Read Navajo NEHEMIAH 13 Bible Online

NEHEMIAH 13 - Navajo bible

NEHEMIAH 13

¹T'áá éí bijį́ ałdó' diné yíl'áhígíí bich'į' Mózes binaaltsoos biyi'dóó dajííłta', áko kóníigo biyi' bik'e'ashchį́į́ lá, Áman dine'é índa Mó'ab dine'é Diyin God baa áłah ílį́įgi doo ła' dashdidoogááłgóó ahool'áa doo,

²háálá Ízrel dine'é yinééł yę́ędą́ą́' t'áadoo bidááh jíkaigo bááh áádóó tó bee bíká ajííjée' da, nidi Béílam há idínóodzįįł biniyé nidadzistį́; azhą́ ákót'ée nidi, hóyée'go á hadoodzih yę́ęgi nihiDiyin God bee ak'ihojidlíii násdlį́į'go áyiilaa.

³Áádóó ákódzaago bee haz'áanii dazdiizts'ą́ą'go doo Ízrel dine'é danilínígíí t'áá ałtso áts'á dadziis'nil.

⁴Díí t'ah bítséedi Iiláíyashib náá'iiłniihii nilíinii, nihiDiyin God bikin bii' sohodizin si'ánígíí bii' nahaz'ą́ą́góó yee bóhólnííh nilíinii éí Tobáíyah yił ach'oo'níigo

⁵nitsaago haz'ą́ yii' bighan dooleeł biniyé yá hasht'ehoolaa. Éí haz'ą́ą́ góne' t'ah yówehdą́ą́' díí ákóne' bá hooghan nít'éé': ak'áán nááhániihii áádóó tsin bijeeh dilidgo łikání halchinii fránkinsens wolyéii áádóó łeets'aa' áádóó tł'oh naadą́ą́' neeznáajį' ałts'ádashjaa'go t'ááłá'í bidadeeshjaa'ii áádóó wáin ániid ályaii índa tsin áliv bineest'ą' bik'ah neeznáago ahádaasdziidgo t'ááłá'í bidadeesdziidii éí Líívai dine'é áádóó sin yee dahataałii índa dáádílkał yaa ádahalyáanii bitaa nídaajih doogo bee ha'oodzíí' nít'éé'.

⁶Díí baa na'aldeeh yę́ędą́ą́' Jerúsalem kin haal'áadi doo naasháa da, háálá Artazérksiiz éí Bábilan dine'é aláahgo yinanit'a'í tádiindóó ba'aan naaki náhááh góne' aláahgo naat'áanii bich'į' níyá, áádóó ákwii t'áá díkwíida shiiską́ą́dóó bik'ijį' shanáádi'doot'áałgo aláahgo naat'áanii bínáánéíkeed.

⁷Áko Jerúsalem kin haal'áadi níyáago łahgo shił bééhoozin, Iiláíyashib éí nihiDiyin God bikin góne' łahgo haz'ą́ Tobáíyah yá hasht'ehoolaaígíí doo ákǫ́ǫ́ áát'įįd da lá.

⁸Áko t'áá íiyisí bąąh shíni' yii'a'; éí bąą Tobáíyah binaalye'é tł'óó'góó ch'éhéłkaad.

⁹Áádóó haasdzíi'go ákóne' hasht'éédahoodlaa; bidiníná Diyin God bikin góne' beedí chodao'íinii áádóó ak'áán nááhániihii índa fránkinsens wolyéii ałts'ádaashjaa'.

¹⁰Áko Líívai dine'é baa dadidoot'ááł yę́ę doo baa nídadit'áah da lágo baa ákoniizį́į́'; díí bąą Líívai dine'é áádóó sin yee dahataałii naanish yaa nidaakai yę́ę bikédaayahgóó anídahineezhchą́ą́'.

¹¹Áadi índa naat'áanii dajílíinii hoł ałghada'désht'ą́ągo ádííniid, Ha'át'íísh biniyé Diyin God bikin yóó'adoot'ą́? Áko áłah ánáshdlaago bá nahaz'ą́ą́góó ninádasisnil.

¹²Áko índa Júdah dine'é t'áá ałtso éí tł'oh naadą́ą́' neeznáá daníjaa'ígíí éí t'ááłá'í shijaa' áádóó wáin ániidíii índa tsin áliv bineest'ą' bik'ah neeznáá daníkánígíí éí t'ááłá'í siką́ągo yódí nooh nídaachííh góne' yah adayiizhjaa'.

¹³Náá'ákóne' yódí nooh nídaachíihgi yindaalnish dooleełii ninínil: éí náá'iiłniihii Shelemáíyah áádóó bee haz'áanii yína'niłtinii Zéídak índa Líívai dine'é nilínígíí Piidéíyah; bíká análwo'ii Matanáíyah biye' Záker, éí biye' Héínan wolyéii ałdó' niníłtį́, háálá bada'ahódlíigo baa nitsídahakeesgo éí dahak'isóó danilíinii bitaa nídaji'nih doo.

¹⁴ShiDiyin God nílíinii, díí bee shéénílniih: shiDiyin God bikin yá'át'éehii bá baa niséyáhígíí áádóó biyi'dóó bich'į' nahadláago bá baa áháshyánígíí k'éé'óółchxǫǫh lágo.

¹⁵Éí yoołkááłdą́ą́' Júdah kéyahdi háá'áyį́į́h jį́į́ góne' diné ła' ch'il na'atł'o'ii bitoo' yąąh hadeiníihgo yiiłtsą́ áádóó neest'áanii bida'astł'ǫ́ǫgo índa wáin, ch'il na'atł'o'ii, tsin bineest'ą' fig wolyéhígíí áádóó naalyéhé ał'ąą ádaat'éii ałdó' Jerúsalem kin haal'áajį' télii yee nidayiiyeehgo yiiłtsą́, áko ch'iyáán baa nidahaniih bijį́į́ góne' bee hak'ijį' haasdzíí'.

¹⁶Táir kin haal'áádę́ę́' diné nidaakaii ałdó' ła' ákwii kéédahat'į́; éí łóó' índa naalyéhé ał'ąą ádaat'éii nidayiiyeehgo Jerúsalemgi háá'áyį́į́h jį́į́ góne' Júdah dine'é yich'į' nidayiiłniih.

¹⁷Áádóó Júdah dine'é bitahdóó aląąjį' naazíinii bił ałghada'désht'ą́ągo áhodííniid, Díísh ha'át'íí doo yá'át'éehii baa naahkai? Háá'áyį́į́h jį́ doo ílį́į́góó ádaohłééh.

¹⁸Da' danihizhé'é yę́ęésh ákódáát'įįd, áko nihiDiyin God doo yá'át'éhígi ánihííł'įįd índa díí kin haal'áhígi doo yá'át'éhígi áyííł'įįd, áko háá'áyį́į́h jį́ doo ílį́į́góó ádaohłéhígíí bee t'ah yówehgo t'óó báhádzidgo bee atí'él'íinii Ízrel dine'é bik'ijį' ádaohłééh.

¹⁹Ákódzaago k'adę́ę háá'áyį́į́h jį́ aleehgo, Jerúsalem bidáń'daditį́į́hgóó yíłhéelgo dáda'dinołkaał, dííniid áádóó t'áadoo ąą ádaalnéhí háá'áyį́į́h jį́ ałtsogo índa ąą ádadoolníiłgo bee haasdzíí' índa háá'áyį́į́h jį́į́ góne' hééł ła' doo yah adoogéeł da biniyé diné shá nidaal'a'ígíí ła' dáń'daditį́į́hgóó nidasínil.

²⁰Áko nída'iiłniihí danilíinii índa naalyéhé ał'ąą ádaat'éii baa nidahaniihgo Jerúsalem tł'óo'di ła'a tł'éé', doodaii' naaki tł'éé' nídabiilkááh nít'éé'.

²¹Ha'át'íí lá biniyé tsé ahénátł'inígíí tł'óo'di nídanihiilkááh? Ákónáádaahdzaago yah anihideeshnił, dishníigo bich'į' bee haasdzíí'. Éí áádóó háá'áyį́į́h jį́į́ góne' t'áadoo náádaaskai da.

²²Áádóó índa Líívai dine'é ábidííniid, Áda'dołdéehgo áádóó háá'áyį́į́h jínígíí diyingo óolzin doo biniyé nihidoohkahgo dáń'dítį́hí baa ádahołyą́ą doo. ShiDiyin God nílíinii, díí ałdó' bee shéénílniihgo ayóó át'éego aa a'ááh nínízinii bik'ehgo shaa sínízid doo.

²³Éí yoołkááłdą́ą́' ałdó' Jew dine'é éí Áshdad dine'é áádóó Áman dine'é índa Mó'ab dine'é bitahdóó asdzání danilíinii yił naazkéego yiiłtsą́;

²⁴hada'áłchíní éí Áshdad bizaad łahjį' yee yádaałti'go Jew dine'é bizaad doo yee yádaałti' da, nidi dadine'é danilínígíí dabizaad yik'ehgo yádaałti'.

²⁵Áádóó bił ałghada'désht'ą́ągo hóyée'go há haasdzíí', áádóó ła' hataa'síłts'ingo hatsii' hadaháłdláád índa doo ákónáádazhdoo'nííłgóó Diyin God bee ádee hadadziisdzíi'go áhodííniid, Nihitsi'ké éí dabiye'ké doo baa dahidoohnił da índa dabitsi'ké éí danihiye'ké doo baa dahidoohnił da, áádóó t'áá nihí nidi doo ádá shódeidoołt'eeł da.

²⁶Shą́ą́', t'áá ákót'éego ałdó' Ízrel dine'é aláahgo binanit'a'í Sálaman ádił ni'iiszíí'. Azhą́ ákót'ée nidi, t'óó ahayóí ał'ąą dine'é bitahgóó t'áadoo ła' ákót'éego aláahgo naat'áanii nilíní da; éí Diyin God ayóó'ábó'níigo Ízrel dine'é t'áá ałtso yinant'áago áyiilaa; azhą́ ákót'ée nidi, asdzání dé'éyóní danilíinii ádił nidziisíihgo ádahoolaa.

²⁷Díí t'áá íiyisí doo yá'át'éhígi ádaoht'ínígíí danohsingo doo danihíísíilts'ą́ą' da doo; éí asdzání dé'éyóní danilíinii bił ahánda'ohgehgo Diyin God bich'į' bee haz'áanii k'ídahohtíih doo.

²⁸Áko aláahgo náá'iiłniihii Iiláíyashib biye' Jóíyada biye' ła' éí Hóran dine'é Sanbálat yaadaaní nilį́į́ lá; éí bąą hó éí níwehjį' ahonííłchą́ą́'.

²⁹ShiDiyin God nílíinii, ádáát'įįdii béénílniih, háálá náá'iiłniihii binaanish áádóó náá'iiłniihii dajílį́į doogo índa t'áá Líívai dine'é dajílį́įgo éí biniyé bee aha'deet'áanii bá íinilaii dayííłchxǫ'.

³⁰Ákót'éego hąąh hóółdee'go dé'éyóní danilíinii t'áá ałtso bits'áhonínil, áádóó náá'iiłniihii binaanish ádaat'ée dooleełii índa Líívai dine'é binaanish ádaat'ée dooleełii baa dahidí'ą́,

³¹áádóó náá'iiniih biniyé chizh dilidii índa átsé neest'áanii nihoot'ą́ą́ góne' yah anídayiijih dooleełii ałdó' biniyé ła' nihonínil. ShiDiyin God nílíinii, shaa jiiníba'go shéénílniih.