédahat'į́į́ nít'éé' áádóó Dáíban kin haal'áadi índa binaagóó kin naazhjaa'góó áádóó Jiikábziyel kin haal'áadi índa binaagóó kin naazhjaa'góó kéédahat'į́į́ nít'éé',

²⁶náá'ákóne' Jéshuwa áádóó Móladah áádóó Beth-péílet

²⁷áádóó Héízar-shúwal áádóó Bíyer-shííba kin hadaas'áágóó índa dabinaagóó kin naazhjaa'ii t'áá bił,

²⁸áádóó Zíklag áádóó Miikónah kin haal'áadi índa binaagóó kin naazhjaa'ii t'áá bił ákǫ́ǫ́ kéédahat'į́į́ nít'éé'

²⁹áádóó En-ríman áádóó Zaríyah áádóó Jármath

³⁰áádóó Zanówah áádóó Adálam kin hadaas'áágóó índa binaagóó kin naazhjaa'ii t'áá bił; Léíkish kin haal'áadi áádóó binaa nahós'a'góó; Azííkah kin haal'áadi índa binaagóó kin naazhjaa'ii t'áá bił. Áko Bíyer-shííba kin shijaa'dóó níléí Hínam yíldzis góyaajį' kéédahat'į́į́ nít'éé'.

³¹Bénjamin ba'áłchíní ahoolchíiłii ałdó' Gííba, Míkmash, Eiyáíja índa Béthel kin hadaas'áágóó áádóó binaagóó kin naazhjaa'góó kéédahat'į́į́ nít'éé',

³²náá'ákóne' kin hadaas'áhígíí Ánathath, Nob, Ananáíyah,

³³Héízar, Réímah, Gíteiyim,

³⁴Héídid, Ziibówim, Niibálat,

³⁵Lad áádóó Óno índa honíts'aa', éí diné da'iichįįhii kéédahat'į́įgi kéédahojit'į́į́ nít'éé'.

³⁶Ákohgo Líívai dine'é éí Júdah kéyahdi kéédahat'į́į́ nít'éé' yę́ę ła' Bénjamin bikéyahdi kéédahat'į́į́ nít'éé'.