Read Navajo NEHEMIAH 2 Bible Online

NEHEMIAH 2 - Navajo bible

NEHEMIAH 2

¹Ákódzaadóó Níísan yiziłígíí binih naadiin náhááh góne' aláahgo naat'áanii Artazérksiiz wáin bidááhgóó niiką́ áádóó nídiiką́ągo baa níką́. Yówehdę́ę́' t'éiyá doo binááł yínííł naasháa da nít'éé'.

²Éí bąą aláahgo naat'áanii áshidííniid, Ha'át'íísh baa yínííł nínílnin? Doo yee' nitah hats'íid da. Díí yee' yínííł t'éiyá nílį́į́ lá. Áko t'áá íiyisí nísísdzííd,

³áádóó aláahgo naat'áanii ábidííniid, Bíni' aláahgo naat'áanii hool'áágóó hiná; jó, biniyéii baa yínííł nishłį́, háálá kin haal'á nít'é'ídi dashizhé'é yę́ę bii' yóó'ádaalyaa yę́ędi t'áá ádzaagóó nihidadíl'á áádóó dáń'daditį́hí adahideesk'ą́ą́'.

⁴Ákohgo aláahgo naat'áanii áshidííniid, Ákoshą' ha'át'íí yídííkił? Áko Diyin God yá'ąąshdi hólóonii bich'į' sodeeszin.

⁵Áádóó aláahgo naat'áanii ábidííniid, Aláahgo naat'áanii bił hóshǫ́ǫ́ ládą́ą́' áádóó ná naal'a'í nił ałch'oo'néé ládą́ą́' dashizhé'é yę́ę yóó'ádaalyaa yę́ędi éí kin haal'áá nít'éé' yę́ę áńdadeeshdlííł biniyé Júdah kéyahgóó shi'níłnííh.

⁶Áko aláahgo naat'áanii áshidííniid, (asdzą́ą́ naat'ááh ałdó' bíighahgi sidá,) Haash nízahjį' ákǫ́ǫ́ nanináa doo? Hahgoshą' nídíídááł? Áko aláahgo naat'áanii shi'doołnihgi shá bił yá'íít'ééh áádóó, Ákohgo nídeeshdááł, bidííniid.

⁷Náá'áłdó' aláahgo naat'áanii ánáábideesh'niid, Aláahgo naat'áanii bił hóshǫ́ǫ́ ládą́ą́' bíni' tooh nílínígíí biláahdi naat'áanii danilíinii naaltsoos shá bich'į' ádadoolnííł, áko dabikéyahgóó ch'íhideesháałgo Júdah kéyahjį' anáásdzáajį' shadadi'doo'ááł.

⁸Áádóó Éísaf éí aláahgo naat'áanii bitsin yíl'áhígíí yaa áhályáanii shá bich'į' naaltsoos ádoolnííł, áko tsin ła' sheidooniłígíí bee Diyin God bikin bii' sohodizin bíighahgóó bighan bidáń'daditį́hígíí áádóó kin haal'á ditą́ągo binaa ahéé'ítł'inii índa kin bii' shighan dooígíí bitsé naazláii ádadoolnííł. ShiDiyin God yá'át'éehgo shik'i dah doolnihígíí bik'ehgo aláahgo naat'áanii sha'diní'ą́.

⁹Ákohgo tooh nílíní biláahdi naat'áanii danilíinii baa níyáago aláahgo naat'áanii binaaltsoos ádaalyaa bitaa sénii'. Áko aláahgo naat'áanii éí siláo binanit'a'í danilíinii áádóó siláo łį́į́' yee nidaabaahii yił shi'níłnii'.

¹⁰Hóran dine'é Sanbálat áádóó bá naal'a'í Áman dine'é nilíinii Tobáíyah yaa hóónii'go Ízrel dine'é bá yá'át'éeh dooleełii hát'į́ yiniyé diné ła' níyá, ha'níigo yiyíínii'go t'áá íiyisí yínííł yiih níídee'.

¹¹Áko Jerúsalem kin haal'áagi níyáago ákwii táá' shiiską́.

¹²Áádóó tł'ée'go shí índa diné t'áá díkwíhígo bił nídiishjéé' áádóó shiDiyin God shijéí yiih yiyííláhígíí bik'ehgo Jerúsalemgi baa nideeshaałii t'áadoo ła' hoł hweeshne'í da, áko naaldlooshii doo ła' shiná naagháa da; łį́į́' shił yíldloozhígíí t'éiyá shiná sizį́.

¹³Áko honíts'aa' dáń'dítį́hí góne' ch'íníyáago na'ashǫ́'ii łibáhítsoh bitó hahadleeh bíighahgóó áádóó ts'iilzéí ch'éhégeeh bá ch'é'étiinjí yisháałgo Jerúsalem ditą́ągo binaa ahéé'ítł'inii ałtso nidahaasdáazgo áádóó dáń'daditį́hí adahideezk'ą́ą'go háísid.

¹⁴Áko tó háálį́įdi dáń'dítį́hígi náánísdzá índa aláahgo naat'áanii bitó siyíníjį' níyá, nidi łį́į́' shił yíldloozhígíí t'áá haa'ída doo bá ch'íhonít'i' da.

¹⁵T'ahdii tł'ée'go tó nílínígíí bibąąhgóó níyáago tsé ahénátł'in nít'é'ígíí háísid; áadi índa naanísísdzáago honíts'aa' bidáń'dítį́hígíí bíighahdę́ę́' ch'éénísdzáago nánísdzá.

¹⁶Áko naat'áanii danilíinii niséyáágóó áádóó baa niséyáii nidi, doo bił béédahózin da índa Jew dine'éda, nááda'iiłniihiida, aląąjį' naazíiniida, naat'áanii danilíiniida índa nidaalnishii nidi t'ah doo ła' bił hashne' da.

¹⁷Áadi índa ábidííniid, Yínííł nitsaii bii' dahoniidlǫ́ǫgo nihił béédahózin; Jerúsalem kin haal'á t'áá ádzaaí silį́į́' índa bidáń'daditį́įhii adahideezk'ą́ą́'; sołtį', doo t'óó nihá ninááhát'i' da doo biniyé Jerúsalem ditą́ągo binaa ahéé'ítł'in dooígíí háádadiitł'į́į́ł.

¹⁸Náá'ákóne' shiDiyin God shaa jooba'go shik'i dah doolnihígíí, índa aláahgo naat'áanii shaa jooba'go shich'į' haadzíí', dishníigo ałdó' bee bił hweeshne'. Áko ádadííniid, Ákǫ́ǫ́ nídidii'néełgo hááda'diitł'į́į́ł. Áko naanish yá'át'éehii yiniyé dadeesdzil.

¹⁹Ákohgo Hóran dine'é Sanbálat áádóó bá naal'a'í Áman dine'é nilíinii Tobáíyah áádóó Aréíbiya dine'é nilíinii Gííshem deidiizts'ą́ą'go nihá nidahałt'i'go nihaa daadlohgo áádóó danihi'į́įgo ádaaní, Díísh ha'át'íí baa nídoohkai? Aláahgo naat'áaniísh bich'į' nídadoołtee'?

²⁰Áko índa shí bich'į' haasdzíi'go ábidííniid, NihiDiyin God yá'ąąshdi hólóonii éí lą́ą yá'át'éehgo nihá áánííł áyósin doo; éí bąą nihí bá nideiil'a'ii nídidii'néełgo hááda'diitł'į́į́ł, nidi Jerúsalem éí łahdóó doo nihí da índa doo nihik'ehdii da, doo nidi nihídéét'i' da.