Read Navajo NEHEMIAH 12 Bible Online

NEHEMIAH 12 - Navajo bible

NEHEMIAH 12

¹Ákohgo díí náá'iiłniihii áádóó Líívai dine'é danilį́įgo éí Shiyáltiyel biye' Zerábabel áádóó Jéshuwa yił ákóde yíkai: Siiréíyah, Jeremáíyah, Ézra,

²Amaráíyah, Málak, Hátash,

³Shekanáíyah, Rííham, Mériimath,

⁴Ído, Gíniitho, Abáíjah,

⁵Máíyamin, Meiyadáíyah, Bílgah,

⁶Shiiméíyah, Jóíyarib, Jedéíyah,

⁷Séílu, Éímak, Hilkáíyah índa Jedéíyah daolyé. Díí éí Jéshuwa bíyoołkááłdą́ą́' nááda'iiłniihii áádóó dabik'isóó yiláahgo bídahólnííh nít'éé'.

⁸Líívai dine'é danilínígíí éí díí: Jéshuwa, Bínuwai, Kádmiyel, Sheriibáíyah, Júdah índa Matanáíyah; éí bik'isóó yił ahééh hwiindzin bee bídahólnííh nít'éé'.

⁹Náá'áłdó' Bakbakáíyah índa Ánai éí dabik'isóó binaashiijí naazį́įgo ahééh daznízingo nidahojiłáá nít'éé'.

¹⁰Jéshuwa éí Jóíyakim há yizhchį́, Jóíyakim éí Iiláíyashib há yizhchį́, Iiláíyashib éí Jóíyada há yizhchį́,

¹¹Jóíyada éí Jánathan há yizhchį́ índa Jánathan éí Jeidúwa há yizhchį́.

¹²Jóíyakim bíyoołkááłdą́ą́' nááda'iiłniihii éí da'azhé'é aláahgo bídahólnííh nít'é'ígíí éí díí: Siiréíyah bits'ą́ą́dóó Miiráíyah, Jeremáíyah bits'ą́ą́dóó Hananáíyah,

¹³Ézra bits'ą́ą́dóó Miishálam, Amaráíyah bits'ą́ą́dóó Jiihohéínan,

¹⁴Málak bits'ą́ą́dóó Jánathan, Shebanáíyah bits'ą́ą́dóó Jóseph,

¹⁵Héírim bits'ą́ą́dóó Ádna, Miiréíyath bits'ą́ą́dóó Helkéíyai,

¹⁶Ído bits'ą́ą́dóó Zekaráíyah, Gíniithan bits'ą́ą́dóó Miishálam,

¹⁷Abáíjah bits'ą́ą́dóó Zíkrai, Mowadáíyah áádóó Mínyamin bits'ą́ą́dóó Píltai,

¹⁸Bílgah bits'ą́ą́dóó Shamúwa, Shiiméíyah bits'ą́ą́dóó Jiihánathan,

¹⁹Jóíyarib bits'ą́ą́dóó Matiinéíyai, Jedéíyah bits'ą́ą́dóó Ázai,

²⁰Sáleiyai bits'ą́ą́dóó Káleiyai, Éímak bits'ą́ą́dóó Ííber,

²¹Hilkáíyah bits'ą́ą́dóó Hashabáíyah, Jedéíyah bits'ą́ą́dóó Niithániyel.

²²Iiláíyashib, Jóíyada, Johéínan índa Jeidúwa bídayééłkaahdą́ą́' Líívai dine'é éí dabizhé'é aláahgo bídahólníhígíí dabízhi' naaltsoos bikáá' ádaalyaa; nááda'iiłniihii ałdó', éí Pérzha dine'é aláahgo yinanit'a'í Daráíyas nant'á silį́į'jį' daházhi' ádaalyaa.

²³Líívai dine'é dabizhé'é aláahgo bídahólníhígíí éí Iiláíyashib binálí Johéínan bíyoołkááł nít'éé' yę́ęjį' naaltsoos Kránikals wolyéii bikáá' dabízhi' ádaalyaa.

²⁴Líívai dine'é aláahgo bídahólníhígíí éí díí: Hashabáíyah, Sheriibáíyah áádóó Kádmiyel biye' Jéshuwa éí Diyin God baa nídahoji'nih doo índa ahééh daznízin doo biniyé dabik'isóó yił ahidiníłnaashii nídeidzįįh; éí yówehdę́ę́' David t'áá hó Diyin God bits'ą́ą́dóó diné jílíinii hadzoodzíi'ii bik'ehgo ałnaashii chodao'į́į́ nít'éé'.

²⁵Matanáíyah, Bakbakáíyah, Obadáíyah, Miishálam, Tálman índa Ákab díí éí dáńda'ditį́į́h bíighahgi yódí bá dahooghan baa ádahojilyą́ągo dáádílkał yaa áhályání dajílį́į́ nít'éé'.

²⁶Díí éí Jázadak binálí éí Jéshuwa biye' Jóíyakim wolyéii bíyoołkááłdą́ą́' índa naat'áanii Niihemáíyah áádóó náá'iiłniihii Ézra, éí bee haz'áanii yína' niłtinii bíyoołkááłdą́ą́' kódahóót'įįd.

²⁷Jerúsalem kin haal'á ditą́ągo binaa ahéé'ítł'inígíí diyingo nidazhdidoo'áałgo Líívai dine'é bił nidahaz'ą́ą́dę́ę́' Jerúsalemjį' nihidoot'ish biniyé hadazneeztą́ą́', áko baa dahózhǫ́ǫgo áádóó ahééh daznízingo áádóó dahojitaałgo áádóó béésh ahídí'niłgo diits'a'ígíí áádóó tsin tł'óół neeznáá bąąh daneelzhee'go bee nida'a'néii índa tsin tł'óół naakits'áadah bąąh daneelzhee'go bee nida'a'néii baa nizhdookah.

²⁸Sin yee dahataałii dabiye'ké t'áá bí ahíikaigo áłah daazlį́į́'; Jerúsalem binaagi dadzígaidę́ę́' áádóó Niitófa dine'é bikin dah naazhjaa'dę́ę́' áłah daazlį́į́'.

²⁹Gílgal kin shijaa'dę́ę́' índa Gííba áádóó Azméíveth binaa kédaayahdę́ę́' ałdó' áłah daazlį́į́', háálá sin yee dahataałii Jerúsalem binaagi kin dah naazhjaa'góó ádá ádayiilaa.

³⁰Nááda'iiłniihii índa Líívai dine'é t'áá ałtso t'áá bí áda'dooldee' áádóó diné ałdó' yida'deesdee' dáń'daditį́hígíí ałdó' índa kin haal'á ditą́ągo binaa ahéé'ítł'inígíí ałdó' ákódayiilaa.

³¹Áádóó índa Júdah bits'ą́ą́dóó oochíiłii naat'áanii danilínígíí tsé ahénátł'inígíí bighą́ą'jį' hashí'eezh. Áadi ahééh danízingo doonéełii naakijį' aháínil; éí ła' dah yinéłígíí nish'náajigo ts'iilzéí ch'éhégeeh bá ch'é'étiinígíí bich'į'go tsé ahénátł'in bighą́ą'jį' dah adiiná;

³²éí bikéédę́ę́' Hoshéíyah áádóó Júdah bits'ą́ą́dóó naat'áanii danilíinii ałníí'dóó yinééł yił dah diiná,

³³áádóó ałdó' Azaráíyah, Ézra, Miishálam,

³⁴Júdah, Bénjamin, Shiiméíyah índa Jeremáíyah daolyéii akéé' yíkai,

³⁵áádóó náá'iiłniihii danilíinii dabiye'ké ła' Éísaf biye' Záker, éí biye' Maikéíyah, éí biye' Matanáíyah, éí biye' Shiiméíyah, éí biye' Jánathan, éí biye' Zekaráíyah wolyéii béésh dilní bee í'dílzoołí yoojihgo akéé' yigááł,

³⁶áádóó bik'isóó danilíinii: Shiiméíyah, Azéíriyel, Miyaléíyai, Gílalai, Meiyéíyai, Niithániyel, Júdah índa Hanéínai, éí Diyin God bits'ą́ą́dóó diné nilíinii David yę́ę bibee na'a'néhí sin yee nidaanéhígíí yił deíjáahgo bee haz'áanii yína'niłtinii Ézra halą́ąjį' yigááł.

³⁷Áko tó háálį́įdi dáń'dítį́hígíí binaashiijí David bikin si'ánígíí biláahdi ahéé'ítł'inígíí áádóó ákóde ałk'i hoo'nilí haaz'áhígíí ákóde hadziskaigo ha'a'aah bich'ijí tóogi dáń'dítį́įhjį' akéé' jíkai.

³⁸Áko ahééh danízinii łahjį' bił ałts'áá'nilii yidááh doonééł biniyé łahjigo yinaashiijí dah diiná, áádóó łahjį' diné ał níí'dóó bił yishnéłígíí éí bii' déédadiljahgo bá ch'íláyi' yaa'áhígíí biláahdi áádóó tsé ahénátł'inígíí bikáá'góó hóteelgo tsé ahénátł'injį' bikéé' niikai,

³⁹áádóó Íífreiyim bidáń'dítį́į́h bideijígo índa dáń'dítį́į́h sání bideijígo áádóó łóó' nidahaniihgi dáń'dítį́į́h bideijígo índa Hanániyel ya'iitł'inígíí bideijígo áádóó Míyah ya'iitł'inígíí bideijígo dibé bá dáń'dítį́hí bideíjį' niniikai, áko awáalyaa bíighahgóó dáń'dítį́įhgi hasht'e'deizį'.

⁴⁰Áko naakidę́ę́' ahidiikaigo Diyin God bikin si'ánígi ahééh danízinii ákwii deizį'; shí áádóó bídahólníihii ałníí'dóóígíí ákwii shił naazį́;

⁴¹nááda'iiłniihii ałdó' éí: Iiláíyakim, Méíyasíyah, Mínyamin, Maikéíyah, Íílaiyowíínai, Zekaráíyah índa Hananáíyah béésh dilní bee í'dílzoołí dah deítįįhgo naazį́,

⁴²índa Méíyasíyah, Shiiméíyah, Eliyéízar, Ázai, Jiihohéínan, Malkáíyah, Íílam índa Íízer yił naazį́. Áko sin yee dahataałii éí bibóhólníihii Jezraháíyah yił ts'ídá yéego dahóótáál.

⁴³Ákwii éí bijį́ ayóó ánéelą́ą́' náádadziisnii'go hoł nidahoozhǫǫh nít'éé'; Diyin God ił hózhǫ́ ayóó át'éii bee hoł nidahoozhǫǫhgo áhoolaa; asdzání ałdó', bada'áłchíní t'áá yił bił nidahoozhǫǫh nít'éé', áko Jerúsalem kin haal'áagi hoł dahózhónígíí ayóó ánízáádgóó adahideesdláád.

⁴⁴T'áá éí hoolzhish yę́ędą́ą́' kin bii' nooh nída'achíihgi naalye'é áádóó nidaneest'ánígíí áádóó átsé neest'áanii índa neeznáago ahádaashjaa'go t'ááłá'í bidadeeshjaa'ígíí yaa ádahalyą́ą dooleełgo ła' nibidee'nil; diné éí bee haz'áanii bik'ehgo nááda'iiłniihii Líívai dine'é danilíinii baa dadeest'ánígíí kin hadaas'áago binaagóó dáda'ak'ehdę́ę́' neest'áanii áłah áńdajiil'įįh dooleełgo biniyé nihodee'nil, háálá éí Júdah dine'é bił nidahoozhǫǫhgo nááda'iiłniihii áádóó Líívai dine'é nidaal'a'.

⁴⁵Áádóó sin yee dahataałii áádóó dáń'daditį́hí yaa ádahalyáanii dabiDiyin God bich'į' nahaghá áádóó í'dídééh ałtso áńdaajiil'įįhgo nidajil'a' nít'éé'; David yę́ę índa biye' Sálaman yę́ę éí t'áá yee haadzíi'ii bik'eh ádajít'éé nít'éé'.

⁴⁶Háálá ałk'idą́ą́' David áádóó Éísaf bíyoołkááłdą́ą́' sin yee dahataałii aláahgo bídahólníhígíí áádóó sin bee Diyin God baa ha'niihii índa bich'į' ahééh hwiindzin nít'éé'.

⁴⁷Índa Zerábabel áádóó Niihemáíyah bíyoołkááłdą́ą́' Ízrel dine'é t'áá ałtso éí sin yee dahataałii índa dáń'dítį́į́h yaa ádahalyáanii t'áá ákwíí jį́ baa nídadit'áahii bitaa nída'altso' nít'éé', áádóó Líívai dine'é baa dahidit'aahígíí diyingo bá nidazhdii'aah nít'éé', índa Líívai dine'é éí Éran ba'áłchíní ahoolchíiłii yaa deidii'aahígíí diyingo bá nidazhdii'aah nít'éé'.